Iumi Bae Gohed Faithful!
“Mi ia, mi bae gohed faithful.”—PS. 26:11.
1, 2. Wanem nao Job talem abaotem wei wea hem faithful, and wanem nao Job chapter 31 showimaot abaotem hem?
LONG bifor, pipol savve iusim scale for weim samting. Scale wea olketa iusim hem garem tufala saed wea garem basket long each saed wea hange long hem. Wansaed man putim samting wea hem laek weim and narasaed hem putim wanfala samting wea hem savve finis long hevi bilong hem. Datwan helpem hem for savve long hevi bilong samting wea hem laek weim. Pipol bilong God long datfala taem mas no raverave. Olketa mas iusim stretfala scale and samting for markem hevi bilong eni samting.—Prov. 11:1.
2 Job hem gudfala man wea followim olketa law bilong God. Taem Satan mekem Job kasem olketa nogud samting, Job sei: “[Jehovah] bae weim mi long stretfala scale and hem bae savve mi faithful.” (Job 31:6) Job storyim staka samting wea savve testim man wea faithful. Bat Job winim olketa test hia, olsem toktok bilong hem long Job chapter 31 showimaot. Gudfala example bilong Job savve helpem iumi for duim sem samting and for talem tu disfala toktok bilong David: “Mi ia, mi bae gohed faithful.”—Ps. 26:11.
3. Why nao iumi mas faithful long God long olketa big samting and smol samting?
3 Nomata Job kasem staka nogud samting, hem gohed faithful long God. Maet samfala pipol sei Job nao showimaot nambawan example long wei for faithful taem hem kasem olketa bigfala test. Iumi no barava safa olsem Job. Nomata olsem, for faithful long God and sapotim rul bilong hem, iumi mas faithful long olketa big samting and smol samting tu.—Readim Luke 16:10.
Iumi Mas Garem Gudfala Fasin
4, 5. Wanem nao Job no duim mekem hem gohed faithful?
4 For gohed faithful long Jehovah, iumi mas garem olketa fasin wea Jehovah hapi long hem, olsem Job duim. Job sei: “Mi mekem promis finis for no lukluk strong long eni gele and no tingting for durong witim hem. . . . Sapos mi laekem tumas waef bilong nara man, and mi weitim long door bilong fren bilong mi, letem waef bilong mi hammerim wheat bilong nara man, and letem olketa nara man sleep witim hem.”—Job 31:1, 9, 10.
5 From Job barava laek gohed faithful long God, hem nating laek lukluk long wanfala woman and laek for durong witim hem. From hem marit, hem no switim feeling bilong eni gele or woman wea marit finis. Long Sermon long Maunten, Jesus talem strongfala kaonsel abaotem wei for durong, and hem kaonsel wea olketa wea faithful mas tingim.—Readim Matthew 5:27, 28.
No Duim Samting wea No Stret
6, 7. (a) Olsem God duim long Job, hem markem wei wea iumi faithful followim wanem? (b) Why nao iumi mas honest and no trikim narawan?
6 Sapos iumi laekem God for tingim iumi faithful, iumi mas honest long evri samting. (Readim Proverbs 3:31-33.) Job sei: “Mi no followim wei bilong olketa wea laea, and mi no trikim eniwan. [Jehovah] bae weim mi long stretfala scale and hem bae savve sapos mi faithful.” (Job 31:5, 6) Jehovah weim evri man long “stretfala scale.” Olsem God duim long Job, hem markem wei wea iumi faithful followim stretfala standard bilong hem.
7 Sapos iumi no honest or trikim narawan, datwan showimaot iumi no gohed faithful long God. Olketa wea faithful “lusim finis olketa nogud samting wea pipol duim haed wea savve mekem man shame” and olketa “no trikim pipol.” (2 Cor. 4:1, 2) Bat waswe sapos iumi no honest long wanem iumi talem or duim, and datwan mekem nara Christian for askem God for help? Bae iumi kasem nogud samting! Man wea raetem psalm sei: “Taem mi kasem trabol mi prea long Jehovah for help and hem ansarem mi. Mi tok olsem: ‘Plis Jehovah, iu sevem mi from pipol wea laea, and from olketa wea trikim mi.’ ” (Ps. 120:1, 2) God savve long evri samting wea iumi tingim and wanem iumi laek for duim. Hem lukluk long “heart and kidney” bilong iumi for savve sapos iumi barava faithful or nomoa.—Ps. 7:8, 9.
