“For Fraet Long Jehovah Datwan Hem Wisdom”

“FROM iumi herem finis evri samting, main samting nao hem: Fraet long trufala God and obeyim olketa komandment bilong hem. From diswan nao hem samting man mas duim.” (Ecclesiastes 12:13) Spirit bilong Jehovah muvim King Solomon bilong Israel bifor for luksavve long disfala barava important samting! Job, wanfala famili hed bifor, hem tu luksavve man kasem olketa gud samting from wei for fraet long God, dastawe hem sei: “Wei for fraet long Jehovah—datwan hem wisdom, and for tanawe from nogud fasin, datwan hem wei for minim samting.”—Job 28:28.

Bible barava mekhae long wei for fraet long Jehovah. Why nao wei for mekem grow fasin for fraet long God witim respect hem showimaot iumi wise? Hao nao iumi kasem gud samting from wei for fraet long God olsem man wanwan and olsem wanfala grup bilong olketa tru worshiper? Ansa for olketa kwestin hia stap long Proverbs chapter 14, verse 26 go kasem 35.a

Trust Bilong Iumi Kam From Wea?

Solomon hem sei: “Wei for fraet long Jehovah mekem man barava trustim hem, and olketa son bilong hem bae garem ples for haed.” (Proverbs 14:26) Man wea fraet long God trustim Jehovah nomoa, God wea loyal and garem bigfala paoa. Dastawe man olsem garem strongfala trust and no fraet long future! Hem bae stap for olowe, hapi and satisfae.

Bat waswe pipol wea trustim olketa plan, idea, and material samting bilong disfala world? Future wea olketa ting for garem hem for lelebet taem nomoa bikos Bible hem sei: “World and evri samting wea pipol long world laekem hem gogo for finis, bat man wea duim will bilong God bae stap for olowe.” (1 John 2:17) So, iumi no garem eni reason for “lovem world or olketa samting insaed long world.”—1 John 2:15.

Wanem nao olketa dadi and mami wea fraet long God savve duim for mek sure “wanfala ples for haed hem stap” for olketa pikinini bilong olketa? Man wea raetem psalm sing olsem: “Kam, iufala olketa son, lisin long mi; mi bae teachim iufala for fraet long Jehovah.” (Psalm 34:11) Taem olketa dadi and mami teachim olketa pikinini for fraet long God and showimaot example long diswan, olketa pikinini bae kamap man and woman wea garem strongfala trust long Jehovah.—Proverbs 22:6.

Solomon sei moa: “Wei for fraet long Jehovah hem well bilong laef, for tanawe from olketa trap bilong dae.” (Proverbs 14:27) For fraet long Jehovah hem “well bilong laef” bikos trufala God hem “man wea givim living wata.” (Jeremiah 2:13) Iumi savve kasem laef olowe sapos iumi kasem savve abaotem Jehovah and Jesus Christ. (John 17:3) And tu, for fraet long God savve helpem iumi for tanawe from olketa trap bilong dae. Long wanem wei? Proverbs 13:14 sei: “Law bilong datwan wea wise hem givim laef, for tanem man awe from olketa trap bilong dae.” Taem iumi fraet long Jehovah, obeyim law bilong hem, and letem Word bilong hem for leadim iumi, datwan protectim iumi from wei for garem olketa nogud feeling and duim olketa nogud samting wea savve lead go long dae.

“Mekem King Luk Naes”

For plande year wea Solomon rul, hem king wea fraet long God and obeyim Jehovah. Bikos long datwan, hem win for rul. Wanem nao showimaot sapos rul bilong wanfala king hem gud or nomoa? Proverbs 14:28 ansa olsem: “Taem staka pipol stap datwan mekem king luk naes, bat taem no staka pipol stap datwan spoelem wanfala ruler.” Living bilong pipol nao bae showimaot sapos rul bilong wanfala king hem win. Sapos staka pipol laek for stap anda long rul bilong hem, datwan showimaot hem win for rul. Solomon “garem pipol anda long hem from [Red] sea go kasem [Mediterranean] sea and from datfala River [Euphrates] go kasem end bilong earth.” (Psalm 72:6-8) Taem hem rul, evriwan stap long peace and garem gudfala living. (1 Kings 4:24, 25) Solomon hem win for rul. Bat long narasaed, sapos pipol no appruvim wanfala ruler diswan bae spoelem hem.

So waswe Bigfala Solomon, datfala Messiah King, Jesus Christ, hem kasem diskaen glory tu? Kam kasem distaem hem leadim staka pipol. Evriwea long earth, winim six million man and woman wea fraet long God chus finis for stap anda long rul bilong Christ. Olketa showimaot faith long Jesus and wan mind for worshipim datfala living God. (John 14:1) Long end bilong Thousand Year Rul Bilong Christ, God bae resurrectim finis evriwan wea hem rememberim. Long taem hia, paradaes earth bae fulap witim raeteous and hapi pipol wea showimaot olketa tinghae long King bilong olketa. Datwan bae pruvim evribit hao rul bilong Christ hem win! Iumi laek hol strong long datfala nambawan Kingdom hope.

