Lane From Prea wea Olketa Levite Redyim Gud

1. Wanem hipap nao bae iumi storyim, and wanem tufala kwestin nao iumi shud ting raonem?

“IUFALA kam and blessim God bilong iufala Jehovah for olowe.” Olketa Levite nao talem naesfala toktok hia for invaetem pipol bilong God for hipap tugeta and prea long Hem. Datfala prea hem wanfala long olketa longfala prea insaed Bible. (Neh. 9:4, 5) Disfala hipap hem kamap long Jerusalem long 455 B.C.E. long mek-24 day long month bilong Tishri long kalenda bilong olketa Jew. Taem iumi story abaotem olketa samting wea happen bifor datfala day, tingim tufala kwestin hia: ‘Wanem nao olketa Levite duim evritaem wea mekem disfala hipap gohed gud? Wanem nao iumi savve lanem from datfala prea wea olketa Levite redyim gud?’—Ps. 141:2.

WANFALA SPESOL MONTH

2. Hao nao olketa Israelite showimaot nambawan example for iumi?

² Wanfala month bifor datfala spesol hipap, olketa Jew finis nao for wakem bak wall bilong Jerusalem. (Neh. 6:15) Olketa duim datfala waka insaed 52 day nomoa. Then long first day bilong month bihaen datwan, wea hem Tishri, olketa hipap for herem Ezra and olketa nara Levite readim Law bilong God and helpem olketa for minim. Olketa dadi, mami, and olketa pikinini tu standap and herehere start from taem sun kamap go kasem midolday. Olketa Israelite hia showimaot nambawan example for iumi. Nomata sapos iumi garem naesfala Kingdom Hall for sidaon insaed, maet samfala taem mind bilong iumi go wakabaot long taem bilong meeting. Bat olketa Israelite hia lisin gud, ting raonem samting wea olketa herem, and krae tu taem olketa luksavve olketa no obeyim Law bilong God.—Neh. 8:1-9.

3. Olketa Israelite obeyim wanem toktok bilong olketa Levite?

³ Bat diswan hem no taem for olketa Israelite talemaot sin bilong olketa. Long datfala day, Jehovah laekem olketa for hipap and hapi. (Num. 29:1) So Nehemiah sei long olketa: “Go, kaikaim olketa best kaikai and drinkim olketa swit samting, and sendem go samfala kaikai and drink hia long man wea no garem eni kaikai. Disfala day hem holy long Lord bilong iumi, and iufala mas no sorre, bikos Jehovah nao mekem iufala hapi and datwan hem olsem sef ples for iufala.” Olketa Israelite obeyim wanem olketa Levite talem, and olketa “hapi fogud” long datfala day.—Neh. 8:10-12.

4. (a) Wanem nao evri hed long famili duim? (b) Long datfala celebration, wanem nao olketa Levite duim evriday?

⁴ Long next day, evri hed long famili hipap tugeta for studyim Law mekem olketa luksavve sapos olketa obeyim evri Law bilong God. Taem olketa studyim datfala Law, olketa luksavve evri Israelite shud stap insaed olketa smol leaf haos, start long mek-15 day go kasem mek-22 day bilong datfala month Tishri. Then long mek-22 day olketa mas garem wanfala holy assembly. So olketa pipol start for redyim evri samting for duim datwan. Datfala celebration wea olketa stap insaed olketa smol leaf haos hem gud winim eni narawan start kam long taem bilong Joshua, and olketa “barava hapi fogud.” Evriday long datfala celebration, olketa Levite readim Law bilong God long olketa Israelite.—Neh. 8:13-18.

DAY FOR TALEMAOT OLKETA SIN

5. Bifor olketa Levite start for prea, wanem nao pipol bilong God duim?

⁵ Tufala day bihaen long datfala celebration, long mek-24 day long month bilong Tishri, hem taem nao for pipol bilong God talemaot sin bilong olketa. Hem no day for olketa kaikai and hapi, bat hem taem for no kaikai and for werem kaleko wea showimaot olketa sorre from olketa no obeyim Law bilong God. Olketa Levite readim moa Law bilong God long pipol for samting olsem thrifala hour long morning. Long aftanun, olketa pipol “talemaot sin bilong olketa and baodaon long God bilong olketa, Jehovah.” ) Long datfala taem nao olketa Levite start for prea for olketa pipol. —Neh. 9:1-4.

