Letem Love Buildimap Iu
“Iu mas lovem Jehovah God bilong iu witim full heart bilong iu and witim full soul bilong iu and witim full mind bilong iu.”—Matthew 22:37.
1. (a) Wanem nao samfala samting wea Christian mekem grow? (b) Wanem barava important Christian fasin nao winim olketa narawan, and why nao olsem?
FOR kamap wanfala gud minister, wanfala Christian mas mekem grow planti samting. Buk bilong Proverbs mekhae long gudfala samting bilong savve, wei for minim samting, and wisdom. (Proverbs 2:1-10) Aposol Paul storyim need for garem barava strongfala faith and hope. (Romans 1:16, 17; Colossians 1:5; Hebrews 10:39) Fasin for go ahed strong and for kontrolem seleva important tu. (Acts 24:25; Hebrews 10:36) Bat, wanfala fasin stap wea sapos hem nomoa hem savve daonem evri nara fasin and savve mekem olketa iusles tu. Datwan nao hem love.—1 Corinthians 13:1-3, 13.
2. Hao nao Jesus showimaot wei wea love hem important, and wanem nao olketa kwestin wea kamap from diswan?
2 Jesus showimaot wei wea love hem important taem hem sei: “From diswan evriwan bae savve iufala nao olketa disaepol bilong mi, sapos iufala garem love midolwan long iufala seleva.” (John 13:35) From love nao hem mark bilong wanfala tru Christian, iumi need for askem olketa kwestin olsem, Wanem nao love? Why nao hem important tumas dastawe Jesus sei datwan, winim evri samting, hem mark bilong olketa disaepol bilong hem? Hao nao iumi savve mekem grow love? Hu nao iumi shud showimaot love long hem? Letem iumi lukluk long olketa kwestin hia.
Wanem Nao Love?
3. Wanem nao mining bilong love, and why nao mind and heart insaed long diswan?
3 Wanfala mining bilong love hem ‘deep feeling for samwan, wei for laekem tumas samwan.’ Hem wanfala fasin wea muvim pipol for duim gud samting for narawan, samfala taem olketa mekem bigfala sakrifaes seleva for duim olsem. Mind and heart nao join insaed long love wea Bible storyim. Mind, or savve, hem insaed diswan bikos man wea love hem duim olsem witim savve, hem luksavve hao hem and olketa wea hem lovem garem olketa wik point and olketa gud fasin tu. And tu, savve hem insaed diswan bikos samfala wea wanfala Christian lovem—maet samtaem, diswan againstim feeling bilong hemseleva—hem lovem bikos hem savve from Bible hao God wantem hem for duim olsem. (Matthew 5:44; 1 Corinthians 16:14) Nomata olsem, love hem kam from heart. Trufala love wea Bible storyim hem no samting long mind nomoa. Insaed diswan hem barava trufala fasin and wei for givim full feeling.—1 Peter 1:22.
4. Long wanem wei nao love hem strongfala samting for keepim pipol tugeta?
4 Pipol wea garem selfish heart no savve fren long loving wei witim narawan bikos man wea lovem samwan hem willing for tingim gud samting bilong narawan firstaem long hemseleva. (Philippians 2:2-4) Toktok bilong Jesus “moa hapi kamaot from wei for give winim wei for kasem” hem barava tru taem wei for give hem kamaot from love. (Acts 20:35) Love hem barava strongfala samting for keepim pipol tugeta. (Colossians 3:14) Planti taem wei for fren hem insaed long diswan, bat wei wea love keepim pipol tugeta hem strong winim hao wei for fren keepim pipol tugeta. Pipol storyim wei for fren midolwan hasband and waef bilong hem olsem love; bat, love wea Bible encouragem iumi for mekem grow hem moa strong winim feeling for laekem narawan long physical wei. Taem man and woman barava lovem each other, tufala stap tugeta nomata sapos tufala no savve enjoyim physical saed bilong marit bikos tufala olo or bikos wanfala long tufala hem disable.
