“Lord, Teachim Mifala Hao for Prea”

“Wanfala disaepol bilong hem sei long hem: ‘Lord, teachim mifala hao for prea.’ ”—LUKE 11:1.

1. Why nao wanfala disaepol bilong Jesus askem hem for teachim olketa hao for prea?

WANTAEM long 32 C.E., wanfala disaepol bilong Jesus lukluk long hem taem Hem prea. Hem no savve herem samting wea Jesus talem long Dadi bilong hem, from maet hem prea kwaet. Nomata olsem, taem Jesus finis prea, datfala disaepol sei long hem: “Lord, teachim mifala hao for prea.” (Luke 11:1) Wanem nao muvim hem for ask olsem? Prea hem normal part long living and worship bilong olketa Jew. Olketa Hebrew Scripture garem planti prea insaed buk bilong Psalm and long nara ples. So datfala disaepol no ask for Jesus teachim hem samting wea hem no idea long hem or wea hem nating duim bifor. For sure hem savve gud long olketa prea bilong olketa bigman bilong Jew religion. Bat taem hem lukim Jesus prea, for sure hem luksavve prea bilong Jesus hem difren from olketa bigman wea prea bilong olketa mekhae long olketa seleva nomoa.—Matthew 6:5-8.

2. (a) Wanem nao showimaot Jesus hem no minim for iumi talem sem word bilong datfala example prea? (b) Why nao iumi interest for savve hao for prea?

² Winim wan year bifor datwan, long Sermon bilong hem long Maunten, Jesus givim olketa disaepol bilong hem wanfala example for prea bilong olketa. (Matthew 6:9-13) Maet disaepol hia hem no stap long datfala taem, so Jesus showimaot kaenfala fasin taem hem talem moa olketa main point bilong datfala example prea. Hem barava interesting hao Jesus no talem sem word bilong datfala prea, wea showimaot hem no talem wanfala prea wea pipol mas baeheartim. (Luke 11:1-4) Olsem datfala disaepol wea iumi no savve long nem bilong hem, iumi tu laek for lane hao for prea mekem olketa prea bilong iumi savve mekem iumi kam moa klos long Jehovah. So, iumi bae lukluk long datfala full example prea, wea aposol Matthew hem raetem. Prea hia askem sevenfala samting, thrifala abaotem olketa purpose bilong God and fofala saed long olketa material and spiritual need bilong iumi. Long disfala article, bae iumi storyim first thrifala samting wea hem askem.

Wanfala Loving Dadi

3, 4. Wanem nao hem minim taem iumi kolem Jehovah “Dadi bilong mifala”?

³ Long start, Jesus showim hao olketa prea bilong iumi shud showimaot wei wea iumi fren klos witim Jehovah long wei wea showimaot respect. Taem hem story for olketa disaepol bilong hem wea sidaon klosap long hem long datfala maunten, Jesus talem olketa for prea long Jehovah olsem “Dadi bilong mifala wea stap long heven.” (Matthew 6:9) Wanfala savveman sei nomata Jesus story long Hebrew or Aramaic languis, word wea hem iusim for “Dadi” hem ‘olsem word wea smol pikinini bae iusim.’ Wei for kolem Jehovah “Dadi bilong mifala” hem showimaot wei for fren wea loving and garem trust.

⁴ Taem iumi sei “Dadi bilong mifala,” iumi showimaot tu hao iumi part long wanfala big famili bilong olketa man and woman wea luksavve long Jehovah olsem Datwan wea Givim Laef. (Isaiah 64:8; Acts 17:24, 28) Hem adoptim olketa Christian wea spirit anointim olsem olketa “son bilong God,” and olketa savve “singaot: ‘Abba, Father!’ ” long hem. (Romans 8:14, 15) Planti million pipol kamap loyal fren bilong olketa. Pipol hia dedicatem laef bilong olketa long Jehovah and showimaot datfala dedication taem olketa baptaes long wata. Evri “nara sheep” hia savve story witim Jehovah tu thru long nem bilong Jesus and kolem Hem “Dadi bilong mifala.” (John 10:16; 14:6) Iumi savve story evritaem witim Dadi bilong iumi long heven for praisem hem, sei thankiu long hem for evri gudfala samting wea hem duim for iumi, and tu for storyim olketa hevi bilong iumi long hem from iumi sure hem kea for iumi.—Philippians 4:6, 7; 1 Peter 5:6, 7.

