Followim Step Witim Organization Bilong Jehovah
“Letem God bilong peace . . . redyim iufala witim evri gudfala samting for duim will bilong hem.”—HEBREWS 13:20, 21.
1. Wanem nao population bilong world, and haomas pipol nao member bilong olketa difren religion?
LONG year 1999, population bilong world hem kasem six billion! Long datfala namba, The World Almanac talem iumi hao 1,165,000,000 olketa Muslim, 1,030,000,000 olketa Roman Catholic; 762,000,000 olketa Hindu; 354,000,000 olketa Buddhist; 316,000,000 olketa Protestant; and 214,000,000 olketa Orthodox.
2. Wanem nao iumi savve talem abaotem samting wea go ahed saed long religion distaem?
2 From wei for divaed saed long religion and wei for konfius wea stap distaem, waswe, evri million pipol hia duim samting followim will bilong God? Nomoa, “from God hem wanfala God, no bilong enihao, bat bilong peace.” (1 Corinthians 14:33) Long narasaed, waswe long olketa servant bilong Jehovah wea olsem famili evriwea long world? (1 Peter 2:17) Sapos iumi lukluk gud, bae iumi lukim hao ‘God bilong peace redyim olketa witim evri gudfala samting for duim will bilong hem.’—Hebrews 13:20, 21.
3. Wanem nao happen long Jerusalem long Pentecost 33 C.E., and why nao olsem?
3 Tru, namba wea kaban witim Olketa Jehovah’s Witness hem no mark for luksavve sapos God appruvim olketa or nomoa; and namba bilong olketa no minim God acceptim olketa tu. Hem no chusim olketa Israelite bikos olketa nao “barava staka” winim evri nara pipol. For tok stret, olketa nao “barava smol” long evriwan. (Deuteronomy 7:7) Bat, bikos Israel no faithful, long Pentecost 33 C.E., Jehovah tanem interest bilong hem long niufala kongregeson bilong olketa follower bilong Jesus Christ. Holy spirit bilong Jehovah anointim olketa and olketa strong for talemaot truth abaotem God and Christ long nara pipol.—Acts 2:41, 42.
Muv Ahed Evritaem
4. Why nao iu savve sei Christian kongregeson bifor hem muv ahed evritaem?
4 Insaed first century, datfala Christian kongregeson go ahed for muv ahed, openem olketa niu territory, mek disaepol, and kasem moa savve abaotem olketa purpose bilong God. Olketa Christian bifor followim spiritual laet wea muv ahed wea kamaot insaed long olketa leta wea God muvim olketa for raetem. Visit bilong olketa aposol and samfala moa encouragem olketa for barava fulfillim ministry bilong olketa. Record abaotem evri samting hia stap insaed long olketa Christian Greek Scripture.—Acts 10:21, 22; 13:46, 47; 2 Timothy 1:13; 4:5; Hebrews 6:1-3; 2 Peter 3:17, 18.
5. Why nao organization bilong God hem muv ahed distaem, and why nao iumi mas followim step witim datwan?
5 Olsem olketa first-century Christian, olketa Witness bilong Jehovah tuday start from smolfala sekson nomoa. (Zechariah 4:8-10) From end bilong mek-19 century, olketa klia pruv hem stap hao spirit bilong Jehovah stap long organization bilong hem. Bikos iumi depend, no long paoa bilong man, bat long gaedens bilong holy spirit, iumi evritaem muv ahed long savve bilong iumi abaotem Bible and wei for duim will bilong God. (Zechariah 4:6) From iumi stap insaed “olketa last day” distaem, hem important tumas for iumi followim step witim organization bilong Jehovah wea muv ahed. (2 Timothy 3:1-5) Wei for duim olsem mekem iumi keepim hope bilong iumi laef and bae iumi savve strong for share for givim witness abaotem Kingdom bilong God, bifor end hem kasem disfala system.—Matthew 24:3-14.
