Hem Fitim for Iumi Evriwan Praisem Jehovah
“Iumi praisem Jah!”—PS. 111:1.
1, 2. Wanem nao “Hallelujah” hem minim? Olsem Christian Greek Scripture showim, wanem taem nao hem fitim for iumi talem datwan?
“HALLELUJAH!” Olketa long religion nao savve talem disfala word hallelujah. Samfala pipol savve talem word hia tu taem olketa story story nomoa. Bat tu-thri nomoa savve long trufala mining bilong hem. Nomata staka pipol talem hallelujah, samting wea olketa duim nating mekhae long God. (Titus 1:16) Wanfala Bible dictionary talem hao “taem olketa man wea raetem olketa psalm talem disfala word hallelujah, olketa laekem evriwan for praisem Jehovah.” Tru tumas, staka savveman long Bible sei “Hallelujah” hem minim “‘Praisem Jah,’ [wea hem nao] Jehovah.”
2 Dastawe long Psalm 111:1, New World Translation hem transleitim hallelujah olsem “Iumi praisem Jah!” Long Christian Greek Scripture, datfala toktok stap fofala taem long Revelation 19:1-6. Olketa wea worshipim Jehovah bae talemaot toktok hia bikos olketa bae hapi tumas taem giaman religion hem finis. Taem datwan happen, bae hem barava fitim nao for pipol bilong God talem datfala toktok “Hallelujah.”
Olketa Nambawan Samting wea Jehovah Wakem
3. Why nao iumi hipap evritaem?
3 Man wea raetem Psalm 111 storyim staka samting wea showimaot why nao hem fitim for iumi evriwan praisem Jehovah. Verse 1 hem sei: “Mi bae praisem Jehovah long full heart bilong mi taem mi hipap witim olketa gudfala pipol.” Olketa Jehovah’s Witness distaem tu ting olsem. Iumi go long olketa kongregeson meeting and olketa convention evritaem for praisem Jehovah.
4. Wanem nao olketa samting wea iumi savve ting raonem?
4 “Olketa samting wea Jehovah wakem hem nambawan, and pipol wea hapi tumas long evri samting hia, olketa laek for savve gud moa long olketa.” (Ps. 111:2) Tingim disfala toktok “savve gud moa.” Wanfala buk sei scripture hia storyim olketa man wea laek tumas for “studyim and ting raonem olketa samting wea God wakem.” Jehovah garem gudfala plan taem hem wakem olketa samting. Hem putim sun, earth, and moon long barava ples wea olketa mas stap long hem. Datwan mekem earth hem hot fitim for man stap long hem, for kasem laet, for hem naet and day, garem hot season and cold season, and kasem taem for sea hem hae tide and low tide.
5. From olketa man lanem staka samting moa abaotem universe, datwan showimaot wanem?
5 Olketa savveman lanem staka samting abaotem ples wea earth stap long hem, and abaotem size bilong moon and hevi bilong hem, and hao taem moon hem go raonem earth datwan mekem earth kasem gud samting. Ples wea earth and moon stap long hem and hao tufala waka tugeta, hem mekem olketa season kamap long olketa difren ples long earth. Olketa savveman lanem staka samting tu abaotem fofala main natural paoa long universe and hao olketa barava set. Dastawe long disfala buk “The Designed ‘Just So’ Universe,” wanfala savveman hem sei: “Long 30 year wea go pas finis, iumi luksavve why nao staka savveman changem tingting bilong olketa. Olketa luksavve man mas garem strongfala faith for bilivim hao universe savve kamap seleva nomoa. Taem iumi minim staka samting moa abaotem earth, plande samting showimaot hao maet wanfala man wea garem bigfala savve nao wakem evri samting.”
6. Hao nao tingting bilong iu abaotem hao God wakem olketa man?
6 Hao God wakem iumi tu hem nambawan. (Ps. 139:14) Iumi garem brain, olketa organ for mekem body waka gud, and savve and strong tu for duim waka. Tingim hao God mekem iumi savve toktok, herehere, and for savve hao for read and raet tu. Staka pipol savve duim olketa samting hia. And nara samting tu, body bilong man savve standap stret seleva. Iumi barava sapraes nao long hao God wakem body bilong iumi mekem body savve muv, duim olketa waka, and for smasem kaikai mekem kaikai hia savve strongim body. Nara spesol samting tu, olketa nerve long body wea mekem brain waka, and for iumi herehere, lukluk, smelem, feelim, and teistim samting, hem winim nao eni samting wea olketa savveman duim. Tru tumas, from God givim olketa samting hia long olketa man, datwan nao mekem olketa fit for duim staka samting. Nomata sapos man garem spesol savve, hem nating savve wakem eni samting wea gud tumas olsem olketa finger long hand bilong iumi. Tingim diswan, ‘Waswe, bae man savve paintim naesfala piksa or wakem olketa spesol samting sapos hem no garem olketa finger?’
