Hao Nao Iu Deal Witim Samting Iu No Agree Witim?

EVRI day iumi feisim olketa difren kaen fasin. Planti taem diswan givim iumi hapi and niu tingting. Samfala taem, diswan savve mekem samting iumi no agree witim kamap, wea samfala olketa serious and narawan olketa smol samting bilong evriday laef nomoa. Nomata hao serious nao samting wea iumi no agree witim, wei wea iumi deal witim savve affectim tingting, feeling, and spiritual saed bilong iumi.

Taem iumi duim samting wea iumi fit for duim for stretem wei for no agree long gudfala wei, diswan bae helpem iumi for garem laef wea moa healthy and fren gud moa witim nara pipol. Wanfala proverb bilong bifor sei: “Wanfala kwaet heart hem laef bilong body bilong man.”—Proverbs 14:30.

Long barava narasaed disfala tru toktok stap: “Olsem taon wea olketa go insaed, wea no garem wall, hem nao man wea no kontrolem spirit bilong hem.” (Proverbs 25:28) Hu long iumi nao bae want for mekem wei open for olketa rong tingting kam insaed wea savve muvim iumi for no duim stret samting—olketa samting wea savve spoelem narawan and iumi? Wei wea iumi no kontrolem feeling or ansa wea kros savve duim datwan. Insaed Sermon long Maunten, Jesus talem for iumi lukluk gud long fasin bilong iumi, wea savve affectim hao iumi deal witim samting iumi no agree witim long nara pipol. (Matthew 7:3-5) Winim wei wea iumi tokdaonem narawan, iumi shud tingim hao nao iumi savve mekem grow and keepim wei for fren witim pipol wea garem difren tingting and living.

Fasin Bilong Iumi

First samting for duim for finisim samting wea iu tingse or hem really wanfala samting iu no agree witim hem nao for luksavve iumi evriwan savve garem rong tingting and fasin. Bible remindim iumi hao iumi evriwan sin “and no kasem glory bilong God.” (Romans 3:23) And tu, fasin for luksavve maet showimaot hao problem hem no kam from narawan. Witim diswan, letem iumi ting raonem experience bilong Jonah.

From Jonah kasem instruction from Jehovah, hem go long taon bilong Nineveh for preach abaotem judgment bilong God wea bae kasem olketa pipol long there. Gudfala samting wea kamaot from diswan hem nao wei wea full taon bilong Nineveh repent and putim faith long trufala God. (Jonah 3:5-10) From olketa garem fasin for repent Jehovah lukim olketa fit for kasem forgiveness, so hem letem olketa stap laef. “Bat long Jonah, hem nating hapi, and hem kamap hot witim kros.” (Jonah 4:1) Feeling bilong Jonah long mercy bilong Jehovah hem mekem man sapraes. Why nao Jonah kros long Jehovah? Luk olsem Jonah tinghae tumas long feeling bilong hemseleva, hem ting hem lus mark insaed community. Hem fail for tinghae long mercy bilong Jehovah. Witim kaenfala fasin, Jehovah leadim Jonah for minim wanfala leson wea helpem hem for changem fasin bilong hem and lukim nambawan principle long mercy bilong God. (Jonah 4:7-11) Hem klia hao fasin bilong Jonah and no bilong Jehovah nao need for change.

Waswe, iumi tu samfala taem maet need for changem fasin bilong iumi abaotem samting? Aposol Paul kaonselem iumi: “Iufala mas lead for showimaot honor long narawan.” (Romans 12:10) Wanem nao hem minim? Long wanfala saed, hem encouragem iumi for garem gudfala tingting and for deal witim nara Christian witim deep respect and honor. Diswan minim for luksavve hao iumi wanwan free for chus. Paul remindim iumi tu: “Evri man bae karem lod bilong hemseleva.” (Galatians 6:5) So, bifor samting wea iumi no agree witim mekem wei for divaed kamap, hem wise for tingim sapos fasin bilong iumi nao need for change! Iumi mas waka hard for showimaot tingting bilong Jehovah and garem peace witim pipol wea barava lovem God.—Isaiah 55:8, 9.

Hao Iumi Duim Samting

Tingim tufala pikinini wea go ahed for pull-pull long wanfala toy, tufala evriwan pull strong from tufala evriwan laekem. Toktok kros maet kamap gogo wanfala hem let go or samwan kam and stopem tufala.

Story long Genesis sei Abraham herem hao wanfala raoa kamap midolwan olketa wakman bilong hem and bilong nephew bilong hem, Lot. Abraham duim samting taem hem go and sei long Lot: “Plis, no letem eni raoa go ahed midolwan long iumi tufala and midolwan long olketa wakman bilong iumi tufala, bikos iumi brata.” Abraham disaed strong for no letem eni problem spoelem wei wea tufala fren. Hao strong? Hem redy for sakrifaesim privilege bilong hem for chus olsem man wea moa olo; hem willing for lusim samting. Abraham letem Lot for chusim wea nao hem laek for tekem go famili and olketa animal bilong hem. Lot chusim green area long Sodom and Gomorrah. Abraham and Lot separate long wei bilong peace.—Genesis 13:5-12.

