Word Bilong Jehovah Hem Laef

Olketa Main Point From Buk Bilong Ezra

BIBLE buk bilong Ezra hem storyim go moa history wea Second Chronicles hem story abaotem. First samting wea datfala priest, Ezra, raetem long disfala buk, hem law wea King Cyrus bilong Persia talemaot for olketa Jew wea stap long Babylon for go bak long hom bilong olketa. And last samting wea disfala buk storyim hem samting wea Ezra duim for mekem olketa Jew kamap klin saed long worship from olketa kamap dirty taem olketa mix witim pipol long datfala land. Hem storyim olketa samting wea happen insaed 70 year, start long 537 B.C.E go kasem 467 B.C.E.

Goal bilong Ezra for raetem datfala buk hem klia: hem for showimaot hao Jehovah fulfillim promis bilong Hem for mekem pipol bilong Hem wea prisoner long Babylon for kamap free and mekem tru worship kamap moa long Jerusalem. Dastawe, Ezra storyim nomoa olketa samting wea join witim datwan. Datfala buk, Ezra, hem abaotem hao olketa buildim moa temple and hao pipol bilong God startim moa worship bilong Jehovah nomata olketa kasem persecution and olketa no perfect. Iumi barava interest long disfala story from iumi tu stap long taem for mekem worship kamap gud moa. Plande pipol go long “maunten bilong Jehovah,” and klosap nao full earth bae “fulap witim savve abaotem glory bilong Jehovah.”—Isaiah 2:2, 3; Habakkuk 2:14.

BUILDIM TEMPLE MOA

(Ezra 1:1–6:22)

Governor Zerubbabel, wea nara nem hem nao Sheshbazzar, leadim samting olsem 50,000 Jew prisoner for go bak long Jerusalem, for fitim law wea Cyrus talemaot for olketa kamap free. Taem olketa kasem Jerusalem, olketa kwiktaem wakem moa altar long sem ples wea hem stap bifor and start for mekem sakrifaes long Jehovah.

Long year bihaen, olketa Israelite mekem faondeson bilong haos bilong Jehovah. Olketa enemy gohed trae hard for stopem waka and gogo olketa win taem olketa kasem komand from king for stopem datfala waka. Profet Haggai and Zechariah encouragem pipol hia for gohed buildim temple nomata olketa enemy trae hard for stopem, and hem nao wanem olketa duim. Samting wea stopem olketa enemy for spoelem olketa nao hem wei wea olketa fraet for againstim law wea no savve change wea Cyrus bilong Persia talemaot. Then olketa faendem datfala komand bilong Cyrus “abaotem haos bilong God long Jerusalem.” (Ezra 6:3) Datfala waka barava gohed gud and gogo hem finis.

Ansa for Olketa Bible Kwestin:

1:3-6—Waswe, olketa Israelite wea no volunteer for go bak long homples bilong olketa garem faith wea wik? Maet samting wea mekem samfala no go bak long Jerusalem hem from olketa tingim tumas material samting, or no tinghae long tru worship. Bat, no evriwan olsem. First samting, datfala gogo for Jerusalem hem 1,600 kilometer and man mas wakabaot for faevfala month for kasem long there. And tu, for setol long land wea stap emti for 70 year and duim datfala building waka man need for strong. Dastawe, olketa samting olsem sik, olo, and famili responsibility nao stopem samfala for go bak.

2:43—Hu nao olketa Nethinim? Hem pipol wea no Israelite wea waka olsem slave or minister long temple. Olketa hia nao olketa wea kam from laen bilong olketa Gibeonite from taem bilong Joshua, and olketa narawan “wea David and olketa prince markem olketa for waka witim olketa Levite.”—Ezra 8:20

2:55—Hu nao olketa son bilong olketa servant bilong Solomon? Hem olketa wea no really Israelite wea kasem olketa spesol assignment long service bilong Jehovah. Olketa maet waka olsem man for copyim olketa raeting long temple or waka olsem olketa overseer.

2:61-63—Waswe, Urim and Thummim, wea olketa iusim for kasem ansa from Jehovah, hem stap for olketa Jew wea go bak for iusim? Olketa wea sei olketa kam from laen bilong olketa priest bat wea fail for pruvim famili laen bilong olketa, maet fit for pruvim datwan long wei for iusim datfala Urim and Thummim. Ezra hem talem nomoa hao maet diswan hem wanfala samting wea olketa duim. No eni story long Bible showimaot hao olketa iusim Urim and Thummim long datfala taem or bihaen. Long kastom story bilong olketa Jew, datfala Urim and Thummim lus taem temple hem distroe long 607 B.C.E.

3:12—Why nao ‘olketa olo man wea lukim datfala haos bilong Jehovah wea stap firstaem’ olketa krae? Olketa rememberim hao datfala temple wea Solomon buildim firstaem hem barava nambawan. Taem olketa markem faondeson bilong niu temple witim datfala first temple “hem nating luk gud.” (Haggai 2:2, 3) Olketa no feel sure sapos hard waka bilong olketa bae mekem datfala niu temple hem garem sem glory olsem datfala first temple. Masbi olketa feel wikdaon, dastawe olketa krae.

