Bible Savve Helpem Iu for Really Hapi

BIBLE hem no wanfala medical buk, bat hem storyim hao olketa feeling savve affectim health bilong iumi saed long tingting and body. Bible hem sei: “Heart wea hapi savve healim man, bat wei for feel sorre bae mekem olketa bon drae.” And tu, hem sei: “Waswe, iu feel wikdaon long day bilong trabol? Bae iu no strong nao.” (Proverbs 17:22; 24:10) Wei for feel wikdaon savve aotem strong bilong iumi. Diswan mekem iumi feel wik and feel olsem hem isi nomoa for eni samting spoelem iumi, and iumi no laek for change or luk aotem help.

Wei for feel nogud savve affectim tu wei wea iumi fren witim Jehovah. Plande taem, pipol wea feel olketa no fit, tingse hard for olketa fren gud witim God and hard for hem acceptim olketa. Datfala woman Simone, wea iumi storyim finis, tingse hem “no kaen man wea God bae laekem.” Bat, taem iumi readim Word bilong God, Bible, iumi savve lukim hao God laekem olketa man wea trae for mekem hem hapi.

God Hem Barava Tingim Iumi

Bible talem iumi hao “Jehovah hem stap klosap long olketa wea heart bilong olketa brek; and hem sevem olketa wea kasem bigfala hevi.” God hem no les long olketa wea garem “heart wea brek and pisis,” bat hem promis for “strongim olketa wea wikdaon and strongim heart bilong man wea kasem hevi.”—Psalm 34:18; 51:17; Isaiah 57:15.

Wantaem, Son bilong God, Jesus, hem need for helpem olketa disaepol bilong hem luksavve hao God savve lukim gud samting wea olketa servant bilong Hem duim. Example wea hem iusim nao hem wei wea God hem savve taem wanfala sparrow hem foldaon long graon. Datwan hem samting wea klosap evri man ting nating long hem. Jesus mekhae tu long wei wea God savve long evri samting abaotem olketa man, nomata hair tu hem savve haomas hem stap long hed bilong man. Jesus endim story bilong hem taem hem sei: “So, no fraet: iufala barava important winim plande sparrow.” (Matthew 10:29-31)a Nomata sapos man feel nogud abaotem hemseleva, Jesus showimaot hao God tinghae long olketa wea garem faith. Tru nao, aposol Peter talem iumi hao “God hem no saed witim eniwan, bat long evri nation man wea fraet long hem and duim raeteous fasin nao hem acceptim.”—Acts 10:34, 35.

Keepim Balance Tingting

Word bilong God encouragem iumi for garem balance tingting abaotem iumiseleva. Aposol Paul hem raet olsem: “Thru long kaeness wea mi no fit for kasem, mi talem iufala evriwan for no tinghae tumas long iuseleva winim wanem hem fitim; bat garem gudfala tingting, fitim faith wea God givim each wan.”—Romans 12:3.

Tru nao, hem nogud for iumi tinghae tumas long iumiseleva and kamap praod, and tu, hem nogud for iumi ting daonem iumiseleva and tingse iumi iusles. Goal bilong iumi hem for garem balance tingting abaotem iumiseleva, for luksavve long olketa samting wea iumi fit for duim and no fit for duim. Wanfala Christian woman hem sei olsem: “Mi no nogud tumas, and mi no spesol winim olketa narawan tu. Mi garem gud fasin and nogud fasin, semsem olsem evriwan.”

Hem tru, hem no isi for garem balance tingting. From maet man ting daonem hemseleva for longfala taem finis, for stopem kaen tingting olsem, maet hem need for barava trae hard. Nomata olsem, God savve helpem iumi for changem fasin and tingting bilong iumi. For tok stret, hem nao samting wea Word bilong God encouragem iumi for duim. Hem sei: “Iufala mas lusim oldfala fasin wea followim wei bilong iufala bifor and wea kamap nogud followim olketa giaman samting wea hem wantem; bat . . . iufala shud kamap niu long paoa wea muvim mind bilong iufala, and shud werem olsem kaleko olketa niu fasin wea God wakem fitim will bilong Hem long trufala raeteous fasin and loyal fasin.”—Ephesians 4:22-24.

Taem iumi waka hard for changem ‘paoa wea muvim mind bilong iumi,’ wea minim main samting wea bossim tingting bilong iumi, bae iumi savve lusim wei for ova tumas for ting daonem iumiseleva and changem datwan witim wei for luksavve iumi garem gud saed tu. Lena, wea iumi storyim finis, hem luksavve hao sapos hem no stopem wei for tingse no eniwan lovem hem or fit for helpem hem, bae hem hard for eni samting changem feeling bilong hem. Wanem gudfala advaes long Bible nao helpem Lena, Simone, and olketa narawan for changem tingting bilong olketa?