Love—Datfala Barava Important Fasin
5. Why nao love hem wanfala important fasin for wanfala Christian?
5 Why nao love hem wanfala important fasin for wanfala Christian? First samting, bikos Jesus komandim olketa follower bilong hem for lovem each other. Hem sei: “Iufala olketa fren bilong mi sapos iufala duim samting wea mi komandim iufala. Olketa samting hia mi komandim long iufala, hem nao for iufala lovem each other.” (John 15:14, 17) Mek-tu samting, bikos Jehovah nao hem love, and olsem olketa worshiper bilong hem iumi shud followim hem. (Ephesians 5:1; 1 John 4:16) Bible sei wei for kasem savve long Jehovah and Jesus hem minim laef olowe. Hao nao iumi fit for sei iumi savve long God sapos iumi no trae for kamap olsem hem? Aposol John hem sei: “Man wea no showimaot love hem no savve long God, from God hem love.”—1 John 4:8.
6. Hao nao love savve balancem olketa difren saed long living bilong iumi?
6 Love hem important for mek-thri reason: Hem helpem iumi for balancem olketa difren saed long living bilong iumi and givim iumi gudfala reason for samting wea iumi duim. Olsem example, hem barava important for evritaem kasem savve long Word bilong God. For wanfala Christian, kaen savve hia hem olsem kaikai. Diswan helpem hem for kamap mature and for duim samting followim will bilong God. (Psalm 119:105; Matthew 4:4; 2 Timothy 3:15, 16) Bat, Paul givim disfala warning: “Savve hem mekem man praod, bat love hem buildimap man.” (1 Corinthians 8:1) No eni samting hem rong witim stretfala savve. Iumi nao problem—iumi garem feeling for duim sin. (Genesis 8:21) Sapos paoa bilong love wea savve balancem man hem no stap, savve maet mekem man praod, hem ting hem moabeta winim nara pipol. Datwan bae no happen sapos love nao muvim hem. “Love. . . hem no tok praod, hem no bighed.” (1 Corinthians 13:4) Wanfala Christian wea love nao muvim hem no kamap praod, nomata sapos hem kasem bigfala savve. Love keepim hem hambol and stopem hem for laek for mekem bignem for hemseleva.—Psalm 138:6; James 4:6.
7, 8. Hao nao love helpem iumi for tingim nomoa olketa samting wea moa important?
7 Paul raet for olketa Philippian: “Diswan nao mi go ahed for prea for hem, for love bilong iufala evritaem kamap moa big long stretfala savve and fasin for luksavve evribit; mekem iufala savve mek sure long olketa samting wea moa important.” (Philippians 1:9, 10) Christian love bae helpem iumi for followim disfala encouragement for mek sure long olketa samting wea moa important. Olsem example, tingim toktok bilong Paul long Timothy: “Sapos eni man trae for reach aot for waka bilong overseer, hem aftarem gudfala waka.” (1 Timothy 3:1) Long 2000 service year, 1,502 niu kongregeson kamap evriwea long world, wea mekem total hem 91,487. So, from diswan bigfala need stap for moa elder, and olketa wea reach aot for disfala privilege fit for kasem praise.
8 Bat, olketa wea reach aot for olketa privilege bilong overseer bae keepim gudfala balance sapos olketa tingim evritaem goal bilong datfala privilege. Wei for garem paoa or moa pipol savve long iu hem no important samting. Olketa elder wea love for Jehovah and for olketa brata nao muvim olketa, mekem Jehovah hapi. Olketa no aftarem bigfala nem or paoa. Aposol Peter, bihaen hem kaonselem olketa elder long kongregeson for keepim gudfala tingting, hem mekhae long need for garem “hambol tingting.” Hem givim kaonsel for evriwan insaed kongregeson for: “Kamap hambol anda long maeti hand bilong God.” (1 Peter 5:1-6) Eniwan wea reach aot bae kasem gud samting sapos hem tingim example bilong planti elder raonem world wea waka hard, hambol, and from datwan, olsem wanfala blessing for kongregeson bilong olketa.—Hebrews 13:7.
