“Hapi Nao Man wea Faendem Wisdom”

HEM raetem poem, mekem plan for building, hem wanfala king. From wages bilong hem evri year winim 1 billion dollar, hem moa rich winim eni nara king long earth. Hem garem bignem tu from wisdom bilong hem. Diswan muvim wanfala queen wea visit for sei: “Lukim! Olketa no talem mi full story. Wisdom and gudfala living bilong iu barava winim wanem mi herem.” (1 Kings 10:4-9) Hem nao living bilong King Solomon bilong Israel bifor.

Solomon garem riches and wisdom tu. Diswan mekem hem fit for disaedem which wan long tufala hia nao barava important winim narawan. Hem raet: “Hapi nao man wea faendem wisdom, and man wea kasem fasin for luksavve, from wei for kasem diswan hem gud winim silver and samting wea kamaot from diswan hem winim gold. Hem barava spesol winim olketa coral, and evri nara samting wea iu laekem tumas kanduit for semsem olsem hem.”—Proverbs 3:13-15.

Bat, wea nao man savve faendem wisdom? Why nao hem garem hae price winim riches? Wanem nao olketa part bilong hem wea mekem hem luk naes tumas? Mek-8 chapter bilong Bible buk bilong Proverbs, wea Solomon raetem, ansarem olketa kwestin hia long barava interesting wei. Long there hem storyim wisdom olsem wanfala man, olsem hem savve story and duim samting. And wisdom seleva hem talemaot why nao hem naes tumas and garem hae price.

“Hem Go Ahed for Singaot Laod”

Chapter 8 bilong Proverbs hem start witim wanfala kwestin for ting raonem: “Waswe, wisdom no go ahed for singaot, and fasin for luksavve go ahed for iusim voice bilong hem?”a Yes, wisdom and fasin for luksavve go ahed for singaot, bat long wei wea difren evribit from datfala olabaot woman wea haed long olketa dark ples and tok smol long ear for trae switim wanfala young man wea stap seleva and no garem experience. (Proverbs 7:12) “Hem stand antap long olketa hae ples, saed long road, long ples wea olketa road akrosim each other. Long saed bilong olketa gate, long mouth bilong taon, long barava ples wea lead go insaed hem go ahed for singaot laod.” (Proverbs 8:1-3) Pipol herem laod and klia long olketa pablik ples datfala voice bilong wisdom wea strong and no fraet—long olketa gate, ples wea olketa road akrosim each other, long olketa ples for go insaed long wanfala taon. Hem isi for pipol herem datfala voice and duim samting.

Waswe, eniwan savve denyim hao wisdom bilong God wea stap long Word bilong hem, Bible, hem stap for klosap evriwan long earth sapos olketa laekem? The World Book Encyclopedia talem hao “Pipol bin readim Bible winim eni nara buk long history.” Hem sei tu: “Olketa givimaot moa copy bilong Bible winim eni narafala buk. And tu, olketa transleitim Bible moa taem and long moa languis winim eni nara buk.” From full Bible or olketa part bilong hem stap long winim 2,100 languis and dialect, winim 90 percent bilong pipol long world fit for garem samfala part long Word bilong God long languis bilong olketa seleva.

Olketa Jehovah’s Witness talemaot message bilong Bible long pablik evriwea long world. Long 235 kantri, olketa busy for preachim gud nius bilong Kingdom bilong God and teachim pipol olketa truth from Word bilong God. Olketa Bible magasin bilong olketa olsem Wastaoa, wea olketa pablisim long 140 languis, and Wekap!, wea olketa printim long 83 languis, evritaem winim 20 million long each wan go aot evriwea long world. Hem tru tumas hao wisdom hem go ahed for singaot long olketa pablik ples!

“Voice Bilong Mi Hem for Olketa Son Bilong Olketa Man”

Disfala wisdom wea olketa storyim olsem man hem start for sei: “Long iufala, O olketa man, mi singaot, and voice bilong mi hem for olketa son bilong olketa man. O iufala wea no garem experience, minim kleva tingting; and iufala olketa krangge wan, minim heart.”—Proverbs 8:4, 5.

Disfala singaot bilong wisdom hem kasem evri ples. Hem givim invitation for evri man. Nomata olketa wea no garem experience invitation hem go aot for olketa kasem kleva and careful tingting, and for olketa krangge wan kasem wei for minim samting. Tru nao, Olketa Jehovah’s Witness biliv hao Bible hem wanfala buk for evriwan and olketa trae for encouragem evriwan wea olketa meetim for luk deep insaed long hem for faendem olketa word bilong wisdom wea stap.

