Word Bilong Jehovah Hem Laef
Olketa Main Point From Buk Faev Bilong Psalms
OLKETA rich man savve sei: “Olketa son bilong iumi olsem olketa young tree wea grow gud, olketa dota bilong iumi olsem kona post wea luk naes long haos bilong king, olketa stoahaos bilong iumi fulap, . . . olketa animal barava kamap staka fogud.” Olketa wea garem hae position savve sei olsem tu: “Pipol wea kasem olketa samting olsem olketa hapi!” Bat man wea raetem disfala psalm talem samting wea barava difren, hem sei: “Pipol wea God bilong olketa Jehovah olketa hapi!” (Psalm 144:12-15) Datwan hem barava tru! Jehovah nao datfala hapi God, and olketa wea worshipim hem olketa hapi pipol. (1 Timothy 1:11) Psalms 107 go kasem 150, wea hem last sekson bilong olketa song long buk bilong Psalms barava showimaot hao diswan hem tru.
Buk Faev bilong Psalms mekhae tu long olketa nambawan fasin bilong Jehovah, and tu loving-kaeness, wei bilong hem for tok tru, and gudfala fasin bilong hem. Taem iumi minim gud olketa fasin bilong God bae datwan muvim iumi for lovem and fraet long hem. Diswan nao bae mekem iumi hapi. Iumi kasem barava important message long Buk Faev bilong Psalms!—Hebrews 4:12.
LOVING-KAENESS BILONG JEHOVAH MEKEM IUMI HAPI
Olketa Jew wea kam bak from wei for prisoner long Babylon singsing olsem: “Pipol mas talemaot thankiu long Jehovah for loving-kaeness bilong hem and olketa nambawan samting wea hem duim for olketa son bilong man.” (Psalm 107:8, 15, 21, 31) David singsing olsem for praisem God: “Wei wea evri samting abaotem iu hem tru hem hae go kasem skae.” (Psalm 108:4) Hem prea olsem long nextfala song bilong hem: “Helpem mi, God bilong mi, Jehovah; from iu garem loving-kaeness, sevem mi.” (Psalm 109:18, 19, 26) Psalm 110 hem profesi abaotem rul bilong Messiah. Psalm 111:10 hem sei: “Wei for fraet long Jehovah hem start bilong wisdom.” Nextfala psalm hem sei hao, “man wea fraet long Jehovah nao hem hapi.”—Psalm 112:1
Olketa kolem Psalms 113 go kasem 118, olketa Hallel Psalm, bikos olketa psalm hia iusim disfala toktok “Hallelujah,” wea minim “Praisem Jah!” Datfala Mishnah hem wanfala buk wea olketa raetem long mek-thri century abaotem evri kastom bilong pipol long datfala taem. Mishnah hem talem hao olketa savve singim olketa song hia long taem bilong Passover and long thrifala festival bilong olketa Jew wea kamap evri year. Psalm 119 hem long winim eni nara chapter and psalm insaed Bible. Datfala psalm hem mekhae long message bilong Jehovah.
Ansa for Olketa Bible Kwestin:
109:23—Wanem nao David minim taem hem sei: “Olsem shadow wea gogo daon, mi mas go nao”? Datwan hem stael toktok bilong David abaotem hao hem savve hem barava klosap for dae.—Psalm 102:11.
110:1, 2—Wanem nao ‘Lord bilong David,’ Jesus Christ, duim taem hem sidaon weit long right hand bilong God? Bihaen Jesus resurrect, hem go ap long heven and weit saed long God go kasem 1914, year wea hem start for rul olsem King. Long taem hia wea hem weit, Jesus rul ovarem olketa anointed follower bilong hem, and hem givim direction long olketa for preach and for mekem pipol kamap disaepol. And tu, hem redyim olketa for rul witim hem long Kingdom bilong hem.—Matthew 24:14; 28:18-20; Luke 22:28-30.
110:4—Wanem ‘promis’ nao Jehovah bae ‘no feel sorre long hem bihaen’ hem talem? Disfala promis hem datfala covenant wea Jehovah mekem witim Jesus Christ for kamap King and Hae Priest.—Luke 22:29.