6, 7. Bae iumi lukluk long wanem thrifala area wea organization bilong Jehovah hem muv ahed long hem?
6 Midolwan long iumi hem olketa wea start for kaban witim organization bilong Jehovah long olketa year bilong 1920, 1930, and 1940. Long datfala taem, hu nao savve tingim hao organization bae grow big olsem and muv ahed gud tumas kam kasem distaem? Tingim olketa barava important step wea happen long history bilong iumi distaem! Tru nao, iumi kasem spiritual reward taem iumi ting raonem olketa samting wea Jehovah duim thru long pipol bilong hem wea organize long theocratic wei.
7 Taem David bilong bifor tingim olketa nambawan waka bilong Jehovah, diswan barava affectim hem. Hem sei: “Sapos mi laek for talem and tok abaotem olketa, olketa staka tumas for mi storyim.” (Psalm 40:5) Iumi feisim sem problem tu, from iumi no fit for storyim planti bigfala and nambawan samting wea Jehovah duim long taem bilong iumi. Nomata olsem, letem iumi lukluk long thrifala area wea organization bilong Jehovah hem muv ahed: (1) laet bilong truth wea kamap moa braet, (2) wanfala ministry wea kamap moabeta and moa big, and (3) olketa change long wei for duim samting long organization wea kamap long barava taem.
Hapi Tumas for Spiritual Savve
8. For fitim Proverbs 4:18, wanem nao spiritual savve mekem iumi fit for luksavve long saed bilong Kingdom?
8 Long saed bilong spiritual savve wea kamap moa big, samting wea Proverbs 4:18 talem hem happen. Hem sei: “Road bilong olketa raeteous wan hem olsem braet laet wea kamap moa strong go kasem taem bilong full daylaet.” Iumi hapi tumas long spiritual savve wea kamap moa big wea iumi kasem! Long datfala convention long Cedar Point, Ohio, long 1919, olketa mekhae long Kingdom bilong God. Disfala Kingdom nao Jehovah hem iusim for mekem nem bilong hem kamap holy and for barava showimaot olmaeti rul bilong hem. Tru nao, spiritual savve hem mekem iumi fit for luksavve hao start from Genesis go kasem lastfala buk, Revelation, olketa Scripture wea kam from God givim witness abaotem purpose bilong Jehovah God, for mekem nem bilong hem kamap holy thru long Kingdom wea Son bilong hem bae rulim. Long datwan nao nambawan hope bilong evriwan wea lovem raeteous samting hem stap.—Matthew 12:18, 21.
9, 10. Long olketa year bilong 1920, wanem nao olketa lanem abaotem Kingdom and abaotem tufala difren organization wea againstim each other, and hao nao diswan hem helpem iumi?
9 Long Cedar Point convention, long 1922, main speaker, J. F. Rutherford, encouragem pipol bilong God for “talemaot, talemaot, talemaot, datfala King and kingdom bilong hem.” Insaed long article “Datfala Nation Hem Born,” wea kamaot long English Wastaoa bilong March 1, 1925, hem storyim spiritual savve abaotem olketa profesi wea point go long taem wea Kingdom bilong God hem start long 1914. Long olketa year bilong 1920 tu, olketa start for luksavve hao tufala difren and opposite organization nao stap—bilong Jehovah and bilong Satan. Faet hem go ahed midolwan long tufala, and iumi bae stap long saed wea win only sapos iumi followim step witim organization bilong Jehovah.
10 Hao nao spiritual savve hia hem helpem iumi? From Kingdom bilong God and datfala King Jesus Christ tufala no part bilong world, iumi tu mas olsem. Taem iumi stap separate from world, iumi showimaot iumi long saed bilong truth. (John 17:16; 18:37) Taem iumi lukim olketa bigfala problem wea kasem disfala wicked system, iumi hapi tumas from iumi no part long organization bilong Satan! And iumi kasem nambawan samting from iumi stap sef long spiritual wei insaed long organization bilong Jehovah!
