Iu Barava Lovem Olketa Kaonsel Bilong Jehovah?
“Soul bilong mi keepim olketa kaonsel bilong iu, and mi barava lovem olketa.”—PSALM 119:167.
1. Especially long wea nao iumi faendem olketa kaonsel bilong Jehovah planti taem?
JEHOVAH laekem pipol bilong hem for hapi. Bat, for kasem tru hapi, iumi mas wakabaot followim olketa law bilong God and obeyim olketa rul bilong hem. For duim diswan, hem givim iumi olketa kaonsel. Olketa kamap planti taem insaed long Bible, especially long Psalm 119, wea maet young Prince Hezekiah bilong Judah nao raetem. Disfala naesfala singsing start witim toktok olsem: “Hapi nao olketa wea no garem eni rong long fasin bilong olketa, olketa wea wakabaot followim law bilong Jehovah. Hapi nao olketa wea obeyim olketa kaonsel bilong hem; witim full heart olketa go ahed for lukaotem hem.”—Psalm 119:1, 2.
2. Hao nao olketa kaonsel bilong God hem join witim wei for hapi?
2 Iumi “wakabaot followim law bilong Jehovah” taem iumi kasem stretfala savve long Word bilong hem and followim insaed long living bilong iumi. Bat, from iumi no perfect, iumi needim olketa kaonsel. Hebrew word for “olketa kaonsel” minim wei wea God savve mekem iumi tingim moa olketa law, rul, and komandment bilong hem. (Matthew 10:18-20) Iumi bae stap hapi nomoa sapos iumi go ahed for followim olketa kaonsel olsem, from olketa helpem iumi for missim olketa spiritual trap wea savve lead go long dae and sorre.
Hol Strong Long Olketa Kaonsel Bilong Jehovah
3. Long faondeson bilong Psalm 119:60, 61, iumi garem wanem trust?
3 Olketa kaonsel bilong God hem spesol long man wea raetem disfala psalm: “Mi hariap, and mi no delay for keepim olketa komand bilong iu. Olketa rope bilong olketa wea wicked stap raonem mi. Law bilong iu mi no forgetim.” (Psalm 119:60, 61) Olketa kaonsel bilong Jehovah helpem iumi for stand strong taem iumi kasem persecution bikos iumi trust hao Father bilong iumi long heven savve katem olketa rope wea olketa enemy taemapem raonem iumi. Long taem wea fitim, hem bae mekem iumi free from kaen problem olsem mekem iumi savve go ahed for duim Kingdom-preaching waka.—Mark 13:10.
4. Iumi shud feel hao abaotem olketa kaonsel bilong God?
4 Samfala taem, olketa kaonsel bilong Jehovah stretem iumi. Letem iumi evritaem tinghae long kaonsel wea stretem iumi, olsem man for raetem Psalm hem duim. Long prea hem sei long God: “Olketa kaonsel bilong iu nao mi laekem tumas . . . Mi lovem olketa kaonsel bilong iu.” (Psalm 119:24, 119) Iumi garem moa kaonsel from God winim wanem man for raetem Psalm hem garem. Planti handred toktok bilong Hebrew Scripture wea stap insaed long Greek Scripture talem iumi no instruction bilong Jehovah nomoa long pipol bilong hem anda long Law, bat tu olketa purpose bilong hem for Christian kongregeson. Taem God disaed for talem iumi samfala samting abaotem olketa law bilong hem, iumi hapi tumas for kasem help olsem. And taem iumi ‘hol strong long olketa kaonsel bilong Jehovah,’ iumi missim samting wea savve pullim iumi for duim sin wea mekem Creator bilong iumi no hapi and bae tekem awe hapi bilong iumi.—Psalm 119:31.
5. Hao nao bae iumi savve barava lovem olketa kaonsel bilong Jehovah?
5 Haomas love nao iumi shud garem for olketa kaonsel bilong Jehovah? Man for raetem Psalm sing olsem: “Soul bilong mi keepim olketa kaonsel bilong iu, and mi barava lovem olketa.” (Psalm 119:167) Iumi bae barava lovem olketa kaonsel bilong Jehovah sapos iumi tingim and acceptim olketa olsem kaonsel bilong wanfala Father wea barava kea for iumi. (1 Peter 5:6, 7) Iumi needim olketa kaonsel bilong hem, and love bilong iumi for olketa bae grow taem iumi lukim gud samting wea iumi kasem from olketa.
