Jehovah Hem Hapi Taem Iu Faithful Long Hem
“Son bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.”—PROV. 27:11.
1, 2. (a) Buk bilong Job showimaot Satan mekem wanem test kamap? (b) Nomata Job dae finis, wanem nao showimaot Satan gohed tok spoelem Jehovah?
JEHOVAH letem Satan testim Job for lukim sapos hem bae faithful long God or nomoa. Taem Satan testim Job, pipol stealim and killim dae olketa animal bilong hem, olketa pikinini bilong hem dae, and hem kasem nogud sik. Bat taem Satan testim Job, hem no tingting for spoelem Job nomoa. Hem laek spoelem tu evri nara man. Satan hem sei: “Man bae givim skin for changem skin, and hem bae givim evri samting wea hem garem for sevem laef bilong hem.” Nomata Job dae finis, kam kasem distaem Satan gohed for testim pipol for lukim sapos olketa bae faithful long God or nomoa.—Job 2:4.
2 Samting olsem 600 year bihaen Job kasem olketa test, Jehovah mekem Solomon for talem olsem: “Son bilong mi, duim samting wea wise, and mekem heart bilong mi hapi, mekem mi savve givim ansa long datwan wea tok daonem mi.” (Prov. 27:11) Nomata long taem bilong Solomon tu, Satan gohed for talem hao Jehovah no fit for rulim olketa man. Aposol John tu lukim long vision hao bihaen Jesus kamap King long heven long 1914 and aotem Satan from heven, hem gohed yet for tok spoelem pipol wea worshipim God. Tru tumas, nomata iumi stap long olketa last day wea gogo for finis and wea nogud tumas, Satan gohed yet for testim pipol bilong God for lukim sapos olketa bae faithful long God or nomoa!—Rev. 12:10.
3. Wanem nao samfala important samting wea iumi savve lanem from buk bilong Job?
3 Tingim thrifala important samting wea iumi savve lanem from buk bilong Job. First wan, olketa test wea Job kasem showimaot hu nao enemy bilong iumi olketa man and hu nao againstim pipol bilong God. Hem nao Satan. Mek-tu, sapos iumi fren gud witim God, iumi bae gohed for faithful long hem nomata iumi kasem hard taem. Mek-thri, God helpem Job so iumi savve hem bae helpem iumi tu taem iumi kasem test or hard taem. Distaem, Jehovah givim kam Bible, organization bilong hem, and holy spirit for helpem iumi.
Luksavve Hu Nao Enemy Bilong Iumi
4. Hu nao bihaenem olketa nogud samting long world?
4 Staka pipol tingse Satan no stap. Nomata olsem, staka seke long olketa nogud samting wea gohed long world, bat olketa no luksavve Satan nao bihaenem olketa samting hia. Hem tru, olketa man tu duim staka samting wea spoelem nara pipol. Adam and Eve wea firstfala dadi and mami bilong iumi, no laekem God for rulim tufala. So start kam long datfala taem, evri man wea born kam duim samting wea no stret nao. Bat hem important for luksavve Satan nao laea long Eve and mekem hem no obeyim God. Satan nao mekem kamap disfala world wea hem rulim. Hem nao world bilong olketa man wea born sin wea bae dae. From Satan hem “god bilong disfala world,” pipol showimaot tu olketa sem wei olsem hem. Olketa praod, raoa, jealous, and duim samting wea olketa seleva nomoa laekem, laea, and bighed. (2 Cor. 4:4; 1 Tim. 2:14; 3:6; readim James 3:14, 15.) Taem olketa man garem olketa wei olsem, raoa savve kamap long gavman and religion, olketa heitim narawan, raverave and olobaot nomoa. Evri samting hia mekem olketa man kasem nogud samting.
5. From iumi garem spesol savve, wanem nao iumi laek duim?
5 Iumi wea worshipim Jehovah garem spesol savve! Tru nao, iumi savve hu nao mekem evri samting long world for gogo nogud tumas. Dastawe iumi laek tumas for go preach and for talem pipol abaotem hu nao main enemy bilong iumi olketa man. And iumi hapi tumas for duim samting wea showimaot iumi saedem trufala God, Jehovah, and talem long pipol wanem Jehovah bae duim for finisim Satan and olketa nogud samting wea kasem iumi olketa man!