113:3—Hao nao nem bilong Jehovah bae kasem praise from “ples wea sun kamap go kasem ples wea hem go daon”? Diswan hem no wanfala grup bilong olketa man nomoa wea worshipim God evriday. From ples wea sun kamap long east go kasem ples wea hem go daon long west, laet bilong hem shaen long full earth. Long sem wei, Jehovah bae kasem praise from pipol raonem full earth. Bae hem hard for olketa duim datwan sapos olketa no organize gud. Iumi olketa Witness bilong Jehovah garem nambawan privilege for praisem God and strong for share long disfala waka for talemaot message abaotem Kingdom.
116:15—Hao nao ‘dae bilong olketa loyal wan bilong Jehovah hem big samting long hem’? From Jehovah barava lovem tumas full sekson bilong olketa loyal worshiper bilong hem, hem kanduit letem evriwan long olketa for dae. Tingim sapos Jehovah letem datwan for happen, bae hem luk olsem olketa enemy bilong hem nao strong winim hem. And tu, bae no eniwan stap long earth for startim datfala niu world.
119:71—Waswe, eni gud samting nao savve kamaot from olketa hard samting wea iumi kasem? Olketa hard samting wea iumi kasem savve teachim iumi for depend evribit long Jehovah, strong for prea, and strong for studyim Bible and followim wanem hem talem. And tu, wei wea iumi deal witim hardfala samting savve showimaot wanem kaen wik point nao iumi need for stretem. Sapos iumi letem hard samting wea kasem iumi mekem fasin bilong iumi kamap moabeta, bae iumi no feel nogud taem iumi kasem hard taem.
119:96—Wanem nao disfala toktok ‘end bilong evri samting wea perfect’ hem minim? Man wea raetem disfala psalm storyim tingting bilong man abaotem wei for perfect. Luk olsem hem tingim wei wea man no minim evribit wei for perfect. Bat, komandment bilong God hem no olsem. Direction bilong hem fitim evri samting iumi duim long laef. New International Version hem talem olsem: “Mi lukim hao evri samting wea perfect hem garem spialaen, bat olketa komand bilong iu no garem eni spialaen.”
119:164—Wanem nao datfala toktok abaotem wei for prea “sevenfala taem insaed long day” hem minim? Plande taem namba seven hem minim samting wea kasem full namba. So, man wea raetem psalm talem hao Jehovah fit for kasem evri praise.
Olketa Leson for Iumi:
107:27-31. Wisdom bilong world bae ‘konfius’ taem Armageddon hem kam. (Revelation 16:14, 16) Datfala wisdom bae hard for sevem eniwan. Only olketa wea depend long Jehovah for salvation bae laef for ‘talemaot thankiu long hem for loving-kaeness bilong hem.’
109:30, 31; 110:5. From soldia savve holem shield long left hand and sword long right hand bilong hem, shield no savve protectim right hand. Long tokpiksa wei, Jehovah hem stap “long right hand” bilong olketa servant bilong hem for faet for olketa. Long wei olsem hem protectim and helpem olketa, wea datwan hem nambawan reason for iumi “praisem hem long bigfala wei”!
113:4-9. Jehovah hem barava hae tumas dastawe hem mas kam daon ‘for lukluk long skae.’ Nomata olsem, hem feel sorre long olketa wea hambol, poor, and woman wea no savve garem pikinini. Sovereign Lord Jehovah hem hambol and laekem olketa wea worshipim hem for deal witim olketa kaen pipol olsem long hambol wei tu.—James 4:6
114:3-7. Wei for lane abaotem olketa nambawan samting wea Jehovah duim for pipol bilong hem long Red Sea, long Jordan River, and long Maunt Sinai shud barava muvim iumi. Olketa man, wea scripture kolem olketa “earth,” shud “kasem bigfala pain,” wea piksarem wei wea olketa shud barava tinghae long datfala Lord.