Showim Gud Example
8. Hao nao Job deal witim olketa narawan?
8 For gohed faithful, iumi mas olsem Job wea duim stret samting, hambol, and tingim narawan. Hem sei: “Taem wakaman bilong mi hem komplen, mi herem case bilong hem and duim samting for stretem. Sapos mi no duim olsem, wanem nao mi savve duim taem God judgem mi? And wanem nao bae mi talem taem hem askem mi for explainim wanem mi duim? God wea wakem mi long bele bilong mami bilong mi, hem tu wakem olketa long bele bilong mami bilong olketa!”—Job 31:13-15.
9. Job showimaot wanem kaen fasin taem hem deal witim olketa wakaman bilong hem? Wanem nao iumi mas duim?
9 Luk olsem long taem bilong Job, hem isi nomoa for man tekem case bilong hem long kot. Olketa conductim olketa case hia long wei wea hem organize gud, and olketa slave tu savve tekem case bilong olketa long kot. Job evritaem duim stret samting and hem sorre and kaen long olketa wakaman bilong hem. Sapos iumi laek gohed faithful, iumi mas garem olketa wei hia. Diswan hem important samting for olketa elder duim.
Helpem Narawan and No Kavet
10, 11. (a) Hao nao iumi savve Job hem kaen and helpem narawan? (b) Wanem nao olketa nara kaonsel wea Job 31:16-25 maet mekem iumi for tingim?
10 Job hem kaen and helpem narawan. Hem no tingim hemseleva and no kavetem eni samting bilong nara man. Hem sei: “Mi evritaem helpem olketa widow, and mi givim kaikai long olketa pikinini wea dadi bilong olketa dae finis. . . . Taem mi lukim eniwan no garem kaleko, . . . mi evritaem givim kaleko long olketa. . . . Sapos mi mekem saen long hand bilong mi againstim olketa wea no garem dadi bikos mi savve judge hem saed witim mi long kot, letem God brekem hand bilong mi from shoulder bilong mi.” Sapos Job trustim nomoa gold wea hem garem, bae hem no savve gohed faithful long God.—Job 31:16-25.
11 Samting wea Job talem savve mekem iumi tingim toktok bilong disaepol James. Hem sei: “Worship wea klin and stret long tingting bilong God, Dadi bilong iumi, hem for lukaftarem olketa pikinini wea dadi and mami bilong olketa dae finis and olketa widow wea kasem hard taem, and for no letem world spoelem gudfala wei bilong iumi.” (Jas. 1:27) Iumi tingim tu warning wea Jesus givim. Hem sei: “Iufala mas lukaot and keakea nogud iufala kavetem eni samting bilong nara man. Diswan hem bikos nomata man garem staka samting, evri samting hia no mekem hem laef.” Then Jesus talem tokpiksa abaotem rich man wea greedy taem hem stap laef. Hem “hipimap olketa riches for hemseleva, bat hem nating tingim God.” (Luke 12:15-21) For iumi gohed faithful, iumi mas no kavet or greedy. Wei for kavet minim man worshipim idol, bikos taem man greedy hem no tingim Jehovah bat samting wea hem laekem tumas kamap idol bilong hem. (Col. 3:5) Sapos iumi greedy, hard for iumi faithful!
No Lusim Tru Worship
12, 13. Wanem example nao Job showimaot abaotem wei for no worshipim idol?
12 Olketa wea faithful no lusim tru worship. Job no lusim tru worship bikos hem sei: “Nomata sun hem saen braet and moon hem luk naes tumas, mi nating worshipim eniwan long tufala. Mi nating laek for mekhae long tufala, and mi no mekem kiss long hand bilong mi for worshipim tufala. Sapos mi duim olsem, mi no faithful long tru God and hem fitim for mi mas kasem panis.”—Job 31:26-28.
