Gudfala Leader​—Wea Nao Iumi Savve Faendem?

“EVRI haos garem samwan wea wakem, bat man wea wakem evri samting hem God,” hem nao wanem Bible sei. (Hebrews 3:4; Revelation 4:11) From tru God, Jehovah, hem Creator bilong iumi, hem “savve gud hao hem wakem iumi.” (Psalm 103:14) Hem savve evribit long need and samting wea iumi short long hem. And bikos hem wanfala loving God, hem laek for satisfaem olketa need hia. (Psalm 145:16; 1 John 4:8) And wei wea iumi needim gudfala leader hem insaed diswan.

Thru long profet Isaiah, Jehovah talemaot: “Lukim! Mi givim hem olsem wanfala witness for olketa nation, olsem wanfala leader and komanda long olketa nation.” (Isaiah 55:4) Ansa long problem for garem gudfala leader distaem hem stap insaed wei for luksavve hu nao disfala Leader—wea Olmaeti nao appointim—and for acceptim wei wea hem lead. So hu nao disfala Leader and Komanda wea olketa profesi abaotem? Wanem nao showaot hem wanfala gud leader? Hem bae leadim iumi for go wea? Wanem nao iumi mas duim for kasem gud samting from wei wea hem lead?

Datfala Promis Leader Hem Kam

Samting olsem 2,500 year go finis, angel Gabriel kam long profet Daniel and talem hem: “Iu mas savve and minim hao from taem wea toktok go aot for buildim moa Jerusalem go kasem Messiah datfala Leader, bae hem sevenfala week, and tu sixti-tu week. Hem bae kam bak and olketa bae buildim hem moa, witim wanfala pablik ples and wanfala wata raonem, bat long taem bilong trabol.”—Daniel 9:25.

Hem klia tumas, datfala angel talem Daniel abaotem wanfala taem wea Leader wea Jehovah chusim hem bae kam. “Messiah datfala Leader” bae kam long end bilong 69 week, or 483 year, wea start long 455 B.C.E., taem toktok hem go aot for buildim bak Jerusalem.a (Nehemiah 2:1-8) Wanem nao happen long end bilong datfala taem? Luke, man wea raetem Gospel sei olsem: “Long mek-fiftin year long rul bilong Tiberius Caesar, taem Pontius Pilate hem governor bilong Judea, and Herod hem ruler long distrik bilong Galilee [29 C.E.], . . . toktok bilong God kam long John son bilong Zechariah long wilderness. So hem kam long evri ples long Jordan, and preach abaotem wei for baptaes olsem saen for repent and kasem forgiveness long olketa sin.” Long datfala taem, “pipol luk forward” for Messiah datfala Leader. (Luke 3:1-3, 15) Nomata staka pipol kam long John, hem no datfala Leader.

Then klosap long October long 29 C.E., Jesus bilong Nazareth kam long John for baptaes. And John hem witness long diswan, hem sei: “Mi lukim spirit kamdaon olsem wanfala kurukuru from heven, and hem stap antap long hem. Mi tu no savve long hem, bat Datwan wea sendem mi for baptaesim pipol long wata hem sei long mi, ‘Man wea iu lukim spirit kamdaon long hem and stap witim hem, hem nao bae baptaesim pipol long holy spirit.’ And mi lukim finis, and mi witness abaotem wei wea diswan nao hem Son bilong God.” (John 1:32-34) Taem hem baptaes, Jesus hem kamap datfala anointed Leader—datfala Messiah, or Christ.

Tru nao, datfala promis “leader and komanda long olketa nation” hem nao Jesus Christ. And taem iumi lukluk gud long olketa fasin bilong hem olsem wanfala leader, iumi bae isi for luksavve hao wei wea hem lead hem barava winim olketa mark wea pipol garem for wanfala gudfala leader.

Datfala Messiah—Wanfala Gudfala Leader

Wanfala gudfala leader hem givim kliafala instruction and helpem pipol wea hem lukaftarem for kasem strong and savve mekem olketa fit for winim olketa problem bilong olketa. ‘Diswan hem wanfala important part long wei for win olsem wanfala leader long mek-21 century,’ hem nao samting wea buk 21st Century Leadership: Dialogues With 100 Top Leaders hem talem. Jesus hem barava redyim gud olketa wea lisin long hem for deal witim olketa problem wea olketa feisim evri day! Tingim datfala tok bilong hem wea staka pipol savve long hem—datfala Sermon long Maunten. Matthew chapter 5 go kasem 7 hem barava fulap witim planti gudfala advaes.

Tingim olsem example, advaes bilong Jesus abaotem wei for stretem problem wea kamap midolwan tufala pipol. Hem sei: “Sapos iu tekem present bilong iu long altar, and taem iu long there iu remember hao brata bilong iu hem garem samting againstim iu, leavim present bilong iu front long altar, and go; mek-peace witim brata bilong iu firstaem, then taem iu kam bak, offerim present bilong iu.” (Matthew 5:23, 24) Wei for duim samting for mek-peace witim narawan hem mas firstaem—hem moa important winim samting saed long worship, olsem wei for givim present long altar long temple long Jerusalem wea insaed law bilong Moses. Sapos olketa no duim diswan, God bae no acceptim worship bilong olketa. Advaes bilong Jesus wea gud tumas planti handred year go finis hem gud for iumi distaem tu.

Jesus helpem tu olketa wea lisin long hem for missim trap bilong dirty fasin. Hem givim kaonsel long olketa: “Iufala herem olketa sei, ‘Iufala mas no duim adultery.’ Bat mi sei long iufala, evriwan wea go ahed for lukluk long wanfala woman for barava laekem hem, hem duim adultery finis witim hem insaed long heart bilong hem.” (Matthew 5:27, 28) Datwan hem barava gudfala warning! Iumi shud no start for go followim datfala road for duim adultery long wei for go ahed for tingting abaotem. Jesus sei fornication and adultery hem samting wea kamaot from heart. (Matthew 15:18, 19) Hem wise for protectim heart bilong iumi.—Proverbs 4:23.