Lovem Nem Bilong Jehovah

5. Wanem nao start bilong datfala example prea, and why nao diswan hem fitim?

⁵ Start bilong prea hia hem showimaot klia wanem nao moa important. Hem sei: “Mekem nem bilong iu hem kamap holy.” (Matthew 6:9) Tru nao, wei for nem bilong Jehovah kamap holy hem shud barava important long iumi bikos iumi lovem hem and no want for lukim olketa difren wei wea pipol tok daonem nem bilong hem. From Satan hem bighed againstim Jehovah and wei wea hem switim first man and woman for disobey long Jehovah God, datwan nao spoelem nem bilong Hem and mekem daot kamap abaotem wei wea God rulim universe. (Genesis 3:1-6) And tu, long planti handred year wea go pas, nem bilong Jehovah kasem shame from teaching and nogud samting wea pipol wea sei olketa stand for hem duim.

6. Wanem nao bae iumi no duim sapos iumi prea for mekem nem bilong Jehovah kamap holy?

⁶ Wei wea iumi prea for mekem nem bilong Jehovah holy showimaot feeling bilong iumi saed long kwestin abaotem sovereign rul bilong universe—hem nao wei wea iumi sapotim evribit right bilong Jehovah for rulim universe. Jehovah laekem olketa angel and man wea stap long universe for willing and hapi for stap anda long raeteous rul bilong hem bikos olketa lovem hem and lovem tu full mining bilong nem bilong hem. (1 Chronicles 29:10-13; Psalm 8:1; 148:13) Love bilong iumi for nem bilong Jehovah bae helpem iumi for no duim eni samting wea maet mekem pipol tok spoelem holy nem bilong hem. (Ezekiel 36:20, 21; Romans 2:21-24) From peace bilong universe and evriwan wea stap insaed hem depend long wei for mekem nem bilong Jehovah kamap holy and for stap anda long sovereign rul bilong hem from love nao muvim iumi, taem iumi prea “mekem nem bilong iu kamap holy,” diswan showimaot iumi trustim hao purpose bilong Jehovah bae fulfill long wei wea bae mekem hem kasem praise.—Ezekiel 38:23.

Kingdom wea Iumi Prea for Hem

7, 8. (a) Wanem nao datfala Kingdom wea Jesus teachim iumi for prea for hem? (b) Wanem nao iumi lanem abaotem disfala Kingdom insaed buk bilong Daniel and Revelation?

⁷ Mek-tu samting wea man askem long datfala example prea hem: “Mekem kingdom bilong iu kam.” (Matthew 6:10) Diswan hem join long klos wei witim first samting hem askem. Samting wea Jehovah bae iusim for mekem nem bilong hem holy nao datfala Messiah Kingdom, gavman bilong hem long heven, wea Son bilong hem Jesus Christ, hem King wea God markem. (Psalm 2:1-9) Profesi bilong Daniel hem storyim datfala Messiah Kingdom olsem “wanfala ston” wea kamaot from wanfala “maunten.” (Daniel 2:34, 35, 44, 45) Datfala maunten hem piksarem sovereign rul bilong Jehovah long universe, so datfala ston wea piksarem Kingdom hem wanfala niu wei wea rul bilong Jehovah long universe hem showaot. Long datfala profesi, datfala ston “hem kamap wanfala big maunten and fulimap full earth,” wea showimaot datfala Messiah Kingdom hem stand for sovereign rul bilong God taem hem rulim earth.

⁸ Insaed disfala Kingdom gavman witim Christ, hem 144,000 narawan wea “hem baem olketa from midolwan long olketa man” for rul witim hem olsem king and priest. (Revelation 5:9, 10; 14:1-4; 20:6) Daniel hem tok abaotem olketa hia olsem “olketa holy wan bilong Most Hae Wan,” wea olketa witim Christ wea Hed bilong olketa, kasem “datfala kingdom and datfala rul and datfala glory bilong olketa kingdom anda long heven . . . Kingdom bilong olketa hem kingdom for olowe, and evriwan wea rul bae servem and obeyim —olketa tu.” (Daniel 7:13, 14, 18, 27) Diswan nao gavman long heven wea Christ teachim olketa follower bilong hem for prea for hem.

Why Nao Iumi Still Prea for Datfala Kingdom for Kam?

9. Why nao hem important for iumi prea for Kingdom bilong God for kam?

⁹ Long datfala example prea, Christ teachim iumi for prea for Kingdom bilong God mas kam. Wei wea olketa profesi bilong Bible fulfill showimaot datfala Messiah Kingdom hem start long heven long 1914.a So waswe, hem still fitim for iumi prea for datfala Kingdom for “kam”? Yes. From insaed long profesi bilong Daniel, datfala Messiah Kingdom wea profesi storyim olsem wanfala ston, hem gogo for smasem olketa gavman bilong man, wea datfala big image stand for hem. Datfala ston no hitim yet datfala image, wea taem hem bangam bae hem pisisim evribit datfala image. Profesi bilong Daniel sei: “Bae no eni nara pipol tekova long datfala kingdom. Hem bae smasem and finisim evri kingdom hia, and hemseleva nao bae stap olowe.”—Daniel 2:44.

