Iumi Shud Ting Hao Long Olketa Test?
OLKETA test! Evriwan mas feisim. Olketa samting wea savve testim iumi maet, fasin bilong pipol, hard taem saed long selen, sik, temptation, hevi for duim rong from olketa wea sem age, persecution, wei wea iumi no teksaed, wei wea iumi againstim wei for worshipim idol, and planti nara samting. Nomata wanem kaen test nao kamap, olketa savve mekem iumi wari tumas. Hao nao iumi savve win for deal witim olketa? Waswe, olketa test savve helpem iumi?
Barava Best Saport
King David garem living wea fulap witim olketa test, bat hem stap faithful go kasem taem hem dae. Wanem nao mekem hem fit for stand strong? Hem point go long wan wea givim strong long hem taem hem sei: “Jehovah hem Shepherd bilong mi. Mi bae no short long eni samting.” Then hem go ahed for sei: “Nomata mi wakabaot long deepfala valley, mi no fraetem eni nogud samting, bikos iu stap witim mi; rod bilong iu and stik bilong iu nao samting wea comfortim mi.” (Psalm 23:1, 4) Tru nao, Jehovah hem wan wea givim bigfala saport. Hem shepherdim David thru long samfala barava hardfala taem, and hem willing for duim sem samting long iumi taem need kamap.
Hao nao iumi savve kasem saport bilong Jehovah? Bible talem iumi hao taem hem sei: “Teistim and lukim hao Jehovah hem gud.” (Psalm 34:8) Datwan hem naesfala invitation, bat wanem nao hem minim? Hem wanfala encouragement for servem Jehovah and mekem laef bilong iumi followim will bilong hem evribit. Diswan minim iumi mas willing for lusim lelebet freedom bilong iumi, mekem olketa sakrifaes. Samfala taem, diswan savve lead go long olketa test—persecution and wei for safa. Bat, olketa wea acceptim witim full heart disfala invitation bilong Jehovah bae nating sorre bihaen. Jehovah bae barava kaen long olketa. Hem bae leadim olketa and kea for olketa long spiritual wei. Hem bae iusim Word bilong hem, holy spirit bilong hem, and Christian kongregeson for saportim olketa thru long olketa test. And gogo, bae hem givim reward bilong laef olowe.—Psalm 23:6; 25:9; Isaiah 30:21; Romans 15:5.
Olketa wea mekem disfala disison for servem Jehovah wea barava changem living bilong olketa, and wea followim wanem olketa disaedem, lukim hao Jehovah fulfillim olketa promis bilong hem. Hem nao samting wea olketa Israelite wea followim Joshua go insaed Promis Land experiencem. Bihaen olketa akrosim Jordan River, olketa mas stand strong long planti test, faetem olketa war, and lanem planti hardfala leson. Bat datfala genereson moa faithful winim olketa dadi bilong olketa, wea kamaot from Egypt and dae long wilderness. So, Jehovah saportim olketa wea faithful, and saed long living bilong olketa long end bilong laef bilong Joshua, Bible hem sei: “Jehovah givim evriwan rest, for followim evri samting hem promisim long olketa laen dadi bilong olketa . . . No eni promis hem fail from evri gudfala promis wea Jehovah talem long haos bilong Israel; evriwan kamap tru.” (Joshua 21:44, 45) Iumi tu savve kasem diswan sapos iumi depend evribit long Jehovah taem iumi kasem test and long evri narataem.
Wanem samting nao savve katem daon wei wea iumi trust long Jehovah? Jesus hem point go long wanfala samting taem hem sei: “No eniwan savve slave for tufala masta . . . Iufala kanduit slave for God and Riches.” (Matthew 6:24) Sapos iumi trust long Jehovah, iumi bae no depend long olketa material samting for givim iumi sef living olsem pipol long world duim. Jesus givim disfala kaonsel long olketa follower bilong hem: “So, go ahed for lukaotem firstaem kingdom and raeteous fasin bilong hem, and iufala bae kasem olketa narafala samting hia.” (Matthew 6:33) Wanfala Christian wea garem balance tingting abaotem material samting and wea putim Kingdom bilong God olsem first samting long laef bilong hem, hem mekem best disison. (Ecclesiastes 7:12) Hem tru, maet diswan hem no isi. Maet hem no garem staka material samting. Bat hem bae kasem planti reward. And Jehovah bae saportim hem.—Isaiah 48:17, 18.
Samting wea Iumi Lanem From Olketa Test
Tru nao, wei wea iumi chus for “teistim and lukim hao Jehovah hem gud” hem no protectim iumi from olketa samting wea iumi no expectim, or from olketa attak bilong Satan and olketa wea followim hem. (Ecclesiastes 9:11) Diswan savve testim sapos wanfala Christian hem honest and disaed strong. Why nao Jehovah letem olketa wea worshipim hem for kasem olketa test olsem? Aposol Peter givim wanfala reason taem hem sei: “For shortfala taem, sapos hem mas olsem, iufala feel sorre from planti test, mekem faith bilong iufala wea kasem test, wea winim price bilong gold wea savve finis nomata olketa testim long fire, hem mekem praise and glory and honor kamap long taem wea Jesus Christ showaot.” (1 Peter 1:6, 7) Tru nao, olketa test givim chance for iumi showimaot strongfala love and faith wea iumi garem long Jehovah. And olketa help for givim ansa long olketa samting wea Satan talem for daonem and accusim iumi.—Proverbs 27:11; Revelation 12:10.
