Kwestin From Reader
Jesus talem olketa wea lisin long hem: “Iufala mas perfect, long sem wei wea Dadi bilong iufala long heven hem perfect tu.” Long wanem wei nao iumi “mas perfect”?—Matt. 5:48.
For savve long ansa, iumi mas savve wanem nao datfala word “perfect” hem minim long Bible. No evri samting wea Bible sei hem “perfect” minim hem barava perfect. Tru tumas, Jehovah perfect long evri samting, bat iumi man and olketa nara samting savve perfect long samfala wei nomoa. Plande taem Hebrew and Greek word long Bible wea olketa transleitim “perfect” savve minim “barava set,” or “mature” followim standard wea man markem.
Taem God wakem Adam and Eve tufala perfect. Olketa fit for obeyim God, fren gud witim hem, and garem perfect body tu. Tufala perfect followim standard wea God markem. Bat from tufala no obey, tufala no kasem nao standard bilong God. Datwan mekem tufala for no perfect and evri pikinini bilong tufala tu. So from Adam sin, evriwan long world sin, no perfect, and dae.—Rom. 5:12.
Bat olsem Jesus storyim long Sermon long Maunten, pipol wea no perfect savve perfect long samfala wei. Long datfala sermon, hem markem olketa standard for showimaot love wea perfect. Diskaen love nao God showim long olketa man. Jesus sei: “Gohed lovem olketa enemy bilong iufala and for prea for olketa wea spoelem iufala. Diswan bae showimaot iufala nao olketa son bilong Dadi bilong iufala long heven, from hem mekem sun hem shaen long pipol wea gud and pipol wea nogud and hem mekem hem rain long pipol wea obeyim God and wea no obeyim God.” (Matt. 5:44, 45) Taem olketa disaepol bilong Jesus showimaot love long evriwan, olketa followim perfect example bilong God.
Olketa Jehovah’s Witness evriwea long world trae hard for followim standard bilong God for lovem narawan. Olketa laek for helpem pipol from evri difren ples and living, tribe, and religion for savve long tru samting long Bible. Long 236 kantri, Olketa Jehovah’s Witness conductim winim 7 million Bible study.
Jesus sei: “Sapos iufala lovem nomoa olketa wea lovem iufala, wanem gud samting nao bae iufala kasem? Olketa man wea tekem tax duim sem samting, iaman? Sapos olketa wea iufala hello and story long olketa hem olketa brata bilong iufala nomoa, datwan hem no difren from wanem nara pipol duim. Nomata pipol wea no savve long God tu duim sem samting, iaman?” (Matt. 5:46, 47) Olketa tru Christian no showimaot love nomoa long pipol wea skul gud, pipol from wanfala tribe, or pipol wea lovem olketa, bat olketa helpem pipol wea poor, sik, young, and olo tu. Taem olketa Christian duim datwan, olketa followim example bilong Jehovah for showimaot love wea perfect.
Waswe, enitaem bae iumi savve perfect olsem Adam taem hem no sin? Ia. Olketa man wea obey and garem faith long wanem Jesus duim for sevem olketa bae kamap perfect taem Christ rul for 1,000 year. Long datfala taem ‘Son bilong God bae finisim olketa samting wea Devil duim.’—1 John 3:8.