Brekem Paoa Bilong Heit

“Lovem olketa enemy bilong iufala.”—MATTHEW 5:44.

FOR staka day tufala leader bilong tufala nation wea enemy go ahed for story abaotem hao for kasem peace. President bilong wanfala rich kantri, hem long there tu, and hem iusim paoa and savve bilong hem for trae for mekem tufala leader hia agree long samting. Bat samting wea kamaot from disfala hard waka hem moa wari. Insaed tu-thri week nomoa tufala nation hia go ahed long samting wea Newsweek magasin kolem “barava worse raf fasin midolwan tufala insaed twenti year.”

Evriwea long world, fasin for heit and enemy midolwan olketa difren kaen tribe and nation no savve finis, nomata olketa leader bilong olketa nation hia waka hard. Olketa samting wea happen wea showimaot fasin for heit hem kamap moa and moa and hem kamap moa big, wea wei for no savve, bighed tingting, and olketa giaman story nao encouragem diswan. Bat nomata olketa leader distaem hard waka nating for faendem enikaen niu idea, olketa fail for lukim hao best ansa hem old wan—old olsem datfala Sermon long Maunten. Taem Jesus Christ givim datfala sermon hem encouragem olketa wea lisin long hem for followim wei bilong God for duim samting. Insaed diswan hem toktok bilong hem wea iumi talem antap, hem nao, “Lovem olketa enemy bilong iufala.” Toktok hia hem no just best ansa for problem bilong heit and wei for garem feeling for againstim difren color skin nomoa bat hem only ansa!

Olketa man wea daot no acceptim disfala wei for lovem olketa enemy olsem wanfala iusles idea and no fitim. Bat, sapos fasin for heit hem samting wea man lanem, waswe, hem fitim for sei man savve lanem tu fasin for no heit? So olketa toktok bilong Jesus givim really hope for olketa man. Hem showimaot hao fasin for enemy, nomata sapos hem bin go ahed for longtaem, savve finis.

Tingim datfala problem long taem bilong Jesus midolwan olketa Jew wea lisin long hem. Olketa no need for go farawe for faendem olketa enemy. Olketa Roman soldia go ahed for rul ovarem datfala ples, wea mekem olketa Jew for peim bigfala tax, deal witim olketa long nogud wei saed long politik, spoelem olketa, and mekius long olketa. (Matthew 5:39-42) Bat, nomata samfala Jew seleva ting long nara Jew olsem enemy bikos long raoa wea olketa no stretem kwiktaem and letem for kamap big. (Matthew 5:21-24) Fitim Jesus for expectim olketa wea lisin long hem for lovem man wea mekem olketa for feel nogud or pain?

Mining bilong “Love”

First samting, luksavve hao taem Jesus hem sei “love,” hem no minim dat kaen feeling wea savve kamap midolwan olketa klos fren. Datfala Greek word for love long Matthew 5:44 hem kam from datfala word a·gaʹpe. Disfala word garem mining bilong love wea olketa principle nao bossim. Wei for showimaot feeling maet no insaed diswan. Bikos olketa raeteous principle nao bossim diswan, kaen love olsem savve muvim man for lukaotem interest bilong nara pipol, nomata wanem kaen fasin nao olketa garem. So, a·gaʹpe love savve winim fasin for enemy. Jesus seleva showimaot diskaen love long wei wea hem no cursim olketa soldia bilong Rome wea nilam hem long post, bat hem prea olsem abaotem olketa: “Father, forgivim olketa, bikos olketa no savve long wanem nao olketa duim.”—Luke 23:34.

Waswe, hem stret for expectim hao world bae acceptim and followim olketa teaching bilong Jesus long bigfala wei and hao pipol bae start for lovem narawan? Nomoa, from Bible showimaot hao disfala world hem gogo for bigfala trabol. Profesi long 2 Timothy 3:13 hem sei: “Olketa wicked man and man for giaman bae kamap worse.” Nomata olsem, man wanwan savve kamap free from fasin for heit taem olketa lanem gud olketa raeteous principle thru long wei for studyim Bible. Record showimaot klia hao planti pipol lane for againstim bigfala wei for heit wea stap raonem olketa. Tingim tu-thri really-laef example.