119:97-101. Wei for kasem moa wisdom, fasin for minim samting, and savve from Word bilong God bae protectim iumi long spiritual wei.
119:105. Word bilong God hem lamp for leg bilong iumi long wei wea hem helpem iumi for deal witim olketa problem wea iumi kasem distaem. Hem olsem laet for road bilong iumi tu, from hem talem iumi plan bilong God for future.
HAPI NOMATA IUMI KASEM PROBLEM
Hao nao iumi savve feisim olketa hard samting wea kamap and winim olketa problem? Psalms 120 go kasem 134 givim klia ansa for disfala kwestin. Iumi savve winim olketa hard samting and gohed for hapi taem iumi depend long Jehovah for help. Maet olketa Israelite singim olketa psalm hia, wea olketa kolem olketa Song bilong Ascents, taem olketa go long Jerusalem for celebratem olketa festival wea kamap evri year.
Psalm 135 and 136 storyim wei wea Jehovah hem Man for duim eni samting hem laek for duim, wea barava difren from olketa iusles idol. Psalm 136 hem song wea olketa raetem for wanfala grup pipol singim first part, then olketa narawan singim last part for ansarem datfala first part. Nextfala psalm hem storyim wei wea olketa Jew wea stap long Babylon barava feel wikdaon from olketa laek for worshipim Jehovah long Zion. David nao raetem Psalms 138 go kasem 145. Hem laek for ‘praisem Jehovah witim full heart bilong hem.’ Why nao olsem? Hem sei: “From iu wakem mi long nambawan wei.” (Psalm 138:1; 139:14) Long faevfala psalm wea kamap bihaen, David prea long Jehovah for protectim hem from olketa wicked man, for kasem kaonsel wea raeteous, for Jehovah sevem hem from olketa wea persecutim hem, and for helpem hem garem gudfala fasin. Hem mekhae long hapi wea pipol bilong Jehovah kasem. (Psalm 144:15) Bihaen David storyim wei wea God hem nambawan and abaotem gudfala fasin bilong hem, hem sei: “Mouth bilong mi bae praisem Jehovah, and evri man mas blessim holy nem bilong hem for longfala taem, tru tumas, for olowe.”—Psalm 145:21.
Ansa for Olketa Bible Kwestin:
122:3—Hao nao Jerusalem hem olsem wanfala taon “wea join tugeta olsem wanfala ples”? Olsem olketa taon long bifor, olketa buildim olketa haos long Jerusalem klosap long each other. From datfala taon hem olsem, datwan mekem hem isi for protectim taon hia. And tu, wei wea olketa haos stap klosap long each other olsem, hem mekem isi for pipol depend long each other for help and protection. Luk olsem, taem olketa 12 tribe bilong Israel hipap tugeta for worship olketa garem wan mind.
123:2—Wanem nao tokpiksa abaotem eye bilong olketa servant bilong God hem minim? Olketa wakman and olketa haos gele luk long hand bilong boss bilong olketa for tufala samting: for luksavve wanem boss hem laekem, and for boss protectim and provaedem need bilong olketa. Long sem wei, iumi luk long Jehovah for minim will bilong hem and for hem appruvim iumi.
131:1-3—Hao nao David ‘mekem soul bilong hem feel gud and stap kwaet olsem wanfala smol pikinini wea mami bilong hem karem hem’? Olsem wei wea wanfala smol pikinini savve kasem comfort and wei for satisfae taem mami karem hem, David lane for mekem soul bilong hem feel gud and stap kwaet “olsem wanfala smol pikinini wea mami bilong hem karem hem.” Long wanem wei? Long wei for no garem heart and eye wea praod, and for no lukaotem olketa haefala samting wea hem no fit for kasem. Winim wei for aftarem bignem, plande taem David hem luksavve long olketa samting wea hem no fit for duim and hem showimaot hambol fasin. Iumi showimaot iumi wise sapos iumi followim wei bilong hem, especially taem iumi laek for kasem olketa privilege insaed kongregeson.
