Letem Toktok Bilong God Kamap Laet for Road Bilong Iu
“Toktok bilong iu hem . . . wanfala laet for road bilong mi.”—PSALM 119:105.
1, 2. Wanem nao iumi need for duim mekem toktok bilong Jehovah torchim road bilong iumi?
TOKTOK bilong Jehovah savve torchim road bilong iumi sapos iumi letem. For kasem gud samting from spiritual laet olsem, iumi mas studyim gud Word bilong God and followim gud kaonsel insaed long datwan. Hem nomoa wei for iumi feel olsem man wea raetem psalm wea sei: “Toktok bilong iu hem wanfala lamp for leg bilong mi, and wanfala laet for road bilong mi.”—Psalm 119:105.
2 Distaem bae iumi lukluk long Psalm 119:89-176. Olketa verse hia wea divaed long 11-fala sekson storyim staka samting! Disfala information savve helpem iumi gohed long road wea lead go long laef olowe.—Matthew 7:13, 14.
Why Nao Iumi Mas Lovem Toktok Bilong God?
3. Hao nao Psalm 119:89, 90 showimaot iumi savve trustim toktok bilong God?
3 Wei for lovem toktok bilong Jehovah savve mekem iumi stedy long spiritual wei. (Psalm 119:89-96) Man wea raetem psalm hem sing olsem: “For olowe, O Jehovah, toktok bilong iu hem stap long skae. . . . Iu barava mekem earth stap stedy long ples bilong hem, mekem hem savve stap for olowe.” (Psalm 119:89, 90) From toktok bilong God, wea datwan nao ‘olketa law hem markem for evri samting long skae,’ sun, moon, and olketa star barava muv followim order, and earth hem stap long ples bilong hem for olowe. (Job 38:31-33; Psalm 104:5) Iumi savve trustim evri toktok from mouth bilong Jehovah; samting wea God talem bae “barava win” for fulfillim plan bilong hem.—Isaiah 55:8-11.
4. Hao nao wei for lovem toktok bilong God hem helpem olketa servant bilong hem wea safa?
4 Datfala man wea raetem psalm bae ‘dae from hard taem wea hem kasem sapos hem no lovem law bilong God.’ (Psalm 119:92) Hem no pipol from difren ples wea persecutim hem, bat olketa wea heitim hem nao olketa Israelite wea brekem law. (Leviticus 19:17) Bat diswan no mekem hem wikdaon bikos hem lovem law bilong God wea strongim hem for gohed. Long Corinth, aposol Paul stap long “danger midolwan olketa giaman brata,” wea maet olketa nao “olketa stael aposol” wea laek accusim hem. (2 Corinthians 11:5, 12-14, 26) Nomata olsem, from hem lovem toktok bilong God, Paul gohed strong long spiritual wei. From iumi lovem Word bilong Jehovah and followim datwan, iumi lovem olketa brata bilong iumi. (1 John 3:15) Nomata world heitim iumi, datwan no savve mekem iumi forgetim olketa instruction from God. Iumi gohed duim will bilong hem witim love and wan mind witim olketa brata bilong iumi, taem iumi luk forward for servem Jehovah witim hapi for olowe.—Psalm 119:93.
5. Hao nao King Asa luk aotem Jehovah?
5 For talemaot feeling bilong iumi for Jehovah, iumi savve talem sem toktok olsem man wea raetem psalm: “Mi bilong iu. Sevem mi plis, from mi luk aotem olketa komand bilong iu.” (Psalm 119:94) King Asa luk aotem God and hem finisim wei for apostate long Judah. Long wanfala big hipap long mek-15 year bilong rul bilong Asa (963 B.C.E.), pipol long Judah “mekem promis for luk aotem . . . Jehovah.” God “letem olketa faendem hem” and hem “gohed for givim peace long olketa.” (2 Chronicles 15:10-15) Disfala example shud encouragem eniwan wea isisi go difren from Christian kongregeson for luk aotem God moa. Hem bae blessim and protectim olketa wea start for kaban moa witim pipol bilong hem.