Why Iumi Needim Olketa Kaonsel Bilong God
6. Wanem nao wanfala reason why iumi needim olketa kaonsel bilong Jehovah, and wanem nao bae helpem iumi for rememberim olketa?
6 Wanfala reason why iumi needim olketa kaonsel bilong Jehovah hem from iumi savve forget. The World Book Encyclopedia hem sei: “Klosap evritaem, pipol forget moa and moa bihaen samfala taem go pas. . . . Iu mas garem finis experience wea iu no savve tingim nem or wanfala information, nomata iu savve gud long hem. . . . Kaen wei olsem wea iu forget for lelebet taem, wea happen planti taem, olketa kolem diswan wei for fail for kasem bak samting. Olketa savveman long science markem diswan witim wei for faendem samting wea lus insaed wanfala rum wea hem fulap witim staka samting. . . . Wanfala gud wei for mek sure iu rememberim wanfala information hem for studyim longtaem bihaen iu tingse iu savve evribit long hem.” Gudfala study and wei for herem moa bae helpem iumi for rememberim olketa kaonsel bilong God and obeyim for iumi kasem gud samting.
7. Why nao iumi needim olketa kaonsel bilong God distaem winim enitaem bifor?
7 Iumi needim olketa kaonsel bilong Jehovah distaem winim enitaem bifor bikos wicked fasin hem kamap big tumas winim enitaem long history bilong man. Sapos iumi lisin long olketa kaonsel bilong God, iumi kasem savve wea iumi needim for missim wei wea disfala wicked world savve pullim iumi for followim olketa wei bilong hem. “Mi kasem moa savve winim olketa teacher bilong mi,” man for raetem Psalm hem sei, “bikos mi tinghevi long olketa kaonsel bilong iu. Witim moa savve winim olketa olo man mi duim samting, from mi followim olketa law bilong iu. From evri nogud road mi tanem bak leg bilong mi, mekem mi savve keepim toktok bilong iu.” (Psalm 119:99-101) Sapos iumi followim olketa kaonsel bilong God, iumi bae stap klia long “evri nogud road” and missim wei for kamap olsem staka man, wea “mind bilong olketa stap long darkness, and olketa stap farawe from laef wea kam from God.”—Ephesians 4:17-19.
8. Hao nao iumi savve kamap moabeta for winim olketa samting wea testim faith bilong iumi?
8 Iumi needim olketa kaonsel bilong God bikos olketa strongim iumi for go ahed strong taem iumi kasem olketa test long disfala “taem bilong end.” (Daniel 12:4) Sapos iumi no kasem olketa kaonsel olsem, iumi bae kamap olsem “man wea herem samting and forgetim.” (James 1:25) Bat gudfala study seleva long Bible and long kongregeson witim help bilong olketa pablikeson wea “faithful and wise slave” provaedem bae helpem iumi for winim olketa samting wea testim faith bilong iumi. (Matthew 24:45-47) Spiritual samting olsem bae helpem iumi for lukim wanem nao iumi mas duim for mekem Jehovah hapi taem iumi kasem olketa hardfala taem.
Important Waka Bilong Olketa Meeting
9. Hu nao “olketa present olsem man,” and hao nao olketa helpem olketa wea garem sem biliv?
9 Wanfala wei wea iumi kasem olketa kaonsel bilong God wea iumi needim hem long olketa Christian meeting, wea olketa brata wea olketa appointim provaedem instruction. Aposol Paul raet hao taem Jesus “go ap long hae hem tekem olketa prisoner; hem givim olketa present olsem man.” Paul sei moa: “[Christ] givim samfala olsem aposol, samfala olsem profet, samfala olsem pipol for talemaot gud nius, samfala olsem shepherd and teacher, for stretem olketa holy wan, for duim waka bilong minister, for buildimap body bilong Christ.” (Ephesians 4:8, 11, 12) Iumi savve thankiu tumas from “olketa present olsem man”—olketa elder—leadim tingting bilong iumi long olketa kaonsel bilong Jehovah taem iumi hipap tugeta for worship!
