Worshipim Jehovah Long “Taem Bilong Trabol”

ERNST, wea hem winim 70 year sei: “Distaem health bilong mi hem no mas gud.”a Waswe, iu tu olsem? Sapos iu start for olo and iu luksavve iu no healthy and strong olsem bifor, maet olketa samting wea Ecclesiastes chapter 12 story abaotem hem kasem iu. Verse 1 sei taem wea man hem olo hem olsem wanfala “taem bilong trabol.” Nomata olsem, no evri samting hem nogud. Iu savve hapi and gohed for worshipim Jehovah.

GOHED STRONGIM FAITH BILONG IU

Olketa hard samting wea kasem iufala olo brata and sista distaem, hem kasem olketa olo wea worshipim Jehovah bifor tu. Olsem example, taem Isaac, Jacob, and Ahijah kamap olo, eye bilong olketa dark nao. (Gen. 27:1; 48:10; 1 Ki. 14:4) King David hem savve “feel cold olowe.” (1 Ki. 1:1) Taem Barzillai, wanfala rich man hem olo, hem sei kaikai no garem eni teist long hem, and from hem earpas, hem no savve herem eni music. (2 Sam. 19:32-35) Waef bilong Abraham hem dae, and hasband bilong Naomi tu hem dae.—Gen. 23:1, 2; Ruth 1:3, 12.

Wanem nao helpem olketa olo hia for faithful long Jehovah and gohed for hapi? Taem Abraham olo, faith wea hem garem long olketa promis bilong God “barava strongim hem.” (Rome 4:19, 20) Iumi tu mas garem strongfala faith. Iumi savve garem strongfala faith nomata wanem nao age bilong iumi, savve bilong iumi, or living bilong iumi. Olsem example, Jacob garem strongfala faith long olketa promis bilong Jehovah nomata taem hem wik, blind, and no fit for wakabaot. (Gen. 48:1-4, 10; Heb. 11:21) Ines, wea hem 93 year distaem and garem sik wea spoelem olketa masol long body bilong hem, sei: “Evriday Jehovah hem barava blessim mi. Mi tingim Paradaes evriday. Datwan mekem mi garem hope.” Datwan hem gudfala tingting for garem!

Iumi strongim faith bilong iumi taem iumi prea, studyim Bible, and attendim olketa meeting. Taem profet Daniel hem olo, hem prea thrifala taem evriday and hem studyim olketa Holy Raeting evritaem. (Dan. 6:10; 9:2) Datfala olo widow woman, Anna, “hem savve go for worship long temple evri day and evri naet.” (Luke 2:36, 37) Taem iu traem best for attendim olketa meeting, and tek part, datwan bae strongim iu and encouragem olketa nara brata and sista tu. And Jehovah hapi tumas taem iu prea long hem, nomata iu no savve duim staka nara samting long waka bilong hem.—Prov. 15:8.

Maet staka long iufala no savve attendim olketa meeting or maet iufala faendem hem hard for readim olketa pablikeson bilong iumi bikos eye bilong iufala nogud. Sapos diswan kasem iu, wanem nao iu savve duim? Duim wanem iu fit for duim. Long samfala kantri, staka wea no fit for attendim olketa meeting savve lisin long olketa meeting long telephone. Inge, wanfala sista wea 79 year, savve prepare for olketa meeting nomata eye bilong hem nogud. Hem iusim olketa article wea wanfala brata printim long computer wea raeting bilong hem big.

Maet iufala olketa olo brata and sista no busy long staka samting. So iu garem taem for duim olketa nara samting. Hao sapos iu iusim datfala taem for lisin long olketa Bible recording, or recording bilong olketa Bible pablikeson, olketa tok, and olketa drama. And tu, maet iu savve ringim or visitim olketa nara Christian. Datwan bae encouragem olketa and bae strongim iu tu.—Rome 1:11, 12.

BUSY LONG WAKA BILONG GOD

Christa, wea hem winim 80 year sei: “Hem nogud tumas taem man hem olo bikos iu no strong nao for duim staka samting olsem bifor.” So wanem nao savve helpem olketa olo for gohed hapi? Peter, wea 75 year hem sei: “Evritaem tingim wanem iu fit for duim, and no samting wea iu no fit for duim.”

Wanem nao iu fit for duim long ministry distaem? Heidi, wea hem winim 80 year, hem no fit nao for go long haos tu haos waka. So hem lane for iusim computer mekem hem savve raetem leta long pipol. Samfala olo brata and sista savve sidaon long park or long bus stop for preach long pipol. And long samfala kantri, olketa olo wea stap long nursing hom savve preach long olketa doctor and olketa nara olo wea stap long there.

Taem King David olo, hem strong for sapotim tru worship. Hem givim selen and organizem waka for buildim wanfala temple. (1 Chron. 28:11–29:5) Iu tu savve duim samting for sapotim Kingdom waka wea gohed raonem world. Maet iu savve sapotim olketa pioneer or olketa strong pablisa long kongregeson. Olsem example, maet iu savve talem toktok for encouragem olketa, givim smol present, or invaetem olketa for lelebet kaikai. Taem iu prea, iu savve askem Jehovah for helpem olketa young wan, olketa famili, olketa wea duim full-taem service, olketa wea sik, and olketa wea garem bigfala responsibility long organization.

Jehovah tinghae long iufala and long waka wea iufala duim. Hem bae nating lusim iufala. (Ps. 71:9) Jehovah barava lovem iufala. Long niu world wea klosap for kam, nomata iumi laef for longfala taem bae iumi no kasem olketa nogud samting wea olketa olo kasem distaem. Long datfala taem, iumi bae strong and healthy, and gohed for worshipim Jehovah for olowe!