Olketa test helpem iumi tu for mekem grow olketa nara Christian fasin. Olsem example, tingim toktok bilong man wea raetem olketa psalm: “[Jehovah] hem lukim hambol wan; bat man wea praod hem lukim from farawe.” (Psalm 138:6) Planti long iumi faendem hem hard for hambol, bat olketa test savve helpem iumi for mekem grow disfala important fasin. Ting go bak long taem bilong Moses, taem samfala long Israel les for kaikaim manna evri week, evri month. Luk olsem, datwan hem wanfala test for olketa, nomata datfala manna hem samting Jehovah provaedem long mirakol wei. Wanem nao purpose bilong disfala test? Moses talem olketa: “[Jehovah] feedim iu witim manna long wilderness . . . for mekem iu hambol and for testim iu.”—Deuteronomy 8:16.
Maet samting testim hambol fasin bilong iumi tu. Hao nao olsem? Olsem example, waswe, iumi kwiktaem for acceptim eni change wea organization mekem? (Isaiah 60:17) Waswe, iumi saportim witim full heart disfala preaching and teaching waka? (Matthew 24:14; 28:19, 20) Waswe, iumi willing for acceptim wei wea “faithful and wise slave” explainim olketa truth insaed Bible? (Matthew 24:45-47; Proverbs 4:18) Waswe, iumi trae hard for no wantem olketa niu samting, olsem niu stael bilong kaleko, or barava niu trak? Man wea hambol savve sei yes long olketa kwestin olsem.—1 Peter 1:14-16; 2 Peter 3:11.
Olketa test helpem iumi for mekem grow nara barava important fasin—fasin for stand strong. Disaepol James hem sei: “Tingim olsem hapi samting, olketa brata bilong mi, taem iufala kasem difren kaen test, from iufala savve hao faith wea kasem test mekem grow fasin for stand strong.” (James 1:2, 3) Wei wea iumi win for stand strong long olketa difren kaen test witim wei for barava depend long Jehovah, helpem iumi for mekem grow fasin for no givap, go ahed evritaem, and faithful fasin. Hem strongim iumi for againstim olketa attak bilong Satan long future, datfala god bilong disfala world wea kros tumas.—1 Peter 5:8-10; 1 John 5:19; Revelation 12:12.
Garem Stretfala Tingting Abaotem Olketa Test
Datfala perfect Son bilong God, Jesus Christ, feisim planti test taem hem stap long earth and hem kasem olketa barava gudfala samting from hem stand strong long olketa. Paul talem hao Jesus “lanem fasin for obey from olketa samting wea mekem hem safa.” (Hebrews 5:8) Wei wea hem loyal go kasem taem hem dae mekem nem bilong Jehovah kasem praise and mekem Jesus fit for offerim perfect laef bilong hem olsem wanfala ransom for olketa man. Diswan givim chance for evriwan wea showimaot faith long Jesus savve kasem laef olowe. (John 3:16) From Jesus go ahed faithful taem hem kasem test, distaem hem Hae Priest and King bilong iumi.—Hebrews 7:26-28; 12:2.
Waswe long iumi? Olsem tu, wei wea iumi go ahed loyal long olketa test bae mekem iumi kasem olketa bigfala blessing. Bible hem sei olsem abaotem olketa wea garem hope for go long heven: “Hapi nao man wea go ahed for stand strong long test, bikos long taem wea God appruvim hem, hem bae kasem crown bilong laef, wea Jehovah hem promisim for olketa wea go ahed for lovem hem.” (James 1:12) Olketa wea garem hope for stap long earth garem promis hao sapos olketa faithful for stand strong, olketa bae kasem laef olowe long wanfala paradaes earth. (Revelation 21:3-6) And tu, samting wea moa important, wei wea olketa faithful for stand strong hem givim praise long nem bilong Jehovah.
Taem iumi followim olketa step bilong Jesus, iumi savve sure dat iumi savve win for deal witim eni test wea iumi kasem insaed disfala world. (1 Corinthians 10:13; 1 Peter 2:21) Hao nao olsem? Long wei for depend long Jehovah, wea givim “paoa wea winim wanem iumi garem” long olketa wea depend long hem. (2 Corinthians 4:7) Iumi laek for barava feel sure olsem Job wea nomata long taem wea hem stand strong long olketa hardfala test hem talem witim strong: “Bihaen hem testim mi, mi bae kamap olsem gold seleva.”—Job 23:10.
[Piksa long page 31]
Loyal fasin bilong Jesus long taem hem kasem test mekem nem bilong Jehovah kasem praise. Loyal fasin bilong iumi savve duim sem samting