‘Mouth Bilong Mi Talemaot Truth’

For talemaot moa hao hem naes tumas, wisdom hem sei: “Lisin, bikos mi tok abaotem olketa important samting, and mi openem mouth bilong mi abaotem stretfala wei. From mouth bilong mi long kwaet wei talemaot barava truth; and badfala fasin hem samting wea lips bilong mi barava heitim. Evri toktok from mouth bilong mi followim raeteous fasin. No eni samting olabaot or kruked midolwan long olketa.” Yes, olketa teaching bilong wisdom hem nambawan and stretfala, tru and raeteous. No eniting giaman or kruked long olketa. “Evriwan long olketa hem stret long man wea garem fasin for luksavve, and stret long olketa wea faendem savve.”—Proverbs 8:6-9.

Dastawe wisdom encouragem man for: “Tekem discipline bilong mi and no silver, and savve winim barava spesol gold.” Wei wea hem strong for encouragem diswan hem fitim, “bikos wisdom hem winim olketa coral, and evri narafala samting wea naes tumas kanduit for semsem olsem hem.” (Proverbs 8:10, 11) Why nao olsem? Wanem nao mekem wisdom moa spesol winim riches?

“Frut Bilong Mi Hem Moabeta Winim Gold”

Olketa present wea wisdom givim long man wea lisin long hem, hem moa spesol winim gold, silver, or olketa coral. For talem klia wanem nao olketa present hia, wisdom hem sei: “Mi, wisdom, mi stap witim kleva tingting and mi faendem nomata savve bilong wei for tingting. For fraet long Jehovah hem minim for heitim nogud samting. Wei for mekhae long seleva and praod fasin and nogud wei and rabis toktok mi heitim.”—Proverbs 8:12, 13.

Wisdom givim kleva tingting and savve for tingting long man wea ownim. Man wea garem wisdom bilong God garem respect for God tu, bikos “wei for fraet long Jehovah hem start bilong wisdom.” (Proverbs 9:10) So, hem heitim samting wea Jehovah heitim. Wei for mekhae long seleva, praod fasin, dirty fasin, and rabis toktok no stap long hem. Wei wea hem heitim nogud samting protectim hem from wei for iusim paoa long selfish wei. Hem barava important for olketa wea garem waka insaed long Christian kongregeson, and olketa famili hed tu, for lukaotem wisdom!

“Mi garem kaonsel and gudfala wisdom,” wisdom go ahed for sei. “Mi—garem wei for minim samting; Mi garem bigfala strong. From mi olketa king go ahed for rul, and olketa bigman long gavman olketa seleva go ahed for komandim raeteous fasin. From mi olketa prince seleva go ahed for rul olsem olketa prince, and evri bigman judgem samting long raeteous wei.” (Proverbs 8:14-16) Insaed olketa frut bilong wisdom hem fasin for luksavve, for minim samting, and bigfala strong—olketa samting wea olketa man wea rul, and olketa bigman barava needim. Olketa wea garem paoa and wea kaonselem narafala pipol barava needim wisdom.

Trufala wisdom hem stap for evriwan. Bat no evriwan faendem hem. Samfala rejectim or stap klia long hem, nomata hem stap front long olketa. “Olketa wea lovem mi miseleva lovem olketa,” wisdom hem sei, “and olketa wea lukaotem mi, olketa nao faendem mi.” (Proverbs 8:17) Only olketa wea barava lukaotem wisdom bae kasem.

Olketa wei bilong wisdom hem stret and raeteous. Hem givim reward long olketa wea lukaotem. Wisdom hem sei: “Riches and glory stap witim mi, olketa important samting from olketa laen dadi and raeteous fasin. Frut bilong mi hem moabeta winim gold, nomata barava klinfala gold, and samting wea kam from mi winim barava spesol silver. Long road bilong raeteous fasin mi wakabaot, midolwan long olketa road bilong judgment, for mekem olketa wea lovem mi for tekem and ownim really samting; and mi keepim olketa stoahaos bilong olketa fulap.”—Proverbs 8:18-21.

Witim olketa nambawan fasin olsem fasin for careful, gudfala tingting, hambol fasin, fasin for luksavve, and wei for minim samting, riches and honor tu insaed olketa present bilong wisdom. Wanfala wise man maet kasem riches long raeteous wei, and hem bae rich long spiritual wei. (3 John 2) And wisdom givim wanfala man honor. And tu, hem kasem wei for satisfae from wanem hem garem, and hem garem peace long mind and klin conscience front long God. Yes, hapi nao man wea faendem wisdom. Olketa frut bilong wisdom hem barava moabeta winim klinfala gold and spesol silver.

