Wakabaot Long Road Bilong Laet wea Kakamap Moa Braet
“Road bilong olketa raeteous wan hem olsem braet laet wea kakamap moa braet go kasem big daylaet.”—PROVERBS 4:18.
1, 2. Wanem nao pipol bilong God kasem from spiritual laet from Jehovah wea kakamap moa braet?
BEST wan for storyim wei wea laet bilong sun wea kakamap long morning hem finisim naet, hem datwan wea wakem laet, Jehovah God! (Psalm 36:9) God hem sei: ‘Taem morning laet hem holem olketa end bilong earth, hem changem hemseleva olsem clay wea wanfala stamp pressim, and olketa samting showaot naes olsem kaleko.’ (Job 38:12-14) Taem laet from sun kakamap moa braet, gogo man savve isisi lukim evri samting long earth, olsem taem man iusim wanfala stamp for changem sheip bilong clay.
2 Jehovah hem givim spiritual laet tu. (Psalm 43:3) Nomata world hem stap insaed bigfala darkness, tru God hem gohed for givim spiritual laet long pipol bilong hem. Wanem nao kamaot from diswan? Bible hem sei: “Road bilong olketa raeteous wan hem olsem datfala braet laet wea kakamap moa braet go kasem big daylaet.” (Proverbs 4:18) Laet from Jehovah wea kakamap moa braet hem gohed for torchim road bilong pipol bilong hem. Hem mekem olketa kamap moabeta saed long organization, saed long teaching, and saed long fasin.
Spiritual Laet Lead Go Long Olketa Change wea Mekem Organization Kamap Moabeta
3. Wanem promis nao stap long Isaiah 60:17?
3 Thru long profet Isaiah, Jehovah talem disfala profesi: “Mi bae tekem kam gold for changem copper, and mi bae tekem kam silver for changem iron, and changem timba witim copper, and olketa ston witim iron.” (Isaiah 60:17) Olsem wei for changem wanfala samting wea no mas gud witim wanfala samting wea gud hem minim diswan hem kamap moabeta, Olketa Jehovah’s Witness kamap moabeta saed long olketa arrangement bilong organization bilong olketa insaed taem wea “olketa samting wea happen long world bae finis,” wea hem nao “olketa last day.”—Matthew 24:3; 2 Timothy 3:1.
4. Wanem arrangement nao start long 1919, and wanem gud samting nao kamaot from diswan?
4 Long start bilong olketa last day, olketa kongregeson bilong olketa Bible Student, wea hem nao nem bilong Olketa Jehovah’s Witness long datfala taem, olketa votem olketa elder and deacon bilong olketa. Nomata olsem, samfala elder no really interest for talemaot gud nius, and tu, olketa talem long narawan olketa no need for duim datwan. So long 1919 wanfala niu arrangement for garem service director hem start insaed each kongregeson. For followim theocratic wei kongregeson no vote for service director, bat hem kasem appointment from branch office bilong pipol bilong God. Olketa responsibility bilong director hia hem for organizem preaching waka, markem olketa territory, and encouragem wei for tekpart insaed long field ministry. Long olketa year bihaen, waka for preach abaotem Kingdom hem barava grow.
5. Wanem change for kamap moabeta nao hem happen long olketa year bilong 1920?
5 Long 1922, long wanfala convention bilong olketa Bible Student long Cedar Point, Ohio, U.S.A., evriwan insaed kongregeson kasem moa encouragement from disfala toktok: “Talemaot, talemaot, talemaot, datfala King and kingdom bilong hem.” Kasem 1927 field service hem barava organize gud and hem wei bilong olketa for markem Sunday olsem best day for duim haos-tu-haos preaching waka. Why nao olsem? Bikos Sunday nao hem day wea staka pipol no waka. Olketa Jehovah’s Witness distaem showimaot sem tingting taem olketa traem best for visitim pipol long taem wea olketa stap long haos, olsem long olketa weekend and long evening.
