No Herem Olketa Laea Story wea Kam From Satan
‘NO BILIVIM olketa laea story. God bilong iufala bae no helpem iufala. Sarenda nao or sapos nomoa bae iufala kasem nogud samting!’ Datwan nao samting wea Rabshakeh hem talem long olketa wea stap long Jerusalem. Rabshakeh hem wanfala man for story for King Sennacherib, bilong Assyria. Olketa army bilong king hia kam insaed long land bilong Judah. Rabshakeh hem story olsem for mekem olketa long Jerusalem for fraet and sarenda.—2 Ki. 18:28-35.
Pipol evriwea savve hao olketa long Assyria barava raf and duim staka nogud samting. Olketa hia talemaot nogud samting wea olketa duim long prisoner wea mekem olketa enemy for fraet. Philip Taylor hem wanfala man wea raet abaotem history bilong Assyria. Hem sei “olketa iusim wei for mekem pipol fraet and olketa laea story for mekem pipol wea olketa rulim for stap anda long kontrol bilong olketa.” Olketa laea story hem olsem samting for faet. Taylor talem hao kaen laea story olsem savve “spoelem tingting bilong man.”
Olketa tru Christian “insaed wanfala faet, wea iumi no faetem man, bat iumi faetem . . . olketa rabis spirit,” wea hem nao olketa nogud spirit wea bighed and againstim God. (Eph. 6:12) Satan nao main wan bilong olketa. Hem iusim tu wei for mekem pipol fraet and olketa laea story.
Satan talem hao hem savve mekem iumi evriwan for no faithful. Long taem bilong Job, Satan tok long Jehovah God and sei, “Man bae . . . givim evri samting wea hem garem for sevem laef bilong hem.” Datwan minim sapos man kasem bigfala hevi, gogo hem bae no faithful nao long God. (Job 2:4) Waswe, Satan tok tru? Waswe, iumi evriwan bae no faithful sapos hevi hem kamap big tumas or laef bilong iumi stap long danger? Satan laekem iumi for bilivim datwan. Dastawe hem laek iusim olketa laea story for isisi trikim and spoelem tingting bilong iumi. Iumi bae storyim nao samfala teknik bilong Satan and wanem iumi savve duim for no herem olketa laea story wea kam from hem.
Olketa “Kam From Dust Nomoa”
Satan iusim Eliphaz wea hem wanfala long olketa wea visitim Job, for storyim hao olketa man no savve faithful from olketa wik tumas. Eliphaz hem sei, “iumi kam from dust nomoa, dastawe, body bilong iumi hem olsem haos wea olketa wakem from graon! Olketa man isi for pisis nomoa winim wanfala butterfly. Start long morning go kasem evening olketa pisis and dae, and no eniwan tingim olketa for olowe.”—Job 4:19, 20.
Bible storyim hao iumi man, iumi olsem “clay pot” wea isi for brek bikos olketa wakem from graon. (2 Cor. 4:7) Iumi wik nomoa, bikos iumi born sin and no perfect. (Rom. 5:12) Sapos no eniwan helpem iumi, hem isi tumas nao for Satan attakim iumi. Bat from iumi olketa Christian, iumi kasem help from Jehovah. Nomata iumi wik, bat long tingting bilong God, iumi spesol tumas. (Isa. 43:4) And tu, Jehovah givim holy spirit long olketa wea askem datwan. (Luke 11:13) Datfala spirit savve givim iumi “strong wea winim wanem iumi garem,” wea mekem iumi winim eni hard taem wea Satan mekem kamap. (2 Cor. 4:7; Phil. 4:13) Sapos iumi stand strong againstim Satan and “strong long faith,” God bae barava strongim iumi. (1 Pet. 5:8-10) Dastawe, iumi no need for fraet long Satan.
Man “Laekem Olketa Samting wea No Raeteous”
Eliphaz story olsem: “Waswe, eni man wea born from woman savve klin or stret? Iu savve, God no trustim olketa holy wan bilong hem, and heven tu no klin long tingting bilong Hem. Hem barava hard for God trustim man wea barava nogud and no stret, and wea laekem olketa samting wea no raeteous olsem man wea laek drinkim wata!” (Job 15:14-16) Eliphaz talem long Job hao long tingting bilong Jehovah, no eni man hem raeteous. Satan tu mekius long wei for garem tingting wea no stret. Hem laekem iumi for warim olketa mistek wea iumi duim finis, for iumi ting daonem iumiseleva, and for tingse iumi no fit for kasem laef olowe. Hem laekem iumi for tingse, Jehovah expectim tumas samting from iumi and for ting daonem wei bilong Hem for forgivim sin, for showimaot mercy, and for sapotim iumi.
Hem tru, iumi evriwan “sin and no savve showimaot olketa nambawan wei bilong God.” No eni man wea sin savve kasem olketa perfect standard bilong Jehovah. (Rom. 3:23; 7:21-23) Bat datwan no minim iumi iusles long hem. Jehovah savve “datfala snek bilong bifor kam, datwan wea olketa kolem Devil and Satan,” hem nao laek spoelem iumi bikos iumi born sin. (Rev. 12:9, 10) From God no forgetim “iumi dust nomoa,” hem no “gohed for lukaotem rong evritaem.”—Ps. 103:8, 9, 14.
