“Followim Mi Olowe”

“Hem kolem iufala for followim disfala wei, from Christ hem safa for iufala, and leavim wanfala example for iufala for followim gud olketa step bilong hem.”—1 PETER 2:21.

1, 2. Why nao perfect example bilong Jesus olsem wanfala teacher hem no hard tumas for iumi followim?

JESUS CHRIST hem nambawan Teacher wea winim evri nara teacher. And tu, hem perfect, no enitaem hem sin long full laef bilong hem olsem wanfala man. (1 Peter 2:22) Bat, waswe, datwan minim example bilong Jesus olsem wanfala teacher hem hard tumas for iumi olketa man wea no perfect for followim? Barava nomoa.

² Olsem iumi lukim long lastfala article, faondeson bilong wei wea Jesus teach, hem love. And love hem samting wea iumi evriwan savve mekem grow. Planti taem Word bilong God encouragem iumi for mekem grow and kamap moabeta long wei wea iumi lovem nara pipol. (Philippians 1:9; Colossians 3:14) No enitaem Jehovah expectim olketa man for duim samting wea olketa no fit for duim. Bat, from “God hem love” and hem wakem iumi long image bilong hemseleva, hem stret for sei hem creatim iumi witim wei for showimaot love. (1 John 4:8; Genesis 1:27) So taem iumi readim toktok bilong aposol Paul long theme text bilong iumi, iumi savve feel sure dat iumi savve win long diswan. Iumi savve followim olketa step bilong Christ long klos wei. Tru nao, iumi savve obeyim komand bilong Jesus: “Followim mi olowe.” (Luke 9:23) Iumi bae lukluk long hao iumi savve followim love wea Christ showim, firstaem for olketa truth wea hem teachim, then for olketa pipol wea hem teachim.

Mekem Grow Love for Olketa Truth wea Iumi Lanem

3. Why nao samfala faendem hem hard tumas for study, bat wanem nao encouragement wea stap long Proverbs 2:1-5?

³ For lovem olketa truth wea iumi teachim long nara pipol, iumiseleva mas lovem wei for lanem olketa truth hia. Long world distaem, for lovem wei for lanem samting hem no isi. Samfala samting olsem wei for no skul gud taem man hem young mekem planti barava les for studyim eni samting. Bat hem important tumas for iumi lane from Jehovah. Proverbs 2:1-5 hem sei: “Son bilong mi, sapos iu acceptim toktok bilong mi and tinghae long komandment bilong mi, for iu lisin gud long wisdom witim ear bilong iu, mekem iu savve tanem heart bilong iu long fasin for luksavve; and tu, sapos iu singaot for minim samting and ask for fasin for luksavve, sapos iu go ahed for lukaotem olsem silver, and olsem riches wea haed iu go ahed for lukaotem, then iu bae minim wei for fraet long Jehovah, and iu bae faendem barava savve bilong God.”

4. Wanem nao hem minim for “tanem” heart, and wanem kaen tingting bae helpem iumi for duim olsem?

⁴ Lukim hao long verse 1 go kasem 4, hem evritaem encouragem iumi for trae hard for no just “acceptim” and “tinghae” bat for “go ahed for lukaotem” tu. Bat, wanem nao bae muvim iumi for duim evri samting hia? Lukim datfala toktok “tanem heart bilong iu long fasin for luksavve.” Wanfala buk hem sei hao disfala encouragement “hem no askem man for lukluk gud long samting nomoa; hem askem hem for garem wanfala spesol wei for tingting: for barava wantem and willing for kasem olketa teaching.” And wanem samting nao savve mekem iumi willing and barava want for lanem samting wea Jehovah teachim iumi? Tingting bilong iumi. Iumi need for ting long “barava savve bilong God” olsem “silver” and olsem “riches wea haed.”

5, 6. (a) Gogo, wanem maet happen, and hao nao iumi savve missim datwan? (b) Why nao iumi shud go ahed for addim go moa samting long olketa treasure wea iumi faendem finis insaed Bible?