6. Wanem nao savve protectim iumi long spiritual wei?
6 Toktok bilong Jehovah givim iumi wisdom wea savve protectim iumi long spiritual wei. (Psalm 119:97-104) Olketa komand bilong God mekem iumi moa wise winim olketa enemy bilong iumi. Iumi kasem fasin for luksavve taem iumi lisin and obeyim olketa reminder bilong hem, and ‘from iumi followim olketa law bilong hem, iumi duim samting witim moa savve winim man wea olo.’ (Psalm 119:98-100) Sapos toktok bilong Jehovah hem ‘teist naes long mouth bilong iumi winim honey,’ bae iumi heitim and stap klia long “evri laea road.” (Psalm 119:103, 104) Diswan bae protectim iumi long spiritual wei taem iumi feisim pipol long olketa last day distaem wea bighed, raf, and no followim God.—2 Timothy 3:1-5.
Wanfala Lamp for Leg Bilong Iumi
7, 8. For followim Psalm 119:105, iumi mas duim wanem?
7 Toktok bilong God hem no savve fail for givim spiritual laet. (Psalm 119:105-112) Nomata iumi anointed Christian or iumi “nara sheep” wea fren bilong olketa, iumi sei olsem: “Toktok bilong iu hem wanfala lamp for leg bilong mi, and wanfala laet for road bilong mi.” (John 10:16; Psalm 119:105) Toktok bilong God hem olsem wanfala lamp wea torchim wei for iumi followim, mekem iumi no stambol and foldaon long spiritual wei. (Proverbs 6:23) Bat iumi wanwan mas letem toktok bilong Jehovah kamap olsem lamp for leg bilong iumi.
8 Iumi mas strong olsem man wea raetem Psalm 119. Hem disaed strong for no go difren from olketa law bilong God. Hem sei: “Mi mekem wanfala promis, and bae mi duim, for keepim olketa judicial disison bilong iu [Jehovah] wea raeteous.” (Psalm 119:106) Iumi shud no ting smol long wei for studyim Bible evritaem and tekpart long olketa Christian meeting from diswan savve barava helpem iumi.
9, 10. Hao nao iumi savve olketa wea dedicate finis long Jehovah savve ‘go difren from olketa law bilong hem,’ bat hao nao iumi savve missim diswan?
9 Man wea raetem psalm hem no ‘go difren from olketa law bilong God,’ bat datwan savve happen long samwan wea dedicate long Jehovah. (Psalm 119:110) Nomata King Solomon hem member bilong wanfala nation wea dedicate long Jehovah and hem duim samting followim wisdom bilong God taem hem start for rul, gogo, hem go difren. “Nomata hem tu olketa heathen waef mekem hem for sin” taem olketa switim hem for worshipim olketa false god.—Nehemiah 13:26; 1 Kings 11:1-6.
10 Datfala “man for kasholem bird,” Satan, hem putim staka trap front long iumi. (Psalm 91:3) Olsem example, samwan wea lusim Jehovah finis maet trae for switim iumi for go difren from road bilong spiritual laet and kamap apostate wea stap long darkness. Midolwan olketa Christian long Thyatira, “datfala woman Jezebel” hem stap, wea maet diswan hem wanfala grup bilong olketa woman wea teachim olketa narawan for worshipim olketa idol and for duim fornication. Jesus barava no acceptim kaen wicked samting olsem, and iumi mas garem sem tingting olsem hem. (Revelation 2:18-22; Jude 3, 4) So iumi mas prea for Jehovah helpem iumi for no go difren from olketa law bilong hem, bat for stap long laet wea kam from toktok bilong hem.—Psalm 119:111, 112.
Toktok Bilong God Strongim Iumi for Gohed
11. Olsem Psalm 119:119 showimaot, hao nao God ting long olketa wea wicked?
11 Sapos iumi evritaem followim olketa law bilong God, hem bae strongim iumi for gohed. (Psalm 119:113-120) Iumi no acceptim “olketa wea hafhaf,” olsem Jesus no acceptim olketa wei sei olketa Christian bat wea hafhaf distaem. (Psalm 119:113; Revelation 3:16) From iumi servem Jehovah witim full heart bilong iumi, Hem nao ‘ples for iumi haed’ and bae hem strongim iumi for gohed. Hem bae ‘torowem evriwan wea go difren from olketa law bilong hem’ long wei for duim olketa trik and laea samting. (Psalm 119:114, 117, 118; Proverbs 3:32) Hem ting long olketa wicked wan olsem “dirty” wea kamaot taem man klinim metal wea garem hae price olsem silver and gold. (Psalm 119:119; Proverbs 17:3) Iumi shud evritaem showimaot iumi lovem olketa reminder bilong God, from iumi no laek for finis witim olketa wea wicked!