Gudfala Reason wea Muvim Iumi Helpem Iumi for Go Ahed Strong
9. Why nao olketa Christian tingim olketa blessing wea Jehovah promisim?
9 Wei wea hem important for love nao muvim iumi hem showaot long narafala wei. For olketa wea aftarem worship bilong God from love nao muvim olketa, Bible promisim olketa rich blessing distaem and olketa nambawan blessing long future wea lelebet hard for tingim. (1 Timothy 4:8) Wanfala Christian wea biliv strong long olketa promis hia and barava sure hao Jehovah “kamap man wea givim reward long olketa wea barava lukaotem hem,” kasem help for stand strong insaed long faith. (Hebrews 11:6) Klosap iumi evriwan laekem tumas for olketa promis bilong God for fulfill and talemaot toktok bilong aposol John: “Amen! Kam, Lord Jesus.” (Revelation 22:20) Tru nao, wei for ting raonem olketa blessing wea iumi savve kasem sapos iumi faithful hem strongim iumi for go ahed strong, long sem wei wea “hapi wea stap front long hem” helpem Jesus for stand strong.—Hebrews 12:1, 2.
10, 11. Hao nao wei wea love muvim iumi hem helpem iumi for go ahed strong?
10 Bat, waswe sapos main samting wea muvim iumi for servem Jehovah hem bikos iumi laek for stap insaed niu world? Then hem isi for iumi no patient or no satisfae taem living kamap hard or samting no happen followim tingting bilong iumi or long taem iumi hope for hem. Iumi savve insaed bigfala danger for isisi go difren. (Hebrews 2:1; 3:12) Paul story abaotem Demas, wanfala fren bilong hem bifor wea lusim hem. Why? Bikos “hem lovem disfala system.” (2 Timothy 4:10) Eniwan wea serve bikos long olketa selfish reason hem stap long danger for duim sem samting. Olketa chance for kasem samting bilong world distaem maet pullim olketa and diswan mekem olketa no willing for mekem olketa sakrifaes distaem witim hope for kasem blessing bihaen.
11 Nomata hem fitim for iumi garem feeling for laek kasem olketa blessing long future and hope for olketa hevi savve finis, love hem buildimap wei wea iumi tinghae long samting wea shud main samting long living bilong iumi. Important samting nao will bilong Jehovah, no bilong iumiseleva. (Luke 22:41, 42) Yes, love hem buildimap man. Hem mekem iumi patient for weit long God bilong iumi, satisfae witim eni blessing wea hem givim and sure hao long taem wea hem markem bae iumi kasem evri samting wea hem promisim—and moa samting. (Psalm 145:16; 2 Corinthians 12:8, 9) Go kasem datfala taem, love helpem iumi for go ahed serve long wei wea no selfish bikos “love . . . hem no lukaotem samting bilong hemseleva nomoa.”—1 Corinthians 13:4, 5.
Hu Nao Olketa Christian Shud Lovem?
12. Olsem Jesus talem, hu nao iumi shud lovem?
12 Jesus talem main rul long saed bilong hu nao iumi shud lovem taem hem talem tufala toktok from Law Bilong Moses. Hem sei: “Iu mas lovem Jehovah, God bilong iu witim full heart bilong iu and witim full soul bilong iu and witim full mind bilong iu” and, “Iu mas lovem neiba bilong iu olsem iuseleva.”—Matthew 22:37-39.