6. Wanem nao helpem olketa Levite for story gud witim Jehovah long prea, and wanem nao iumi savve lanem from olketa?

⁶ Olketa Levite evritaem readim Law bilong God, and datwan helpem olketa for redyim gud prea bilong olketa. First haf long datfala prea hem mekhae long olketa samting wea Jehovah duim and olketa wei bilong hem. Long mek-tu haf long datfala prea olketa Levite storyim olketa sin bilong pipol and talem stret why nao olketa Israelite no fit for kasem “bigfala mercy” wea God showimaot long olketa. (Neh. 9:19, 27, 28, 31) Wanem nao iumi savve lanem from olketa Levite? Iumi shud readim Bible and ting raonem evriday. Taem iumi duim olsem, iumi letem Jehovah story kam for iumi. Then taem iumi prea, bae iumi garem staka samting for storyim long Jehovah, and bae iumi story gud long hem.—Ps. 1:1, 2.

7. Olketa Levite askem God for wanem samting, and wanem nao iumi lanem from example bilong olketa?

⁷ Long prea bilong olketa Levite, olketa ask for wanfala samting nomoa. Long end long prea bilong olketa, olketa sei: “God bilong mifala wea nambawan, maeti, and wea olketa man fit for respectim, . . . plis no ting smol long olketa hard samting wea kasem mifala, and wea kasem olketa king, prince, priest, profet, and grani bilong mifala, and pipol bilong iu start kam long taem bilong olketa king bilong Assyria kam kasem distaem.” (Neh. 9:32) Olketa Levite showimaot gudfala example for iumi distaem. Taem iumi prea, iumi shud praisem and sei thankiu long Jehovah firstaem bifor iumi askem hem for eni samting.

OLKETA PRAISEM NAMBAWAN NEM BILONG GOD

8, 9. (a) Hao nao prea bilong olketa Levite showimaot olketa hambol? (b) Wanem tufala army nao olketa Levite storyim long prea bilong olketa?

⁸ Olketa Levite hambol. Nomata olketa talem naesfala prea, long tingting bilong olketa no eni toktok hem barava fitim for praisem Jehovah. So taem olketa start for prea long Jehovah for olketa Israelite, olketa hambol and sei long Jehovah: “Olketa mas praisem nambawan nem bilong iu, wea hae winim eni blessing or praise wea pipol savve givim.”—Neh. 9:5.

⁹ Olketa gohed for sei: “Iu nao Jehovah. Iu nao wakem skae and universe and army bilong hem. Iu wakem earth and evri samting wea stap long hem witim sea and evri samting wea stap long hem tu. Iu mekem evri samting gohed laef, and army long heven baodaon long iu.” (Neh. 9:6) Long verse hia, olketa Levite storyim samfala spesol samting wea Jehovah wakem. Hem wakem universe and “army bilong hem,” wea minim staka billion star. Hem wakem tu evri samting long disfala earth and mekem evri samting wea laef savve garem pikinini. Disfala prea bilong olketa Levite story abaotem narafala army tu. Hem kolem olketa angel bilong God, “army long heven.” (1 Ki. 22:19; Job 38:4, 7) Olketa angel hia hambol for duim wanem God laekem long wei for helpem olketa man. (Heb. 1:14) Distaem, iumi tu olsem wanfala army wea wan mind for worshipim Jehovah and wea hem trainim gud. Iumi shud followim example bilong olketa angel wea hambol for worshipim God.—1 Cor. 14:33, 40.

10. Wanem nao iumi lanem from samting wea God duim for Abraham?

¹⁰ Next samting wea olketa Levite storyim hem samting wea Jehovah duim for Abram. Jehovah changem nem bilong hem long Abraham, wea minim “dadi bilong staka pipol” nomata hem 99 year and no garem eni pikinini. (Gen. 17:1-6, 15, 16) God talem Abraham tu bae olketa pikinini bilong hem tekovarem Canaan. Olketa Levite storyim wei wea Jehovah keepim promis bilong hem. Olketa sei: “Jehovah, iu nao trufala God, wea chusim Abram and tekem hem kamaot from Ur long Chaldea and changem nem bilong hem long Abraham. And hem faithful long iu, so iu mekem wanfala agreement witim hem for hem mas tekovarem land bilong pipol long Canaan, . . . for givim datwan long olketa pikinini bilong hem, and from iu raeteous iu duim samting wea iu talem.” (Neh. 9:7, 8) Staka taem olketa man savve forgetim promis bilong olketa. Bat iumi savve followim example bilong Jehovah long wei for evritaem traem best for duim wanem iumi promisim.—Matt. 5:37.

