Kwestin From Reader
Hao nao iumi savve wisdom wea Proverbs 8:22-31 storyim, hem abaotem Jesus Christ bifor hem kam long earth?
Toktok for explainim wisdom wea stap long buk bilong Proverbs hem sei olsem: “Jehovah seleva wakem mi olsem start bilong wei bilong hem, firstfala samting wea hem wakem from taem bifor kam. . . . Bifor olketa maunten stap long ples bilong olketa, bifor olketa hill, hem wakem mi witim pain for bornem pikinini . . . Taem hem wakem olketa star mi long there; . . . then mi stap witim hem olsem nambawan wakman, and mi nao kamap datwan wea hem laekem tumas evriday, and evritaem mi hapi taem mi stap witim hem, . . . and olketa samting wea mi laekem tumas nao olketa son bilong man.”
Disfala scripture no story abaotem wisdom bilong God or abaotem wisdom seleva. Why nao olsem? Bikos Jehovah “wakem” datfala wisdom long start bilong wei bilong hem. Jehovah God hem stap from taem olowe go kasem taem olowe and for datfala full taem hem wise. (Psalm 90:1, 2) Wisdom bilong Jehovah hem no garem eni start. Hem no wakem diswan witim “pain for bornem pikinini.” And tu, datfala wisdom hem toktok and duim samting, so hem mas piksarem samwan.—Proverbs 8:1.
Buk bilong Proverbs storyim hao long taem bifor kam datfala wisdom hem stap witim Jehovah, datfala Creator, olsem “nambawan wakman.” Datwan hem barava fitim Jesus. Longfala taem bifor hem kam long earth, Jesus hem barava waka gud tugeta witim Jehovah, dastawe Word bilong God sei olsem: “Hem nao first wan bifor evri nara samting and thru long hem evri nara samting kamap.”—Colossians 1:17; Revelation 3:14.
Wei for storyim Son bilong God olsem wisdom hem fitim, from hem nao Datwan wea talemaot olketa wise plan and law bilong Jehovah. Taem hem stap long heven bifor hem kam long earth, Jesus hem Word bilong God, wea minim hem Man wea tok for Jehovah. (John 1:1) Bible storyim hem olsem “paoa bilong God and wisdom bilong God.” (1 Corinthians 1:24, 30) Datwan hem nambawan wei for storyim disfala Son bilong God wea love bilong hem for olketa man muvim hem for sakrifaesim laef bilong hem olsem ransom for olketa man!—John 3:16.
[Piksa long page 3]
“Bifor olketa maunten stap . . . hem wakem mi”