Lane for Love

Taem hem 13 year, José joinim guerrilla war olsem member bilong terrorist grup.a Olketa teachim hem for heitim pipol wea olketa tingse garem blame for fasin wea no followim justice wea hem lukim raonem hem. Main goal bilong hem hem for finisim olketa evribit, sapos hem savve duim. From hem lukim planti long olketa fren bilong hem dae, José barava feel kros and want for pei bak. Taem hem go ahed for wakem olketa grenade, hem askem hemseleva, ‘Why nao wei for safa hem big tumas? Sapos God hem stap, waswe, hem no luksavve?’ Planti taem hem krae, konfius and feel sorre.

Gogo José start for savve long wanfala kongregeson bilong Olketa Jehovah’s Witness. Long first kongregeson meeting wea hem attendim, hem kwiktaem luksavve long loving wei bilong olketa. Evriwan sei hello long hem long wei wea showaot love and fren gud. Bihaen, olketa story abaotem disfala subject “Why nao God Letem Nogud Fasin?” hem kasem ansa long olketa kwestin wea hem bin askem evritaem.b

Gogo, savve bilong hem long Bible kamap moa big and diswan leadim José for mekem olketa change long laef bilong hem and wei wea hem ting long samting. Hem lanem hao “man wea no garem love go ahed for stap insaed dae. Eniwan wea heit. . . . hem man for killim dae samwan, and . . . man for killim dae samwan no garem laef olowe.”—1 John 3:14, 15.

Bat, hem wanfala big challenge for hem lusim evribit olketa terrorist fren bilong hem. Evritaem hem go long Kingdom Hall bilong Olketa Jehovah’s Witness, olketa followim hem. Samfala fren bilong hem bifor attendim samfala meeting mekem olketa savve wanem nao mekem José change olsem. Taem olketa satisfae hao hem bae no talemaot secret bilong olketa or kosim danger long olketa, olketa leavim hem nomoa. Taem hem 17 year, José hem baptaes olsem wanfala Jehovah’s Witness. No longtaem bihaen hem start for preach full-taem. Winim wei for plan for killim pipol, distaem hem tekem go wanfala message bilong love and hope long olketa!

Brekem Daon Olketa Ethnic Wall

Waswe, olketa member bilong olketa ethnic grup savve brekem daon olketa wall bilong heit wea separatem olketa? Tingim wanfala grup bilong Olketa Jehovah’s Witnesses long London, England, wea tok long Amharic languis. Samting olsem 35 pipol nao insaed datfala grup—20-fala long olketa hia kam from Ethiopia and 15-fala from Eritrea. Olketa worship tugeta long peace and wan mind, nomata hao no longtaem go nomoa long Africa, pipol bilong Eritrea and Ethiopia faet long war.

Wanfala Witness from Ethiopia kasem disfala toktok from famili bilong hem: ‘No trustimpipol from Eritrea!’ Bat distaem, hem no just trustim olketa Christian fren bilong hem from Eritrea nomoa bat hem kolem olketa brata and sista! Nomata olketa from Eritrea tok long Tigrinya languis, olketa chus for lanem Amharic—languis bilong olketa brata bilong olketa from Ethiopia—mekem olketa savve studyim Bible tugeta witim olketa. Hem barava pruvim strong bilong love bilong God olsem “perfect wei for keepim wan mind”!—Colossians 3:14.

Forgetim Olketa Samting Bilong Bifor

Bat, waswe sapos olketa treatim wanfala man long nogud wei bifor? Planti pipol bae keepim feeling for enemy long man wea givim pain long hem. Tingim Manfred, wanfala Witness from Germany. Hem spendem sixfala year bilong laef bilong hem long wanfala Communist prison bikos hem wanfala Jehovah’s Witness. Waswe, hem enitaem garem feeling for heitim olketa wea spoelem hem or laek for pei bak? “Nomoa,” hem sei. Long wanfala German niuspepa Saarbrücker Zeitung, Manfred explainim olsem: “For duim samting wea no followim justice or for pei bak long samting wea no followim justice . . . hem wei for duim moa sem samting and evritaem diswan lead go long narafala wei wea no followim justice.” Manfred hem followim disfala toktok bilong Bible: “No peim bak nogud samting witim nogud samting long eniwan. . . . Sapos iufala fit for duim, keepim peace witim evri man.”—Romans 12:17, 18.

