Wanem Nao Savve Mekem Man Hapi?

“Fraet long trufala God and obeyim olketa komandment bilong hem.” ​—ECCL. 12:13.

1, 2. Long wanem wei nao disfala buk bilong Ecclesiastes savve helpem iumi?

TINGIM wanfala man wea luk olsem hem garem evri samting. Staka pipol savve long hem, hem man wea barava rich, and savve bilong hem big winim olketa long taem bilong hem. Bat nomata hem duim plande samting, hem tingting olsem, ‘Wanem nao savve mekem man hapi?’

² Disfala man nao hem Solomon, wea hem laef samting olsem thri thousand year go finis. Long buk bilong Ecclesiastes, Solomon storyim wanem hem duim for mekem hem hapi. (Eccl. 1:​13) Iumi savve lanem staka samting from story bilong Solomon. Tru tumas, gudfala toktok wea stap long buk bilong Ecclesiastes savve helpem iumi for markem olketa goal wea bae mekem iumi hapi.

“Hard Waka Nating”

3. Wanem nao tru samting abaotem laef bilong iumi evriwan?

³ Solomon storyim hao God hem wakem staka naesfala samting long earth wea iumi savve lane abaotem. Bat hem hard for iumi savve long evri nambawan samting hia from iumi no savve laef longtaem. (Eccl. 3:​11; 8:​17) Bible hem sei iumi laef short taem nomoa then iumi dae nao. (Job 14:​1, 2; Eccl. 6:​12) From diswan hem tru tumas, iumi mas duim gud samting taem iumi laef. Bat hem no isi for duim olsem from world bilong Satan laekem iumi for duim rong samting.

4. (a) Long Hebrew languis, disfala toktok “iusles” hem minim wanem? (b) Wanem samting nao bae iumi storyim wea pipol aftarem distaem?

⁴ Long buk bilong Ecclesiastes, Solomon hem talem disfala toktok “iusles” 30-fala taem for showimaot man hem hard waka nating sapos hem aftarem olketa iusles samting. Long Hebrew languis disfala toktok “iusles” hem minim samting wea man weistim taem nomoa long hem, samting wea man hard waka nating long hem, and no eni gud samting nomoa long datwan. (Eccl. 1:​2, 3) Samfala taem Solomon hem iusim toktok “iusles” and long olketa narataem hem iusim toktok “hard waka nating.” (Eccl. 1:​14; 2:​11) Man wea aftarem olketa iusles goal hem olsem man wea trae for kasholem wind. Man olsem hem hard waka nating nomoa. From iumi no laef longtaem hem iusles nomoa for aftarem olketa samting wea no givim eni gud samting long iumi. So for helpem iumi no duim olsem, bae iumi lukluk long samfala samting wea Solomon storyim wea pipol aftarem distaem. Firstaem bae iumi storyim hapitaem and olketa material samting. Then bae iumi storyim olketa waka wea iumi savve duim wea God hapi long hem.

Waswe, Bae Iumi Hapi Sapos Iumi Aftarem Hapitaem?

5. Wanem kaen samting nao Solomon hem duim for mekem hem hapi?

⁵ Olsem plande pipol distaem aftarem hapitaem, Solomon tu hem tingse datwan nao bae mekem hem hapi. Hem sei: “Mi duim enikaen samting for mekem mi hapi.” (Eccl. 2:​10) Wanem kaen samting nao hem duim? Olsem Ecclesiastes chapter 2 hem talem, hem ‘drink wine for mekem hem hapi’ bat long semtaem hem kontrolem hemseleva long datwan. Hem duim olketa nara samting tu olsem for designim garden flaoa, olketa bigfala haos, hem herem music, and kaikaim naesfala kaikai.

6. (a) Waswe, Bible stopem iumi for duim olketa samting wea savve mekem iumi hapi? Why nao olsem? (b) Iumi mas ting hao long hapitaem?