6, 7. (a) Hu nao bihaenem olketa wea againstim pipol bilong God? (b) Wanem nao iumi savve duim for showimaot iumi followim wei bilong Elihu?
6 Satan nao bihaenem staka nogud samting wea kasem olketa man and hem tu bihaenem olketa wea againstim pipol bilong God. Satan laek testim iumi. Jesus Christ talem aposol Peter olsem: “Simon, Simon, iu savve, Satan hem sei hem laek for separatem iufala olsem man hem separatem wheat from skin bilong hem.” (Luke 22:31) Iumi wea followim Jesus bae kasem hard taem tu. Peter storyim Satan hem olsem “lion wea singaot bigfala, from hem lukaotem eniwan for hem kaikaim.” Paul hem sei: “Evriwan wea laek gohed for lovem God and wea followim Christ Jesus tu pipol bae spoelem olketa.”—1 Pet. 5:8; 2 Tim. 3:12.
7 Taem nogud samting kasem wanfala brata or sista, iumi savve hem no Jehovah wea duim datwan. Iumi luksavve Satan nao enemy bilong iumi. Iumi bae no les long brata or sista bilong iumi, bat iumi bae duim sem samting wea Elihu duim for Job. Hem story gud long Job olsem gudfala fren bilong hem. Iumi bae helpem disfala brata or sista for againstim Satan. (Prov. 3:27; 1 Thess. 5:25) Nomata maet hem hard, iumi laek helpem brata or sista hia for gohed faithful long God. Sapos iumi duim datwan, Jehovah bae hapi long hem.
8. Why nao Satan no fit for mekem Job no faithful long Jehovah?
8 First samting wea Satan duim long Job nao, hem mekem pipol for stealim and killim dae olketa animal bilong hem. Sapos olketa animal hia laef, Job fit for tekem big selen for helpem hem long living bilong hem. Hem savve sakrifaesim olketa animal tu. Bihaen hem redyim olketa pikinini bilong hem, “hem wekap long early morning yet, and mekem olketa sakrifaes wea hem bonem fitim olketa, from Job hem sei, ‘maet olketa son bilong mi sin and tok spoelem God insaed long heart bilong olketa.’ Hem nao wanem Job duim evritaem.” (Job 1:4, 5) So evritaem nao Job sakrifaesim olketa animal long Jehovah. Bat taem Job kasem test, hem no savve duim datwan nao. Job no garem eni “gudfala samting” for hem iusim for mekhae long Jehovah. (Prov. 3:9) Bat hem savve mekhae long Jehovah long toktok bilong hem and hem duim datwan!
Barava Fren Gud Witim Jehovah
9. Wanem nao barava important tumas long iumi?
9 Iumi savve barava fren gud witim Jehovah nomata sapos iumi rich, poor, young, olo, sik, or no sik. Sapos iumi fren gud witim God, nomata iumi kasem olketa test, iumi savve gohed faithful long hem and mekem hem hapi. Nomata samfala wea garem lelebet savve nomoa abaotem truth, olketa nating fraet bat gohed faithful long Jehovah.
10, 11. (a) Taem Valentina kasem test for gohed faithful long God, wanem nao hem duim? (b) Long wanem wei nao hem givim ansa long Satan?
10 Tingim samting wea kasem Sista Valentina Garnovskaya. Hem wanfala Witness long Russia wea faithful long God olsem Job tu nomata hem kasem samfala big test. Long 1945, taem hem 20 year, wanfala brata preach long hem. Brata hia kam bak for lukim hem tufala taem moa for story abaotem Bible, bat bihaen datwan, hem no lukim brata hia nao. Nomata olsem, Valentina start preach long olketa neiba bilong hem. Olketa police putim hem long prison for eitfala year. Long 1953, bihaen hem kamaot from prison, hem preach moa. So olketa police putim hem moa long prison for tenfala year. Hem stap long prison for samfala year, then olketa muvim hem go long nara prison moa. Samfala sista stap long prison hia tu and olketa garem wanfala Bible. Wantaem wanfala sista showim long Valentina Bible hia. Valentina hapi tumas! Datwan nao mek-tu Bible wea hem lukim. Firstfala Bible wea hem lukim nao hem bilong brata wea preach long hem long 1945!
