Distaem Nao Taem for Disaed Strong for Duim Samting
“Hao long nao bae iufala followim tufala difren tingting?”—1 KINGS 18:21.
1. Hao nao taem bilong iumi hem barava difren from bifor?
WASWE, iu bilivim hao Jehovah nao only tru God? Waswe, iu bilivim tu hao olketa profesi long Bible showimaot taem bilong iumi hem “olketa last day” bilong wicked world bilong Satan? (2 Timothy 3:1) Sapos olsem, for sure iu bae agree hao distaem, winim enitaem bifor, iumi need for disaed strong for duim samting. No enitaem bifor long history bilong olketa man laef bilong staka pipol stap long danger.
2. Wanem nao happen long ten-tribe kingdom bilong Israel taem King Ahab hem rul?
2 Long mek-ten century B.C.E., nation bilong Israel need for disaedem wanfala barava important samting. Hu nao bae olketa servem? Jezebel, heathen waef bilong King Ahab, encouragem hem for apim worship bilong Baal long ten-tribe kingdom bilong Israel. Pipol tingse Baal hem god wea savve givim rain and mekem olketa garden grow gud. Maet plande wea worshipim Baal kissim or baodaon long wanfala Baal idol. For encouragem Baal for mekem olketa garden grow gud and olketa animal for garem pikinini, olketa wea worshipim hem join insaed olketa dirty wild party witim olketa jury long temple. Hem kastom bilong olketa tu for katem body bilong olketa seleva mekem blood hem ran.—1 Kings 18:28.
3. Hao nao wei for worshipim Baal hem affectim pipol bilong God?
3 Wanfala smol sekson bilong 7,000 Israelite no willing for join insaed long disfala raf and dirty wei for worshipim idol. (1 Kings 19:18) Olketa loyal long covenant wea olketa garem witim Jehovah God, and from diswan olketa kasem persecution. Olsem example, Queen Jezebel killim dae plande profet bilong Jehovah. (1 Kings 18:4, 13) From olketa kasem hard taem olsem, bigfala haf long olketa Israelite trae for mekem Jehovah and Baal hapi long wei for worshipim tufala evriwan semtaem. Bat sapos wanfala Israelite hem lusim Jehovah and worshipim wanfala false god, hem kamap apostate nao. Jehovah promis for blessim olketa Israelite sapos olketa lovem hem and obeyim olketa komandment bilong hem. Bat, hem givim warning hao sapos olketa no ‘worshipim hemseleva nomoa,’ bae hem finisim olketa evribit.—Deuteronomy 5:6-10; 28:15, 63.
4. Wanem nao Jesus and olketa aposol bilong hem sei bae happen midolwan olketa Christian, and hao nao datwan hem fulfill?
4 Sem samting hem happen long olketa false Christian religion distaem. Olketa church member sei olketa Christian, bat olketa holiday, fasin, and biliv bilong olketa barava difren from samting wea Bible teachim. Olsem Jezebel, olketa bigman bilong olketa false Christian religion nao olketa main wan wea persecutim Olketa Jehovah’s Witness. Start from taem bifor, kam kasem distaem, olketa bigman bilong olketa sapotim olketa war, so olketa mas givim ansa for wei wea staka million member bilong olketa church dae. Bible kolem disfala wei wea olketa religion hia sapotim olketa gavman bilong world, spiritual fornication. (Revelation 18:2, 3) And tu, moa and moa olketa acceptim really wei for duim fornication, nomata midolwan long olketa bigman bilong olketa tu. Jesus Christ and olketa aposol bilong hem talem profesi abaotem disfala bigfala wei for apostate. (Matthew 13:36-43; Acts 20:29, 30; 2 Peter 2:1, 2) Gogo, wanem nao bae happen long winim wan billion pipol wea followim olketa religion hia? And wanem nao responsibility bilong olketa tru worshiper bilong Jehovah long olketa pipol hia and evri nara pipol wea false religion hem leadim olketa go rong? Iumi kasem klia ansa for olketa kwestin hia taem iumi lukluk long olketa samting wea lead go long wei for ‘Baal hem finis evribit from Israel.’—2 Kings 10:28.