10. Wanem nao main point bilong Hebrews 10:24, 25?
10 Wei for tinghae long olketa samting wea God provaedem bae muvim iumi for stap long faevfala kongregeson meeting bilong iumi evri week. Paul strongim disfala need for hipap tugeta evritaem. Hem raet: “Letem iumi tingim and muvim narawan for showimaot love and gudfala waka, no lusim wei for hipap tugeta, olsem fasin bilong samfala, bat encouragem narawan, and duim long bigfala wei moa taem iufala lukim datfala day hem kam klosap.”—Hebrews 10:24, 25.
11. Hao nao each meeting evri week helpem iumi?
11 Waswe, iu tinghae long wanem olketa meeting duim for iumi? Wastaoa Study bilong evri week strongim faith bilong iumi, helpem iumi for obeyim olketa kaonsel bilong Jehovah, and strongim iumi for againstim “spirit bilong world.” (1 Corinthians 2:12; Acts 15:31) Long Pablik Meeting, olketa speaker givim instruction from Word bilong God, wea insaed diswan hem olketa kaonsel bilong Jehovah and olketa nambawan “toktok bilong laef olowe” bilong Jesus. (John 6:68; 7:46; Matthew 5:1–7:29) Savve bilong iumi for teach hem kamap moabeta long Theocratic Ministry Skul. Service Meeting barava helpem iumi for kamap moabeta for talemaot gud nius from haos tu haos, long olketa return visit, long olketa hom Bible study, and long narafala part bilong ministry. From grup long Kongregeson Buk Study hem smol lelebet, hem givim iumi moa chance for givim olketa ansa wea planti taem talemaot olketa kaonsel bilong God.
12, 13. Hao nao pipol bilong God long wanfala kantri long Asia showimaot olketa tinghae long olketa Christian meeting?
12 For hipap evritaem long olketa kongregeson meeting bae mekem iumi tingim moa olketa komandment bilong God and helpem iumi for stap strong long spiritual wei nomata iumi feisim war, hardfala taem saed long selen, and olketa nara samting wea testim faith bilong iumi. Wei wea olketa tinghae long olketa meeting showaot klia long 70 Christian long wanfala kantri long Asia wea pipol aotem olketa from haos bilong olketa and diswan forcem olketa for go stap midolwan long bush. From olketa disaed strong for go ahed for meeting tugeta evritaem, olketa go bak long taon bilong olketa wea war spoelem, brekem daon wanem hem stap long Kingdom Hall and buildim bak long bush.
13 Bihaen olketa kasem war for staka year long difren part long sem kantri, pipol bilong Jehovah go ahed yet for serve witim strong. Olketa askem wanfala elder long datfala area: “Wanem nao barava help for keepim olketa brata tugeta?” Ansa bilong hem? “Insaed 19 year, no enitaem mifala stopem wanfala meeting. Samfala taem from bomb hem bosta or nara problem, samfala brata no kasem meeting, bat no enitaem mifala stopem wanfala meeting.” Olketa naesfala brata and sista hia barava tinghae long wei wea hem important for “no lusim wei for hipap tugeta.”
14. Wanem nao iumi savve lanem from fasin bilong olo woman, Anna?
14 Widow woman Anna wea hem 84 year “nating savve miss long temple.” From diswan, hem stap taem olketa tekem kam smol baby Jesus no longtaem bihaen hem born. (Luke 2:36-38) Waswe, iu trae hard for no missim meeting enitaem? Waswe, iu traem best bilong iu for attendim evri session bilong olketa assembly and convention bilong iumi? Gudfala spiritual instruction wea iumi kasem long olketa hipap olsem givim kliafala pruv hao Father bilong iumi long heven hem kea for pipol bilong hem. (Isaiah 40:11) Olketa hipap olsem givim hapi, and wei wea iumi stap showimaot hao iumi tinghae long olketa kaonsel bilong Jehovah.—Nehemiah 8:5-8, 12.