11 Long 1967, Valentina kamaot from prison and hem baptaes for showimaot hem dedicate long Jehovah. Hem iusim gud taem wea hem garem for preach go kasem 1969. Bat long datfala year, olketa police putim hem moa long prison for thrifala year. Nomata olsem, Valentina gohed preach nomoa. Hem helpem 44 pipol for savve long truth bifor hem dae long 2001. Hem stap long prison for 21 year. Hem willing for lusim evri samting mekem hem savve gohed faithful long Jehovah. No longtaem bifor Valentina dae, hem tok olsem: “Mi nating garem eni haos. Evri samting wea mi garem stap long wanfala suitcase nomoa. Nomata olsem, mi hapi nomoa for worshipim Jehovah.” Valentina givim gudfala ansa long Satan wea hem sei no eni man bae gohed faithful long God taem hem kasem hard taem! (Job 1:9-11) Tru tumas, Jehovah hapi long Valentina. Hem laek tumas for mekem Valentina laef bak moa witim olketa narawan wea faithful go kasem taem olketa dae.—Job 14:15.
12. Long wanem wei nao love helpem iumi for fren gud witim Jehovah?
12 Iumi fren witim Jehovah bikos iumi lovem hem. Iumi tinghae long olketa wei bilong God and iumi duim olketa samting wea followim plan bilong hem. Iumi lovem Jehovah, no bikos hem nao forcem iumi, bat from iumiseleva nao laek lovem hem. Datwan hem difren from wanem Satan hem talem abaotem iumi. Taem iumi lovem God, datwan nao strongim iumi for gohed faithful long hem taem iumi kasem test. Jehovah “bae protectim olketa wea faithful long hem long gogo bilong olketa.”—Prov. 2:8; Ps. 97:10.
13. Taem iumi duim samting for worshipim Jehovah, hem ting hao long datwan?
13 Sapos iumi lovem Jehovah, iumi bae praisem nem bilong Jehovah nomata sapos iumi tingse iumi no fit for duim staka samting for worshipim hem. Hem luksavve taem iumi laek duim gud samting. Hem no judgem iumi sapos iumi no savve duim staka samting wea iumi laek duim for hem. Hem important for iumi tingim wanem nao iumi duim and wanem nao mekem iumi duim datfala samting. Nomata Job kasem staka nogud samting and hem barava sorre tumas, hem storyim long olketa wea tok spoelem hem hao hem laekem tumas olketa wei bilong Jehovah. (Readim Job 10:12; 28:28.) Long Job chapter 42, God talem hem kros long Eliphaz, Bildad, and Zophar bikos olketa no tok tru. Bat Jehovah hapi long Job. Fofala taem nao Jehovah sei Job hem ‘wakaman bilong hem.’ Hem talem Job tu for prea for olketa man hia wea kam lukim hem. (Job 42:7-9) Iumi tu laek for duim samting wea bae mekem Jehovah hapi long iumi.
Jehovah Strongim Olketa wea Faithful Long Hem
14. Wanem nao Jehovah duim for helpem Job stretem tingting bilong hem?
14 Nomata Job hem man wea sin, hem gohed for faithful long God. Job no tingting stret taem hem kasem hard taem. Wantaem hem tok olsem long Jehovah: “Mi krae go long iu bat iu nating ansarem mi nomoa . . . And witim full strong bilong iu, iu showimaot iu barava les long mi.” Job mekhae tumas long hemseleva taem hem sei: “Mi nating duim eni nogud samting.” Hem talem tu: “Mi no man for faet, and mi prea long stretfala wei.” (Job 10:7; 16:17; 30:20, 21) Nomata olsem, Jehovah story gud witim Job for helpem hem. God askem Job samfala kwestin wea mekem hem for no tingim hemseleva tumas bat for hem luksavve God nao hae winim evri man. Job hapi taem God kaonselem hem and Job stretem tingting bilong hem.—Readim Job 40:8; 42:2, 6.