Olketa Nambawan Samting wea Jehovah Duim and Wei Bilong Hem
7. Why nao Bible hem wanfala nambawan samting wea God givim kam for iumi?
7 Bible storyim samfala nambawan samting moa wea Jehovah duim for olketa man. Bible tu hem nambawan samting wea Jehovah givim kam for iumi. Hem spesol bikos evri buk insaed long hem agree witim narawan. Hem difren from olketa nara buk bikos hem “kam from God and hem gud for teachim man.” (2 Tim. 3:16) Tingim diswan. Firstfala buk long Bible, Genesis, hem storyim samting wea God duim long taem bilong Noah for finisim rabis pipol. Mek-tu buk, Exodus, hem storyim taem wea Jehovah mekem olketa Israelite kamap free from Egypt and hao datwan showimaot Jehovah nomoa fit for rul. Luk olsem man wea raetem psalm hem tingim olketa samting hia. Hem sei: “Evri samting wea [Jehovah] duim hem mekhae long hem and hem nambawan. And stretfala wei bilong hem bae stap for olowe. Hem laekem iumi for tingim evritaem olketa nambawan waka wea hem duim. Jehovah hem kaen tumas and hem sorre long iumi.” (Ps. 111:3, 4) Tru tumas, taem iu tingim olketa samting wea Jehovah duim bifor kam, kam kasem distaem, evri samting hia ‘mekhae long hem and showimaot hem nambawan’!
8, 9. (a) Hao nao samting wea God duim hem difren from wanem olketa man duim? (b) Wanem nao samfala wei bilong God wea iu tinghae long hem?
8 Datfala man wea raetem psalm hem mekhae tu long olketa nambawan wei bilong Jehovah, olsem hao hem duim stret samting, hem kaen, and sorre long pipol. Plande taem olketa man duim samting wea no stret, from olketa greedy, jealous, and praod. Olketa man wakem olketa rabis samting for killim dae pipol and for kasem staka selen. Olketa samting hia barava spoelem staka pipol. Nara samting tu, olketa man wakem olketa big samting bikos olketa mekius nao long poor pipol for wakem olketa. Wanfala nao, long Egypt bifor olketa iusim olketa slave for wakem olketa pyramid. Olketa pyramid hia wea sheip bilong olketa hem olsem maunten, olketa wakem nomoa for berem olketa Pharaoh. Staka samting wea olketa man duim distaem hem spoelem olketa man and hem “spoelem earth” tu.—Readim Revelation 11:18.
9 Bat samting wea Jehovah duim hem no olsem. Evritaem hem duim stret samting! Wanfala samting wea hem duim nao, hem givim Son bilong hem for sevem olketa man. Taem hem duim olsem, datwan showimaot ‘stretfala wei bilong God.’ (Rom. 3:25, 26) Tru tumas, “stretfala wei bilong hem bae stap for olowe”! God showimaot hem kaen tu from hem isisi witim olketa man wea sin. Samfala taem hem talem disfala toktok “plis” taem hem askem pipol bilong hem for lusim nogud wei bilong olketa and for duim stret samting.—Readim Ezekiel 18:25.