OLKETA NAMBAWAN SAMTING WEA JEHOVAH DUIM FOR PIPOL BILONG HEM

11, 12. (a) Wanem nao mining bilong datfala nem Jehovah? (b) Wanem nao Jehovah duim wea showimaot hem nomoa fit for garem datfala nem?

¹¹ Datfala nem Jehovah hem minim, “Hem Mekem Kamap.” Datwan minim God hem gohed duim samting for mekem olketa promis bilong hem kamap tru. Nambawan example long diswan hem promis wea hem talem for olketa pikinini bilong Abraham, wea olketa nao datfala nation bilong Israel. Taem olketa slave long Egypt, God promis bae olketa kamap free and stap long Promis Land. Long datfala taem, maet olketa tingse hard tumas for datwan hem happen. Bat God gohed duim olketa samting gogo datfala promis kamap tru. Datwan showimaot hem nomoa fit for garem datfala barava spesol nem, Jehovah.

¹² Long datfala prea bilong olketa Levite, olketa storyim samfala samting wea Jehovah duim for pipol bilong hem. Olketa sei: “Iu lukim olketa grani bilong mifala safa long Egypt, and iu herem krae bilong olketa long Red Sea. Then iu iusim olketa saen and mirakol for panisim Pharaoh and evri wakaman bilong hem and pipol bilong hem. Iu savve olketa spoelem pipol bilong iu, and iu mekem nem bilong iu for kasem praise kam kasem distaem. Iu divaedem sea for pipol bilong iu mekem olketa katkros long drae graon. Iu torowem pipol wea aftarem olketa insaed long sea olsem wanfala ston.” Olketa Levite gohed storyim wei wea Jehovah helpem pipol bilong hem for tekovarem Promis Land. Olketa sei: “Iu helpem pipol bilong iu for win againstim and tekovarem pipol long Canaan.” Then olketa Levite sei pipol bilong God “tekovarem olketa taon wea garem wall raonem and wea garem gudfala graon, and tekem olketa haos wea garem olketa naes samting, olketa ples for keepim wata wea olketa katem long ston, olketa grape planteison and olive tree, and staka tree wea garem frut for kaikaim. Olketa kaikai and satisfae. Olketa kamap strong,” taem olketa enjoyim olketa gudfala samting wea God givim long olketa.—Neh. 9:9-11, 24, 25.

13. No longtaem bihaen olketa Israelite lusim Egypt, wanem nao Jehovah duim for olketa, bat wanem nao olketa duim?

¹³ Jehovah duim staka nara samting tu for mekem olketa promis bilong hem kamap tru. Olsem example, no longtaem bihaen olketa Israelite lusim Egypt, Jehovah givim olketa law long olketa and teachim olketa stretfala wei for worshipim hem. Olketa Levite prea olsem: “Iu kam daon long Maunt Sinai and story witim olketa from skae and iu givim olketa disison bilong iu wea stret, olketa law wea tru, and olketa gudfala komand.” (Neh. 9:13) Jehovah chusim olketa Israelite for kamap pipol bilong hem and hem sei bae hem givim Promis Land long olketa. So hem teachim olketa for kamap pipol wea fit for garem nem bilong hem. Bat olketa no gohed for obeyim olketa law bilong hem.—Readim Nehemiah 9:16-18.

OLKETA ISRAELITE NEEDIM DISCIPLINE

14, 15. (a) Storyim wei wea Jehovah showimaot mercy long olketa Israelite. (b) Wanem nao iumi lanem from wei wea Jehovah deal witim olketa Israelite?