⁶ Waswe, Bible stopem iumi for hapitaem witim olketa fren bilong iumi? Nomoa. Solomon storyim hao bihaen man hem waka hard, hem gud samting tumas for hem sidaon and kaikai gud. Datwan hem wanfala present wea God givim long iumi. (Readim Ecclesiastes 2:​24; 3:​12, 13.) And tu, Jehovah nao laekem olketa young wan for ‘hapi and duim samting wea olketa laek duim’ wea God hapi long hem. (Eccl. 11:9) Iumi needim gudfala hapitaem. (Markem witim Mark 6:​31.) Nomata olsem, hapitaem mas no kamap nambawan samting long laef bilong iumi. Bat hapitaem mas olsem lelebet salt wea iumi putim long kaikai for mekem hem swit naes. Sapos iu putim staka salt tumas baebae kaikai hem saoa nao and bae iu les for kaikaim. Olsem tu, Solomon luksavve hao man wea aftarem hapitaem nomoa hem “hard waka nating.”​—Eccl. 2:​10, 11.

7. Why nao iumi mas tingting gud taem iumi chusim hapitaem?

⁷ And tu, samfala hapitaem hem no mas gud. Staka hapitaem savve barava spoelem wei bilong man, and tu, wei wea hem fren witim Jehovah. Staka pipol tekem nogud drug, drink gogo olketa drunk, plei kura or go long casino bikos olketa laek for hapi, bat nogud samting nomoa olketa kasem. Jehovah talem iumi sapos iumi duim samting wea iumi laekem wea hem nogud, bae nogud samting tu kasem iumi.​—Gal. 6:7.

8. Why nao hem gud for lukluk gud long laef bilong iumiseleva?

⁸ Nara samting tu, sapos iumi aftarem nomoa hapitaem olowe, bae iumi no tingim olketa important samting. Olketa year savve go pas kwiktaem and iumi no savve sapos iumi bae healthy olowe, or sapos iumi bae kasem olketa problem or nomoa. Dastawe Solomon talem hao iumi savve kasem gud samting sapos iumi go long dae bilong wanfala Christian brata or sista wea faithful, winim wei for go long “haos wea olketa duim hapitaem long hem.” (Readim Ecclesiastes 7:​2, 4.) Why nao hem tok olsem? Taem iumi herem funeral tok and ting raonem laef bilong datfala faithful brata or sista wea just dae, maet datwan savve mekem iumi for lukluk gud long laef bilong iumiseleva. Maet iumi luksavve iumi need for changem olketa goal bilong iumi mekem iumi savve duim gud samting long laef bilong iumi.​—Eccl. 12:1.

Waswe, Olketa Material Samting Bae Mekem Iumi Hapi?

9. Wanem nao Solomon luksavve long hem abaotem olketa material samting?

⁹ Taem Solomon hem raetem buk bilong Ecclesiastes, no staka pipol rich olsem hem. (2 Chron. 9:​22) Hem savve tekem nomoa eni samting wea hem laekem. Hem sei olsem: “Eni samting wea mi lukim and mi laekem, mi tekem nao.” (Eccl. 2:​10) Nomata olsem, hem luksavve olketa material samting no savve mekem hem hapi. Hem sei: “Man wea laekem silver tumas bae no hapi long silver nomoa, and man wea laekem staka selen tumas bae no hapi long datwan tu.”​—Eccl. 5:​10.

10. Wanem nao savve mekem man hapi and for God ting long hem olsem hem rich?

¹⁰ Nomata material samting savve helpem man for lelebet taem, hem samting wea man savve barava laek for kasem. Long wanfala research wea olketa duim long America, long evri fofala student long university, thrifala nao sei main goal bilong olketa hem for “kamap rich.” Nomata sapos olketa kamap rich, waswe, bae olketa barava hapi? Maet nomoa. Olketa wea duim research long diswan sei taem man hem laek kasem staka material samting, datwan savve mekem hem for no hapi. Solomon savve long diswan finis taem hem laef yet. Hem sei: “Mi kasem staka silver and gold, and olketa haos from olketa king . . . batawea, mi hard waka nating and evri samting hem iusles nomoa!”a (Eccl. 2:​8, 11) Bat sapos iumi iusim full strong bilong iumi for worshipim Jehovah and hem blessim iumi, datwan nao bae mekem God ting long iumi olsem iumi rich.​—Readim Proverbs 10:22.