11. Wanem nem wea kam from Bible nao pipol bilong God tekem long 1931?
11 Long convention long Columbus, Ohio, long 1931, stretfala savve hem kamaot abaotem Isaiah 43:10-12. Olketa Bible Student tekem nem Olketa Jehovah’s Witness. Hem barava bigfala privilege for evriwan long iumi for talemaot nem bilong God mekem nara pipol savve kol long nem bilong hem for mekem olketa savve sev!—Psalm 83:18; Romans 10:13.
12. Wanem spiritual savve abaotem datfala big crowd nao kamaot long 1935?
12 Bifor olketa year bilong1930, planti long pipol bilong God no really sure abaotem hope bilong olketa for future. Samfala garem tingting abaotem laef long heven bat long semtaem olketa interest tumas long olketa Bible teaching abaotem wanfala paradaes earth. Long Washington, D.C. convention long 1935, olketa hapi tumas for herem hao datfala bigfala sekson, or datfala big crowd bilong Revelation chapter 7 hem wanfala sekson witim hope for stap long earth. From datfala taem hipap bilong datfala big crowd hem muv ahed witim bigfala speed. Waswe, iumi thankiu hao datfala big crowd hem no secret samting long iumi? Wei wea iumi barava lukim hao staka pipol hipap kam from evri kantri, tribe, and languis, hem muvim iumi for waka hard for followim step witim organization bilong Jehovah.
13. Wanem bigfala kwestin nao olketa mekhae long hem long St. Louis convention long 1941?
13 Bigfala kwestin wea evri man shud barava interest long hem nao kamaot long convention long 1941 long St. Louis, Missouri. Hem hu nao garem olmaeti rul, or paoa ovarem full universe? Diswan nao hem kwestin wea mas klosap kasem ansa long datfala big day bilong fraet wea kam kwiktaem! Nara kwestin wea kamaot klia long 1941 tu hem nao wan wea join witim faithful fasin, wea letem iumi wanwan for showimaot wanem nao iumi disaedem saed long olmaeti rul bilong God.
14. Long international convention long 1950, wanem nao olketa lanem abaotem olketa prince wea Isaiah 32:1, 2 hem story abaotem?
14 Long 1950 international convention long New York City, mining bilong olketa prince bilong Isaiah 32:1, 2 hem barava showaot. Hem barava spesol samting taem Brata Frederick Franz storyim datfala subject and minim hao olketa wea savve kamap olketa prince long niu earth olketa stap midolwan long iumi distaem. Long datfala convention and olketa wea kamap bihaen, planti spiritual laet sutaot. (Psalm 97:11) Iumi tinghae tumas long wei wea road bilong iumi “hem olsem braet laet wea kamap moa and moa strong”!
Muv Ahed Long Ministry Bilong Iumi
15, 16. (a) Hao nao iumi muv ahed long ministry bilong iumi long olketa year bilong 1920 and 1930? (b) Olketa wanem pablikeson nao mekem Christian ministry bilong iumi insaed olketa year wea go pas hem muv ahed?
15 Mek-tu wei wea organization hem muv ahed hem saed long main waka bilong iumi—for preach abaotem Kingdom and for mek disaepol. (Matthew 28:19, 20; Mark 13:10) For duim disfala waka, organization hem evritaem givim reminder hao hem important for mekem ministry waka bilong iumi kamap moa big. Long year 1922, olketa encouragem evri Christian for tekpart long preaching waka. Hem saed bilong man wanwan for letem laet bilong hem shaen and tekpart seleva insaed disfala waka for witness abaotem truth. (Matthew 5:14-16) Long 1927, olketa mekem arrangement for markem Sunday olsem day for duim field service. Start long February 1940, planti pipol start for lukim olketa Witness go ahed for offerim Wastaoa and Consolation magasin (distaem Wekap!) long olketa street long bisnis area.