Love Bilong God for Pipol Bilong Hem wea No Faithful
5. Hao nao Jehovah showimaot loving kea for pipol bilong hem wea no faithful?
5 Hem no mekem Jehovah God hapi for panisim olketa wea no faithful long hem. From hem wanfala loving Father, hem laekem olketa wea wicked for repent and kam bak long hem. (Ezekiel 18:32; 2 Peter 3:9) Olsem example, Jehovah iusim olketa profet long taem bilong Ahab and Jezebel for warnim pipol bilong Hem abaotem samting wea bae kamaot from wei for worshipim Baal. Elijah hem wanfala profet olsem. Bihaen long wanfala big drae season, wea olketa kasem warning abaotem firstaem, Elijah talem King Ahab for hipimap olketa Israelite and olketa profet bilong Baal tugeta long Maunt Carmel.—1 Kings 18:1, 19.
6, 7. (a)Hao nao Elijah showimaot samting wea kosim apostate fasin long Israel? (b) Wanem nao olketa profet bilong Baal duim? (c) Wanem nao Elijah duim?
6 Olketa hipap long ples wea olketa “brekem daon” wanfala altar bilong Jehovah, maet for mekem Jezebel hem hapi. (1 Kings 18:30) Sorre nao, olketa Israelite wea hipap long there olketa no sure hu nao best wan for givim rain wea olketa barava needim—Jehovah or Baal. Namba bilong olketa profet bilong Baal wea hipap hem 450, bat Elijah nomoa hem profet bilong Jehovah. Elijah storyim main problem wea olketa garem taem hem askem olketa: “Hao long nao bae iufala followim tufala difren tingting?” Then, hem barava tok stret and sei: “Sapos Jehovah hem tru God, go followim hem; bat sapos Baal hem tru God, go followim hem.” For muvim olketa Israelite wea no savve disaed sapos olketa bae worshipim Jehovah nomoa, Elijah arrangem wanfala test for showimaot hu nao tru God. Olketa mas sakrifaesim tufala buluka, wanfala for Jehovah and narawan for Baal. Tru God bae bonem sakrifaes bilong hem witim fire. Olketa profet bilong Baal redim sakrifaes bilong olketa, and then for plande hour olketa gohed for singaot: “O Baal, ansarem mifala!” Taem Elijah start for mekfani long olketa, olketa singaot big and katem body bilong olketa mekem blood hem ran. Bat Baal no ansarem olketa.—1 Kings 18:21, 26-29.
7 Then hem taem for Elijah givim sakrifaes bilong hem. Firstaem hem fixim altar bilong Jehovah and putim olketa pis bilong young buluka antap long hem. Then hem talem olketa for pourim fofala big clay botol wata long datfala sakrifaes. Olketa duim diswan thrifala taem mekem datfala drain raonem altar hem fulap witim wata. Then Elijah hem prea olsem: “O Jehovah, God bilong Abraham, Isaac and Israel, tuday evriwan mas savve hao iu nao God long Israel and mi nao servant bilong iu and thru long toktok bilong iu nao mi duim olketa samting hia. Ansarem mi, O Jehovah, ansarem mi, mekem olketa pipol hia savve hao iu, Jehovah, iu nao tru God and iuseleva nao tanem bak heart bilong olketa.”—1 Kings 18:30-37.