⁵ Hem no hard for kasem tingting olsem. Olsem example, maet insaed “savve bilong God” wea iu lanem finis, iu lanem hao hem purpose bilong Jehovah for olketa man wea faithful for stap olowe long Paradaes long earth. (Psalm 37:28, 29) Firstaem wea iu lanem datfala truth, for sure iu tingim datwan olsem wanfala spesol treasure, wanfala truth wea fulimap mind and heart bilong iu witim hope and hapi. Waswe distaem? Waswe, gogo iu lusim wei wea iu tinghae long datfala treasure? Sapos olsem, trae for duim tufala samting. Firstaem, mekem datfala feeling for tinghae kamap niu moa, hem minim, evritaem ting raonem why nao iu tinghae long each truth wea Jehovah teachim iu, nomata olketa wea iu lanem planti year bifor.

⁶ Mek-tu samting, go ahed for addim samting long treasure bilong iu. Olsem example, sapos iu digim wanfala spesol ston, waswe, bae iu just putim long poket and go awe hapi nomoa? Or waswe, bae iu dig for lukim sapos eni moa stap? Word bilong God hem fulap witim olketa spesol truth wea olsem olketa spesol ston. Nomata sapos iu faendem planti finis, iu savve faendem samfala moa. (Romans 11:33) Taem iu lanem wanfala niu truth, askem iuseleva: ‘Wanem nao mekem hem wanfala treasure? Waswe, hem helpem mi for minim go moa fasin and olketa purpose bilong Jehovah? Waswe, hem savve helpem mi for followim olketa step bilong Jesus?’ Wei for ting raonem olketa kwestin olsem savve helpem iu for buildimap love bilong iu for olketa truth wea Jehovah teachim iu.

Showimaot Love for Olketa Truth wea Iumi Teachim

7, 8. Wanem nao samfala wei wea iumi savve showim nara pipol iumi lovem olketa truth wea iumi lanem from Bible? Storyim wanfala example.

⁷ Taem iumi teachim nara pipol, hao nao iumi savve showimaot iumi lovem olketa truth wea iumi lanem from Word bilong God? Long wei wea followim example bilong Jesus, iumi barava depend long Bible taem iumi preach and teach. Distaem, pipol bilong God evriwea long world kasem encouragement for iusim Bible long bigfala wei moa long pablik ministry bilong olketa. Taem iu followim datfala encouragement, lukaotem olketa wei for mekem haosholder luksavve hao iu barava tinghae long samting wea iu sharem from Bible.—Matthew 13:52.

⁸ Olsem example, bihaen terrorist attak long New York City last year, wanfala Christian sista readim Psalm 46:1, 11 long pipol wea hem meetim long ministry. Firstaem, hem askem pipol hao nao olketa go ahed for deal witim datfala barava nogud samting. Hem lisin gud long ansa bilong olketa, then hem sei: “Waswe, hem olraet for mi readim wanfala scripture witim iu wea barava comfortim mi long disfala hardfala taem?” Tu-thri nomoa no willing, and planti nambawan story kamap. Taem hem story witim olketa young pipol, planti taem datfala sem sista hem sei: “Mi teachim Bible for 50 year finis, and iu savve, mi nating lukim eni problem wea disfala buk no fit for help stretem.” Taem iumi honest and interest for story witim pipol, iumi showimaot iumi tinghae and lovem wanem iumi lanem from Word bilong God.—Psalm 119:97, 105.

9, 10. Why nao hem important for iusim Bible taem iumi ansarem olketa kwestin abaotem olketa biliv bilong iumi?

⁹ Taem pipol askem kwestin abaotem olketa biliv bilong iumi, iumi garem nambawan chance for showimaot iumi lovem Word bilong God. Long wei wea followim example bilong Jesus, iumi no givim ansa from idea bilong iumiseleva. (Proverbs 3:5, 6) Iumi iusim Bible for ansa. Waswe, iu fraet nogud samwan askem iu kwestin wea iu no savve ansarem? Tingim tufala samting wea iu savve duim for winim datfala problem.