Disfala advaes barava fitim iumi distaem from iumi stap long world wea pipol tingim nomoa material samting and willing for duim or kasem eni samting for kamap rich! Iumi mas no forgetim hao wisdom hem barava important and no duim eniting wea no raeteous for kasem riches. Iumi mas nating forgetim olketa samting wea stap for givim wisdom—olketa Christian meeting bilong iumi and wei for study seleva long Bible and olketa pablikeson wea “datfala faithful and wise slave” provaedem—for kasem riches nomoa.—Matthew 24:45-47.

“From Taem Olowe Bifor Mi Stap Redy”

Purpose bilong wei wea mek-8 chapter bilong Proverbs storyim wisdom olsem wanfala man, hem no for explainim olketa difren part bilong disfala fasin nomoa. Bat tu, long tokpiksa wei hem story abaotem datfala creation bilong Jehovah wea important winim eni narawan. Wisdom hem go ahed for sei: “Jehovah seleva wakem mi olsem start bilong wei bilong hem, firstfala samting wea hem wakem from taem bifor kam. From taem olowe bifor mi stap redy, from start, from olketa taem bifor earth hem stap. Taem no eni deep wata stap mi kam olsem witim pain for bornem, taem no eni ples bilong springwata wea fulap. Bifor olketa maunten seleva kamap stedy, bifor olketa hill, mi kam olsem witim pain for bornem, taem hem no wakem yet earth and olketa bigfala klia area and olketa first part bilong dust bilong olketa gudfala land.”—Proverbs 8:22-26.

Disfala story abaotem wisdom olsem wanfala man, hem barava fitim wanem Bible talem abaotem “datfala Word”! “Long start Word hem stap,” aposol John raetem, “and Word hem stap witim God, and Word hem wanfala god.” (John 1:1) Long tokpiksa wei, wisdom, olsem wanfala man, hem piksarem Son bilong God, Jesus Christ, taem hem stap long heven bifor.b

Jesus Christ hem “firstborn bilong evri creation; bikos thru long hem evri narafala samting kamap long heven and long earth, olketa samting wea man lukim and olketa samting wea man no lukim.” (Colossians 1:15, 16) “Taem hem [Jehovah] wakem heven mi long there,” wisdom olsem man go ahed for sei, “taem hem komandim wanfala circle antap long wata wea deep tumas, taem hem mekem stedy olketa cloud antap, taem hem kosim olketa ples wea deep wata hem kam from for kamap strong, taem hem putim law for sea mekem wata shud no winim spialaen wea hem putim, taem hem givim komand for olketa faondeson bilong earth, then mi stap witim hem olsem nambawan wakman, and mi nao datwan wea hem laekem tumas evri day, mi hapi for stap front long hem evritaem, mi hapi long land bilong earth bilong hem wea garem planti samting, and olketa samting wea mi laekem tumas nao witim olketa son bilong man.” (Proverbs 8:27-31) Firstborn son bilong Jehovah hem stap long there saed long Father bilong hem, for waka witim hem—datfala Creator bilong olketa heven and earth wea no eniwan olsem hem. Taem Jehovah God creatim firstfala man, Son bilong hem waka witim hem olsem Nambawan Wakman. (Genesis 1:26) Hem nao why Son bilong God hem barava interest and laekem tumas olketa man!

“Hapi Nao Man wea Lisin Long Mi”

Olsem wisdom, datfala Son bilong God sei: “And nao, O olketa son, lisin long mi; yes, hapi nao olketa wea keepim olketa wei bilong mi. Lisin long discipline and kamap wise, and no fail for followim evribit. Hapi nao man wea lisin long mi taem hem go ahed for wekap front long door bilong mi evriday, taem hem lukluk long ples wea mi kam insaed. From datwan wea faendem mi bae barava faendem laef, and kasem gudwill from Jehovah. Bat datwan wea no tingim mi hem duim raf fasin long soul bilong hemseleva; evriwan wea barava heitim mi nao olketa wea lovem dae.”—Proverbs 8:32-36.

Jesus Christ hem barava fulap witim wisdom bilong God. “Evri rich samting bilong wisdom and savve hem stap haed witim hem.” (Colossians 2:3) So, letem iumi barava careful for lisin long hem and followim gud olketa step bilong hem. (1 Peter 2:21) For rejectim hem minim iumi duim raf fasin long soul bilong iumiseleva and iumi lovem dae, bikos “salvation no kam thru long eni narawan.” (Acts 4:12) Tru tumas, letem iumi acceptim Jesus olsem datwan wea God provaedem for salvation bilong iumi. (Matthew 20:28; John 3:16) Then from diswan, iumi bae hapi taem iumi ‘faendem laef and kasem gudwill from Jehovah.’

[Olketa Footnote]

[Olketa Piksa long page 26]

Olketa wea garem paoa barava needim wisdom

[Olketa Piksa long page 27]

No forgetim olketa samting wea stap for givim wisdom