No “Kros Long Jehovah”

1, 2. Why nao hem no stret for sei Jehovah nao kosim olketa problem long earth? Storyim example.

TINGIM wanfala man wea marit for staka year finis and hem stap gud witim waef bilong hem. Wanday hem kam bak long haos and lukim evri samting hem olobaot. Samwan nao kam distroe long haos. Tebol and chair brek finis, evri pleit and kap pisis long floor, and walling hem brek tu. Naes haos bilong hem nogud nao. Waswe, bae hem sei: “Why nao waef bilong mi duim diswan?” Nomoa. Bae hem sei: “Hu nao duim diswan?” Hem talem diswan bikos hem savve waef bilong hem, wea hem lovem, bae no duim kaen nogud samting olsem.

² Distaem pollution, pipol wea raf, and pipol wea garem rabis wei barava spoelem disfala earth, wea hem hom bilong iumi olketa man. From iumi studyim Bible, iumi savve Jehovah no kosim olketa problem hia. Hem wakem disfala earth olsem paradaes for iumi stap insaed. (Gen. 2:8, 15) Jehovah hem God wea showimaot love. (1 John 4:8) Bible sei Satan “rulim disfala world,” and hem nao kosim staka problem hia.—John 14:30; 2 Cor. 4:4.

3. Wanem rong tingting nao maet iumi garem abaotem olketa problem bilong iumi?

³ Bat Satan no kosim evri problem wea iumi kasem. Why nao iumi sei olsem? Bikos iumiseleva nao kosim samfala problem wea iumi kasem. (Readim Deuteronomy 32:4-6.) Nomata iumi luksavve long datwan, bat from iumi no perfect maet iumi savve garem rong tingting taem iumi garem problem, and datwan hem danger samting. (Prov. 14:12) Maet iumi start for blamem Jehovah, and no Satan or iumiseleva. Maet gogo iumi “kros long Jehovah” tu.—Prov. 19:3.

4, 5. Long wanem wei nao maet wanfala Christian savve “kros long Jehovah”?

⁴ Waswe, man savve “kros long Jehovah” tu? Hem no mek sense for kros long Jehovah. (Isa. 41:11) Hard for iumi win sapos iumi faet againstim God. Hem tru, maet iumi no sei iumi kros long Jehovah. Bat Proverbs 19:3 sei krangge wei bilong man nao “mekem hem duim nogud samting, and gogo hem kros long Jehovah long heart bilong hem.” Tru nao, man savve kros long God long heart bilong hem. Diswan savve affectim samting wea hem duim. Olsem example, maet gogo hem no kam long olketa meeting or hem no sapotim nao olketa arrangement bilong Jehovah for worship.

⁵ Wanem nao samfala samting wea maet mekem iumi “kros long Jehovah”? Wanem nao savve helpem iumi for no foldaon insaed disfala trap? Hem barava important for iumi savve long ansa bilong tufala kwestin hia. Diswan bae helpem iumi for protectim wei wea iumi fren witim Jehovah God.

WANEM NAO MAET MEKEM IUMI “KROS LONG JEHOVAH”?

6, 7. Why nao olketa Israelite long taem bilong Moses start for komplen abaotem Jehovah?

⁶ Wanem nao maet mekem wanfala faithful servant bilong Jehovah start for komplen abaotem God long heart bilong hem? Bae iumi storyim faevfala samting wea maet mekem iumi kros, and olketa example bilong samfala long Bible wea “kros long Jehovah.”—1 Cor. 10:11, 12.

⁷ Nogud toktok bilong olketa narawan savve affectim iumi. (Readim Deuteronomy 1:26-28.) Tingim samting wea Jehovah duim for olketa Israelite. Hem mekem tenfala trabol kasem pipol long Egypt and hem finisim Pharaoh and army bilong hem long Red Sea. Olketa Israelite free nao! (Ex. 12:29-32, 51; 14:29-31; Ps. 136:15) Bat taem pipol bilong God redi for go insaed long Promis Land, olketa start for komplen abaotem Jehovah. Why nao faith bilong olketa hem wik? Olketa herem nogud story from tenfala spae, and diswan mekem olketa wikdaon and fraet. (Num. 14:1-4) So Jehovah no letem olketa go insaed long datfala “gud land” long datfala taem. (Deut. 1:34, 35) Wanem nao iumi lanem from datwan? Nogud toktok bilong olketa narawan savve mekem faith bilong iumi wik and mekem iumi komplen abaotem wei wea Jehovah leadim pipol bilong hem.

8. Long taem bilong Isaiah, wanem nao mekem pipol bilong Judah blamem Jehovah for olketa problem bilong olketa?

⁸ Olketa hard taem and problem savve mekem iumi wikdaon. (Readim Isaiah 8:21, 22.) Long taem bilong Isaiah, pipol bilong Judah kasem barava hard taem. Olketa enemy stap raonem olketa. Staka long olketa hangre bikos olketa short long kaikai. Samting wea worse winim datwan, olketa no laek herem toktok bilong Jehovah and olketa no fren gud witim hem. (Amos 8:11) Olketa shud depend long Jehovah for helpem olketa, bat olketa blamem hem and king for olketa problem bilong olketa. Sapos iumi kasem olketa hard taem or problem, maet iumi tu start for blamem Jehovah and tingse hem no helpem iumi taem iumi needim hem.