¹⁰ Duim wanem iu fit for duim for redy. Aposol Peter hem raet: “Mekem Christ kamap holy olsem Lord long heart bilong iufala, evritaem redy for givim ansa long eniwan wea askem reason for hope wea iufala garem, bat duim datwan witim kwaet fasin and bigfala respect.” (1 Peter 3:15) Waswe, iu redy for defendim olketa biliv bilong iu? Olsem example, sapos samwan laek for savve why iu no tekpart long wanfala kastom or nara samting wea no followim Bible, no just sei, “Religion bilong mi stopem.” Kaen ansa olsem maet mekem man tingse iu letem nara pipol disaedem samting for iu wea minim iu member bilong wanfala cult. Maet hem moabeta for sei, “Word bilong God, Bible, tambuim” or, “Hem bae no mekem God bilong mi hapi.” Then explainim long gudfala wei why nao hem olsem.—Romans 12:1.

11. Wanem research tul nao savve helpem iumi for redy for ansarem olketa kwestin abaotem olketa truth from Word bilong God?

¹¹ Sapos iu feel olsem iu no redy gud, waswe sapos iu spendem lelebet taem for studyim datfala buklet Olketa Bible Subject For Storyim sapos hem stap long languis bilong iu?a Chusim tu-thri subject wea pipol maet ask abaotem, and baeheartim samfala Bible point. Mek sure datfala buklet and Bible stap redy. No hol bak for iusim tufala evriwan. Talem haosholder iu garem wanfala research tul wea iu laek for iusim for helpem iu iusim Bible for ansarem olketa kwestin.

12. Wanem nao iumi savve duim sapos iumi no savve ansarem wanfala Bible kwestin?

¹² Trae for no wari. No eni man wea no perfect savve long evri samting. So, taem samwan askem iu wanfala Bible kwestin wea iu no savve ansarem, iu savve sei: “Thankiu nao iu askem interesting kwestin. For tok stret, mi no savve long ansa, bat mi sure Bible storyim datwan. Mi laekem tumas for duim Bible research, so bae mi faendem ansa for kwestin bilong iu and kam bak moa.” For story long honest and hambol wei olsem savve mekem chance kamap for story moa bihaen.—Proverbs 11:2.

Lovem Pipol wea Iumi Teachim

13. Why nao iumi mas keepim gudfala tingting abaotem pipol wea iumi preach long olketa?

¹³ Jesus showimaot love for pipol wea hem teachim. Hao nao iumi savve followim example bilong hem? Iumi mas evritaem garem feeling for pipol wea stap raonem iumi. Hem tru, “war bilong bigfala day bilong God Olmaeti” hem klosap, and staka man bae finis evribit. (Revelation 16:14; Jeremiah 25:33) Bat, iumi no savve hu bae stap laef and hu bae dae. Datfala judgment wea Jehovah appointim Jesus Christ for duim bae kamap long future. Go kasem taem wea datfala judgment hem finis, iumi ting long evri man olsem olketa wea maet kamap olketa servant bilong Jehovah.—Matthew 19:24-26; 25:31-33; Acts 17:31.

14. (a) Hao nao maet iumi luksavve sapos iumi tingim feeling bilong pipol? (b) Wanem nao samfala wei wea iumi savve showimaot iumi tingim feeling and iumi interest long nara pipol?

¹⁴ So, olsem Jesus, iumi mas trae for tingim feeling bilong pipol. Maet iumi askem iumiseleva: ‘Waswe, mi feel sorre for pipol wea religion, politik, and bisnis trikim olketa witim kleva laea toktok and giaman wei? Sapos hem luk olsem olketa no interest long message bilong mifala, waswe, mi trae for minim why nao olketa feel olsem? Waswe, mi luksavve hao miseleva, or olketa narawan wea faithful for servem Jehovah distaem, feel olsem bifor tu? Waswe, mi changem story bilong mi for fitim diswan? Or mi rejectim olketa olsem pipol wea hard tumas for change?’ (Revelation 12:9) Taem pipol luksavve iumi really tingim feeling bilong olketa, olketa bae moa willing for herem message bilong iumi. (1 Peter 3:8) For tingim feeling bilong pipol savve muvim iumi tu for showimaot moa interest long olketa wea iumi meetim long ministry. Maet iumi raetem samfala note abaotem olketa kwestin and samting olketa wari long hem. Taem iumi go bak, iumi savve showimaot hao iumi ting raonem samting wea olketa talem last taem. And sapos olketa garem bigfala need long datfala taem, maet iumi fit for helpem olketa.