16 Long year 1937, olketa releasem wanfala buklet Model Study, wea mekhae long need for duim return visit mekem olketa savve teachim Bible truth long nara pipol. Long olketa year bihaen, olketa barava strongim wei for duim Bible study. Olketa strongim disfala part bilong ministry moa witim buk “Let God Be True” long 1946 and Truth Where Bringim Man Long Life All-the-way long 1968. Distaem iumi iusim disfala buk Savve Wea Lead Go long Laef Olawe. Wei for studyim olketa buk hia hem putim strongfala faondeson bilong Bible for mek disaepol.
Muv Ahed Long Saed for Kamap Moabeta Long Wei for Organize
17. For followim Isaiah 60:17, hao nao organization bilong Jehovah hem muv ahed?
17 Mek-thri area bilong iumi hem long saed for kamap moabeta long wei for organize. Long Isaiah 60:17, datfala profet talem olketa toktok bilong Jehovah: “Winim copper mi bae tekem kam gold, and winim iron mi bae tekem kam silver, and for changem wood, copper, and for changem olketa ston, iron; and mi bae appointim peace olsem olketa overseer bilong iufala and raeteous fasin olsem olketa man for givim waka for iufala.” For followim disfala profesi, samfala change kamap for mekem wei for lukaftarem waka for preachim Kingdom and shepherdim olketa sheep hem kamap moabeta.
18, 19. Wanem wei for moabeta for organize nao hem kamap insaed long olketa year?
18 Long 1919, wanfala service director kasem appointment insaed evri kongregeson wea askem Society for organizem olketa for duim field service. Diswan strongim moa waka long field. Wei for electim olketa elder and deacon long olketa kongregeson hem finis long 1932, wea finisim wei for followim olketa democratic wei. Narafala barava important samting kamap long 1938 taem Society nao start for appointim evri servant long kongregeson for followim long klos wei moa olketa arrangement bilong theocratic appointment long first Christian kongregeson. (Acts 14:23; 1 Timothy 4:14) Long 1972, olketa overseer and ministerial servant kasem appointment for serve, olsem olketa man duim midolwan long olketa first Christian. Winim wei for wanfala man nao bae serve olsem overseer long kongregeson, Philippians 1:1 and olketa nara scripture showimaot hao olketa wea kasem mark bilong Bible for kamap overseer bae kamap wanfala sekson bilong olketa elder.—Acts 20:28; Ephesians 4:11, 12.
19 Long 1975 wanfala arrangement hem kamap for olketa komiti bilong Governing Body bilong Olketa Jehovah’s Witness for lukaftarem waka bilong organization bilong God raonem world. Olketa appointim olketa Branch Komiti for lukaftarem waka insaed territory bilong olketa. Start from datfala taem olketa waka hard for mekem waka hem isi long headquarter and long olketa branch office bilong Watch Tower Society for mekem olketa savve “mek sure long olketa samting wea moa important.” (Philippians 1:9, 10) Insaed long olketa responsibility wea stap long shoulder bilong olketa anda-shepherd bilong Christ hem for tekem lead saed long preaching waka, teach insaed long kongregeson, and shepherdim gud olketa sheep bilong God.—1 Timothy 4:16; Hebrews 13:7, 17; 1 Peter 5:2, 3.
Jesus Duim Samting for Lead
20. Wanem nao iumi mas luksavve abaotem position bilong Jesus, for followim step witim organization bilong Jehovah?
20 For followim step witim organization bilong Jehovah wea muv ahed, iumi need for luksavve long position wea God givim long Jesus Christ olsem “hed bilong kongregeson.” (Ephesians 5:22, 23) Important samting tu hem wanem Isaiah 55:4 hem talem iumi: “Lukim! Mi [Jehovah] givim hem olsem wanfala witness for olketa nation, olsem wanfala leader and komanda long olketa nation.” Jesus savve hao for lead. Hem savve tu long olketa sheep bilong hem and wanem olketa duim. Tru nao, taem hem lukluk long sevenfala kongregeson long Asia Minor, faevfala taem hem sei: “Mi savve long olketa samting iu duim.” (Revelation 2:2, 19; 3:1, 8, 15) Jesus savve tu long olketa need bilong iumi, olsem Dadi bilong hem, Jehovah. Bifor hem givim datfala example prea, Jesus hem sei: “God wea hem Dadi bilong iufala, hem savve finis long evri samting wea iufala needim bifor iufala askem hem.”—Matthew 6:8-13.