Wanfala World wea Free From Fasin for Heit!

Olketa Jehovah’s Witness no sei olketa perfect long diswan. Planti taem olketa faendem hao hem no isi for lusim old fasin for enemy and heit. Man need for go ahed for waka hard for followim olketa Bible principle long laef bilong hem. Olsem wanfala sekson, Olketa Jehovah’s Witness showimaot example bilong wei wea paoa bilong Bible savve aotem fasin for heit. Thru long wanfala program bilong hom Bible study, Olketa Witness go ahed for helpem staka thousand pipol evri year for kamap free from fasin for heitim man from difren ples and bighed tingting.c (Lukim box “Kaonsel Bilong Bible Help for Finisim Evribit Fasin for Heit.”) Datfala wei for win hem example nomoa long samting wea bae kamaot from wanfala education program evriwea long world wea klosap bae finisim evribit fasin for heit and samting wea kosim diswan. Disfala education program long future bae kamap anda long Kingdom bilong God, or gavman ovarem full world. Jesus teachim iumi for prea for datfala Kingdom insaed datfala Lord’s Prea, taem hem sei: “Letem kingdom bilong iu kam.”—Matthew 6:9, 10.

Bible promisim hao anda long rul bilong disfala gavman long heven, “earth bae fulap witim savve bilong Jehovah.” (Isaiah 11:9; 54:13) Then, disfala toktok bilong profet Isaiah wea iumi talem evritaem bae fulfill evriwea long world: “[God] bae judgem olketa nation and stretem planti pipol. And bae olketa mas hammerim sword bilong olketa for kamap hou and spia bilong olketa for kamap naef for katem tree. Nation bae no iusim sword againstim narafala nation, and olketa bae no lanem war moa.” (Isaiah 2:4) God seleva bae finisim evribit and for olowe disfala strongfala paoa bilong heit.

[Olketa footnote]

[Box long page 11]

Kaonsel Bilong Bible Help for Finisim Evribit Fasin for Heit

● “From wea nao olketa raoa and from wea nao olketa faet hem kamap midolwan long iufala? Waswe, olketa no from disfala samting, hem nao, from iufala barava wantem samting wea body laekem wea go ahed for faet insaed long olketa part bilong body bilong iufala?” (James 4:1) Iumi savve finisim olketa faet witim nara pipol sapos iumi lane for kontrolem olketa selfish feeling.

● “No interest long olketa samting bilong iufala seleva nomoa, bat interest long olketa samting bilong narafala pipol tu.” (Philippians 2:4) Wei for tingim interest bilong nara pipol firstaem hem narafala wei for finisim faet.

● “Let go long kros and lusim bigfala kros; no kamap hot tumas seknomoa iu duim nogud samting.” (Psalm 37:8) Iumi savve kontrolem and mas kontrolem feeling for duim nogud samting.

● “God . . . mekem evri nation bilong man from wanfala man, for stap long full earth.” (Acts 17:24, 26) Hem no stret for feel olsem iu moa hae winim pipol bilong difren color skin, bikos iumi evriwan member bilong sem famili bilong olketa man.

● ‘No duim eni samting thru long wei for raoa or for tinghae long seleva, bat witim hambol mind tingim narafala pipol olsem hae winim iufala.’ (Philippians 2:3) Hem krangge samting for lukdaonem nara pipol—bikos planti taem nara pipol garem olketa gudfala fasin and savve wea iumiseleva no garem. No wankaen color skin or kastom nomoa garem evri gud samting.

● “So, sapos iumi garem taem wea hem fitim, letem iumi duim samting wea hem gud long evriwan.” (Galatians 6:10) Taem iumi duim samting for fren gud and helpem nara pipol, nomata wanem color skin or kastom nao olketa garem, hem savve barava help long wei for story tugeta and finisim raoa.

[Olketa piksa long page 8, 9]

Olketa Witness from Ethiopia and Eritrea worship tugeta long peace

[Piksa long page 10]

Manfred, wea stap long wanfala Communist prison, nating letem diswan for mekem hem garem fasin for heit

[Piksa long page 10]

Bible savve help for brekem daon olketa wall wea separatem pipol