15. Why nao iumi shud lukaotem olketa gud point bilong pipol, and hao nao iumi savve duim datwan?

¹⁵ Olsem Jesus, iumi lukaotem olketa gud point bilong pipol. Maet wanfala singol mami hem duim gudfala waka for bringimap olketa pikinini bilong hem. Maet wanfala man stragol for provaedem samting for famili bilong hem. Wanfala olo showimaot interest long olketa spiritual samting. Waswe, taem iumi meetim pipol iumi luksavve long olketa fasin olsem and praisem olketa? Taem iumi duim olsem, iumi showimaot hao sem samting long laef affectim iumi evriwan and datwan savve openem wei for givim witness abaotem Kingdom.—Acts 26:2, 3.

Mas Hambol Taem Iumi Showimaot Love

16. Why nao hem important for iumi evritaem garem kwaet fasin and showimaot respect for pipol wea iumi preach long olketa?

¹⁶ Love for pipol wea iumi teachim bae muvim iumi for followim disfala wisefala warning from Bible: “Savve hem mekem man praod, bat love hem buildimap man.” (1 Corinthians 8:1) Jesus garem bigfala savve, bat no enitaem hem praod. So, taem iu storyim olketa biliv bilong iu, stap klia long wei for argue or fasin for apim iuseleva. Goal bilong iumi hem for kasem heart bilong pipol and pullim olketa kam long olketa truth wea iumi barava lovem. (Colossians 4:6) Remember, taem Peter encouragem olketa Christian for stap redy for defendim faith bilong olketa, hem talem tu hao iumi shud duim olsem “witim kwaet fasin and bigfala respect.” (1 Peter 3:15) Sapos iumi garem kwaet fasin and showimaot respect, bae hem moa isi for iumi pullim pipol kam long God wea iumi servem.

17, 18. (a) Wanem nao iumi shud duim taem pipol tingse iumi no fit for kamap olketa minister? (b) Why nao olketa Bible student no need for savve long olketa Bible languis bilong bifor?

¹⁷ Iumi no need for show-off witim savve or education bilong iumi. Sapos samfala long territory bilong iu nating willing for lisin long eni man wea no garem olketa university degree or bignem, no letem tingting bilong olketa mekem iu feel wikdaon. Jesus no wari abaotem olketa wea againstim hem from wei wea hem no go long eni spesol skul bilong olketa Jew long taem bilong hem, and hem no trae for mekem pipol hapi long wei for show-off witim bigfala savve bilong hem.—John 7:15.

¹⁸ Hem barava moa important for olketa Christian minister garem hambol fasin and love winim bigfala education. Nambawan Teacher, Jehovah, mekem iumi fit for duim ministry. (2 Corinthians 3:5, 6) And nomata wanem nao samfala bigman bilong Christendom talem, iumi no need for lanem olketa Bible languis bilong bifor for kamap fit for teachim Word bilong God. Jehovah muvim olketa man for raetem Bible long barava klia wei mekem evriwan fit for minim olketa spesol truth insaed long hem. Olketa truth hia no change, nomata taem Bible hem transleit go long planti handred languis. So nomata hem maet helpem man for savve long olketa languis bilong bifor, hem no samting wea man mas lanem. And tu, samfala taem, praod fasin wea savve kamap taem man garem savve abaotem olketa languis savve spoelem wanfala fasin wea olketa tru Christian mas garem—willing for lane.—1 Timothy 6:4.

