Wanem Nao Mekem Bigfala Kros Kamap Distaem?
WANFALA man sutim dae nara man insaed wanfala ples for drink beer long Prague, long Czech Republic. Why? Datfala man witim gun hem kros long nara man hia from hem pleim laod music long radio. Long wanfala road long Cape Town, South Africa, wanfala man iusim hockey stik for hitim wanfala draeva gogo hem killim dae man hia. Datfala man kros bikos draeva hia hem torchim hem witim laet bilong car bilong hem. Boyfren bilong wanfala British nurse wea stap long Australia hem kros tumas so hem kikim front door bilong haos; go insaed and kapsaetem petrol long girl hia, laetem fire long hem and leavim hem for dae.
Waswe, olketa story abaotem fasin for garem bigfala kros—kros wea kamap taem man draev, kros insaed famili, kros wea kamap long aeroplane—olketa ova tumas? Or waswe, olketa olsem olketa krak long wall bilong wanfala haos, wea olsem wanfala saen for showimaot olketa serious problem stap? Olketa samting showimaot hao olketa serious problem stap.
Long road, “olketa report abaotem olketa raf samting wea kamap from raoa long traffic hem grow klosap kasem 7 percent evri year start kam long 1990,” hem nao wanem wanfala report from American Automobile Association (AAA) Foundation for Traffic Safety hem talem.
Insaed haos, fasin for garem bigfala kros hem kamap big tumas. Olsem example, police long state bilong New South Wales long Australia lukim hao olketa case bilong raf fasin insaed famili hem grow 50-percent long year 1998. Long datfala kantri, evri mek-foa woman wea marit or wea stap witim wanfala man safa from raf fasin bilong partner bilong hem.
Insaed aeroplane hem semsem tu. Danger wea kamap from wei wea seknomoa samfala passenger kros and attakim olketa wea waka insaed aeroplane, narafala passenger, and samtaem pilot, mekem olketa bigfala aeroplane company long world putim olketa spesol belt for taemapem long chair olketa wea duim raf fasin.
Why nao moa and moa pipol no savve kontrolem feeling bilong olketa? Wanem nao mekem kaen wei for kros olsem hem kamap? Waswe, man savve fit for kontrolem kaen feeling olsem?
Why Nao Bigfala Kros hem Kakamap?
For garem bigfala kros hem minim for feelim or showimaot strongfala kros. Kaen wei for garem bigfala kros olsem hem kamap from wei wea man letem kros bilong hem for grow gogo feeling bilong hem bosta aot long raf wei. “Raf fasin wea kamap from raoa long traffic hem no kamap from samting wea happen long datfala taem nomoa. Bat hem kamap from fasin and wei wea planti wari kamap insaed laef bilong olketa wea draev,” hem nao samting David K. Willis, president bilong AAA Foundation for Traffic Safety hem talem.
Samting wea join go moa long wei for garem planti wari hem wei wea iumi kasem planti information each day. Long baksaed bilong wanfala buk Information Overload, wea David Lewis raetem, hem sei: “Planti wakman distaem sink daon insaed flood bilong information. . . From disfala information hem tumas nao, . . . olketa kasem wei for wari tumas, no careful, and no savve waka gud from olketa wari for trae hard for minim or chus from evri difren kaen information wea stap.” Olsem wanfala example long disfala flood bilong information, wanfala niuspepa hem sei: “Big bilong information insaed wanfala copy bilong niuspepa hem sem olsem information wea wanfala man long 17th century bae savve insaed full laef bilong hem.”
Samting wea iumi putim insaed mouth bilong iumi savve mekem kros for grow tu. Tufala bigfala research showimaot hao wei wea kros kakamap moa big hem join witim wei for smokem cigarette, drinkim alcohol, and for kaikaim kaikai wea no healthy. Diskaen living wea kamap evriwea distaem hem mekem moa big wari and wei for kros—wei for kros hem mekem wei for swear, no patient, and wei for no acceptim samting.
Fasin wea No Showaot Respect and Olketa Movie
Taem hem story abaotem hao fasin for no showaot respect and crime tufala join tugeta, Dr. Adam Graycar, director bilong Australian Institute of Criminology (AIC), hem sei: “Wei for strongim moa fasin for showaot respect hem maet wanfala barava important step for katem daon olketa smolfala crime.” Datfala institute saportim wei for garem patient fasin, for showimaot fasin for acceptim samting and for no swear. Sapos man fail for duim diswan hem bae mekem olabaot fasin kamap criminal fasin. Bat long semtaem, wanfala samting wea planti chusim for mekem olketa daonem feeling for kros and wari hem really encouragem wei for no acceptim samting and bigfala kros. Hao nao olsem?