21. Hao nao wei wea Jesus lead hem showaot long Christian kongregeson?
21 Hao nao wei wea Jesus hem lead hem showaot? Wanfala wei hem thru long olketa Christian overseer, olketa “present olsem man.” (Ephesians 4:8) Revelation 1:16 showimaot olketa anointed overseer stap insaed long raet hand bilong Christ, anda long kontrol bilong hem. Distaem, Jesus leadim arrangement bilong olketa elder, nomata olketa man hia garem hope for go long heven or stap long earth. Olsem article bifor diswan storyim, olketa kasem appointment thru long holy spirit fitim olketa mark bilong Bible. (1 Timothy 3:1-7; Titus 1:5-9) Long first century, wanfala grup bilong olketa older man long Jerusalem waka olsem wanfala governing body wea lukaftarem olketa kongregeson and waka for preachim Kingdom. Diswan hem example insaed Bible wea organization bilong Jehovah hem followim tuday.
Followim Step!
22. Wanem help nao Governing Body provaedem?
22 Olketa samting bilong Kingdom long earth stap anda long kea bilong “faithful and wise slave,” wea Governing Body bilong Olketa Jehovah’s Witness stand for hem. (Matthew 24:45-47) Main waka bilong Governing Body hem for provaedem spiritual teaching and direction for Christian kongregeson. (Acts 6:1-6) Bat, taem natural disaster kasem olketa brata, Governing Body askem wanfala or moa legal corporation for provaedem help and for repairim or buildim moa olketa haos and Kingdom Hall wea damage. Sapos pipol deal long raf wei or persecutim samfala Christian, olketa duim samting for buildimap olketa long spiritual wei. And long “hardfala taem,” olketa duim best for mekem preaching waka for muv ahed.—2 Timothy 4:1, 2.
23, 24. Nomata wanem samting kasem pipol bilong hem, wanem nao Jehovah evritaem provaedem, and wanem nao iumi shud disaed strong for duim?
23 Nomata wanem samting kasem pipol bilong hem, Jehovah evritaem provaedem spiritual kaikai and direction wea olketa needim. God givim tu fasin for luksavve long olketa brata wea garem responsibility for redyim wei for muv ahed and kamap moabeta long theocratic wei for organize. (Deuteronomy 34:9; Ephesians 1:16, 17) Jehovah nating fail for provaedem samting wea iumi needim for mek disaepol and for duim ministry bilong iumi evriwea long world.—2 Timothy 4:5.
24 Iumi savve garem full trust hao Jehovah bae no lusim faithful pipol bilong hem; hem bae sevem olketa thru long datfala “big trabol” wea bae kam. (Revelation 7:9-14; Psalm 94:14; 2 Peter 2:9) Iumi garem evri reason for keepim trust wea iumi garem long firstaem go kasem end. (Hebrews 3:14) So, letem iumi disaed strong for followim step witim organization bilong Jehovah.
Hao Nao Bae Iu Ansa?
• Why nao iumi savve sei organization bilong Jehovah hem muv ahed evritaem?
• Wanem pruv nao showaot pipol bilong God enjoyim spiritual savve wea kamap moa big?
• Hao nao Christian ministry hem kamap moabeta?
• Wanem change nao kamap long barava taem long wei for organize midolwan olketa servant bilong Jehovah?
[Piksa long page 17]
Olsem David, iumi no savve tingim evri nambawan waka bilong Jehovah
[Piksa long page 18]
Olketa sheep bilong God kasem gud samting from olketa change wea kamap long barava taem long wei for organize