Olketa Kaonsel Bilong Jehovah Mekem Iumi Stap Difren
15, 16. Hao nao wei for followim olketa kaonsel bilong Jehovah affectim fasin bilong iumi?
15 Wei for keepim olketa kaonsel bilong God help for mekem iumi stap difren from disfala wicked world. Wei for followim olketa kaonsel bilong God bae stopem iumi for share insaed long dirty fasin saed long sex. (Deuteronomy 5:18; Proverbs 6:29-35; Hebrews 13:4) Iu savve win for daonem feeling for laea, no honest, or steal sapos iu live followim olketa kaonsel bilong God. (Exodus 20:15, 16; Leviticus 19:11; Proverbs 30:7-9; Ephesians 4:25, 28; Hebrews 13:18) For live followim olketa kaonsel bilong Jehovah bae stopem iumi for pei bak, or keepim kros, or tok laea abaotem samwan.—Leviticus 19:16, 18; Psalm 15:1, 3.
16 Taem iumi followim olketa kaonsel bilong God, iumi stap holy, or difren, for service bilong hem. And hem barava important for difren from disfala world! Long prea for Jehovah long last naet bilong laef bilong hem long earth, Jesus ask olsem for olketa wea followim hem: “Mi givim word bilong iu long olketa, bat world hem heitim olketa, bikos olketa no part bilong world, olsem mi tu no part bilong world. Mi askem iu, no for tekaotem olketa from world, bat for lukaftarem olketa from wicked wan. Olketa no part bilong world, olsem mi tu no part bilong world. Mekem olketa kamap holy thru long truth; word bilong iu nao truth.” (John 17:14-17) Letem iumi go ahed for barava lovem Word bilong God, wea mekem iumi stap difren for duim holy service.
17. Wanem nao savve happen sapos iumi no lisin long olketa kaonsel bilong God, so wanem nao iumi shud duim?
17 Olsem olketa servant bilong Jehovah, iumi want for stap fit long service bilong hem. Bat, sapos iumi no lisin long olketa kaonsel bilong God, then spirit bilong disfala world wea olketa mekhae long hem long toktok, olketa buk, and fasin, maet winim iumi. And iumi sure iumi no laek for kamap man wea lovem selen, mekhae long seleva, bighed, no savve sei thankiu, no loyal, raf tumas, followim mind bilong seleva, fulap long praod fasin, lovem hapitaem winim wei for lovem God—wea olketa hia samfala fasin nomoa wea pipol wea stap difren from God showimaot. (2 Timothy 3:1-5) From iumi stap deep insaed long olketa last day bilong disfala wicked system, letem iumi go ahed for prea for help bilong God mekem iumi savve go ahed for followim olketa kaonsel bilong Jehovah long ‘wei for go ahed for lukaot followim word bilong hem.’—Psalm 119:9.
18. Wei for obeyim olketa kaonsel bilong God bae muvim iumi for duim olketa wanem gud samting?
18 Olketa kaonsel bilong Jehovah no just mekem iumi luksavve long olketa samting wea iumi mas no duim. Wei for obeyim olketa kaonsel bilong hem bae muvim iumi for duim gud samting, for trustim Jehovah evribit and for lovem hem witim full heart, soul, mind, and strong bilong iumi. (Deuteronomy 6:5; Psalm 4:5; Proverbs 3:5, 6; Matthew 22:37; Mark 12:30) Olketa kaonsel bilong God bae muvim iumi for lovem neiba tu. (Leviticus 19:18; Matthew 22:39) Barava wei for showimaot love bilong God and neiba hem for duim will bilong God and sharem witim narawan “savve bilong God” wea givim laef.—Proverbs 2:1-5.
Wei for Obeyim Olketa Kaonsel Bilong Jehovah Minim Laef!
19. Hao nao iumi savve showimaot long olketa narawan hao wei for followim olketa kaonsel bilong Jehovah hem fitim and gud?