12. Why nao hem important for fraet long Jehovah?
12 Man for raetem psalm hem sei: “From mi fraet long iu [Jehovah] body bilong mi seksek.” (Psalm 119:120) Sapos iumi laekem God strongim iumi for gohed servem hem, iumi mas garem stretfala wei for fraet long hem. Diswan hem showaot long wei wea iumi stap klia long samting wea hem no appruvim. From Job fraet long Jehovah hem live followim raeteous wei. (Job 1:1; 23:15) Fasin for fraet long God savve mekem iumi fit for gohed duim wanem God hem laekem nomata iumi kasem olketa hard samting. Bat for stand strong olsem, iumi need for prea strong and garem faith.—James 5:15.
Prea and Biliv Strong
13-15. (a) Why nao iumi savve barava sure God bae ansarem olketa prea bilong iumi? (b) Wanem nao savve happen sapos iumi no savve wanem for talem insaed prea bilong iumi? (c) Talem example hao Psalm 119:121-128 maet join witim “sorre toktok wea iumi no talem” insaed prea.
13 Iumi savve prea and biliv strong hao God bae duim samting for iumi. (Psalm 119:121-128) Olsem man wea raetem psalm, iumi sure God bae ansarem olketa prea bilong iumi. Why nao olsem? Bikos iumi lovem olketa komandment bilong God “winim gold, nomata klinfala gold.” And tu, ‘iumi ting long evri law bilong God saed long evri samting olsem hem stret.’—Psalm 119:127, 128.
14 Jehovah herem olketa prea bilong iumi bikos iumi prea and biliv strong, and tu, iumi barava followim olketa law bilong hem. (Psalm 65:2) Bat waswe sapos samfala taem iumi kasem kaen problem wea mekem iumi no savve wanem for talem insaed prea bilong iumi? Long datfala taem nao “spirit hem toktok for iumi witim sorre toktok wea iumi no talem.” (Romans 8:26, 27) Long taem olsem, God acceptim toktok insaed long Word bilong hem olsem olketa prea for samting wea iumi needim.
15 Bible hem fulap witim olketa prea and tingting wea barava join witim “sorre toktok wea iumi no talem.” Olsem example, tingim Psalm 119:121-128. Samting wea man for raetem psalm talem long hia maet barava fitim samting wea kasem iumi. Olsem example, sapos iumi fraet nogud samwan ravem iumi, maet iumi askem God for helpem iumi long sem wei datfala man for raetem psalm hem duim. (Verse 121-123) Tingim sapos iumi need for mekem hardfala disison. Sapos olsem, maet iumi savve prea for spirit bilong Jehovah helpem iumi rememberim and followim olketa reminder bilong hem. (Verse 124, 125) Nomata iumi ‘heitim evri laea wei,’ maet iumi need for askem God for helpem iumi no foldaon long temptation for brekem law bilong hem. (Verse 126-128) Sapos iumi readim Bible evriday, maet iumi savve tingim olketa verse olsem taem iumi prea long Jehovah.
Kasem Help From Olketa Reminder Bilong Jehovah
16, 17. (a) Why nao iumi needim olketa reminder bilong God, and hao nao iumi shud ting long olketa? (b) Nara pipol maet ting hao long iumi, bat wanem nao main important samting?
16 Sapos iumi laekem God for herem olketa prea bilong iumi and appruvim iumi, iumi mas obeyim olketa reminder bilong hem. (Psalm 119:129-136) From iumi olketa man savve forget, iumi needim olketa nambawan reminder bilong Jehovah for mekem iumi tingim moa olketa komandment and instruction bilong hem. Tru nao, iumi hapi long spiritual laet taem iumi minim niu samting abaotem toktok bilong God. (Psalm 119:129, 130) And tu, nomata ‘wata barava ran daon from eye bilong iumi’ taem iumi lukim nara pipol brekem law bilong Jehovah, iumi hapi God ‘mekem feis bilong hem shaen long iumi,’ wea minim hem appruvim iumi.—Psalm 119:135, 136; Numbers 6:25.