15, 16. Wanem nao Jehovah givim long pipol bilong hem distaem for helpem olketa?
15 Jehovah givim gudfala advaes for helpem pipol bilong hem distaem tu. And iumi kasem samfala nambawan samting. Wanfala nao, Jesus Christ givim laef bilong hem for iumi mekem God savve forgivim iumi. From Jesus duim datwan, iumi savve fren gud witim God nomata iumi born sin. (Jas. 4:8; 1 John 2:1) Nara wei nao, taem iumi kasem test, iumi savve prea for holy spirit bilong God for strongim iumi. Nara samting tu, iumi garem Bible. Sapos iumi readim and ting raonem wanem iumi readim, datwan savve redyim iumi for eni test wea iumi bae kasem. Taem iumi duim study seleva, iumi savve minim why nao God nomoa fit for rulim iumi and why nao iumi mas faithful long hem.
16 Nara samting wea Jehovah givim for helpem iumi tu, iumi lanem gud samting long olketa buk wea “datfala wakaman wea faithful and wise” givim long iumi, and iumi garem staka brata and sista long full world. (Matt. 24:45-47) Long samting olsem 100 thousand kongregeson bilong Olketa Jehovah’s Witness long full world, iumi garem olketa meeting wea strongim iumi for gohed faithful taem iumi kasem test. Long next paragraf, iumi bae story abaotem Sheila wea hem wanfala Witness wea stap long Germany taem hem 15 year.
17. Wanem gud samting nao wanfala gele kasem from hem go evritaem long meeting?
17 Wantaem long class bilong Sheila, olketa student nomoa stap. So olketa student hia plei witim Ouija board, wea hem bilong devildevil. Long taem hia nomoa, Sheila lusim classrum nao. Taem hem herem samting wea happen bihaen, hem hapi tumas nao hem no stap long class. Taem olketa student plei witim Ouija board, samfala student sei olketa demon kam and olketa student ranawe krangge olobaot nao. Why nao Sheila lusim classrum kwiktaem? Sheila hem sei: “No longtaem go nomoa, long wanfala meeting long Kingdom Hall, mi herem tok wea storyim hao iumi mas no iusim Ouija board. So mi savve nao wanem for mi duim. Mi laek for duim samting wea Jehovah hapi long hem, olsem Bible talem long Proverbs 27:11.” Hem barava gud tumas Sheila go long meeting and herehere gud long datfala tok!
18. Wanem nao iu barava laek for duim?
18 Hem gud for iumi evriwan followim wanem organization bilong God talem for iumi duim. Iumi mas go long meeting evritaem, readim Bible, study seleva long olketa buk bilong iumi, prea, and fren witim olketa strong brata and sista. Taem iumi duim olketa samting hia, iumi bae kasem kaonsel for helpem iumi and strongim iumi. Jehovah laekem iumi for gohed faithful long hem. Hem trustim hao iumi savve faithful long hem. Tru tumas, iumi wanwan savve praisem nem bilong Jehovah, gohed faithful long hem, and duim samting wea hem hapi long hem!
Waswe, Iu Tingim Yet?
• Satan hem bihaenem wanem test and wanem nogud samting?
• Wanem nao barava important tumas long iumi?
• Wanem nao savve helpem iumi for fren gud witim Jehovah?
• Wanem nao Jehovah givim for helpem pipol bilong hem distaem?
[Piksa long page 8]
Waswe, iu laek tumas for story long pipol abaotem spesol savve wea iu garem?
[Piksa long page 9]
Iumi savve helpem olketa brata and sista for gohed faithful long God
[Piksa long page 10]
Valentina willing for lusim evri samting mekem hem savve gohed faithful long Jehovah