Jehovah Duim Samting wea Hem Promisim
10. Wanem nao Jehovah duim bifor wea showimaot hem no forgetim wanem hem promisim long Abraham?
10 “Hem givim kaikai long olketa wea fraet long hem. Hem bae nating forgetim agreement wea hem mekem.” (Ps. 111:5) Luk olsem man wea raetem psalm hem storyim agreement wea God mekem witim Abraham. Jehovah promis for givim gud samting long olketa pikinini bilong Abraham and hem talem tu hao olketa bae winim enemy bilong olketa. (Gen. 22:17, 18; Ps. 105:8, 9) Gogo olketa pikinini bilong Abraham kamap datfala nation bilong Israel. Datfala nation kamap slave long Egypt for staka year, bat “God no forgetim agreement wea hem mekem witim Abraham.” Hem mekem olketa Israelite kamap free. (Ex. 2:24) Samting wea hem duim for olketa bihaen showimaot hem kaen tumas. Hem givim kaikai for olketa and hem talem olketa wanem nao olketa mas duim for followim hem. (Deut. 6:1-3; 8:4; Neh. 9:21) Bat insaed staka handred year bihaen, plande taem olketa Israelite no obeyim God, nomata God sendem olketa profet for talem olketa for kam bak long hem. Gogo 1,500 year bihaen olketa Israelite kamap free from Egypt, God sendem spesol Son bilong hem long earth. Staka Jew no laekem Jesus and olketa letem nara pipol killim hem dae. So Jehovah startim wanfala niu nation, wea hem nao “Israel bilong God.” Datfala nation nao hem Christ witim 144,000 spiritual pikinini bilong Abraham. Jehovah talem finis hao hem bae iusim olketa hia for mekem olketa man kasem gud samting.—Gal. 3:16, 29; 6:16.
11. Wanem nao Jehovah duim distaem wea showimaot hem “no forgetim agreement wea hem mekem” witim Abraham?
11 Nomata distaem tu, Jehovah “no forgetim agreement wea hem mekem” witim Abraham and olketa gud samting wea hem promisim. Hem givim kam staka spiritual kaikai long winim 400 languis. And hem herem tu prea bilong iumi taem iumi askem hem for givim long iumi wanem iumi needim, olsem Jesus talem: “Givim mifala kaikai wea mifala needim for tuday.”—Luke 11:3; Ps. 72:16, 17; Isa. 25:6-8.
Jehovah Garem Bigfala Paoa
12. Long wanem wei nao Jehovah givim “kantri bilong narafala pipol” long olketa Israelite?
12 “Hem showimaot paoa bilong hem long pipol bilong hem taem hem givim kantri bilong narafala pipol long olketa.” (Ps. 111:6) Maet wanfala big samting wea disfala man wea raetem psalm tingim nao, hem taem God mekem olketa Israelite kamap free from Egypt. Taem Jehovah letem olketa Israelite go insaed long Promis Land, hem helpem olketa for winim olketa kantri long east saed long Jordan River and long west saed tu. (Readim Nehemiah 9:22-25.) Tru tumas, Jehovah givim “kantri bilong narafala pipol” long olketa Israelite. Datwan showimaot God hem garem bigfala paoa!
13, 14. (a) Hao nao Jehovah showimaot paoa bilong hem taem pipol bilong hem stap long Babylon? (b) Wanem nao olketa nara big samting wea Jehovah duim?
13 Bat iumi savve nomata Jehovah duim staka gud samting for olketa Israelite, olketa no respectim hem and no respectim tu olketa laen dadi bilong olketa olsem Abraham, Isaac, and Jacob. Olketa bighed gogo God iusim olketa long Babylon for aotem olketa from land bilong olketa and mekem olketa kamap prisoner long Babylon. (2 Chron. 36:15-17; Neh. 9:28-30) Samfala Bible savveman sei disfala man wea raetem Psalm 111, hem stap taem olketa Israelite kamap free from Babylon. Sapos datwan hem tru, man hia fit for praisem Jehovah. Hem lukim Jehovah showimaot paoa bilong hem and wei wea Hem faithful long pipol bilong hem taem Hem mekem olketa Jew kamap free from Babylon. Datwan hem big samting bikos olketa long Babylon no savve letem eni prisoner bilong olketa kamap free.—Isa. 14:4, 17.
14 Samting olsem 500 year bihaen datwan, Jehovah iusim paoa bilong hem long bigfala wei moa taem hem mekem olketa man kamap free from sin and dae. (Rom. 5:12) From Jehovah duim olsem, 144,000 pipol long earth savve kamap olketa anointed Christian. Long 1919, Jehovah iusim paoa bilong hem for mekem olketa anointed Christian kamap free from giaman religion. Samting wea olketa anointed Christian duim long olketa last day showimaot God nao helpem olketa. Sapos olketa faithful go kasem taem olketa dae, olketa bae rul witim Jesus Christ long heven. Taem olketa rulim earth, olketa man bae kasem gud samting. (Rev. 2:26, 27; 5:9, 10) God bae givim full earth long olketa anointed Christian, wea diswan hem winim Promis Land wea olketa Israelite kasem bifor.—Matt. 5:5.