17 God bae gohed appruvim iumi sapos iumi followim olketa reminder bilong hem wea raeteous. (Psalm 119:137-144) Iumi olketa servant bilong Jehovah luksavve hao hem stret for hem givim iumi olketa reminder wea raeteous and for hem markem olketa hia olsem olketa komandment wea hem expectim iumi for obeyim. (Psalm 119:138) From datfala man for raetem psalm hem obeyim olketa komandment bilong God, why nao hem sei: “Mi man nating and pipol luk daonem mi”? (Psalm 119:141) Luk olsem hem storyim wei wea olketa enemy bilong hem ting long hem. Sapos iumi stand strong for olketa raeteous principle, maet nara pipol luk daonem iumi. Nomata olsem, main important samting nao, Jehovah hem appruvim iumi from iumi followim olketa reminder bilong hem wea raeteous.
Stap Sef and Garem Peace
18, 19. Wanem nao kamaot from iumi followim olketa reminder bilong God?
18 Iumi stap klos long God taem iumi followim olketa reminder bilong hem. (Psalm 119:145-152) From iumi lisin gud long olketa reminder bilong Jehovah, iumi feel sure hao taem iumi prea long hem witim full heart bilong iumi, bae hem herem iumi. Maet iumi wekap long “early morning taem hem dark yet” and singaot for help. Datwan hem nambawan taem for prea! (Psalm 119:145-147) God hem klos long iumi tu from iumi stap klia from olobaot fasin, and olsem Jesus, iumi ting long toktok bilong hem olsem tru samting. (Psalm 119:150, 151; John 17:17) Wei wea iumi fren witim Jehovah strongim iumi for gohed long disfala nogud world, and thru long bigfala war bilong hem long Armageddon tu.—Revelation 7:9, 14; 16:13-16.
19 From iumi barava respectim toktok bilong God, iumi stap sef. (Psalm 119:153-160) Iumi no olsem olketa wea wicked bikos iumi ‘no go difren from olketa reminder bilong Jehovah.’ Iumi lovem olketa law bilong God and iumi feel sef from loving-kaeness bilong hem. (Psalm 119:157-159) Olketa reminder bilong Jehovah mekem iumi no forgetim wanem hem laekem iumi for duim nomata wanem samting kamap. Long narasaed, olketa law bilong God hem instruction for iumi followim and iumi luksavve hao Creator garem right for directim iumi. From iumi luksavve hao ‘full toktok bilong God hem tru’ and iumiseleva kanduit disaedem gogo bilong iumi, iumi hapi for kasem direction from God.—Psalm 119:160; Jeremiah 10:23.
20. Why nao iumi garem “bigfala peace”?
20 From iumi lovem law bilong Jehovah iumi kasem bigfala peace. (Psalm 119:161-168) Persecution no aotem datfala “peace bilong God” wea winim eni samting. (Philippians 4:6, 7) From iumi barava tinghae long olketa judicial disison bilong Jehovah, iumi evritaem praisem hem—“sevenfala taem insaed long day.” (Psalm 119:161-164) Man wea raetem psalm hem sing: “Olketa wea lovem law bilong iu garem bigfala peace, and no eni samting savve mekem olketa stambol.” (Psalm 119:165) Sapos iumi wanwan lovem and followim law bilong Jehovah, toktok bilong narawan, or eni nara samting bae no mekem iumi stambol long spiritual wei.
21. Wanem nao olketa example from Bible wea showim hao iumi no need for stambol sapos olketa problem kamap insaed long kongregeson?
21 Plande man wea Bible storyim no letem eni samting mekem olketa stambol for olowe. Olsem example, datfala Christian man Gaius no stambol bat hem ‘gohed for wakabaot long truth’ nomata fasin bilong Diotrephes no followim God. (3 John 1-3, 9, 10) Paul encouragem tufala Christian woman Euodia and Syntyche “for garem sem mind insaed long Lord,” maet from problem kamap midolwan long tufala. Luk olsem tufala kasem help for stretem datfala problem and gohed faithful for servem Jehovah. (Philippians 4:2, 3) No eni reason stap for iumi stambol sapos olketa problem kamap insaed long kongregeson. Iumi mas trae hard for followim olketa law bilong Jehovah, and no forgetim hao ‘evri wei bilong iumi stap front long hem.’ (Psalm 119:168; Proverbs 15:3) Sapos olsem no eni samting savve aotem “bigfala peace” wea iumi garem.