9. Why nao olketa Israelite long taem bilong Ezekiel tingse wei wea Jehovah duim samting hem no stret?

⁹ Iumi no savve long full story. From olketa Israelite long taem bilong Ezekiel no savve long full story, olketa tingse wei wea Jehovah duim samting “hem no stret.” (Ezek. 18:29) Samting wea olketa duim showimaot olketa tingse olketa garem raet for judgem God and for disaedem sapos hem duim samting long best wei or nomoa, nomata olketa no barava minim why hem duim datwan. Sapos samfala taem iumi no minim gud wanfala samting long Bible, or why wanfala samting hem happen long laef bilong iumiseleva, maet iumi start for tingse olketa samting wea Jehovah duim “hem no stret.”—Job 35:2.

10. Wanem nao maet samwan duim wea showimaot hem followim example bilong Adam?

¹⁰ Iumi blamem God for olketa sin and rong samting wea iumi duim. Taem firstfala man Adam hem duim sin, hem blamem God for datwan. (Gen. 3:12) Adam savve hem brekem law bilong God, and God bae panisim hem for datwan. Nomata olsem, hem blamem Jehovah and sei waef wea Jehovah givim long hem nao nogud. Olketa narawan tu followim example bilong Adam and blamem God for rong samting wea olketa duim. Hem gud for iumi tingim disfala kwestin: ‘Taem mi feel nogud long olketa rong samting wea mi duim, waswe, mi start for tingse olketa standard bilong Jehovah hard tumas?’

11. Wanem nao iumi savve lanem from Jonah?

¹¹ Iumi start for tingim iumiseleva nomoa. Profet Jonah hem kros taem Jehovah showimaot mercy long pipol long Nineveh. (Jonah 4:1-3) Why nao olsem? Hem wari nogud olketa tingse hem wanfala laea profet bikos hem sei Jehovah bae finisim datfala taon bat Jehovah no duim datwan. Jonah shud feel sorre for pipol long Nineveh wea repent bat luk olsem hem warim hao nao bae pipol ting long hem. Waswe, iumi tu savve garem sem tingting olsem Jonah? Sapos iumi tingim iumiseleva nomoa, maet iumi forget for tingim nara pipol. Olsem example, maet iumi preach for staka year finis and talem pipol day bilong Jehovah hem klosap. Bat taem pipol mekfani long iumi bikos datfala day no kam yet, waswe, datwan mekem iumi start for no patient nao?—2 Pet. 3:3, 4, 9.

WANEM NAO IUMI SAVVE DUIM FOR NO “KROS LONG JEHOVAH”?

12, 13. Wanem nao iumi mas duim sapos iumi start for no agree witim samting wea Jehovah duim or samting wea hem letem for happen?

¹² Wanem nao iumi savve duim sapos iumi no agree witim samting wea Jehovah duim or samting wea hem letem for happen? Iumi mas no forget, hem no wise for garem tingting olsem. Proverbs 19:3 showimaot maet iumi blamem Jehovah for olketa problem wea iumiseleva nao kosim bikos iumi no savve long evri samting. So distaem bae iumi storyim faevfala samting wea bae helpem iumi for no kros long Jehovah.

¹³ Waka hard for gohed fren gud witim Jehovah. Sapos iumi gohed for fren gud witim God, bae iumi no kros long hem. (Readim Proverbs 3:5, 6.) Iumi mas trustim Jehovah. Iumi mas stap klia long wei for tingse iumi savve winim hem or iumi nao important winim eni nara samting. (Prov. 3:7; Eccl. 7:16) Datwan bae helpem iumi for no blamem Jehovah taem olketa nogud samting happen.

14, 15. Wanem nao savve helpem iumi for no letem nogud toktok bilong narawan affectim iumi?

¹⁴ No letem nogud toktok affectim iu. Olketa Israelite long taem bilong Moses garem staka reason for bilivim Jehovah bae tekem olketa go insaed long Promis Land. (Ps. 78:43-53) Bat taem olketa herem nogud report bilong tenfala spae, Bible sei olketa Israelite “no tingim nao bigfala paoa bilong hem,” wea minim olketa forgetim wanem Jehovah duim finis for olketa. (Ps. 78:42) Sapos iumi ting raonem evri nambawan samting wea Jehovah duim finis for iumi, datwan bae strongim wei wea iumi fren witim hem. Then bae iumi no letem nogud toktok bilong olketa narawan for spoelem wei wea iumi fren witim Jehovah.—Ps. 77:11, 12.

¹⁵ Wanem nao savve happen sapos iumi no garem gudfala tingting abaotem olketa nara brata or sista bilong iumi? Maet datwan savve spoelem wei wea iumi fren witim Jehovah. (1 John 4:20) Olsem example, taem Aaron kamap hae priest, olketa Israelite komplen abaotem datwan. Bat Jehovah ting long datwan olsem olketa komplen abaotem Hem. (Num. 17:10) Olsem tu, sapos iumi komplen abaotem olketa wea Jehovah iusim for leadim waka bilong hem long earth, maet datwan minim iumi komplen abaotem Jehovah.—Heb. 13:7, 17.