10. Why nao iumi laek tumas for Kingdom bilong God for kam?

¹⁰ Iumi laek tumas for lukim Kingdom bilong God hem kam againstim wicked system bilong Satan bikos diswan minim wei for mekem nem bilong Jehovah holy bae kamap and evriwan wea againstim sovereign rul bilong God bae finis. Iumi prea strong olsem: “Mekem kingdom bilong iu kam,” and olsem aposol John iumi sei: “Amen! Kam, Lord Jesus.” (Revelation 22:20) Tru nao, iumi wantem Jesus for kam for apim wei wea nem bilong Jehovah hem holy and vindicatem sovereign rul bilong Hem, mekem disfala toktok bilong man wea raetem psalm hem kamap tru: “Mekem pipol savve hao iu, wea nem bilong iu Jehovah, iu nomoa Most Hae ovarem full earth.”—Psalm 83:18.

“Letem Will Bilong Iu Kamap”

11, 12. (a) Wanem nao iumi askem taem iumi prea for will bilong God “kamap long earth, olsem long heven”? (b) Wanem moa hem insaed long wei wea iumi prea for will bilong Jehovah for kamap?

¹¹ Next samting Jesus teachim olketa disaepol for prea for hem nao: “Mekem will bilong iu kamap long earth, olsem long heven.” (Matthew 6:10) Universe hem stap bikos long will bilong Jehovah. Olketa strongfala angel long heven singaot olsem: “Iu nao fit, Jehovah, God bilong mifala, for kasem glory and honor and paoa, from iu creatim evri samting, and from will bilong iu nao evri samting hia stap and kamap.” (Revelation 4:11) Jehovah garem purpose for “olketa samting long earth.” (Ephesians 1:8-10) Taem iumi prea for will bilong God for kamap, iumi askem Jehovah for duim purpose bilong hem. And tu, iumi showimaot iumi laek tumas for lukim will bilong God kamap long full universe.

¹² Wei wea iumi talem disfala prea showimaot tu iumi willing for mekem living bilong iumi followim will bilong Jehovah. Jesus hem sei: “Kaikai bilong mi hem for duim will bilong datwan wea sendem mi kam, and for finisim waka bilong hem.” (John 4:34) Olsem Jesus, iumi olketa Christian wea dedicate hapi tumas for duim will bilong God. Love bilong iumi for Jehovah and Son bilong hem muvim iumi for iusim laef bilong iumi “no for samting wea olketa man wantem, bat for duim will bilong God.” (1 Peter 4:1, 2; 2 Corinthians 5:14, 15) Iumi waka hard for no duim olketa samting wea iumi savve hem againstim will bilong Jehovah. (1 Thessalonians 4:3-5) Taem iumi markem taem for Bible reading and study, iumi “go ahed for luksavve wanem nao will bilong Jehovah,” wea insaed diswan hem wei for strong for share for preachim “disfala gud nius bilong kingdom.”—Ephesians 5:15-17; Matthew 24:14.

Will Bilong Jehovah Long Heven

13. Hao nao will bilong God hem go ahed longtaem bifor Satan hem bighed?

¹³ Will bilong Jehovah hem go ahed long heven longfala taem bifor wanfala spirit son bilong hem bighed and kamap Satan. Buk bilong Proverbs hem showimaot hao firstborn Son bilong God nao wisdom. Hem talem hao insaed staka million year, only-born Son bilong God “hapi taem hem stap witim hem,” hapi for duim will bilong Dadi bilong hem. Gogo, hem kamap “nambawan wakman” bilong Jehovah for creatim evri samting “long heven and long earth, olketa samting wea man lukim and olketa samting wea man no lukim.” (Proverbs 8:22-31; Colossians 1:15-17) Jehovah iusim Jesus olsem Word bilong hem, or Man for Toktok.—John 1:1-3.

14. Wanem nao iumi savve lanem from Psalm 103 abaotem wei wea olketa angel duim will bilong Jehovah long heven?

¹⁴ Man wea raetem psalm showim hao sovereign rul bilong Jehovah hem ovarem evri samting wea hem creatim and evri angel lisin long instruction and olketa komand bilong hem. Hem sei: “Jehovah nao strongim throne bilong hem long heven; and olsem king hem rul ovarem evriting. Blessim Jehovah, O iufala olketa angel bilong hem, wea garem strongfala paoa, wea duim samting wea hem talem, taem iufala lisin long voice bilong word bilong hem. Blessim Jehovah, iufala evri army bilong hem, iufala olketa minister bilong hem, wea duim will bilong hem. Blessim Jehovah, iufala evri samting wea hem wakem, long evri ples wea hem rulim.”—Psalm 103:19-22.