Wanem Kaen Waka Nao Savve Mekem Man Barava Hapi?

11. Bible showimaot wanem samting nao man savve kasem taem hem waka?

¹¹ Jesus hem sei: “Dadi bilong mi waka kam kasem distaem, and mi gohed for waka tu.” (John 5:​17) Tru tumas, Jehovah and Jesus barava hapi long waka wea olketa duim. Bible showimaot Jehovah hem hapi long samting wea hem wakem taem hem sei: “God lukim evri samting wea hem wakem and hem barava gud tumas!” (Gen. 1:​31) Taem olketa angel lukim samting wea God wakem, olketa “singaot big from olketa hapi.” (Job 38:​4-7) Solomon tu tinghae long waka wea man kasem gud samting long hem.​—Eccl. 3:​13.

12, 13. (a) Wanem nao tingting bilong tufala man wea waka hard? (b) Wanem nao savve mekem man feel wiki long waka bilong hem?

¹² Staka luksavve taem man hem waka hard, bae hem hapi. José, wanfala man wea savve tumas for paintim piksa, hem sei: “Taem iu tingim wanfala samting long mind bilong iu and iu savve paintim datwan, hem olsem iu klaemem wanfala big maunten.” Miguel,b wanfala bisnisman hem sei: “Man savve hapi taem hem waka bikos diswan savve mekem famili bilong hem kasem wanem olketa needim.”

¹³ Nomata olsem, staka waka hem boring tumas. Samfala taem pipol wea iumi waka witim mekem iumi feel wiki and olketa duim samting long iumi wea no stret. Olsem Solomon hem talem, man wea lesy maet kasem sem samting olsem man wea waka hard tu from hem switim olketa boss bilong hem. (Eccl. 2:​21) Samfala nara samting tu savve mekem man no hapi long waka. Maet long firstaem bisnis bilong hem ran gud bat maet gogo bisnis hem brekdaon nao bikos selen long kantri hem nogud, or maet seknomoa wanfala samting wea hem no tingim hem kasem hem. (Readim Ecclesiastes 9:​11.) Plande taem man wea waka hard for kasem staka samting hem savve kamap kros and feel wiki bikos hem luksavve hem “hard waka nating” nomoa.​—Eccl. 5:​16.

14. Wanem kaen waka nao savve mekem man barava hapi?

¹⁴ Waswe, eni waka stap wea no savve mekem man feel wiki? José wea iumi storyim finis hem sei: “Gogo olketa piksa wea man paintim savve lus or kamap nogud tu. Bat olketa samting wea iumi duim for God hem no olsem. Taem mi duim waka bilong Jehovah for preachim gud nius, mi helpem nara pipol for worshipim God and datwan hem helpem olketa for olowe. Datwan hem winim eni nara samting.” (1 Cor. 3:​9-​11) Miguel tu talem hao taem hem preach abaotem Kingdom, datwan nao mekem hem hapi winim waka wea hem duim for selen. Hem sei: “Taem iu storyim wanfala tru samting insaed Bible long wanfala man and iu lukim datwan hem barava kasem tingting bilong hem, bae iu hapi fogud.”

“Torowem Go Bred Bilong Iu”

15. Wanem samting nao savve mekem man hapi?

¹⁵ So wanem nao savve mekem man hapi? Iumi bae hapi sapos distaem iumi duim olketa gudfala samting wea Jehovah hapi long hem. Iumi savve fren gud go moa witim God, lanem pikinini bilong iumi long toktok bilong God long Bible, helpem narawan for fren gud witim Jehovah, and fren gud witim olketa brata and sista long kongregeson. (Gal. 6:​10) Evri samting hia bae mekem iumi kasem plande blessing and gud samting for olowe. Solomon talem wanfala tokpiksa for showimaot diswan. Hem sei: “Torowem go bred bilong iu antap long wata, bikos nomata longfala taem bihaen bae hem kam bak long iu moa.” (Eccl. 11:1) Jesus talem olketa disaepol bilong hem: “Iufala mas givim samting long pipol, and bae pipol givim samting long iufala tu.” (Luke 6:​38) And Jehovah tu promis for givim gud samting long olketa wea duim gud samting long narawan.​—Prov. 19:17; readim Hebrews 6:​10.