16, 17. Why nao iumi shud no blamem Jehovah for olketa problem bilong iumi?

¹⁶ No forget, Jehovah no kosim problem bilong iumi. Nomata olketa Israelite long taem bilong Isaiah lusim Jehovah, Hem still laek for helpem olketa. (Isa. 1:16-19) Nomata wanem kaen problem nao iumi kasem, iumi hapi from iumi savve Jehovah tingim iumi and laek for helpem iumi. (1 Pet. 5:7) Jehovah promis tu for strongim iumi mekem iumi gohed faithful long hem.—1 Cor. 10:13.

¹⁷ Sapos samting wea no stret hem kasem iumi and iumi safa olsem Job, iumi mas no forget Jehovah no kosim datwan. Bible sei Jehovah heitim samting wea no stret and hem lovem samting wea raeteous. (Ps. 33:5) Iumi shud olsem fren bilong Job, Elihu. Hem savve no enitaem Jehovah hem duim rabis samting or samting wea no stret. (Job 34:10) Jehovah no kosim olketa problem bilong iumi bat hem givim iumi “evri gud and perfect present.”—Jas. 1:13, 17.

18, 19. Why nao iumi shud no daotem Jehovah? Storyim example.

¹⁸ No daotem Jehovah. God hem perfect, and tingting bilong hem winim tingting bilong iumi. (Isa. 55:8, 9) So sapos iumi hambol bae iumi luksavve iumi no savve long evri samting. (Rome 9:20) Staka taem iumi no savve long full story abaotem wanfala samting. Iumi evriwan luksavve toktok long disfala proverb hem tru, wea sei: “Story bilong wanfala man hem savve here stret, go kasem taem narawan kam and kwestinim hem.”—Prov. 18:17, New International Version.

¹⁹ Olsem example, maet gudfala fren bilong iu duim samting wea iu no minim or wea difren. Waswe, bae iu kwiktaem tingse hem duim nogud samting? Nomoa, bae iu luksavve iu no savve long full story. Sapos iumi willing for showimaot love long fren bilong iumi long wei olsem, nomata hem no perfect, iumi mas barava willing for trustim Dadi bilong iumi long heven wea tingting bilong hem winim tingting bilong iumi!

20, 21. Why nao hem important for iumi luksavve hu or wanem nao kosim problem?

²⁰ Luksavve hu or wanem nao kosim problem. Iumi mas luksavve iumiseleva nao kosim samfala problem wea iumi kasem. (Gal. 6:7) Iumi shud no blamem Jehovah. Why nao olsem? Tingim disfala example: Wanem nao bae happen sapos man wea draevem trak hem speed tumas long wanfala road wea bend? Bae hem accident. Waswe, hem fit for blamem company wea wakem datfala trak? Nomoa! Olsem tu, Jehovah wakem iumi long wei wea iumi free for disaedem samting. Bat hem teachim iumi for mekem olketa wise disison tu. So iumi shud no blamem Jehovah for olketa rong samting wea iumi duim.

²¹ Hem tru, no evri problem wea iumi kasem hem bikos iumi nao duim rong samting. Samfala samting hem happen ‘bikos seknomoa samting wea iumi no tingim savve kasem iumi evriwan.’ (Eccl. 9:11) And tu, iumi mas no forget Satan nao main wan wea bihaenem olketa nogud samting wea happen long world. (1 John 5:19; Rev. 12:9) Hem nao enemy bilong iumi, no Jehovah!—1 Pet. 5:8.

PROTECTIM WEI WEA IU FREN WITIM JEHOVAH

22, 23. Wanem nao iumi shud tingim sapos iumi wikdaon bikos long olketa problem wea iumi kasem?

²² Taem iu kasem olketa hard taem and problem, tingim example bilong Joshua and Caleb. Tufala faithful man hia talem gudfala report, no olsem nara tenfala spae. (Num. 14:6-9) Tufala showimaot faith long Jehovah. Nomata olsem, tufala mas wakabaot long wilderness witim olketa nara Israelite for 40-fala year. Waswe, Joshua and Caleb komplen or feel nogud and sei diswan hem no stret? Nomoa. Tufala trust long Jehovah and hem blessim tufala. Nomata klosap evri Israelite hia dae long wilderness, Jehovah letem tufala go insaed long Promis Land. (Num. 14:30) Iumi tu bae kasem blessing bilong Jehovah sapos iumi “no givap” for duim wanem hem laekem.—Gal. 6:9; Heb. 6:10.

²³ Sapos iu wikdaon bikos long olketa problem wea iu kasem, olketa wik point bilong narawan, or bilong iuseleva, wanem nao iu shud duim? Tingim olketa nambawan wei bilong Jehovah. Tingim olketa gud samting wea Jehovah promis for givim long iu. Tingim hao nao bae laef bilong iu sapos iu no fren gud witim Jehovah. Fren gud witim Jehovah evritaem and no kros long hem long heart bilong iu!