6. Long 1931, wanem resolution nao pipol bilong Jehovah acceptim, and hao nao datwan affectim waka for talemaot Kingdom?
6 Wanfala samting wea barava mekem waka for preach abaotem Kingdom muv ahed hem kamap long Sunday aftanun, July 26, 1931, taem pipol bilong Jehovah acceptim wanfala resolution long Columbus, Ohio, U.S.A., and bihaen, long olketa nara ples raonem world. Wanfala part bilong datfala resolution hem sei: “Iumi olketa servant bilong Jehovah God wea kasem assignment for duim wanfala waka wea hem nao markem iumi for duim, and iumi obeyim komandment bilong hem for talemaot witness wea Jesus Christ talem, and for talemaot long pipol hao Jehovah hem datfala tru and Olmaeti God; so iumi hapi for kasem datfala nem wea Lord God hem givim, and iumi laekem pipol for kolem iumi long datfala nem, hem nao, Olketa Jehovah’s Witness.” (Isaiah 43:10) Datfala niu nem barava showimaot main waka bilong evriwan wea garem datfala nem! Tru nao, Jehovah garem waka for evri servant bilong hem duim. Staka barava acceptim and hapi long datwan!
7. Wanem change nao kamap long 1932, and why nao olsem?
7 Staka elder hambol and willing for duim disfala preaching waka. Bat, long samfala ples, olketa elder wea kongregeson votem olketa againstim idea for evriwan insaed kongregeson shud share insaed long pablik ministry. Bat no longtaem bihaen, samfala nara change kamap. Long 1932, olketa kongregeson kasem instruction thru The Watchtower for finisim wei for vote for olketa elder and deacon. Olketa mas votem olketa spiritual brata wea sapotim waka for preach for kamap wanfala service komiti. So, olketa wea strong for tekpart insaed ministry nao kasem responsibility for lead insaed kongregeson, and waka hem muv ahed gud.
Laet wea Kakamap Moa Braet Mekem Olketa Nara Samting Moabeta
8. Wanem change nao happen long 1938?
8 Datfala laet hem “kakamap moa braet.” Long 1938 olketa finisim wei for vote. Evri servant insaed kongregeson kasem appointment long theocratic wei thru long headquarter anda long lead bilong “faithful and wise slave.” (Matthew 24:45-47) Staka kongregeson bilong Olketa Jehovah’s Witness acceptim datfala change and waka for witness hem gohed for garem moa frut.
9. Long 1972, wanem arrangement nao hem start, and why nao datwan hem moabeta?
9 Start long October 1, 1972, narafala change hem kamap insaed olketa kongregeson saed long olketa wea lead. Arrangement for body of elders lead insaed olketa kongregeson bilong Olketa Jehovah’s Witness evriwea long world hem changem wei for wanfala kongregeson servant nomoa lead. Disfala niu arrangement hem barava encouragem olketa man wea mature long spiritual wei for kamap fit for lead insaed kongregeson. (1 Timothy 3:1-7) Samting wea kamaot from diswan nao staka brata kasem savve for lukaftarem olketa responsibility insaed long kongregeson. Help wea olketa shepherd hia givim long staka niu wan wea acceptim truth from Bible hem barava gud tumas!
10. Wanem arrangement nao start long 1976?
10 Arrangement kamap for olketa member bilong Governing Body serve insaed sixfala komiti, and start long January 1, 1976 olketa komiti hia nao lukaftarem evri waka bilong organization and olketa kongregeson raonem world. Hem bigfala blessing for evri part bilong Kingdom waka kasem gudfala direction wea kamap taem “plande story tugeta” olsem!—Proverbs 15:22; 24:6.
11. Wanem change nao kamap long 1992, and why nao olsem?
11 Long 1992, narafala change hem kamap, wea olsem samting wea happen bihaen olketa Israelite and olketa narawan lusim Babylon for go bak long Jerusalem. Long datfala taem, no inaf Levite stap for duim evri waka insaed long temple. So olketa Nethinim wea no Israelite kasem moa waka for helpem olketa Levite. Olsem tu, for helpem faithful and wise slave for lukaftarem olketa responsibility saed long waka bilong olketa long disfala earth, samfala bilong “nara sheep” kasem moa responsibility long 1992. Olketa kasem appointment olsem olketa helper for olketa komiti bilong Governing Body.—John 10:16.
12. Hao nao Jehovah appointim peace olsem olketa overseer bilong iumi?
12 Wanem nao kamaot from evri samting hia? Jehovah hem sei: “Mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” (Isaiah 60:17) Olketa servant bilong Jehovah distaem garem “peace,” and wei for lovem “raeteous fasin” hem kamap “man for givim waka” for olketa, wea hem nao datfala samting wea muvim olketa for servem God. Olketa organize gud for duim disfala waka for preach abaotem Kingdom and for mek disaepol.—Matthew 24:14; 28:19, 20.
Jehovah Givim Klia Information Abaotem Olketa Teaching
13. Insaed olketa year bilong 1920, hao nao Jehovah helpem pipol bilong hem for minim samfala teaching long wei wea moa klia?