16. Long wanem taem nao hem gud for iumi chusim wanem iumi bae duim long laef?

¹⁶ Bible talem iumi hao taem iumi young, hem gud for iumi tingting gud taem iumi chusim wanem nao iumi bae duim long laef. Sapos iumi duim datwan, bae iumi no sorre bihaen. (Eccl. 12:1) Sorre tumas sapos iumi weistim young laef bilong iumi for aftarem olketa samting long world, from iumi bae luksavve iumi hard waka nating nomoa!

17. Wanem nao bae helpem iu for duim samting wea bae mekem iu barava hapi?

¹⁷ Jehovah hem kaenfala dadi bilong iumi wea laekem iumi for hapi long laef, for duim olketa gud samting, and hem no laekem iumi for sorre bihaen iumi duim eni samting. (Eccl. 11:​9, 10) Wanem nao savve helpem iumi long diswan? Markem olketa spiritual goal and then waka hard for kasem olketa. Samting olsem 20 year go finis, Javier mas chus sapos hem laek for kamap doctor or for pioneer. Hem sei: “Nomata for waka olsem doctor savve mekem man hapi, datwan no kasem hapi bilong mi taem mi helpem pipol for savve long truth. Pioneer waka nao hem mekem mi barava hapi. Wanfala samting nomoa, mi sorre from mi no duim pioneer waka kwiktaem.”

18. Wanem nao olketa nambawan samting wea Jesus duim taem hem stap long earth?

¹⁸ So wanem nao nambawan samting wea iumi mas waka hard for kasem? Buk bilong Ecclesiastes hem sei: “For narawan ting long iu olsem gudfala man hem winim gudfala oil, and day wea iu dae hem winim day wea iu born.” (Eccl. 7:1) Laef bilong Jesus hem barava showimaot diswan. Jehovah ting long hem olsem gudfala man. Jesus hem faithful go kasem taem hem dae. From hem duim olsem, hem showimaot hao Dadi bilong hem nomoa fit for rulim man and dae bilong hem mekem iumi garem chance for kasem laef olowe. (Matt. 20:28) Nomata Jesus hem laef for lelebet taem nomoa long earth, hem showimaot nambawan wei for iumi followim wea bae mekem iumi barava hapi.​—1 Cor. 11:1; 1 Pet. 2:21.

19. Wanem gudfala toktok nao Solomon hem talem for iumi?

¹⁹ Iumi tu savve duim samting wea bae mekem God ting long iumi olsem gudfala man. Datwan nao hem winim eni richfala samting wea iumi garem. (Readim Matthew 6:​19-​21.) Evriday iumi savve duim olketa samting wea Jehovah hapi long hem and wea bae mekem iumi hapi tu. Iumi savve preachim gud nius long pipol, duim samting for strongim marit and famili bilong iumi, duim study seleva and gogo long olketa meeting for helpem iumi fren gud go moa witim Jehovah. (Eccl. 11:6; Heb. 13:16) So waswe, iu laek hapi long laef bilong iu? Sapos olsem, gohed for duim disfala samting wea Solomon hem talem: “Fraet long trufala God and obeyim olketa komandment bilong hem. From diswan nao hem samting wea olketa man mas duim.”​—Eccl. 12:⁠13.

[Olketa Footnote]

Wanem Nao Ansa Bilong Iu?

• Why nao iumi mas tingting gud firstaem bifor iumi markem olketa goal?

• Wanem tingting nao iumi mas garem long hapitaem and olketa material samting?

• Wanem kaen waka nao bae mekem man barava hapi?

• Wanem nambawan samting nao iumi mas waka hard for kasem?

[Piksa long page 23]

Wanem tingting nao iumi mas garem long hapitaem?

[Piksa long page 24]

Why nao preaching waka savve mekem man barava hapi?