8. Hao nao God ansarem prea bilong Elijah, and wanem nao datfala profet hem duim?
8 Tru God hem bonem datfala sakrifaes and altar witim fire from heven. Datfala fire mekem drain raonem altar wea fulap witim wata kamap drae tu! Tingim feeling bilong olketa Israelite taem olketa lukim diswan. “Stretawe olketa baodaon long graon and sei: ‘Jehovah nao tru God! Jehovah nao tru God!’” Then Elijah strong for duim samting taem hem sei long olketa Israelite: “Kasholem olketa profet bilong Baal! No letem eniwan long olketa ranawe!” Long botom bilong Maunt Carmel, olketa killim dae evriwan long 450 profet bilong Baal.—1 Kings 18:38-40.
9. Hao nao olketa tru worshiper kasem test moa?
9 Long datfala sem day, Jehovah mekem rain foldaon for firstaem insaed long thri and haf year! (James 5:17, 18) Tingim hao olketa Israelite bae storyim wei wea Jehovah showimaot klia hem nao tru God taem olketa gogo bak long hom bilong olketa. Bat, olketa wea worshipim Baal no givap. Jezebel gohed for persecutim olketa servant bilong Jehovah. (1 Kings 19:1, 2; 21:11-16) So faithful fasin bilong pipol bilong God kasem test moa. Waswe, bae Jehovah faendem hao pipol bilong hem gohed for worshipim hem nomoa long taem wea hem markem for judgem olketa wea worshipim Baal?
Disaed Strong for Duim Samting Distaem
10.(a) Long taem bilong iumi, wanem nao olketa anointed Christian duim? (b) Wanem nao man mas duim for obeyim datfala warning long Revelation 18:4?
10 Long taem bilong iumi, olketa anointed Christian duim semkaen waka olsem Elijah duim. Thru long toktok and olketa pablikeson, olketa warnim pipol bilong evri nation abaotem danger bilong false religion, nomata olketa Christian or nomoa. From diswan, plande million pipol aotem nem bilong olketa olsem member bilong false religion. Olketa dedicatem laef bilong olketa long Jehovah and baptaes olsem olketa disaepol bilong Jesus Christ. Tru nao, olketa duim samting followim disfala warning bilong God abaotem false religion: “Go aot from hem, pipol bilong mi, sapos iufala no want for share witim hem long olketa sin bilong hem, and sapos iufala no want for kasem eni trabol bilong hem.”—Revelation 18:4.
11. Wanem nao man mas duim for Jehovah appruvim hem?
11 Nomata plande million nara pipol laekem message from Bible wea Olketa Jehovah’s Witness preachim, olketa no disaed yet wanem olketa shud duim. Samfala taem, samfala long olketa hia kam long olketa Christian meeting, maet celebration bilong Evening Kaikai bilong Lord or samfala part bilong wanfala distrik convention. Iumi encouragem olketa olsem for tingting strong long disfala toktok bilong Elijah: “Hao long nao bae iufala followim tufala difren tingting?” (1 Kings 18:21) Olketa mas no delay bat mas disaed strong distaem for duim samting for kasem datfala goal for kamap wanfala worshiper bilong Jehovah wea dedicate and baptaes. Diswan hem barava important samting for man savve kasem laef olowe!—2 Thessalonians 1:6-9.
12. Wanem nao happen long samfala Christian wea baptaes finis wea datwan hem danger tumas, and wanem nao olketa shud duim?
12 Sorre nao, samfala Christian wea baptaes finis savve miss for duim preaching samfala month, or maet no duim eni preaching for winim 6-fala month. (Hebrews 10:23-25; 13:15, 16) Samfala wikdaon from olketa fraetem persecution, feelim hevi from wei for provaed for famili, trae hard for kamap rich, or olketa busy for aftarem olketa selfish samting. Jesus givim warning hao olketa samting hia bae blokem and trapim samfala follower bilong hem and mekem olketa stambol. (Matthew 10:28-33; 13:20-22; Luke 12:22-31; 21:34-36) Olketa mas no ‘followim tufala difren tingting’ bat mas “strong for servem God and repent” wea minim olketa mas disaed strong for duim samting for fulfillim dedication bilong olketa long God.—Revelation 3:15-19.