13 Saed long olketa teaching, Jehovah gohed for mekem laet bilong truth shaen moa braet long pipol bilong hem. Revelation 12:1-9 hem givim wanfala example. Thrifala nao insaed long disfala story—“wanfala woman” wea babule and bornem baby, wanfala “dragon,” and “wanfala son, wanfala boy.” Waswe, iu savve hu nao each wan hia piksarem? Wanfala article insaed The Watch Tower, March 1, 1925, wea garem title “Birth of the Nation,” hem showimaot hu nao olketa hia piksarem. Datfala article helpem pipol bilong God minim long wei wea moa klia olketa profesi abaotem taem wea Kingdom hem start, wea diswan showimaot klia hao tufala organization nao stap—organization bilong Jehovah and bilong Satan. Then, long samting olsem 1927/1928, pipol bilong God luksavve hao Christmas and birthday hem againstim Bible so olketa stop for celebratem olketa.
14. Wanem tru samting saed long teaching nao hem kamap moa klia long olketa year bilong 1930?
14 Long olketa year bilong 1930, Jehovah givim moa laet long thrifala Bible teaching. For staka year, olketa Bible Student savve datfala “big crowd” wea Revelation 7:9-17 storyim hem difren from 144,000 wea bae rul olsem olketa king and priest witim Christ. (Revelation 5:9, 10; 14:1-5) Nomata olsem, olketa no really savve hu nao datfala big sekson. Long sem wei wea laet long morning hem mekem evri samting moa klia and garem moa kala, long 1935 pipol bilong God minim hao datfala big crowd nao sekson wea bae no distroe long “datfala big trabol,” and garem hope for laef olowe long earth. Bihaen, long sem year, pipol bilong God minim stret wanfala samting wea affectim olketa pikinini bilong Olketa Jehovah’s Witness wea go long skul long staka kantri. Long datfala taem, wei for mekhae long kantri hem gohed big long full world bat olketa Witness luksavve hao wei for salutim flag hem no samting nating bat hem garem moa mining and olketa mas stap klia long hem. Long 1936, faithful and wise slave explainim narafala tru teaching, hao Christ hem dae long wanfala post, and no long wanfala cross.—Acts 10:39.
15. Long wanem taem and hao nao pipol bilong Jehovah barava luksavve long wei wea blood hem holy?
15 Bihaen long World War II, wea long datfala taem hem normal samting for givim blood transfusion long olketa soldia wea garekil, laet hem kamap moa braet saed long wei wea blood hem holy. The Watchtower bilong July 1, 1945, encouragem “evriwan wea worshipim Jehovah and wea laek for laef olowe insaed niu world bilong raeteous fasin for respectim wei wea blood hem holy and for followim olketa raeteous law bilong God saed long disfala barava important samting.”
16. Wanem taem nao olketa releasem New World Translation of the Holy Scriptures, and wanem nao tufala nambawan samting abaotem hem?
16 Long 1946, olketa lukim hao need hem stap for garem wanfala Bible transleison wea mekius long olketa niu information and wea olketa giaman teaching bilong olketa false church no spoelem. Waka for transleitim diswan hem start long December 1947. Long 1950, olketa releasem New World Translation of the Christian Greek Scriptures long English. Olketa start for releasem faevfala volume bilong olketa Hebrew Scripture long English long 1953. Olketa releasem lastfala volume long 1960, wea hem winim 12-fala year bihaen olketa startim transleison bilong datfala Bible. Long 1961, olketa releasem full New World Translation of the Holy Scriptures long wanfala volume. Distaem, disfala transleison hem stap long staka languis and hem garem samfala nambawan samting. Hem putim bak nem bilong God, Jehovah, insaed long hem. And tu, wei wea olketa trae for transleitim barava mining bilong each word from olketa first Bible raeting, hem kamap faondeson for iumi gohed kasem moa savve abaotem truth wea stap insaed Bible.
17. Wanem laet wea moa braet nao hem shaen kam long 1962?
17 Long 1962, iumi kasem stretfala savve abaotem hu nao “olketa hae paoa” wea Romans 13:1 hem story abaotem, and tu, long wanem wei nao olketa Christian mas stap anda long olketa. Wei for studyim gud mek-13 chapter bilong Romans and olketa scripture olsem Titus 3:1, 2 and 1 Peter 2:13, 17 showimaot klia hao datfala toktok, “olketa hae paoa” no minim Jehovah God and Jesus Christ, bat hem minim olketa gavman bilong man.