Sermon long Maunten garem tu nambawan advaes for lovem enemy, for showimaot kaenfala fasin, for garem stretfala tingting abaotem olketa material and spiritual samting, and planti samting moa. (Matthew 5:43-47; 6:1-4, 19-21, 24-34) Jesus showim pipol hao for kasem help from God taem hem teachim olketa hao for prea. (Matthew 6:9-13) Messiah datfala Leader hem strongim and redyim olketa follower bilong hem for deal witim olketa problem wea iumi olketa man savve kasem.

Sixfala taem insaed Sermon long Maunten, Jesus startim story bilong hem witim disfala toktok: “Iufala herem finis samting wea olketa talem” or “and tu olketa sei,” bat then hem talem nara idea taem hem sei “bat, mi talem iufala.” (Matthew 5:21, 22, 27, 28, 31-34, 38, 39, 43, 44) Diswan showimaot hao olketa wea lisin bin getius for duim samting followim wanfala wei nomoa, wea fitim olketa kastom bilong olketa Pharisee. Bat Jesus hem showim long olketa wanfala difren wei—wanfala wei wea showimaot tru mining bilong law bilong Moses. So Jesus hem mekem wei for change kamap bat hem duim long wei wea hem isi for olketa wea followim hem for acceptim. Tru nao, Jesus muvim pipol for mekem bigfala change insaed laef bilong olketa, long spiritual saed and saed long fasin. Diswan hem mark bilong wanfala tru leader.

Wanfala course buk for lanem hao for kamap manager hem showimaot hao hem hard for mekem olketa kaen change olsem for kamap. Hem sei: “Leader wea mekem olketa change need for garem feeling olsem feeling bilong man wea waka for helpem pipol, mas garem fasin for luksavve olsem doctor bilong mind, strong olsem man for ran long marathon, wei for no givap olsem bulldog, fasin for depend long seleva olsem man wea stap seleva, and patient fasin olsem saint. And nomata hem garem evri fasin hia, datwan no minim hem bae savve win.”

“Olketa leader mas duim samting wea olketa laekem follower bilong olketa for duim,” hem nao toktok insaed wanfala article wea garem title “Wei for lead: Waswe Fasin Hem Important?” Tru nao, wanfala gudfala leader mas duim samting wea hem talem. Diswan hem barava fitim Jesus Christ! Hem teachim olketa wea stap witim hem for hambol and long semtaem hem showimaot example taem hem wasim leg bilong olketa. (John 13:5-15) Hem no sendem go nomoa olketa disaepol bilong hem for preach abaotem gud nius bilong Kingdom, bat hemseleva tu barava waka hard for duim. (Matthew 4:18-25; Luke 8:1-3; 9:1-6; 10:1-24; John 10:40-42) And Jesus showimaot example for followim man wea lead. “Son no savve duim eni samting followim tingting bilong hemseleva,” hem sei, “bat only samting wea hem lukim Father hem duim.”—John 5:19.

Olketa toktok and samting Jesus duim wea iumi just ting raonem barava showimaot klia hao hem wanfala nambawan Leader. For tok stret, hem barava winim eni mark wea man putim for olketa leader. Jesus hem perfect. From hem kasem wei for kanduit dae bihaen hem dae and resurrect, hem go ahed for laef olowe. (1 Peter 3:18; Revelation 1:13-18) Wanem leader bilong olketa man nao savve kasem olketa kaen mark olsem?

Wanem Nao Iumi Mas Duim?

Olsem King wea go ahed for rul long Kingdom bilong God, “Messiah datfala Leader” bae givim planti blessing long olketa man wea obeyim hem. Long saed bilong diswan Bible hem promis olsem: “Earth bae fulap witim savve bilong Jehovah olsem wata hem kavarem sea.” (Isaiah 11:9) “Bat olketa wea garem kwaet fasin bae kasem earth, and olketa bae hapi tumas long bigfala peace.” (Psalm 37:11) “Olketa bae sidaon, evriwan anda long vine bilong hem and anda long fig tree bilong hem, and no eniwan bae mekem olketa seksek.” (Micah 4:4) “God bae stap witim olketa. And hem bae aotem evri wata from eye bilong olketa, and dae bae nomoa, sorre and krae and pain bae nomoa tu. Evri samting bifor hem finis nao.”—Revelation 21:3, 4.

Distaem world garem problem for garem gudfala leader. Bat Jesus Christ go ahed for leadim olketa wea garem kwaet fasin for kasem wanfala niu world bilong peace, wea olketa man wea obey bae garem wan mind taem olketa worshipim Jehovah God and muv ahed for kasem wei for perfect. Hem barava important for kasem savve abaotem trufala God and datwan wea hem appointim olsem Leader and for duim samting followim datfala savve!—John 17:3.

Wanfala barava nambawan wei for praisem samwan hem for followim example bilong hem. Waswe, hem no fitim iumi for followim example bilong nambawan Leader long history bilong iumi man—Jesus Christ? Hao nao iumi savve duim datwan? Hao nao datwan bae affectim laef bilong iumi? Bae iumi storyim olketa kwestin hia and planti narawan insaed tufala next article.

[Footnote]

[Piksa long page 4]

Daniel talemaot kakam bilong leader wea God chusim

[Piksa long page 7]

Olketa teaching bilong Jesus redyim pipol for deal witim olketa problem long laef

[Piksa long page 7]

Jesus bae leadim olketa man wea obey for kasem wanfala niu world bilong peace