Taem False Religion Seknomoa Finis
13. Storyim samting wea gohed long Israel taem Jehu kasem anointing olsem king.
13 Reason why hem barava important for olketa man disaed strong for duim samting distaem hem showaot klia long samting wea happen long Israel samting olsem 18 year bihaen datfala kwestin kamap long Maunt Carmel abaotem hu nao tru God. Day bilong Jehovah for judgem Baal worship hem seknomoa kam and olketa no expectim datwan long taem wea Elisha, wea hem changem Elijah, duim ministry bilong hem. Son bilong King Ahab, Jehoram, hem rulim Israel, and Jezebel hem stap yet olsem queen mother. Long wei wea haed, Elisha sendem attendant bilong hem for anointim army chief bilong Israel, Jehu, olsem niu king. Long datfala taem, Jehu hem stap long east saed bilong Jordan River long Ramoth-gilead, wea hem leadim wanfala war againstim olketa enemy bilong Israel. King Jehoram hem stap long Jezreel long valley klosap long Megiddo, wea hem rest from hem garekil long war.—2 Kings 8:29–9:4.
14, 15. Jehu kasem assignment for duim wanem samting, and hao nao hem duim datwan?
14 Jehovah komandim Jehu olsem: “Iu mas killim dae famili bilong lord bilong iu Ahab, and mi mas peim bak blood bilong olketa servant bilong mi olketa profet and blood bilong evri servant bilong Jehovah long hand bilong Jezebel. And full famili bilong Ahab mas finis evribit; . . . Olketa dog bae kaikaim Jezebel long datfala land long Jezreel, and no eniwan bae berem hem.”—2 Kings 9:7-10.
15 Jehu hem man wea disaed strong for duim samting. Stretawe hem go insaed long chariot bilong hem and speed go for Jezreel. Wanfala man for lukaot long Jezreel luksavve long hem from wei wea hem draev and reportim datwan long King Jehoram. Jehoram go insaed chariot bilong hem for go meetim Jehu, wea hem chief bilong army bilong hem. Taem tufala meet, Jehoram hem ask: “Waswe Jehu, iumi garem peace nao?” Jehu hem ansa: “Wanem peace nao savve stap taem olketa fornication and plande magic samting bilong mami bilong iu Jezebel hem gohed?” Then, bifor King Jehoram garem chance for ranawe, Jehu aotem bow bilong hem and killim dae Jehoram witim wanfala arrow wea hem sutim long heart bilong hem.—2 Kings 9:20-24.
16. (a) Seknomoa, olketa attendant bilong Jezebel feisim wanem test? (b) Hao nao toktok bilong Jehovah abaotem Jezebel hem fulfill?
16 Jehu no delay bat hem speed go long datfala taon long chariot bilong hem. Jezebel wea werem staka mek-ap hem luk go daon from window bilong hem and talem toktok for trae mekem Jehu fraet. Jehu nating lisin long hem bat singaot olsem for eniwan wea willing for sapotim hem: “Hu nao sapotim mi? Eniwan?” Olketa attendant bilong Jezebel mas disaed strong wanem nao olketa bae duim. Tu or thrifala long olketa hia luk go aot from window. Stretawe, loyal fasin bilong olketa kasem test. Jehu hem sei: “Torowem hem kam daon!” Olketa hia pushim Jezebel aot from window and hem banga long road long daon. Olketa horse purubutim hem and chariot bilong Jehu draev antap long hem. So disfala woman wea startim wei for worshipim Baal long Israel hem finis nao. Bifor eniwan garem chance for berem hem, olketa dog kaikaim body bilong hem, olsem profesi talem finis.—2 Kings 9:30-37.