13. Hao nao iumi savve lane for lovem Jehovah, nomata iumi no savve lukim hem?
13 From toktok bilong Jesus, hem klia hao first and main wan wea iumi shud lovem hem nao Jehovah. Bat, iumi no born witim wei for lovem Jehovah. Hem samting wea iumi mas mekem grow. Taem iumi firstaem lane abaotem hem, iumi laekem hem from samting wea iumi herem. Isisi, iumi lanem hao hem redyim earth for olketa man. (Genesis 2:5-23) Iumi lanem hao hem deal witim olketa man, hem no lusim iumi taem sin firstaem kasem olketa man, bat hem duim samting for baem bak iumi. (Genesis 3:1-5, 15) Long kaenfala wei hem deal witim olketa wea faithful, and gogo hem provaedem only-born Son bilong hem for iumi kasem forgiveness long olketa sin bilong iumi. (John 3:16, 36) Disfala savve wea kamap moa big mekem wei wea iumi tinghae long Jehovah hem grow. (Isaiah 25:1) King David sei hem lovem Jehovah bikos long loving kea bilong Hem. (Psalm 116:1-9) Distaem, Jehovah kea, gaedem, strongim, and encouragem iumi. Taem iumi lanem moa samting abaotem hem, love bilong iumi kamap moa deep.—Psalm 31:23; Zephaniah 3:17; Romans 8:28.
Hao Nao Iumi Savve Showimaot Love Bilong Iumi?
14. Long wanem wei nao iumi savve showimaot love bilong iumi for God hem tru wan?
14 Tru, planti pipol raonem world sei olketa lovem God, bat akson bilong olketa showaot datwan no tru. Hao nao iumi fit for savve iumi really lovem Jehovah? Iumi savve story witim hem insaed long prea and talem hem feeling bilong iumi. And iumi savve duim samting long wei wea showimaot love bilong iumi. Aposol John sei: “Eniwan wea obeyim word bilong [God], tru nao insaed long disfala man love for God hem kamap perfect. Thru long diswan iumi savve iumi wan mind witim hem.” (1 John 2:5; 5:3) Witim olketa nara samting, Word bilong God talem iumi for kaban tugeta and garem living wea klin saed long fasin. Iumi stap klia long hypocrite fasin, iumi talem tru toktok, and keepim tingting bilong iumi klin. (2 Corinthians 7:1; Ephesians 4:15; 1 Timothy 1:5; Hebrews 10:23-25) Iumi showimaot love taem iumi givim material samting long olketa wea needim. (1 John 3:17, 18) And iumi no hol bak for talem nara pipol abaotem Jehovah. Insaed diswan hem for share long preaching waka abaotem gud nius bilong Kingdom wea go ahed evriwea long world. (Matthew 24:14; Romans 10:10) Wei for obeyim olketa samting hia wea stap insaed Word bilong God hem pruvim love bilong iumi for Jehovah hem tru wan.
15, 16. Hao nao love for Jehovah affectim laef bilong planti pipol last year?
15 Love for Jehovah hem helpem pipol for disaedem samting long gudfala wei. Last year, love olsem hem muvim 288,907 pipol for dedicatem laef bilong olketa long hem and showimaot disison bilong olketa long wei for baptaes long wata. (Matthew 28:19, 20) Dedication bilong olketa garem mining. Hem markem wanfala change long laef bilong olketa. Olsem example, Gazmend hem wanfala best basketball pleia long Albania. For planti year, hem and waef bilong hem studyim Bible and nomata olketa feisim hard taem, gogo tufala fit for kamap Kingdom pablisa. Last year, Gazmend hem baptaes, wanfala long 366 wea baptaes long Albania long 2000 service year. Wanfala niuspepa pablisim wanfala article abaotem hem and sei: “Laef bilong hem garem mining, and from diswan, hem and famili bilong hem barava hapi long living bilong olketa winim eni taem bifor. For saed bilong hem, wei for lukim haomas gud samting nao hem savve kasem long living hem no important bat, haomas help nao hem savve givim for nara pipol.”
