Kwestin From Reader

Long example prea bilong hem, waswe, Jesus minim hao will bilong God hem go ahed long heven nomata olketa wicked angel stap yet long there?

Long Matthew 6:10, Jesus sei: “Letem will bilong iu kamap long earth, olsem long heven.” Tufala tingting nao stap for minim diswan. First wan, hem ask for will bilong God kam long earth olsem hem go ahed for kamap long heven or, mek-tu tingting, hem ask for will bilong God for kamap evribit long heven and long earth.a Mining bilong toktok wea Jesus just talem, “letem kingdom bilong iu kam,” showimaot hao mek tu tingting nao hem fitim wanem nao Bible talem. And diswan showimaot wanem nao go ahed taem Jesus stap long earth and for longfala taem bihaen. Hao nao olsem?

Buk bilong Revelation talem tufala kliafala samting wea happen taem Kingdom bilong God kamap long heven. First samting, hem affectim heven seleva, and mek-tu, hem affectim earth. Revelation 12:7-9, 12 hem sei: “War hem start long heven: Michael and olketa angel bilong hem faet againstim dragon, and dragon and olketa angel bilong hem faet bat olketa no win, and nomoa eni ples stap for olketa long heven. So, olketa torowem go daon datfala bigfala dragon, datfala firstfala snek, datwan wea olketa kolem Devil and Satan, wea hem giamanim olketa man long earth; olketa torowem hem kamdaon long earth, and olketa torowem olketa angel bilong hem go daon witim hem. Dastawe iufala hapi, iufala heven and iufala wea stap long there! Trabol for earth and for sea, bikos Devil hem kamdaon finis long iufala, and hem kros tumas, from hem savve hem garem shortfala taem nomoa.”

Datfala torowe bilong Satan and olketa demon bilong hem from heven bihaen 1914 hem kliarem evri wicked spirit from heven. Diswan givim barava bigfala hapi long evri loyal angel bilong Jehovah, wea olketa nao staka. (Job 1:6-12; 2:1-7; Revelation 12:10) So, datfala part insaed example prea bilong Jesus wea ask abaotem heven, hem kamap tru nao. Evriwan wea stap long heven bihaen datfala taem, olketa loyal long Jehovah and barava followim sovereign rul bilong hem.

Iumi mas luksavve hao nomata bifor datfala taem, taem olketa wicked angel still savve kasem heven, olketa no part nao long famili bilong God, and olketa stap anda olketa kliafala tambu. Olsem example, Jude 6 showimaot hao nomata long first century yet, olketa ‘stap long ples wea dark evribit [long spiritual wei] for olowe for weitim judgment bilong bigfala day.’ Olsem tu, 2 Peter 2:4 hem sei: “God no hol bak for panisim olketa angel wea sin, bat, taem hem torowem olketa go long Tartarus [ples wea barava low tumas], hem putim olketa long hol wea dark tumas [long spiritual wei] for weitim judgment.”b

Long wei wea barava difren from hao olketa bin stap long heven olsem no part long famili bilong God, olketa wicked angel hia garem bigfala paoa ovarem earth. Tru nao, Word bilong God kolem Satan “ruler bilong disfala world,” and hem sei olketa demon nao “olketa world ruler bilong disfala darkness.” (John 12:31; Ephesians 6:11, 12; 1 John 5:19) From paoa wea hem garem, Devil savve offerim long Jesus “evri kingdom bilong world and glory bilong olketa” sapos Jesus worshipim hem wanfala taem nomoa. (Matthew 4:8, 9) So hem klia tumas hao taem Kingdom bilong God “kam” long earth, bae bigfala change nao happen.

Long earth, ‘kakam’ bilong Kingdom bilong God bae bringim wanfala barava niufala system. Datfala Kingdom bae pisisim evri gavman wea man wakem and bae kamap only gavman bilong earth. Long semtaem, olketa man wea fraet long God nao bae kamap “niu earth.” (2 Peter 3:13; Daniel 2:44) Datfala Kingdom bae finisim sin from man wea obey and gogo mekem full earth kamap paradaes, and finisim rul bilong Satan evribit.—Romans 8:20, 21; Revelation 19:17-21.

Long end bilong datfala Wan Thousand Year Rul, taem Messiah Kingdom hem fulfillim finis waka wea God givim long hem, “Son bae putim hemseleva anda long Datwan wea putim evri samting anda long hem, for mekem God mas kamap evri samting long evriwan.” (1 Corinthians 15:28) Then wanfala lastfala test bae kamap, and bihaen datwan Satan, olketa demon bilong hem, and eni man wea followim Satan for bighed bae barava finis for olowe long “mek-tu dae.” (Revelation 20:7-15) Bihaen datwan and for olowe nao, evri gud wan wea stap long heven and long earth bae hapi for stap anda long loving sovereign rul bilong Jehovah. Long datfala taem nao, olketa toktok long example prea bilong Jesus bae fulfill evribit.—1 John 4:8.

[Olketa Footnote]