18. Wanem nao samfala truth wea kamap moa klia long olketa year bilong 1980?
18 Long olketa year bihaen, road bilong olketa raeteous wan hem gohed for kamap moa braet. Long 1985, laet hem sut aot saed long wanem hem minim for man raeteous “for kasem laef” and raeteous olsem wanfala fren bilong God. (Romans 5:18; James 2:23) Long 1987, faithful and wise slave barava explainim gud mining bilong Christian Jubilee.
19. Hao nao Jehovah givim moa spiritual laet for pipol bilong hem insaed olketa year wea just go pas finis?
19 Long 1995, pipol bilong God kasem mining wea moa klia saed long wei for separatem “olketa sheep” and “olketa goat.” Long 1998, olketa barava minim gud go moa temple vision bilong Ezekiel, wea gohed for fulfill distaem. Long 1999, olketa minim klia wanem taem and hao nao ‘datfala barava rabis samting hem standap long wanfala holy ples.’ (Matthew 24:15, 16; 25:32) And long 2002, moa savve kamaot saed long wanem hem minim for worshipim God “witim spirit and truth.”—John 4:24.
20. Pipol bilong God kasem olketa change long wanem nara samting?
20 Olketa change no kamap saed long organization and teaching nomoa bat saed long Christian fasin tu. Olsem example, long 1973 olketa luksavve hao wei for smoke hem mekem ‘body kamap dirty,’ and kongregeson bae ting long diswan olsem wanfala big rong. (2 Corinthians 7:1) Tenfala year bihaen, The Watchtower bilong July 15, 1983, hem mekem iumi minim moa klia wei wea iumi shud ting long olketa samting for faet. Olketa hia samfala example nomoa bilong wei wea laet kakamap moa braet long taem bilong iumi.
Gohed for Wakabaot Long Road wea Laet Kakamap Moa Braet
21. Wei for garem wanem tingting nao bae helpem iumi for gohed for wakabaot long road wea laet kakamap moa braet?
21 Wanfala brata wea elder for longfala taem hem sei: “Maet samfala taem wei for acceptim and followim wanfala change hem no isi.” Wanem nao helpem hem for acceptim staka change wea kamap insaed 48 year wea hem wanfala pablisa bilong Kingdom? Hem sei: “Wanfala main samting hem for garem stretfala tingting. For no acceptim wanfala change hem minim man stap long sem ples bat organization muv ahed. Sapos mi faendem hem hard lelebet for acceptim samfala change, mi ting raonem disfala toktok bilong Peter for Jesus: ‘Lord, hu nao bae mifala go long hem? Iu storyim olketa samting wea bae mekem man kasem laef olowe.’ Then mi askem miseleva olsem: ‘Wea nao bae mi go—bae mi go aotsaed long darkness bilong disfala world?’ Diswan helpem mi for hol strong long organization bilong God.”—John 6:68.
22. Wanem gudfala samting nao iumi kasem taem iumi wakabaot insaed long laet?
22 World wea stap raonem iumi hem stap long bigfala darkness. Taem Jehovah gohed for shaenim kam laet long pipol bilong hem, wei wea olketa difren from world hem kamap moa big. Wanem nao disfala laet hem duim for iumi? Tru nao, wei for torchim wanfala hol long road bae no aotem datfala hol, olsem tu, laet from Word bilong God hem no aotem olketa trap. Nomata olsem, laet from God hem barava helpem iumi for stap klia long olketa mekem iumi savve gohed for wakabaot long road wea laet kakamap moa braet. So, iumi mas gohed for lisin gud long profesi toktok bilong Jehovah “wea hem olsem wanfala lamp wea shaen long ples wea dark.”—2 Peter 1:19.
Waswe, Iu Remember?
• Wanem change long organization nao Jehovah mekem for pipol bilong hem?
• Laet wea kakamap moa braet hem mekem wanem change kamap saed long teaching?
• Wanem change nao iuseleva lukim, and wanem nao helpem iu for acceptim olketa?
• Why nao iu laek for gohed wakabaot long road bilong laet wea kakamap moa braet?
[Piksa long page 19]
Convention long Cedar Point, Ohio, long 1922, hem strongim olketa Bible Student for duim waka bilong God
[Piksa long page 21]
Long 1950, N. H. Knorr releasem “New World Translation of the Christian Greek Scriptures”
[Piksa Credit Line long page 18]
© 2003 BiblePlaces.com