16 Olsem tu, wanfala sista wea just baptaes wea waka for wanfala oil company long Guam hem kasem naesfala offer. Bihaen planti year and hem kasem hae position, hem kasem offer for kamap first woman vice president long history bilong datfala company. Bat, distaem hem dedicatem laef bilong hem long Jehovah finis. So bihaen hem storyim diswan witim hasband bilong hem, niu sista hia no acceptim datfala offer bat arrange for waka part-taem mekem hem savve muv ahed for kamap wanfala full-taem minister, wanfala pioneer. Love for Jehovah muvim sista hia for want for servem hem olsem wanfala pioneer winim wei for aftarem selen bilong disfala world. Tru nao, love olsem muvim 805,205 pipol evriwea long world for share insaed olketa difren part bilong pioneer ministry insaed long 2000 service year. Olketa pioneer hia duim nambawan samting for showimaot love and faith!
Samting wea Muvim Iumi for Lovem Jesus
17. Wanem nambawan example bilong love nao iumi lukim long Jesus?
17 Jesus hem nambawan example bilong samwan wea love nao muvim hem. Bifor hem kamdaon olsem man, hem lovem Dadi bilong hem and hem lovem olketa man. Olsem wan wea fulap witim wisdom, hem sei: “Mi stap witim [Jehovah] olsem nambawan wakman, and mi nao datwan wea hem laekem tumas evriday, mi hapi for stap front long hem evritaem, mi hapi long land bilong disfala earth wea garem planti samting, and olketa samting wea mi laekem tumas nao witim olketa son bilong man.” (Proverbs 8:30, 31) Love bilong Jesus muvim hem for lusim ples bilong hem long heven and born olsem wanfala baby wea no savve duim eni samting. Hem deal long patient and kaen wei witim pipol wea hambol and hem safa from olketa enemy bilong Jehovah. Gogo, hem dae for evri man long wanfala torture stake. (John 3:35; 14:30, 31; 15:12, 13; Philippians 2:5-11) Hem nambawan example bilong wan wea stret samting nao muvim hem!
18. (a) Hao nao iumi mekem grow love for Jesus? (b) Long wanem wei nao iumi showimaot iumi lovem Jesus?
18 Taem olketa wea garem stretfala feeling long heart readim olketa story abaotem laef bilong Jesus insaed olketa Gospel and ting raonem planti blessing wea hem kasem from faithful gogo bilong hem, diswan mekem deep love for hem grow insaed long olketa. Iumi distaem olsem pipol wea Peter sei long olketa: “Nomata iufala nating lukim [Jesus], iufala lovem hem.” (1 Peter 1:8) Love bilong iumi hem showaot taem iumi garem faith long hem and followim laef bilong hem for sakrifaesim seleva. (1 Corinthians 11:1; 1 Thessalonians 1:6; 1 Peter 2:21-25) Long April 19, 2000, total bilong 14,872,086 pipol kasem reminder long olketa reason bilong iumi for lovem Jesus taem olketa attendim Memorial bilong dae bilong hem. Datwan hem bigfala namba! And iumi kasem strong taem iumi savve planti pipol interest long salvation thru long sakrifaes bilong Jesus! Tru nao, love bilong Jehovah and Jesus for iumi and love wea iumi garem for tufala hem buildimap iumi.
19. Wanem nao olketa kwestin abaotem love wea iumi bae storyim long next article?
19 Jesus sei iumi shud lovem Jehovah witim full heart, soul, mind, and strong. Bat hem sei tu for iumi shud lovem neiba bilong iumi olsem iumiseleva. (Mark 12:29-31) Hu nao olketa hia? And hao nao wei for lovem neiba hem helpem iumi for keepim gudfala balance and stretfala reason for samting iumi duim? Olketa kwestin hia bae kamap long next article.
Waswe, Iu Remember?
• Why nao love hem wanfala important fasin?
• Hao nao iumi savve lane for lovem Jehovah?
• Hao nao fasin bilong iumi pruvim iumi lovem Jehovah?
• Hao nao iumi showimaot love bilong iumi for Jesus?
[Olketa Piksa long page 10, 11]
Love helpem iumi for patient for weit for help
[Piksa long page 12]
Nambawan sakrifaes bilong Jesus muvim iumi for lovem hem