3:8-10; 4:23, 24; 6:15, 16—Haomas year nao olketa buildim bak temple? Olketa putim faondeson bilong temple long 536 B.C.E.—“long mek-tu year bihaen olketa kam bak.” Datfala building waka hem stop long taem bilong King Artaxerxes, long 522 B.C.E. Hem stop go kasem 520 B.C.E., wea datwan hem mek-tu year bilong King Darius. Temple hia hem finis long mek-six year long rul bilong hem, wea hem 515 B.C.E. (Lukim box wea garem title “Olketa King Bilong Persia From 537 Go Kasem 467 B.C.E.”) So, olketa buildim temple for samting olsem 20 year.

4:8–6:18 (4:8, footnote)—Why nao olketa raetem olketa verse hia long Aramaic languis? Klosap evri samting long olketa verse hia hem olketa copy bilong olketa leta wea olketa bigman long gavman raetem go long olketa king, and ansa wea olketa king sendem go bak. Ezra hem copyim olketa leta hia from olketa pablik record wea olketa raetem long Aramaic, wea datwan hem languis wea olketa bisnisman and gavman iusim. Olketa nara part long Bible wea olketa raetem long disfala languis hem Ezra 7:12-26, Jeremiah 10:11, and Daniel 2:4b–7:28.

Olketa Leson for Iumi:

1:2. Samting wea Isaiah profesi abaotem olsem 200 year bifor hem kamap tru. (Isaiah 44:28) Olketa profesi bilong Jehovah long Bible no savve fail.

1:3-6. Olsem samfala Israelite wea no lusim Babylon for go bak long Jerusalem, plande long Olketa Jehovah’s Witness no fit for duim full-taem ministry or serve long ples wea garem need wea moa big. Nomata olsem, olketa sapotim and encouragem olketa wea savve duim datwan and olketa givim tu donation for mekem waka for preach abaotem Kingdom and for mek disaepol kamap moa big.

3:1-6. Firstfala sakrifaes wea olketa faithful wan hia wea kam bak olketa duim, hem long mek-seven month long 537 B.C.E. (Tishri, wea semsem witim September/October). Olketa bilong Babylon kam insaed long Jerusalem long mek-faev month (Ab, wea semsem witim July/August) long 607 B.C.E. and tufala month bihaen datfala taon hem finis evribit. (2 Kings 25:8-17) Seventi year wea Jerusalem mas stap emti hem end long barava taem wea profesi markem. (Jeremiah 25:11; 29:10) Evri profesi wea stap long Word bilong Jehovah hem kamap tru evritaem.

4:1-3. Olketa faithful wan wea go bak rejectim wanfala invitation wea bae mekem olketa joinim giaman worship. (Exodus 20:5; 34:12) Olsem tu, olketa wea worshipim Jehovah distaem no duim eni samting wea join witim nara religion.

5:1-7; 6:1-12. Jehovah savve mekem wei kamap for pipol bilong hem win.

6:14, 22. Wei for strong for share long waka bilong Jehovah hem mekem man kasem reward and Jehovah appruvim hem.

6:21. Wei wea waka bilong Jehovah gohed for grow muvim olketa Samaritan wea stap long homples bilong olketa Jew and olketa Jew wea kam bak wea letem olketa heathen for pullim olketa go difren, for changem olketa samting long laef bilong olketa wea need for change. Iumi shud barava hapi for share insaed waka bilong iumi wea kam from God, wea insaed diswan nao disfala waka for talemaot kingdom!

EZRA KAM LONG JERUSALEM

(Ezra 7:1–10:44)

Fifti year hem go pas bihaen olketa dedicatem datfala haos bilong Jehovah wea olketa buildim moa. Hem year 468 B.C.E, and Ezra tekem olketa pipol bilong God wea stap and olketa contribution from Babylon go long Jerusalem. Wanem nao hem lukim long there?

Olketa prince talem Ezra olsem: “Pipol bilong Israel and olketa priest and olketa Levite nating separatem olketa seleva from pipol bilong disfala ples saed long olketa nogud samting wea pipol hia duim.” And tu, “olketa prince and olketa mek-tu ruler nao main wan for no faithful.” (Ezra 9:1, 2) Ezra barava seke tumas. Hem kasem encouragement for “strong and for duim samting.” (Ezra 10:4) Ezra duim olketa samting for stretem diswan and pipol hia hapi for followim wanem hem talem.

Ansa for Olketa Bible Kwestin:

7:1, 7, 11—Waswe, olketa verse hia storyim datfala Artaxerxes wea stopem datfala building waka? Nomoa. Artaxerxes hem nem or title wea Bible givim for tufala king bilong Persia. Wanfala hem maet Bardiya or Gaumata, wea givim order for stopem waka for buildim temple long 522 B.C.E. Artaxerxes wea stap taem Ezra kam long Jerusalem hem Artaxerxes Longimanus.