13 Job nating worshipim olketa samting wea no laef. Sapos hem laek for ‘mekem kiss long hand bilong hem’ for sun and moon, datwan bae showimaot hem worshipim idol and no faithful long God. (Deut. 4:15, 19) For gohed faithful long God, iumi mas no worshipim eni samting wea savve kamap olsem idol.—Readim 1 John 5:21.
No Mek Trabol or Laea Long Wei Bilong Iu
14. Why nao iumi savve Job no mek trabol for narawan?
14 Job no mek trabol for narawan and no raf. Hem savve sapos hem garem wei olsem, datwan bae showimaot hem no faithful. Hem sei: “Mi nating hapi taem enemy bilong mi dae, and mi nating hapi taem trabol kasem hem. Mi no sin long toktok bilong mi bikos mi nating talem eni samting for mekem trabol kasem hem.”—Job 31:29, 30.
15. Why nao hem no stret for hapi taem narawan kasem trabol?
15 Job nating hapi taem nogud samting kasem man wea heitim hem. Wanfala proverb sei: “No hapi taem enemy bilong iu kasem trabol, and no hapi taem hem foldaon. Sapos iu hapi, Jehovah bae savve long diswan and maet hem no hapi long iu and no panisim enemy bilong iu.” (Prov. 24:17, 18) From Jehovah savve long tingting bilong iumi, hem savve sapos iumi hapi taem narawan kasem trabol. Hem bae no hapi sapos iumi garem tingting olsem. (Prov. 17:5) God savve deal witim iumi bikos hem sei: “Mi nao bae changem bak nogud samting and givim panis.”—Deut. 32:35.
16. Nomata sapos iumi no garem staka samting, wanem nao iumi savve duim for welkamim narawan?
16 Job savve welkamim pipol. (Job 31:31, 32) Nomata sapos iumi no garem staka samting, iumi savve “kaen long pipol and welkamim olketa.” (Rom. 12:13) Iumi savve sharem smol samting witim narawan. Bible sei: “Hem gud for garem love and kaikaim olketa vegetable winim wei for heitim narawan and kaikaim wanfala buluka.” (Prov. 15:17) Taem iumi garem love and kaikai witim brata or sista wea faithful, datwan savve encouragem evriwan and mekem iumi hapi nomata sapos iumi garem lelebet kaikai nomoa for sharem.
17. Why nao iumi mas no trae for haedem bigfala sin?
17 Job no laea long wei bilong hem taem hem welkamim pipol. Samting wea hem duim encouragem narawan for gohed worshipim God. Job no olsem olketa man wea no followim God wea kam insaed kongregeson long first century. Olketa hia “ososo long man for mekem olketa kasem gud samting for olketa seleva.” (Jude 3, 4, 16) Job nating haedem sin bilong hem tu. Hem no fraetem wanem pipol maet talem abaotem sin wea hem duim. Hem hapi nomoa for God lukluk long hem and hem no hol bak for talemaot sin bilong hem long God. (Job 31:33-37) Sapos iu duim bigfala sin, no trae for haedem bikos iu no laekem narawan for ting daonem iu. Wanem nao iu savve duim for showimaot iu trae hard for faithful? Iu mas talemaot sin bilong iu, repent, askem help, and duim evri samting wea iu fit for duim for stretem datwan.—Prov. 28:13; Jas. 5:13-15.
Job Willing for Olketa Kotem Hem
18, 19. (a) Why nao iumi savve Job no duim nogud samting long narawan? (b) Sapos Job duim samting wea no stret, wanem nao hem willing for duim?
18 Job hem honest and duim stret samting. Dastawe hem savve sei: “Sapos mi no lukaftarem land bilong mi and mi spoelem, and sapos mi kaikaim kaikai long garden bilong nara man and mi no peim, and sapos mi mekem olketa wea ownim land for feel nogud bikos mi trae for tekem land bilong olketa, letem olketa nila grass and rabis tree grow long garden bilong mi and no wheat and barley.” (Job 31:38-40) Job nating tekem land bilong narawan and hem no ravem olketa wakaman. Iumi tu mas olsem Job and gohed faithful long Jehovah long olketa big samting and smol samting.