¹⁴ Long prea bilong olketa Levite, olketa storyim tufala sin wea olketa Israelite duim no longtaem bihaen olketa promis for obeyim Law bilong God long Maunt Sinai. Bikos long datwan, olketa Israelite shud dae long wilderness. Bat Jehovah showimaot mercy long olketa and gohed provaedem wanem olketa needim. Long datfala prea, olketa praisem Jehovah and sei: “For foti year iu provaedem kaikai for olketa long wilderness. Olketa garem evri samting wea olketa needim. Kaleko bilong olketa no brek, and leg bilong olketa no boela.” (Neh. 9:19, 21) Distaem tu Jehovah provaedem wanem iumi needim mekem iumi gohed faithful for worshipim hem. Iumi no laek for olsem plande thousand Israelite wea dae long wilderness bikos olketa no obey and no garem faith. Nogud example bilong olketa hem warning for iumi.—1 Cor. 10:1-11.

¹⁵ Olketa Israelite wea go insaed long Promis Land no gohed faithful long Jehovah. Olketa start for worshipim olketa god bilong pipol long Canaan. Long worship bilong olketa, olketa mekhae long sex and sakrifaesim pikinini bilong olketa. So Jehovah letem pipol long olketa nara kantri for spoelem olketa Israelite. Bat taem olketa Israelite repent, Jehovah forgivim olketa and helpem olketa for winim olketa enemy. Staka taem nao diswan hem happen. (Readim Nehemiah 9:26-28, 31.) Olketa Levite sei: “Iu patient witim olketa for plande year and iu givim spirit bilong iu long olketa profet mekem olketa warnim pipol bilong iu, bat olketa les for herem. Gogo, iu letem pipol bilong olketa nara kantri for spoelem olketa.”—Neh. 9:30.

16, 17. (a) Wanem nao happen taem olketa Israelite kamaot from Babylon and start for no obeyim Jehovah moa? (b) Wanem nao olketa Levite talemaot long Nehemiah 9:33, and wanem nao olketa promis for duim?

¹⁶ Nomata bihaen olketa Israelite kamaot from Babylon, olketa start for no obeyim Jehovah moa. From olketa no obey, wanem nao happen? Long prea bilong olketa Levite, olketa sei: “Distaem mifala olketa slave long land wea iu givim long olketa grani bilong mifala. Iu givim disfala land long olketa mekem olketa kaikaim frut and evri gud samting wea grow long hem, and from mifala duim sin iu mekem olketa nara king nao for rulim mifala, and olketa nao tekem olketa kaikai hia, . . . bat mifala safa.” Olketa Israelite kamap slave insaed long land wea Jehovah givim for olketa.—Neh. 9:36, 37.

¹⁷ Waswe, olketa Levite tingse God no kaen long pipol bilong hem? Nomoa! Olketa sei: “Nomata mifala kasem staka nogud samting, iu nao raeteous. Iu evritaem duim stret samting, bat mifala nao duim nogud samting.” (Neh. 9:33) Long end long prea bilong olketa Levite, olketa promisim God full nation bae obeyim Law bilong hem. (Readim Nehemiah 9:38; 10:29) Olketa raetem datfala promis and 84 bigman bilong olketa nao saenem.—Neh. 10:1-27.

18, 19. (a) Wanem nao iumi mas duim sapos iumi laek for stap insaed niu world bilong God? (b) Wanem nao iumi mas gohed prea abaotem, and why nao olsem?

¹⁸ Sapos iumi laek for stap insaed niu world bilong Jehovah, iumi mas letem Jehovah for stretem iumi. Aposol Paul hem sei: “Evri dadi stretem son bilong hem.” (Heb. 12:7) Sapos iumi letem Jehovah stretem iumi and iumi gohed faithful long hem, datwan showimaot iumi letem hem for trainim iumi. And sapos iumi duim bigfala sin, iumi sure Jehovah bae forgivim iumi sapos iumi barava repent and hambol for letem hem stretem iumi.

¹⁹ Klosap nao, Jehovah bae duim olketa nambawan samting wea winim wanem hem duim taem hem sevem olketa Israelite long Egypt. Long datfala taem evriwan bae savve hem wanfala nambawan God. (Ezek. 38:23) Long datfala taem wea God mekhae long nem bilong hem, evriwan wea faithful long hem bae go insaed long niu world, olsem olketa Israelite go insaed long Promis Land. (2 Pet. 3:13) So iumi mas gohed prea for God hem mekhae long nambawan nem bilong hem. Long next study, bae iumi storyim narafala prea wea savve helpem iumi for duim samting for kasem blessing from God distaem and for olowe.