Creation Bilong Jehovah Luk Naes Tumas

‘Iu Barava Nambawan Winim Olketa Maunten’

TAEM man stap antap long Mount Fuji and lukim sun kamap hem samting wea hem no savve forgetim. Sun wea kala bilong hem olsem fire, hem shaen long snow and olketa gray ston bilong volcano. Taem day start for daylaet big, shadow bilong datfala maunten kwiktaem kavarem olketa hill and valley for planti kilometer.

Olsem Mount Fuji—wea minim “no semsem witim eniwan moa”—olketa bigfala maunten olsem mekem iumi barava sapraes. Tru nao, wei wea olketa big tumas mekem iumi barava feel smol! From olketa maunten big fogud, hem mekem pipol biliv hao olketa barava haefala part long olketa maunten wea evritaem olketa cloud savve kavarem, hem hom bilong olketa god.

Jehovah, God wea wakem olketa hae maunten hia, hem nomoa fit for kasem praise from olketa. Hem nomoa “Datwan wea wakem olketa maunten.” (Amos 4:13) Klosap wan-quarter bilong disfala earth garem maunten, and taem God wakem disfala planet, hem putim samfala samting wea garem bigfala paoa insaed wea savve mekem kamap olketa maunten wea hae tumas. (Psalm 95:4) Olsem example, pipol bilivim hao olketa hae maunten bilong Himalayas and Andes kamap from paoa wea stap deep insaed graon and from olketa sekson bilong crust bilong earth wea muv.

Iumi olketa man no savve minim evribit hao and why olketa maunten kamap. Tru nao, iumi no fit for ansarem olketa kwestin hia wea raeteous Job kasem: “Wea nao iu stap taem mi [Jehovah] wakem earth? . . . Olketa strongfala post bilong hem stap insaed long wanem samting?”—Job 38:4-6.

Bat iumi savve, laef bilong iumi depend long olketa maunten. Olketa nao ples wea wata hem start, from evri bigfala river depend long olketa for wata and haf long olketa pipol long earth depend long olketa maunten for wata. (Psalm 104:13) Olsem New Scientist magasin talem, “sixfala long 20 main plant wea man savve kaikaim long world hem kam from olketa maunten.” Insaed niu world wea God promisim wea evri samting hem perfect, “planti kaikai bae stap long earth; antap long olketa maunten hem bae fulap.”—Psalm 72:16; 2 Peter 3:13.

Staka pipol, taem olketa herem story abaotem olketa maunten hem mekem olketa tingim European Alps. Olketa maunten hia, witim Mount Civetta wea iumi savve lukim hia, hem givim nambawan pruv hao wanfala Creator hem stap. (Psalm 98:8) Olketa givim praise long Jehovah, wan wea “wakem olketa maunten witim strong bilong hem.”—Psalm 65:6.a

Olketa maunten bilong Alps barava luk spesol. Ice kavarem antap bilong olketa and kavarem tu olketa ridge. Snow kavarem olketa saed bilong hem. Olketa valley, lake and olketa grass area barava luk naes. King David talemaot Jehovah hem “Wan wea mekem green grass grow long olketa maunten.”—Psalm 147:8.

Olketa hill olsem olketa long Guilin, long China, maet no luk spesol tumas olsem olketa bilong Alps, bat olketa barava luk naes. Staka row bilong limeston wea stap followim Li River barava luk naes wea mekem olketa visitor barava interest for lukim. Taem man lukim kliafala wata wea ran go daon long olketa valley wea smoke kavarem, maet hem mekem man tingim olketa toktok bilong man wea raetem psalm: “Hem [Jehovah] sendem olketa spring go insaed long olketa valley; midolwan long olketa maunten olketa go ahed for ran go daon.”—Psalm 104:10

Iumi barava tinghae long olketa maunten bikos iumi luksavve hem part long olketa nambawan loving samting wea Creator givim for olketa man and for olketa enjoyim. Nomata olketa barava spesol, olketa maunten no garem sem glory olsem Jehovah. Jehovah “barava nambawan winim olketa maunten.”—Psalm 76:4.

[Footnote]

[Box/Piksa long page 9]

Ten percent bilong population bilong world olketa stap long olketa area wea garem planti maunten. Bat hem no wanfala problem for olketa wea talemaot gud nius abaotem Kingdom bilong God. Olketa Christian minister hia barava busy long olketa ples wea hae fogud. And “samting wea luk naes tumas long olketa maunten nao hem leg bilong datwan wea bringim kam gud nius, datwan wea talemaot peace, datwan wea bringim kam gud nius abaotem samting wea moabeta, datwan wea talemaot salvation!”—Isaiah 52:7.

Man wea raetem psalm singsing olsem: “Olketa hae maunten hem for olketa maunten goat.” (Psalm 104:18) Olketa maunten goat, olsem Nubian ibex wea garem bigfala horn, olketa savve tumas for wakabaot antap olketa maunten and no savve foldaon. Olketa savve wakabaot followim steep ples wea smol tumas wea no fitim man for go followim. Datfala goat fit for stap long olketa ples wea hem no isi. Diswan hem from wei wea God wakem olketa leg bilong hem. Weight bilong hem savve mekem toe kamap waed, mekem hem standap strong or wakabaot stedy antap ston long olketa ples wea steep tumas. Tru nao, Jehovah designim goat hia long barava spesol wei!

[Piksa long page 9]

Mount Fuji, long Honshu, Japan