Olketa Leson for Iumi:
120:1, 2, 6, 7. Wei for tok laea and toktok for spoelem man savve mekem narawan wikdaon and barava feel nogud. Wei for kontrolem toktok bilong iumi hem wanfala wei for showimaot iumi “laek for garem peace.”
120:3, 4. Sapos iumi mas deal witim samwan wea savve “tanem toktok,” wei wea iumi savve hao Jehovah bae stretem olketa samting long taem wea hem markem bae comfortim iumi. Olketa wea savve tok laea againstim narawan bae kasem trabol from hand bilong “wanfala maeti man.” Olketa nao bae kasem datfala strong judgment bilong Jehovah wea “olketa sakol bilong olketa brum tree” hem piksarem.
127:1, 2. Iumi shud depend long Jehovah for leadim iumi long evri samting wea iumi duim.
133:1-3. Wei wea pipol bilong Jehovah garem wan mind hem comfortim man, mekem man kasem gud samting, and strongim man. Iumi no laek for spoelem datwan witim wei for lukluk long nogud saed bilong man, raoa, and komplen.
137:1, 5, 6. Pipol bilong Jehovah wea stap farawe olsem prisoner feel klos long Zion wea hem nao part long organization bilong God long earth long datfala taem. Waswe long iumi? Waswe, iumi loyal for sapotim organization wea Jehovah iusim distaem?
138:2. Jehovah ‘mekhae long toktok bilong hem winim nem bilong hem’ long wei wea hem fulfillim evri samting wea hem promisim long nem bilong hem winim eni samting iumi maet tingim. Tru nao, olketa nambawan hope stap front long iumi.
139:1-6, 15, 16. Jehovah savve finis long olketa samting wea iumi duim, tingting bilong iumi, and olketa toktok wea bae iumi talem. Hem savve long iumi taem iumi start insaed bele bilong mami, bifor olketa main part long body hem start. Wei wea Jehovah savve evri samting abaotem iumi wanwan hem barava nambawan and hem hard tumas for iumi minim. Iumi kasem comfort taem iumi savve hao Jehovah lukim hard samting wea kasem iumi, and tu, hem minim hao datwan hem affectim iumi!
139:7-12. Nomata wanem ples iumi stap God savve strongim iumi.
139:17, 18. Waswe, iumi barava feel hapi for kasem savve bilong Jehovah? (Proverbs 2:10) Sapos olsem, iumi bae kasem hapi wea no savve finis. Olketa tingting bilong Jehovah “staka tumas winim sandbis.” Bae iumi nating finis for lanem niu samting abaotem hem.
139:23, 24. For helpem iumi aotem olketa “rongfala tingting”—olketa nogud tingting and feeling for laekem samting—iumi laekem Jehovah for lukluk long heart bilong iumi and for helpem iumi aotem olketa “rongfala tingting” hia.
143:4-7. Hao nao iumi savve stand strong nomata long olketa barava hard samting tu? Man wea raetem psalm hem givim ansa: Ting raonem olketa waka bilong Jehovah, and barava interest long olketa samting wea hem duim, and prea long hem for help.
“Iufala Praisem Jah!”
Toktok for praisem Jehovah nao hem endim each wan long first fofala buk insaed buk bilong Psalms. (Psalm 41:13; 72:19, 20; 89:52; 106:48) Lastfala buk hem semsem tu. Psalm 150:6 hem sei: “Evri samting wea brith—mas praisem Jah. Iufala praisem Jah!” Datwan bae barava kamap tru long niu world bilong God.
Taem iumi luk forward for datfala taem bilong hapi, iumi garem staka reason for givim glory long trufala God and praisem nem bilong hem. Taem iumi tingim hapi wea iumi kasem bikos iumi savve long Jehovah and enjoyim gudfala wei for fren witim hem, datwan barava muvim iumi for praisem hem from heart wea tinghae long hem!
[Piksa long page 31]
Olketa nambawan samting wea Jehovah duim mekem hem fit for kasem honor
[Piksa long page 32]
Olketa tingting bilong Jehovah “staka tumas winim sandbis”