Olketa Bible Principle wea Help for Mekem Man Hapi

“Torowem hevi bilong iu long Jehovah, and hem nao bae strongim iu.” (Psalm 55:22) Main samting wea bae helpem iumi for hapi nao hem wei for prea. Simone hem sei: “Sapos mi feel wikdaon, mi prea long Jehovah and askem hem for hem helpem mi. Evritaem mi savve feelim hao hem strongim mi and showim mi wanem for duim.” Taem man for raetem psalm hem encouragem iumi for torowem hevi bilong iumi long Jehovah, hem remindim iumi hao Jehovah tingim iumi and ting iumi wanwan fit for kasem help and sapot. Long naet bilong Passover 33 C.E., olketa disaepol bilong Jesus barava sorre from Jesus sei hem klosap for lusim olketa. Jesus barava encouragem olketa for prea long Dadi bilong hem, and hem sei olsem long olketa: “Ask and iufala bae kasem, mekem iufala hapi evribit.”—John 16:23, 24.

“Moa hapi kamaot from wei for givim samting winim wei for kasem samting.” (Acts 20:35) Jesus teachim hao wanfala main wei for kasem hapi nao hem for givim samting. Wei for followim disfala toktok bilong Bible helpem iumi for tingim need bilong narawan winim wei for tingim nomoa hao iumi no fit. Taem iumi helpem olketa narawan and lukim wei wea olketa barava tinghae long samting iumi duim, hem mekem iumi feel gud and no ting daonem iumiseleva. Lena barava luksavve hao wei wea hem evritaem sharem gud nius bilong Bible witim olketa narawan hem helpem hem long tufala wei. Hem sei: “First samting, hem mekem mi hapi and satisfae olsem Jesus talem. Mek-tu, wei wea mi lukim pipol hapi long wanem mi duim hem helpem mi for hapi.” Taem iumi hapi for duim samting for nara pipol, iumi bae kasem samting wea Proverbs 11:25 talem: “Man wea willing for watarem [narawan] bae olketa willing for watarem hem tu.”

“Olketa day bilong man wea safa hem nogud; bat man wea heart bilong hem hapi hem feast olowe.” (Proverbs 15:15) Iumi evriwan free for chusim hao nao iumi ting long iumiseleva and samting wea kasem iumi. Iumi savve ting long nogud saed olowe and mekem iumiseleva safa, or iumi savve ting long gud saed and garem ‘heart wea hapi,’ olsem taem iumi go long wanfala feast. Simone hem sei: “Mi trae hard for tingim gud saed. Mi busy for duim study seleva and duim ministry, and mi gohed for prea. And tu, mi trae for kaban witim pipol wea ting long gud saed and wea hapi, and mi trae for helpem narawan saed long feeling tu.” Olketa fasin olsem savve mekem man really hapi, olsem Bible hem sei: “Hapi long Jehovah and gohed hapi iufala raeteous wan; and singaot witim hapi, iufala evriwan wea heart bilong iufala hem stret.”—Psalm 32:11.

“Wanfala tru fren hem showimaot love evritaem, and hem wanfala brata wea born for taem bilong trabol.” (Proverbs 17:17) Wei for story long samwan wea iumi lovem or samwan wea iumi trustim savve helpem iumi for aotem olketa feeling for ting daonem seleva bifor olketa kamap big tumas. Taem iumi story witim narawan datwan savve helpem iumi for garem balance tingting and tingim gud saed. Simone hem sei: “Taem mi talemaot feeling bilong mi hem barava helpem mi. Iu need for talem narawan abaotem feeling bilong iu. Plande taem, wei for talemaot nomoa feeling bilong iu hem savve helpem iu.” Sapos iu duim datwan bae iu barava luksavve hao toktok bilong disfala proverb hem tru: “Wari wea stap insaed heart bilong man bae mekem heart wikdaon, bat gudfala toktok nao bae mekem heart hapi.”—Proverbs 12:25.

Samting wea Iu Savve Duim

Iumi storyim samfala nomoa long olketa nambawan principle from Bible wea savve helpem iumi for really hapi and winim olketa nogud feeling. Sapos iu tu stragol for deal witim feeling for tingse iu no fit, mifala laek encouragem iu for lukluk gud insaed long Word bilong God, Bible. Lane for garem gudfala and balance tingting abaotem iuseleva and abaotem wei wea iu fren witim God. Mifala barava hope hao Word bilong God bae helpem iu for really hapi long evri samting wea iu duim.

[Footnote]

[Piksa long page 7]

Wei for followim Bible principle mekem man hapi