19. Long wanem wei nao Christian ministry bilong iumi hem wanfala service?

¹⁹ Hem tru tumas hao iumi mas garem hambol tingting for duim Christian ministry waka bilong iumi. Evritaem iumi feisim wei wea pipol againstim iumi, no interest, and persecutim iumi tu. (John 15:20) Nomata olsem, taem iumi faithful for duim ministry bilong iumi, iumi provaedem wanfala important service. Sapos iumi go ahed for hambol for servem nara pipol long disfala waka, iumi followim love wea Jesus Christ showimaot long pipol. Tingim diswan: Sapos iumi mas preach long wan thousand pipol wea no interest or againstim iumi just for faendem wanfala wea olsem sheep, waswe, iumi bae willing? Barava nao! So taem iumi go ahed long disfala waka and no givap, iumi faithful for servem olketa wea olsem sheep wea iumi no faendem yet. For sure Jehovah and Jesus bae mek sure iumi bae faendem and helpem planti moa pipol bifor end hem kam.—Haggai 2:7.

20. Wanem nao samfala wei wea iumi savve teach thru long example?

²⁰ For teach thru long example hem nara wei for showimaot iumi willing for servem pipol. Olsem example, iumi laek for teachim pipol hao wei for servem Jehovah, “datfala hapi God,” hem nao best wei bilong laef wea barava mekem man satisfae. (1 Timothy 1:11) Waswe, taem olketa lukim fasin bilong iumi and wei wea iumi deal witim olketa neiba, skulfren, and wakfren, olketa luksavve iumi hapi and satisfae? Olsem tu, iumi teachim olketa Bible student hao Christian kongregeson hem sef ples wea garem love insaed disfala raf world wea no garem feeling. Waswe, hem showaot klia long olketa student hao iumi lovem evriwan insaed long kongregeson and waka hard for stap long peace witim narawan?—1 Peter 4:8.

21, 22. (a) For lukluk gud long ministry bilong iumiseleva maet mekem iumi garem chance for duim wanem? (b) Wanem nao bae olketa article insaed next Wastaoa magasin storyim?

²¹ Wei wea iumi willing tumas for duim ministry bilong iumi maet muvim iumi samfala taem for lukluk gud moa long iumiseleva. Taem olketa honest for duim diswan, planti luksavve olketa fit for mekem service bilong olketa moa big, long wei for join insaed ministry full-taem or for muv go long ples wea garem need. Samfala narawan disaed for lanem nara languis for helpem pipol from difren ples wea stap long territory bilong olketa. Sapos iu garem chance olsem, tingting gud and prea abaotem datwan. For iusim laef for serve savve givim bigfala hapi, wei for satisfae, and peace long mind.—Ecclesiastes 5:12.

²² Iumi mas go ahed for followim example bilong Jesus Christ long wei for mekem grow love bilong iumi for olketa truth wea iumi teachim and for pipol wea iumi teachim. For mekem grow and showimaot love long tufala wei hia bae helpem iumi for garem gudfala faondeson for kamap olketa teacher wea olsem Christ. Bat, hao nao iumi savve build antap long datfala faondeson? Long next Wastaoa magasin, samfala article bae storyim samfala spesol teaching teknik wea Jesus iusim.

[Footnote]

Hao Nao Bae Iu Ansa?

• Why nao iumi sure example bilong Jesus olsem wanfala teacher hem no hard tumas for iumi followim?

• Hao nao iumi savve showimaot iumi lovem olketa truth wea iumi lanem from Bible?

• Why nao hem important for go ahed hambol taem iumi kasem moa savve?

• Wanem nao samfala wei wea iumi savve showimaot love for pipol wea iumi trae for teachim?

[Olketa Piksa long page 16]

Duim wanem iu fit for duim for redy

[Olketa Piksa long page 16, 17]

Sapos iu tinghae long “savve bilong God,” iu savve iusim Bible long gudfala wei

[Piksa long page 18]

Iumi showimaot love for pipol taem iumi sharem gud nius witim olketa