7:28–8:20—Why nao plande Jew long Babylon no willing for go bak long Jerusalem witim Ezra? Nomata hem winim 60 year finis from taem wea firstfala grup bilong olketa Jew kam bak long homland bilong olketa, no staka pipol stap long Jerusalem. For go bak long Jerusalem man mas startim niu laef anda long olketa hard and danger samting. Living long Jerusalem long datfala taem hem no rich olsem living wea olketa Jew garem long Babylon. Datfala gogo hem danger tumas tu. Olketa wea go bak mas garem strongfala faith long Jehovah, strong for tru worship, and no fraet for go bak. Nomata Ezra tu bat depend long Jehovah for strongim hem. From encouragement bilong Ezra, 1,500 famili—maet full namba hem 6,000 pipol—olketa go bak. Bihaen Ezra duim samfala nara samting moa, 38 Levite and 220 Nethinim followim hem.

9:1, 2—Waswe, wei for maritim olketa pipol bilong datfala ples bae kamap samting wea savve spoelem olketa? Datfala nation mas protectim worship bilong Jehovah go kasem taem wea Messiah hem kam. Wei for maritim pipol long nara ples savve barava spoelem tru worship. From samfala mekem agreement finis saed long marit witim pipol wea worshipim idol, gogo maet datfala full nation bae kamap part long olketa heathen nation. Datwan savve lead go long wei wea klin worship finis evribit from earth. Sapos olsem, Messiah bae kam long hu? Dastawe Ezra barava seke tumas taem hem lukim samting wea happen!

10:3, 44—Why nao olketa sendem go olketa pikinini witim olketa waef? Sapos olketa no sendem go tu olketa pikinini, maet staka long olketa waef hia kam bak long olketa pikinini bilong olketa. And tu, plande taem mami nao mas lukaftarem olketa pikinini bilong hem.

Olketa Leson for Iumi:

7:10. Ezra hem showimaot gudfala example for iumi saed long wei for studyim and teachim gud Word bilong God. Hem preparem heart bilong hem witim prea for lukluk long Law bilong Jehovah. Taem hem luk insaed, Ezra barava tingting strong long toktok bilong Jehovah. Ezra followim wanem hem lanem and waka hard for teachim olketa narawan.

7:13. Jehovah laekem olketa man wea willing for serve.

7:27, 28; 8:21-23. Ezra talemaot hao Jehovah nao mekem hem win long evri samting hem duim, hem prea strong long Jehovah bifor hem go long datfala gogo for Jerusalem wea farawe and danger tumas, and hem willing for putim laef bilong hem long danger for mekem God kasem glory. Long evri samting hia hem showimaot gudfala example for iumi.

9:2. Iumi mas tingting strong long disfala kaonsel for maritim nomoa “wanfala Christian.”—1 Corinthians 7:39.

9:14, 15. Wei for kaban witim olketa nogud pipol bae lead go long wei for Jehovah no appruvim iumi.

10:2-12, 44. Pipol wea maritim olketa woman from nara ples hambol for repent and stretem nogud wei bilong olketa. Tingting bilong olketa and samting olketa duim hem gudfala example for iumi.

Jehovah Duim Wanem Hem Promisim

Buk bilong Ezra hem important tumas for iumi! Long barava taem wea Jehovah markem, hem duim wanem hem promisim for mekem pipol bilong hem kamap free from Babylon and mekem tru worship kamap moa long Jerusalem. Datwan barava strongim faith bilong iumi long Jehovah and olketa promis bilong hem!

Tingim olketa example wea stap long buk bilong Ezra. Ezra and olketa Jew wea go bak for help for mekem tru worship kamap moa long Jerusalem, showimaot nambawan example for iumi saed long wei for lovem and worshipim God. Disfala buk mekhae tu long faith bilong olketa from difren kantri and hambol fasin bilong olketa sinner wea repent. Tru nao, olketa toktok bilong Ezra showimaot klia hao “word bilong God hem laef and garem paoa.”—Hebrews 4:12.

[Chart/Picture on page 18]

OLKETA KING BILONG PERSIA FROM 537 GO KASEM 467 B.C.E.

Cyrus the Great (Ezra 1:1) dae long 530 B.C.E.

Cambyses, nara nem Ahasuerus (Ezra 4:6) 530-22 B.C.E.

Artaxerxes, nara nem Bardiya or Gaumata (Ezra 4:7) 522 B.C.E. (Hem rul for sevenfala month nomoa then olketa killim hem dae)

Darius I (Ezra 4:24) 522-486 B.C.E.

Xerxes, nara nem Ahasuerusa 486-75 B.C.E. (Rul long semtaem witim Darius I, 496-86 B.C.E.)

Artaxerxes Longimanus (Ezra 7:1) 475-24 B.C.E.

[Footnotes]

[Piksa long page 4]

Ahasuerus

[Piksa long page 3]

Cyrus

[Piksa long page 3]

Datfala Cyrus Cylinder talem law bilong gavman for sendem olketa prisoner go hom

[Credit Line]

Cylinder: Photograph taken by courtesy of the British Museum

[Piksa long page 6]

Waswe, iu savve wanem nao mekem Ezra hem gudfala teacher?