19 Job storyim evri samting wea hem duim long thrifala fren bilong hem and datfala young man Elihu. Sapos eniwan againstim wanem Job duim, hem willing nomoa for olketa tekem hem long kot. Sapos olketa pruvim Job duim samting wea no stret, hem willing for kasem panis. So hem givim case bilong hem long God and weitim God nao for judgem hem. Then “olketa toktok wea Job talem hem finis.”—Job 31:35, 40.
Iu Savve Gohed Faithful
20, 21. (a) Why nao Job fit for gohed faithful? (b) Wanem nao savve helpem iumi for lovem God?
20 Job gohed faithful bikos hem lovem God, and Jehovah tu lovem and helpem hem. Job sei: “[Jehovah] iu nao givim laef long mi and kaen tumas long mi. Iu nao lukaftarem mi.” (Job 10:12) Job showimaot love tu long narawan. Hem luksavve sapos man no kaen long narawan, bae hem no fraet long Olmaeti God. (Job 6:14) Pipol wea faithful lovem God and lovem narawan.—Matt. 22:37-40.
21 Samting wea helpem iumi for lovem God hem for readim Bible evriday and ting raonem wanem Bible talem abaotem hem. Taem iumi prea, iumi savve praisem Jehovah and thankiu long hem for olketa gud samting wea hem duim for iumi. (Phil. 4:6, 7) Iumi savve singsing long Jehovah and kasem gud samting taem iumi go evritaem long olketa meeting. (Heb. 10:23-25) Love bilong iumi for God bae strong go moa taem iumi duim ministry and talemaot “gud nius abaotem wei for iumi sev.” (Ps. 96:1-3) Taem iumi duim olketa samting hia, iumi savve gohed faithful olsem man wea raetem psalm. Hem sei: “Hem barava gud tumas for mi stap klosap long God. Jehovah, iu nao Lord bilong evri samting and olsem ples bilong mi for stap sef.”—Ps. 73:28.
22, 23. From iumi sapotim rul bilong Jehovah, wanem nao iumi duim wea olsem olketa faithful man bifor?
22 Long staka handred year wea go pas, Jehovah givim olketa difren assignment long pipol wea faithful long hem. Noah wakem ark and hem “preach abaotem olketa stret samting.” (2 Pet. 2:5) Joshua leadim olketa Israelite long Promis Land. Hem fit for duim datwan bikos hem readim “buk bilong law . . . day and naet” and hem followim evri samting wea Law talem. (Josh. 1:7, 8) Olketa Christian long first century teachim pipol for kamap disaepol and olketa hipap tugeta evritaem for studyim olketa scripture.—Matt. 28:19, 20.
23 Iumi sapotim rul bilong Jehovah and gohed faithful taem iumi preach, teachim pipol for kamap disaepol, followim kaonsel long Bible, and hipap witim olketa brata and sista long olketa meeting, assembly, and convention. Olketa samting hia helpem iumi for no fraet, fren gud witim God, and for duim wanem God laekem. Iumi fit for duim wanem God laekem and faithful bikos Dadi bilong iumi long heven and Son bilong hem helpem iumi. (Deut. 30:11-14; 1 Ki. 8:57) And iumi garem help tu from olketa ‘brata and sista’ wea olketa tu gohed faithful and mekhae long Jehovah olsem Lord bilong evri samting.—1 Pet. 2:17.
Wanem Nao Ansa Bilong Iu?
• Iumi shud ting hao long olketa standard bilong Jehovah saed long fasin?
• Wanem nao olketa fasin bilong Job wea iu tinghae long hem?
• Olsem Job 31:29-37 storyim, wanem kaen fasin nao Job showimaot?
• Why nao iumi fit for gohed faithful long God?
[Piksa long page 29]
Job gohed faithful long Jehovah. Iumi tu savve faithful!
[Piksa long page 32]
Iumi savve gohed faithful!