19 Sapos iumi obeyim olketa kaonsel bilong Jehovah and helpem olketa narawan for duim sem samting, iumi bae sevem iumiseleva and olketa wea lisin long iumi. (1 Timothy 4:16) Hao nao iumi savve showimaot long olketa narawan hao wei for followim olketa kaonsel bilong Jehovah hem fitim and gud? Long wei wea iumi strong for followim olketa Bible principle insaed long living bilong iumiseleva. Olketa wea “garem fasin fitim laef olowe” bae garem pruv hao wei bilong laef wea Word bilong God talemaot hem nao best wan for aftarem. (Acts 13:48) Olketa bae lukim hao ‘God hem barava stap midolwan long iumi’ and diswan bae muvim olketa for joinim iumi long worship bilong Sovereign Lord Jehovah.—1 Corinthians 14:24, 25.
20, 21. Olketa kaonsel bilong God and spirit bilong hem bae mekem iumi fit for duim wanem samting?
20 So sapos iumi go ahed for studyim Bible, followim wanem iumi lanem, and iusim evribit olketa spiritual samting wea Jehovah provaedem, iumi bae barava lovem olketa kaonsel bilong hem. Sapos iumi followim, olketa kaonsel hia bae helpem iumi for werem “niufala fasin wea God wakem fitim will bilong Hem long trufala raeteous fasin and loyal fasin.” (Ephesians 4:20-24) Olketa kaonsel bilong Jehovah and holy spirit bilong hem bae mekem iumi fit for showimaot love, hapi, peace, patient for safa, kaenfala fasin, gudfala fasin, faith, kwaet fasin, fasin for kontrolem seleva—olketa fasin wea barava difren from olketa fasin bilong world wea hem stap long paoa bilong Satan! (Galatians 5:22, 23; 1 John 5:19) So, iumi savve hapi tumas taem iumi herem moa olketa samting wea Jehovah laek for kasem from iumi, taem iumi duim study seleva, from olketa elder, and long olketa meeting, assembly, and convention bilong iumi.
21 Bikos iumi obeyim olketa kaonsel bilong Jehovah, iumi fit for hapi nomata taem iumi safa for saed bilong raeteous fasin. (Luke 6:22, 23) Iumi luk long God for sevem iumi from olketa samting wea putim iumi long danger. Diswan hem barava important distaem from olketa nation hipap for “war bilong bigfala day bilong God Olmaeti” long Har–Magedon.—Revelation 16:14-16.
22. Iumi shud disaed strong for duim wanem witim olketa kaonsel bilong Jehovah?
22 For iumi kasem present bilong laef olowe wea iumi no fit for kasem, iumi mas barava lovem olketa kaonsel bilong Jehovah and obeyim witim full heart. So letem iumi garem feeling olsem man for raetem Psalm hem singim: “Raeteous fasin bilong olketa kaonsel bilong iu hem for olowe. Mekem mi minim, for mi go ahed stap laef olowe.” (Psalm 119:144) Letem iumi showimaot fasin for disaed strong olsem toktok bilong man for raetem Psalm showim klia: “Mi singaot long iu [Jehovah]. O sevem mi! And mi bae keepim olketa kaonsel bilong iu.” (Psalm 119:146) Yes, thru long samting wea iumi talem and duim, letem iumi pruvim hao iumi barava lovem olketa kaonsel bilong Jehovah.
Hao Nao Bae Iu Ansa?
• Hao nao man for raetem Psalm tingim olketa kaonsel bilong Jehovah?
• Why nao iumi needim olketa kaonsel bilong God?
• Wanem waka nao olketa meeting bilong iumi duim saed long olketa kaonsel bilong God?
• Hao nao olketa kaonsel bilong Jehovah mekem iumi stap difren from disfala world?
[Piksa long page 15]
Man for raetem Psalm barava lovem olketa kaonsel bilong Jehovah
[Piksa long page 17]
Followim example bilong Anna, waswe, iu trae hard for no missim eni meeting?
[Piksa long page 18]
Wei for followim kaonsel bilong Jehovah mekem iumi difren olsem klin and fitim service bilong hem