22. (a) Sapos iumi obeyim God, iumi savve kasem wanem privilege? (b) Hao nao iumi shud ting long samfala wea go difren from Christian kongregeson?
22 Sapos iumi evritaem obeyim Jehovah, bae iumi garem privilege for praisem hem for olowe. (Psalm 119:169-176) Taem iumi live followim olketa law bilong God iumi stap sef long spiritual wei distaem, and tu, ‘mouth bilong iumi hem gohed for praisem Jehovah.’ (Psalm 119:169-171, 174) Diswan nao hem nambawan privilege wea iumi savve garem long olketa last day distaem. Man wea raetem psalm laek for gohed laef and praisem Jehovah, bat hem ‘go difren olsem wanfala sheep wea lus.’ (Psalm 119:175, 176) Samfala wea go difren from Christian kongregeson maet lovem God yet and want for givim praise long hem. So iumi mas duim samting for helpem olketa mekem olketa stap sef long spiritual wei moa and kasem hapi from wei for praisem Jehovah witim pipol bilong hem.—Hebrews 13:15; 1 Peter 5:6, 7.
Laet for Torchim Road Bilong Iumi for Olowe
23, 24. Wanem gud samting nao iu kasem from Psalm 119?
23 Psalm 119 savve helpem iumi long plande difren wei. Olsem example, hem savve mekem iumi depend long God long bigfala wei moa, from hem showim iumi hao trufala hapi hem kam from wei for “wakabaot followim law bilong Jehovah.” (Psalm 119:1) Man wea raetem psalm remindim iumi hao ‘full toktok bilong God hem tru.’ (Psalm 119:160) Diswan shud mekem iumi tinghae go moa long full Word bilong God. Wei for ting raonem Psalm 119 shud muvim iumi for waka hard for studyim Bible. Man wea raetem psalm hem evritaem askem God: “Teachim mi olketa law bilong iu.” (Psalm 119:12, 68, 135) Hem ask moa: “Teachim mi gudfala fasin, gudfala tingting and savve, from mi showimaot faith long olketa komandment bilong iu.” (Psalm 119:66) Iumi shud prea for sem samting.
24 Teaching bilong Jehovah mekem wei for iumi fren gud witim hem. Man wea raetem psalm evritaem kolem hemseleva servant bilong God. Taem hem story long Jehovah hem iusim naesfala toktok taem hem sei: “Mi bilong iu.” (Psalm 119:17, 65, 94, 122, 125; Romans 14:8) Hem nambawan privilege for servem and praisem Jehovah olsem wanfala Witness bilong hem! (Psalm 119:7) Waswe, iu wanfala servant bilong God wea talemaot Kingdom bilong hem witim hapi? Sapos olsem, iu savve feel sure hao Jehovah bae gohed for strongim and blessim iu long disfala waka sapos iu evritaem trustim toktok bilong hem and letem datwan torchim road bilong iu.
[CAPTIONS]
Toktok bilong God givim spiritual laet
Sapos iumi lovem olketa reminder bilong Jehovah, bae hem no ting long iumi olsem “dirty” wea kamaot taem man klinim gold
Sapos iumi readim Bible evriday, maet iumi savve tingim olketa verse for helpem iumi taem iumi prea
Hao Nao Bae Iu Ansa?
• Why nao iumi shud lovem toktok bilong God?
• Hao nao toktok bilong God strongim iumi for gohed?
• Hao nao olketa reminder bilong Jehovah helpem iumi?
• Why nao pipol bilong Jehovah stap sef and garem peace?
[Piksa long page 16]
Toktok bilong God givim spiritual laet
[Piksa long page 17]
Sapos iumi lovem olketa reminder bilong Jehovah, bae hem no ting long iumi olsem “dirty” wea kamaot taem man klinim gold
[Olketa Piksa long page 18]
Sapos iumi readim Bible evriday, maet iumi savve tingim olketa verse for helpem iumi taem iumi prea