Report bilong AIC hem sei olsem: “Olketa pikinini and full-grown pipol go long olketa cinema for lukluk long olketa samting wea showim dae and wei for distroe. Olketa video abaotem raf fasin hem staka and mekem big selen. Planti pikinini barava laekem ‘olketa war toy’ nomata samfala parent no laekem. Planti full-grown pipol and pikinini savve laek for lukluk long raf fasin long television, and television pasim go olketa principle and mark bilong community.” Hao nao diswan join witim wei wea man no hol bak for showim bigfala kros long street and long haos? Datfala report sei: “Taem community ting nating long raf fasin, tingting bilong olketa man wanwan insaed community bae followim datwan.”
Planti man distaem sei wei for no holem bak kros hem natural samting wea kamaot from wari, hem wanfala wei bilong man wea hem no savve missim from hem kasem bigfala hevi from community wea garem raf fasin. So waswe, hem tru hao disfala tingting wea planti garem, “Taem iu kros, mas no holem bak,” hem gud advaes?
Waswe, Man Shud Kontrolem Bigfala Kros?
Olsem wei wea volcano wea bosta savve spoelem olketa wea stap raonem hem, man wea showimaot strongfala kros hem savve spoelem olketa wea stap raonem hem. And tu hem savve barava spoelem hemseleva. Long wanem wei? The Journal of the American Medical Association (JAMA) hem sei: “Taem man hem no holem bak kros bilong hem diswan mekem raf fasin kamap moa big.” From research wea olketa duim, olketa man wea showimaot kros “bae moa isi for dae taem olketa kasem 50 year winim olketa wea no savve duim datwan.”
American Heart Association hem talem sem samting tu: “Olketa man wea no savve holem bak kros bilong olketa bae tufala taem moa isi for kasem stroke winim olketa man wea savve kontrolem feeling bilong olketa.” Olketa warning hia fitim evriwan, man and woman.
Wanem advaes nao bae gud? Lukim hao advaes bilong olketa wea garem savve long world hem lelebet semsem witim advaes bilong Bible, datfala buk wea kasem staka ples long earth and wea barava savve gud abaotem wei wea olketa man stap tugeta.
Kontrolem Kros—Missim Bigfala Kros
Insaed JAMA, Dr. Redford B. Williams hem sei: “Datfala simpol advaes, ‘taem iu kros, no holem bak,’ hem luk olsem. . . bae hem no savve helpem man. Samting wea moa important hem wei for luksavve long kros bilong iu, then kontrolem.” Hem sei for askem iuseleva: “(1) Waswe, disfala problem hem important long mi? (2) Waswe, tingting and feeling bilong mi fitim samting wea happen? (3) Waswe, hem fitim for mi stretem disfala problem, mekem mi no need for garem kaen kros olsem?”
Proverbs 14:29; 29:11 “Man wea slow for kros hem barava showimaot fasin for luksavve, bat man wea no patient hem mekhae long krangge fasin. Krangge man hem aotem evri spirit bilong hem, bat wisefala man hem stap kwaet go kasem end.”
Ephesians 4:26 “Iufala savve kros, bat no sin; no letem sun go daon taem iufala kros yet.”
Long buk bilong hem Dealing With Anger—Self-Help Solutions for Men, Frank Donovan hem sei: “For ranawe from kros—or, really, for ranawe from ples and pipol wea mekem iu kros—hem wanfala teknik wea barava important taem man hem kros.”
Proverbs 17:14 “Start bilong raoa hem olsem wei for letem aot wata, so bifor raoa hem bosta, go awe.”
Bertram Rothschild, wea raet long magasin The Humanist, hem sei: “Kros . . . hem really responsibility bilong man wanwan. Olketa reason why man kros hem insaed hed bilong iumi. . . . Namba bilong taem wea kros hem helpem iu hem smol nomoa sapos iu markem witim staka taem wea hem just mekem evri samting go worse. Hem moabeta for no mekem kros kamap winim wei for kasem datwan.”
Psalm 37:8 “Let go long kros and lusim bigfala kros; no kamap hot tumas gogo iu duim nogud samting.”
Proverbs 15:1 “Kwaet ansa hem stopem kros, bat toktok wea givim pain hem mekem kros kamap.”
Proverbs 29:22 “Man wea savve kros hem mekem fasin for divaed kamap, and eniwan wea savve feel kros tumas hem duim planti rong.”
Planti million Jehovah’s Witness evriwea long world saportim kaonsel hia. Mifala invaetem iu for attendim olketa meeting long Kingdom Hall wea stap long area bilong iu and bae iu savve lukim seleva hao wei for live followim advaes bilong Bible savve helpem man, nomata iumi stap insaed taem wea pipol garem bigfala kros.
[Olketa piksa long page 21]
Olsem volcano wea bosta, man wea no kontrolem bigfala kros savve spoelem samting
[Piksa long page 22]
Advaes bilong Bible really helpem man