For keepim peace insaed wei for fren witim pipol, waswe, iumi willing for duim samting long sem wei wea Abraham duim? Disfala Bible story markem nambawan example for iumi followim taem iumi deal witim wanfala samting iumi no agree witim. Abraham askem: “No letem eni raoa go ahed.” Samting wea Abraham barava laekem nao hem for kasem ansa witim peace. Iumi sure diskaen wei for laek keepim peace bae help for aotem eni rong tingting. Then Abraham finis witim disfala toktok “bikos iumi brata.” Waswe, hem stret for finisim wanfala gudfala wei for fren olsem bikos long samting wea man seleva laekem or praod fasin? Abraham lukluk klia long samting wea important. Hem duim diswan witim wei for respectim and honorim seleva, long semtaem witim respect for nephew bilong hem.

Nomata samfala taem maet need kamap for kasem help from aotsaed for helpem iumi stretem samting iumi no agree witim, hem barava gud tumas sapos iumi savve stretem seleva disfala problem! Jesus encouragem iumi for duim samting for mek peace witim brata bilong iumi, tok sorre sapos need hem stap.a (Matthew 5:23, 24) Bae iumi need for garem hambol fasin, or tingting wea no praod, bat Peter raet: “Taetem hambol tingting raonem iufala taem iufala deal witim narawan, bikos God hem againstim praod pipol, bat hem showimaot kaeness wea man no fit for kasem long olketa hambol wan.” (1 Peter 5:5) Wei wea iumi deal witim olketa wea iumi worship tugeta hem affectim wei wea iumi fren witim God.—1 John 4:20.

Insaed Christian kongregeson, iumi maet lusim samting wea fit for iumi kasem mekem peace hem go ahed. Bigfala namba bilong olketa wea kaban witim olketa Jehovah’s Witness kamap part long famili bilong olketa trufala worshiper bilong God insaed last faev year. Diswan barava mekem heart bilong iumi hapi! Wei wea iumi duim samting saed long fasin bae affectim olketa hia and narawan insaed kongregeson. Diswan givim iumi gudfala reason for chusim gud hapitaem, samting wea iumi laek duim, or waka, tingim hao nao olketa narawan bae ting long iumi. Waswe, maet samfala no minim gud wanem iumi duim or talem and diswan maet mekem olketa stambol?

Aposol Paul remindim iumi olsem: “Evri samting fitim law; bat no evri samting hem gud. Evri samting fitim law; bat no evri samting buildimap man. Letem man go ahed for lukaotem, no gudfala samting for hemseleva, bat for narafala man.” (1 Corinthians 10:23, 24) Olsem olketa Christian, iumi barava interest for buildimap love and wan mind bilong Christian famili.—Psalm 133:1; John 13:34, 35.

Olketa Toktok wea Heal

Olketa toktok garem paoa for duim gudfala samting. “Gudfala toktok hem olsem honeycomb, wea hem swit long soul and healim olketa bon.” (Proverbs 16:24) Story abaotem Gideon wea hem stap klia long faet witim olketa Ephraimite showimaot tru samting wea disfala proverb talem.

Gideon, wea barava insaed long faet againstim Midian, askem tribe bilong Ephraim for help. Bat, taem faet hem finis, Ephraim kros long Gideon and komplen hao hem nating askem olketa long start bilong faet. Story wea stap hem sei “olketa barava trae hard for startim raoa witim hem.” For ansarem, Gideon hem sei: “Markem samting wea iufala duim, wanem nao mi duim? Waswe, olketa leftova grain wea Ephraim tekem hem no winim grape wea Abiezer harvestim? Long hand bilong iufala nao God givim Oreb and Zeeb olketa prince bilong Midian, and for markem samting wea iufala duim wanem nao mi duim?” (Judges 8:1-3) Witim toktok wea hem chusim gud wea kwaet, Gideon missim samting wea savve kamap olsem nogud war midolwan olketa tribe. Olketa long tribe bilong Ephraim maet garem problem for ting olketa seleva nao important and praod. Bat, datwan nating stopem Gideon for trae mekem peace kamaot from diswan. Waswe, iumi savve duim olsem?

Samfala maet fulap witim kros gogo hem mekem olketa heitim iumi. Luksavve long feeling bilong olketa, and trae for minim tingting bilong olketa. Maet iumi givim reason for olketa garem feeling olsem? Sapos olsem, talemaot wanem iumi duim wea help for mekem problem hia kamap and showimaot sorre bilong iumi from iumi add go long problem. Tu-thri toktok wea iumi tingting gud raonem savve mekem wei for fren kamap moa nomata samting spoelem. (James 3:4) Samfala wea kros maet needim nomoa for iumi kaen long olketa. Bible talem “sapos nomoa firewood hem stap, fire bae dae.” (Proverbs 26:20) Tru nao, olketa toktok wea iumi chusim gud and wea iumi talem witim gud tingting savve “stopem kros” and healim man.—Proverbs 15:1.

Aposol Paul talem: “Sapos iufala fit for duim, keepim peace witim evri man.” (Romans 12:18) Hem tru iumi kanduit kontrolem feeling bilong olketa narawan, bat iumi savve duim waka bilong iumi for apim peace. Winim wei for iumi stap anda long feeling or toktok bilong iumi or narawan wea no perfect, iumi savve duim samting distaem for followim olketa Bible principle wea garem gud faondeson. Sapos iumi deal witim olketa samting wea iumi no agree witim long wei wea Jehovah talem, diswan bae givim iumi peace and hapi for olowe.—Isaiah 48:17.

[Footnote]

[Piksa long page 24]

Waswe, iumi evritaem laekem samting for followim mind bilong iumi?

[Piksa long page 25]

Abraham givim gudfala example for willing for agree for stretem problem