Wastaoa ONLINE LIBRARY
Wastaoa
ONLINE LIBRARY
Solomon Islands Pidgin
  • BIBLE
  • OLKETA PABLIKESON
  • OLKETA MEETING
  • g04 10/8 pp. 8-9
  • “Tingim Olowe Creator Bilong Iu”

Disfala sekson no garem eni video.

Sorre, disfala video no savve plei distaem.

  • “Tingim Olowe Creator Bilong Iu”
  • Wekap!—2004
  • Olketa Nara Article
  • Hao for Iumi Barava Kamap Free
    Wastaoa wea Talemaot Kingdom Bilong Jehovah (Study)—2018
  • Worshipim Jehovah, God wea Mekem Iumi Free
    Wastaoa wea Talemaot Kingdom Bilong Jehovah (Study)—2018
  • Olketa Young Wan, Creator Bilong Iu Laekem Iu for Hapi
    Wastaoa wea Talemaot Kingdom Bilong Jehovah (Study)—2018
  • Worshipim God wea Mekem Iumi Free
    Wastaoa wea Talemaot Kingdom Bilong Jehovah—2012
Samfala Moa
Wekap!—2004
g04 10/8 pp. 8-9

“Tingim Olowe Creator Bilong Iu”

“Tingim olowe Creator bilong iu taem iu young! From long future, iu bae garem staka hevi and bae iu sei, ‘Mi no hapi nao.’” —Ecclesiastes 12:1, “Contemporary English Version.”

DISFALA toktok from Bible hem barava mekem man tingting. Iu young wantaem nomoa. Bihaen, bae iu ting bak long taem iu young, maet witim hapi or witim sorre. So hao, bae iu hapi or sorre? Hao nao bae iu kasem best samting?

Bible encouragem iu for “tingim olowe Creator bilong iu.” Hao nao iu savve duim datwan? Followim olketa law and principle, wea stap long Word bilong God, Bible. Diswan no minim iu mas ova tumas saed long lotu, and no enjoyim eniting. For tok stret, taem iu tingim olowe Creator bilong iu bae iu kasem hapi wea winim eni nara hapi. Hao nao olsem?

Tingim sapos iu kasem wanfala trak and license for draev. From iu free for duim planti samting, ating iu bae hapi narawe. Tingim hao iu savve go long planti difren ples! Bat, nomata iu free olsem iu kasem tu wanfala bigfala responsibility. From taem iu draev iu mas obeyim olketa law saed long wei for draev long road and iu mas lukluk gud long olketa signal, followim speed wea law markem, and followim olketa warning saen. Waswe, disfala responsibility mekem iu les for draev nao? Nomoa nao! Diswan hem for protectim iu, from hu nao bae laek kasem wanfala accident?

Hem semsem tu witim freedom wea Creator bilong iu, Jehovah God, hem givim long iu. Taem iu gogo for kamap big man, hem letem iu for chusim wanem nao iu laek for duim. (Deuteronomy 30:19; Proverbs 27:11) Datwan hem wanfala barava spesol samting! Bat taem iu garem datfala freedom iu garem tu bigfala responsibility. Insaed Word bilong hem, Jehovah putim finis olketa standard, wea olsem olketa ‘law for draev long road,’ wea hem laekem iu for followim. Waswe, olketa standard hia spoelem hapi bilong iu? Nating nao! Olketa protectim iu from wei for kasem pain and sorre wea planti young wan distaem kasem.

Federico, wea distaem hem winim 30 year, savve hao diswan hem tru. Taem hem young, hem lukim olketa wea hem skul witim duim olketa samting wea hem savve hem shud no duim. “Luk olsem olketa barava enjoy narawe,” hem sei, “bat mi savve hao olketa no really hapi.” Taem hem ting bak, Federico hapi bikos hem followim olketa Bible standard taem hem young. “Hem tru, mi garem olketa problem, semsem olsem eni young wan,” hem sei. “Bat Bible barava protectim mi. And evritaem olketa Christian brata stanbae for helpem mi. Taem mi followim olketa Bible principle mi kasem hapi wea winim wanem mi tingim!”

Jehovah God laekem iu for hapi—really hapi. No kaen wei for laflaf and enjoyim samting, bat long semtaem iu feel nogud and sorre. Bible sei: “Enjoyim taem wea iu young. Kasem hapi taem iu young yet.” Nomata olsem insaed sem verse Bible talem warning tu. “Tingim,” hem sei, “hao God bae judgem iu from evri samting wea iu duim.”—Ecclesiastes 11:9, Today’s English Version.

Showimaot iu tingim olowe Creator bilong iu taem iu iusim freedom wea hem givim iu long wisefala wei. Sapos iu duim diswan, iu savve feel sure hao Creator bilong iu bae tingim iu and hem bae givim iu hapi wea winim evri nara hapi. Bible hem sei: “Blessing bilong Jehovah—hem nao mekem man rich, and hem no addim eni pain witim datwan.”—Proverbs 10:22.

For helpem olketa young wan deal witim olketa problem wea olketa feisim, Olketa Jehovah’s Witness printim wanfala buk wea garem 320-page, title bilong hem Questions Young People Ask . . . Answers That Work. Kam kasem distaem, olketa wakem klosap 34 million copy long 77 languis. Iu savve kasem wanfala copy sapos iu askem Olketa Jehovah’s Witness wea stap klosap long iu.

[Olketa piksa long page 8, 9]

For Helpem Iu Win Taem Iu Young

Markem taem for readim Word bilong God

Waka hard insaed ministry

Stap klia long olketa nogud kaban

Evritaem story gud witim parents bilong iu

[Credit Line]

Brochure cover: Pictorial Archive (Near Eastern History) Est.

    Solomon Islands Pidgin Pablikeson (1988-2024)
    Log Aot
    Log In
    • Solomon Islands Pidgin
    • Sharem
    • Settings
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Setting
    • JW.ORG
    • Log In
    Sharem