Olketa Law wea Man Fit for Trustim
15, 16. (a) Wanem nao wanfala samting wea God duim? (b) Wanem nao samfala law wea God talem for olketa Israelite followim?
15 “Evri samting wea hem duim hem tru and hem stret. Iumi savve trustim evri law bilong hem. Olketa law bilong hem bae stap for olowe bikos olketa tru and stret.” (Ps. 111:7, 8) Wanfala “samting wea [Jehovah] duim” nao, hem raetem tenfala important law long tufala flat ston for olketa Israelite followim. (Ex. 31:18) Tenfala law hia witim olketa nara law nao hem Law Bilong Moses. Jehovah nao givim olketa law hia dastawe iumi fit for trustim olketa.
16 Tingim wanfala long tenfala law wea Jehovah raetem long tufala flat ston. Hem sei: “Mi nao Jehovah, God bilong iufala, and mi nomoa iufala mas worshipim.” Datfala law talem tu hao Jehovah hem “kaen long evriwan wea lovem [hem] and obeyim olketa law bilong [hem], witim olketa pikinini bilong olketa and plande thousand pipol wea bae born kam bihaen long olketa.” Nomata wanem taem iumi stap long hem, iumi savve followim olketa nara toktok wea stap long tufala ston hia. Samfala nao hem olketa toktok olsem for “respectim dadi and mami,” “no steal,” and for no kavetem eni samting wea hem bilong nara man.—Ex. 20:5, 6, 12, 15, 17.
Man wea Sevem Iumi Hem Holy and Nambawan
17. Why nao hem fitim for olketa Israelite ting long nem bilong God hem holy?
17 “Hem sevem iumi olketa pipol bilong hem. And disfala agreement wea hem mekem witim iumi bae nating savve finis. Nem bilong hem stap holy and hem nambawan.” (Ps. 111:9) Maet disfala man wea raetem psalm tingim moa hao Jehovah no forgetim agreement wea hem mekem witim Abraham. From Jehovah duim olsem, hem no lusim pipol bilong hem taem olketa kamap slave long Egypt and taem olketa prisoner long Babylon tu. God sevem pipol bilong hem long tufala taem hia. Nomata diswan hem tufala samting nomoa long staka samting wea God duim, hem barava fitim nao for olketa Israelite mas ting long nem bilong God hem holy.—Readim Exodus 20:7; Romans 2:23, 24.
18. From iumi pipol wea garem nem bilong Jehovah, why nao iu tinghae long datwan?
18 Olketa Christian tu mas ting long nem bilong God hem holy bikos hem mekem olketa kamap free from sin and dae. Iumi mas trae hard for duim firstfala samting wea Jesus talem long Lord’s Prea. Hem sei: “Mifala laekem nem bilong iu for stap holy.” (Matt. 6:9) Taem iumi ting raonem nambawan nem bilong God, hem fitim for iumi fraet long hem. Man wea raetem Psalm 111 garem stretfala tingting abaotem wei for fraet long God. Hem sei: “Eniwan wea laek kamap wise mas fraet long Jehovah. Evriwan wea obeyim olketa toktok [olketa law] bilong hem garem gudfala tingting.”—Ps. 111:10.
19. Wanem nao bae iumi storyim long study bihaen diswan?
19 Sapos iumi fraet long God, datwan bae helpem iumi for heitim olketa nogud samting. Hem bae helpem iumi tu for garem olketa nambawan wei bilong God, olsem Psalm 112 storyim. Disfala psalm wea iumi bae storyim long study bihaen, hem showimaot wanem nao iumi mas duim mekem iumi savve praisem God for olowe witim staka million pipol. Tru tumas, hem barava fitim for iumi praisem Jehovah. Bible hem sei: “Iumi mas praisem hem for olowe.”—Ps. 111:10.
Ting Raonem Diswan
• Why nao hem fitim for iumi evriwan praisem Jehovah?
• Olketa samting wea Jehovah duim showimaot hem garem olketa wanem kaen wei?
• From iumi pipol wea garem nem bilong Jehovah, why nao iu tinghae long datwan?
[Piksa long page 20]
Iumi hipap evritaem for praisem Jehovah
[Piksa long page 23]
Jehovah nao givim olketa law, dastawe iumi savve trustim olketa