Sapos iumi lusim olketa rabis wei and barava askem Jehovah, hem “bae forgive long bigfala wei.” (Isa. 55:7; Ps. 51:17) Bible talem hao, nomata olketa sin bilong iumi “barava red, olketa bae kamap white olsem snow. Nomata olketa olsem redfala kaleko, olketa bae kamap olsem wool.” (Isa. 1:18) So iumi shud disaed strong for no givap taem iumi trae for duim wanem God laekem.
From iumi sin, iumiseleva nating savve kamap raeteous front long God. Adam and Eve lusim perfect laef and chance for laef olowe, no for tufala seleva nomoa, bat for iumi evriwan. (Rom. 6:23) Bat bikos Jehovah barava lovem olketa man, hem sendem Son bilong hem Jesus Christ, mekem God savve forgivim olketa sin bilong iumi sapos iumi showimaot faith long ransom sakrifaes. (Matt. 20:28; John 3:16) Tru nao, datwan hem showimaot God hem “barava kaen tumas”! (Titus 2:11) God savve forgivim olketa sin bilong iumi! Dastawe iumi shud no letem Satan for mekem iumi tingse God bae no forgivim sin bilong iumi.
“Trae Spoelem Body Bilong Hem”
Satan sei Job savve lusim faith bilong hem sapos health bilong hem nogud. Satan tok spoelem Jehovah olsem: “Iu trae spoelem body bilong hem and lukim sapos hem bae tok nogud long iu or nomoa.” (Job 2:5) Satan wea hem enemy bilong God, bae hapi sapos hem mekem iumi feel iusles bikos iumi garem problem saed long health.
Bat Jehovah no les long iumi nomata taem wea iumi no fit for duim staka samting for hem, olsem bifor. Waswe sapos pipol attakim wanfala fren bilong iumi and hem garekil? Waswe, bae iumi ting daonem hem nao, bikos hem no fit for duim staka samting olsem bifor? Nomoa nao! Iumi bae gohed for lovem and lukaftarem hem. Diswan hem tru tumas sapos hem garekil from hem trae for duim samting for iumi. Sapos olsem, hard tumas for Jehovah ting nating long iumi. Bible sei “God hem duim stret samting evritaem. Hem no forgetim waka wea iufala duim and love wea iufala showimaot for nem bilong hem.”—Heb. 6:10.
Bible story abaotem “wanfala widow woman wea poor tumas” wea maet hem sapotim trufala worship for staka year finis. Taem Jesus lukim datfala woman putim “tufala selen nomoa” long contribution box long temple, waswe, Jesus ting nating long hem and datfala contribution? Nomoa nao, bat hem praisem hem for sapotim trufala worship witim evri samting wea hem garem.—Luke 21:1-4.
Nomata iumi born sin, sapos iumi gohed faithful, iumi savve, no eni samting olsem wei for olo or sik bae spoelem wei wea iumi fren witim Jehovah. God bae nating lusim olketa wea faithful nomata olketa kasem problem wea mekem olketa no fit for duim staka samting for hem.—Ps. 71:9, 17, 18.
Acceptim “Helmet wea Sevem Man”
Long wanem wei nao iumi savve protectim iumiseleva from olketa laea story wea kam from Satan? Aposol Paul sei: “Gohed for kasem strong from Lord and from bigfala strong bilong hem. Werem evri samting for faet wea kam from God mekem iufala savve stand strong for againstim evri trik bilong Devil.” Wanfala part long evri samting hia nao hem “helmet wea sevem man.” (Eph. 6:10, 11, 17) Iumi mas acceptim datfala helmet wea sevem man and werem evritaem mekem datwan stopem olketa laea story bilong Satan. Helmet bilong wanfala soldia hem protectim hed bilong hem. “Hope wea iumi garem for sev,” and wei wea iumi trustim olketa promis bilong God abaotem nambawan niu world bae protectim tingting bilong iumi from olketa laea story bilong Satan. (1 Thess. 5:8) Iumi mas strongim hope bilong iumi taem iumiseleva studyim Bible long gudfala wei.
Job hem stand strong taem Satan attakim hem long nogud wei. Job barava bilivim hao hem savve laef bak nomata hem klosap for dae. Bat hem sei long Jehovah: “Iu bae kolem mi, and mi bae ansarem iu. Samting wea iu wakem, iu barava laek for lukim moa.” (Job 14:15) Job savve God lovem man wea faithful. So nomata hem dae from hem faithful, hem bae laef bak.
Hem gud tumas for iumi garem sem trust olsem Job long trufala God. Jehovah savve stretem eni samting wea Satan and olketa wea sapotim hem duim againstim iumi. Tingim tu, Paul strongim iumi taem hem sei, “God hem duim wanem hem promisim, and bae hem no letem eni samting traem iufala wea iufala no fit for winim. Bat taem eni samting hem traem iufala, bae hem mekem wei for iufala gohed strong and no givap.”—1 Cor. 10:13.
[Piksa long page 20]
Jehovah hem tinghae long faithful waka bilong iu
[Piksa long page 21]
Acceptim datfala helmet wea sevem man, and werem evritaem