15. Hao nao wei wea Jesus kasem paoa long Kingdom affectim wei wea will bilong God go ahed long heven?

¹⁵ Bihaen hem go againstim God, Satan still savve go long heven, olsem buk bilong Job hem showim. (Job 1:6-12; 2:1-7) Nomata olsem, buk bilong Revelation profesi abaotem taem wea Jesus bae raosem Satan and olketa demon bilong hem from heven. Luk olsem datwan hem happen no longtaem bihaen Jesus Christ kasem paoa long Kingdom long 1914. Start long dat taem, no eni ples stap long heven for olketa hia wea bighed. Olketa stap nomoa raonem earth. (Revelation 12:7-12) No eniwan wea againstim rul bilong Jehovah hem stap moa long heven, only olketa voice wea praisem “datfala Lamb,” Christ Jesus, and praisem and stap anda long Jehovah. (Revelation 4:9-11) Will bilong Jehovah hem barava go ahed long heven.

Will Bilong Jehovah for Earth

16. Hao nao example prea hem againstim teaching bilong Christendom saed long hope bilong olketa man?

¹⁶ Olketa church bilong Christendom no joinim earth insaed olketa purpose bilong God, from olketa sei evri gud pipol go long heven. Bat Jesus teachim iumi for prea olsem: “Mekem kingdom bilong iu kam. Mekem will bilong iu kamap long earth, olsem long heven.” (Matthew 6:10) Waswe, fitim for eniwan talem dat will bilong Jehovah hem kamap long earth distaem wea fulap witim raf fasin, fasin wea no followim justice, sik, and dae? Barava nomoa nao! Dastawe iumi shud prea strong for will bilong God kamap long earth, for fitim disfala promis bilong aposol Peter: “Iumi weitim olketa niu heven [Messiah Kingdom gavman from Christ] and niu earth [wanfala community bilong raeteous pipol] olsem hem promisim, wea raeteous fasin bae stap.”—2 Peter 3:13.

17. Wanem nao purpose bilong Jehovah for earth?

¹⁷ Jehovah garem wanfala purpose taem hem creatim earth. Hem muvim profet Isaiah for raet olsem: “Diswan nao samting wea Jehovah talem, Creator bilong heven, Trufala God, Datwan wea Sheipim earth and Wakem, Datwan wea mekem hem stap strong, wea no wakem for stap nating, wea wakem for pipol stap long hem: ‘Mi nao Jehovah, and no eniwan moa stap.’ ” (Isaiah 45:18) God putim first man and woman insaed wanfala paradaes garden and givim olketa disfala instruction: “Garem pikinini and kamap planti and fulimap earth and lukaftarem.” (Genesis 1:27, 28; 2:15) Hem klia tumas, purpose bilong Creator hem for earth fulap witim perfect pipol wea raeteous and hapi for stap anda long rul bilong Jehovah and wea stap olowe insaed datfala Paradaes wea Christ promisim.—Psalm 37:11, 29; Luke 23:43.

18, 19. (a) Wanem nao mas happen bifor will bilong God kamap evribit long earth? (b) Wanem nao olketa nara part bilong example prea bilong Jesus wea iumi bae storyim long next article?

¹⁸ Will bilong Jehovah for earth bae no kamap taem earth hem still garem olketa man and woman wea go againstim sovereign rul bilong hem. God bae iusim olketa strongfala angel wea Christ leadim for “finisim olketa wea spoelem earth.” Full wicked system bilong Satan, and giaman religion bilong hem, raverave politik, greedy and raverave bisnis, and army wea distroem pipol and ples, bae finis for olowe. (Revelation 11:18; 18:21; 19:1, 2, 11-18) Sovereign rul bilong Jehovah bae kamap hae and nem bilong hem kamap holy. Iumi prea for evri samting hia taem iumi sei: “Dadi bilong mifala wea stap long heven, mekem nem bilong iu kamap holy. Mekem kingdom bilong iu kam. Mekem will bilong iu kamap long earth, olsem long heven.”—Matthew 6:9, 10.

¹⁹ Nomata olsem, long example prea bilong Jesus, hem showimaot hao iumi savve prea for olketa samting saed long iumiseleva tu. Iumi bae lukluk long olketa samting hia long next article.

[Footnote]

Review

• Why nao hem fitim for iumi kolem Jehovah “Dadi bilong mifala”?

• Why nao hem important tumas for iumi prea for nem bilong Jehovah kamap holy?

• Why nao iumi prea for Kingdom bilong God for kam?

• Wanem nao hem minim taem iumi prea for will bilong God for kamap long earth olsem long heven?

[Piksa long page 9]

Olketa prea bilong Jesus difren tumas from prea bilong olketa Pharisee wea mekhae long olketa seleva nomoa

[Piksa long page 10]

Olketa Christian prea for Kingdom bilong God for kam, nem bilong hem for kamap holy, and will bilong hem for kamap