Olketa Spiritual and Physical Blessing

For fraet long God witim respect savve mekem mind bilong man garem peace and heart bilong hem no wari. Hem olsem bikos gudfala wei for tingting and fasin for luksavve nao join witim wisdom. Proverbs 14:29 sei: “Man wea no kwiktaem for kros hem barava showimaot fasin for luksavve, bat man wea no patient hem apim krangge fasin.” Fasin for luksavve helpem iumi for minim hao kros wea iumi no kontrolem savve spoelem spiritual saed bilong iumi. Olketa feeling olsem “fasin for heit, faet, jealous fasin, fasin for kros,” and “raoa” savve stopem iumi for “kasem kingdom bilong God.” (Galatians 5:19-21) And tu, iumi kasem kaonsel for no keepim kros nomata sapos iumi garem stretfala reason for feel olsem. (Ephesians 4:26, 27) And wei for no patient savve mekem iumi tok krangge and duim samting wea mekem iumi sorre bihaen.

King bilong Israel storyim nogud wei wea kros savve affectim body bilong man, taem hem sei: “Wanfala kwaet heart hem laef bilong body bilong man, bat jealous fasin savve mekem olketa bon rotten.” (Proverbs 14:30) Kros savve kosim olketa samting olsem short wind, hae blood, and sik long liver and pancreas. Olketa doctor talem tu hao kros savve mekem kamap olketa sik olsem ulcer, skin hem skras, asthma, and problem long bele. Bat, “heart wea stap long peace mekem body laef gud.” (Proverbs 14:30, New International Version) So hem wise for iumi “aftarem olketa samting for mekem peace and olketa samting for buildimap narawan.”—Romans 14:19.

For Fraet Long God Helpem Iumi for No Teksaed

Solomon hem sei: “Man wea ravem poor wan hem daonem Creator bilong hem, bat wan wea kaen long man wea poor givim glory long Hem.” (Proverbs 14:31) Man wea fraet long God luksavve hao Jehovah God nao creatim evri man. Dastawe, from man wea poor hem man tu, wei wea eniwan deal witim hem bae affectim hao pipol ting long Creator bilong olketa man. For givim glory long God, iumi mas deal witim pipol long wei wea followim justice and no teksaed. Christian wea poor tu shud kasem spiritual help. Iumi mas preachim gud nius abaotem Kingdom Bilong God long poor and rich pipol.

Datfala wise king storyim narafala gud samting wea man kasem taem hem fraet long God. Hem sei: “From nogud fasin bilong hem, man wea wicked bae go daon, bat from raeteous wan hem faithful, bae hem stap sef.” (Proverbs 14:32) Hao nao man wea wicked go daon? Samfala Bible savveman sei diswan minim bihaen hem kasem trabol, bae hem no kamap gud moa. Bat bikos man wea fraet long God hem faithful, taem trabol kamap, hem stap sef. From hem trustim Jehovah evribit, nomata sapos for duim datwan minim hem mas dae, hem showimaot sem wei for strong olsem Job, wea sei: “Go kasem taem mi dae bae mi no lusim faithful fasin bilong mi!”—Job 27:5.

For stap faithful hem minim man mas fraet long God and garem wisdom. Wea nao man savve faendem wisdom? Proverbs 14:33 ansa olsem: “Wisdom hem stap insaed heart bilong man wea minim samting, and hem showaot midolwan long olketa wea stupid.” Tru nao, wisdom hem stap insaed heart bilong man wea minim samting. Bat hao nao wisdom showaot midolwan long stupid pipol? Wanfala buk hem sei: “From stupid man laek tumas for showimaot hem wise, hem talem samting wea hem tingse hem wise bat taem hem duim olsem diswan hem stupid nomoa.”

“Nation Kamap Gud”

Iumi lanem finis gud samting wea man wanwan kasem taem hem fraet long God. King bilong Israel talem gud samting wea wanfala full nation kasem taem hem sei: “Wanfala nation kamap gud bikos long raeteous fasin, bat sin mekem olketa nation kasem shame.” (Proverbs 14:34) Datfala principle showaot klia long nation bilong Israel! From olketa Israelite followim olketa hae standard bilong God, olketa kamap gud winim olketa nara nation. Bat taem olketa gohed for no obey, diswan mekem Israel kasem nogud samting and gogo Jehovah lusim olketa. Principle hia fitim tu pipol bilong God distaem. From Christian kongregeson followim olketa raeteous principle bilong God, hem difren from world. Bat for keepim disfala hae standard, laef bilong iumi wanwan mas klin. For gohed duim sin bae mekem iumiseleva, kongregeson, and God kasem shame.

Solomon talem samting wea savve mekem king hapi, taem hem sei: “King hem hapi long servant wea iusim fasin for luksavve, bat bae hem kros long man wea duim krangge samting.” (Proverbs 14:35) Proverbs 16:13 sei tu: “King laekem tumas for herem toktok bilong man wea raeteous, and hem lovem man wea talem tru samting.” Tru nao, Jesus Christ, Leader and King bilong iumi, barava hapi taem iumi duim stret samting, garem fasin for luksavve, and iusim mouth bilong iumi for preachim Kingdom and mek disaepol. Iumi mas busy for duim disfala waka and kasem olketa blessing from wei for fraet long trufala God.

[Footnote]

[Piksa long page 15]

Man savve lane for fraet long God