17. Judgment bilong God long Jezebel shud strongim faith bilong iumi long wanem samting wea bae happen long future?
17 Semkaen nogud end bae kasem datfala tokpiksa jury woman wea garem nem “Bigfala Babylon.” Datfala jury woman hem piksarem olketa false religion bilong world bilong Satan, wea start kam from taon bilong Babylon bifor. Bihaen false religion hem finis, Jehovah God bae deal witim pipol wea stap long olketa nara sekson bilong disfala world bilong Satan. Hem bae finisim olketa tu, wea bae openem wei for wanfala raeteous niu world.—Revelation 17:3-6; 19:19-21; 21:1-4.
18. Bihaen Jezebel hem dae, wanem nao happen long olketa wea worshipim Baal long Israel?
18 Stretawe bihaen Jezebel hem dae, King Jehu killim dae evriwan long laen bilong Ahab and evri bigman bilong hem. (2 Kings 10:11) Bat plande Israelite wea worshipim Baal olketa stap yet. Saed long olketa hia, Jehu duim samting for showimaot hao hem “no acceptim eni wei for againstim Jehovah.” (2 Kings 10:16) Jehu hem act olsem wanfala worshiper bilong Baal and hem organizem wanfala maeti festival long temple bilong Baal wea Ahab buildim long Samaria. Evriwan wea worshipim Baal long Israel olketa kam long datfala festival. Olketa man bilong Jehu killim dae evriwan long olketa hia from olketa wea hipap insaed temple no savve ranawe nao. Bihaen Bible storyim datwan, hem sei: “So Jehu hem finisim Baal evribit from Israel.”—2 Kings 10:18-28.
19. Wanem nao nambawan hope bilong datfala “big crowd” wea loyal for worshipim Jehovah?
19 Baal worship hem finis evribit long Israel. Long sem wei tu, olketa false religion bilong disfala world bae seknomoa finis. Bae iu saed witim hu long datfala bigfala day bilong judgment? Sapos iu disaed strong and duim samting distaem, maet iu kasem privilege for stap midolwan long datfala “big crowd” bilong pipol wea bae winim “datfala big trabol.” Then bae iu ting bak witim hapi and bae iu praisem God for wei wea hem judgem datfala “bigfala jury woman wea spoelem disfala earth witim fornication bilong hem.” Tugeta witim olketa nara tru worshiper, bae iu agree witim disfala nambawan toktok wea olketa long heven singim: “Praisem Jah, iufala pipol, from God bilong iumi, Jehovah, datfala Olmaeti Wan, hem start finis for rul olsem king.”—Revelation 7:9, 10, 14; 19:1, 2, 6.
Olketa Kwestin for Ting Raonem
• Israel guilty long olketa wanem kaen wei for worshipim Baal?
• Bible profesi abaotem wanem bigfala wei for apostate, and hao nao datwan hem fulfill?
• Hao nao Jehu finisim Baal worship?
• Wanem nao iumi mas duim for sev long judgment day bilong God?
[Map long page 25]
(For formatted text, lukim pablikeson)
Socoh
Aphek
Helkath
Jokneam
Megiddo
Taanach
Dothan
SAMARIA
En-dor
Shunem
Ophrah
Jezreel
Ibleam (Gath-rimmon)
Tirzah
Beth-shemesh
Beth-shean (Beth-shan)
Jabesh-gilead?
Abel-meholah
House of Arbel
Ramoth-gilead
Mountain Peaks
Mt. Carmel
Mt. Tabor
Moreh
Mt. Gilboa
[Bodies of water]
Mediterranean Sea
Sea of Galilee
[River]
Jordan River
[Spring and well]
Well of Harod
[Credit Line]
Based on maps copyrighted by Pictorial Archive (Near Eastern History) Est. and Survey of Israel
[Olketa Piksa long page 26]
Olketa barava important part bilong tru worship hem for evritaem share long Kingdom preaching waka and attendim olketa Christian meeting
[Piksa long page 28, 29]
Olsem Jehu, evriwan wea want for sev long day bilong Jehovah mas disaed strong for duim samting