Olketa Christian Famili, “Redi Gudfala”

“Redi gudfala, bikos Son bilong man bae kam long taem wea iufala nating tingim.”​—LUKE 12:40.

1, 2. Why nao iumi shud followim wanem Jesus talem for “redi gudfala”?

WANEM nao bae happen long iu and famili bilong iu “taem Son bilong man hem kam” and “separatem [pipol] long tufala difren sekson”? (Matt. 25:31, 32) From datwan bae happen long taem wea iumi nating tingim, hem important tumas for followim wanem Jesus talem for “redi gudfala”!—Luke 12:40.

² Study wea iumi duim bifor diswan hem storyim waka wea each member long famili mas duim for helpem famili gohed for wekap long spiritual wei. Bae iumi storyim tu olketa nara samting wea famili savve duim mekem olketa gohed fren gud witim Jehovah.

“Lukluk Long Wanfala Samting Nomoa”

3, 4. (a) Olketa Christian famili mas careful long wanem? (b) Wanem nao hem minim for “lukluk long wanfala samting nomoa”?

³ Olketa famili need for redi gud for taem wea Christ bae kam bikos staka samting distaem savve mekem olketa for no worshipim Jehovah. Olketa mas careful for no letem olketa samting hia spoelem worship bilong olketa. Jesus talem iumi for “lukluk long wanfala samting nomoa” bikos wei for laek garem plande material samting spoelem staka famili finis. (Readim Matthew 6:22, 23.) Iumi savve laetem wanfala laet for shaen long road mekem iumi no foldaon. Semsem tu, wanem iumi lukim long tokpiksa ‘eye long heart’ savve helpem iumi for no sin.​—Eph. 1:18.

⁴ For iumi lukim klia wanfala samting, eye bilong iumi mas gud. Hem semsem tu witim tokpiksa eye long heart. Tokpiksa eye bilong iumi mas lukluk long wanfala samting nomoa. Hem minim for iumi evritaem tingim olketa spiritual samting winim wei for laek garem staka material samting and wari tumas abaotem wanem famili needim. (Matt. 6:33) Diswan minim for hapi nomoa long wanem iumi garem and for Kingdom nao first samting long laef bilong iumi.​—Heb. 13:5.

5. Wanem nao wanfala teenage gele duim wea showimaot hem tingim olketa spiritual samting firstaem?

⁵ Taem dadi and mami lanem pikinini for tingim olketa spiritual samting firstaem, gud samting nao savve kamaot from datwan! Tingim example bilong wanfala teenage gele long Ethiopia. From hem kasem hae mark long skul, hem kasem scholarship for go long big skul moa. Bat from hem garem olketa spiritual goal, hem no tekem datfala scholarship. No longtaem bihaen, samwan askem hem for kam waka for hem wea pei bilong datfala waka hem $4,200 (U.S.) for wanfala month. Pei hia hem big winim pei bilong staka pipol long kantri. Bat datfala gele tingim goal bilong hem for pioneer. Hem no acceptim datfala waka, nomata hem no talem long dadi and mami wanem hem disaedem. Wanem nao tingting bilong dadi and mami taem tufala savve hem no acceptim datfala waka? Olketa hapi tumas and sei olketa tinghae long wanem hem duim!

6, 7. Wanem nogud samting nao iumi mas “lukaot and keakea” long hem?

⁶ Warning abaotem wei for greedy hem showaot long samting wea Jesus talem long Matthew 6:22, 23. Jesus story abaotem eye wea “lukluk long wanfala samting nomoa” and eye wea “laek for lukim nogud samting.” Eye wea “laek for lukim nogud samting” hem minim wei for kavet or greedy. (Matt. 6:23) Wanem nao tingting bilong Jehovah abaotem wei for kavet or greedy? Bible sei: “Iufala mas no storyim wei for durong, and no storyim tu evri difren kaen wei for no klin, or wei for greedy [kavet].”—Eph. 5:3.

⁷ Maet hem isi for luksavve long man wea greedy, bat maet hem no isi for lukim datwan long iumiseleva. Dastawe hem wise for followim disfala advaes bilong Jesus: “Iufala mas lukaot and keakea nogud iufala kavetem eni samting bilong nara man.” (Luke 12:15) Iumi need for lukluk gud long iumiseleva for luksavve wanem nao iumi barava laekem. Olketa Christian famili shud ting raonem haomas taem and selen nao olketa iusim long hapitaem and for peim olketa material samting.

8. Taem iumi laek for peim eni samting, wanem nao hem gud for tingim?

⁸ Bifor iu peim eni samting, hem gud for no tingim nomoa sapos iu garem inaf selen for peim datwan, bat tingim diswan tu: ‘Waswe, bae mi garem taem for iusim datwan and for lukaftarem gud? Waswe, bae hem tek longtaem for savve gud hao for iusim?’ Staka advertisement distaem trae for mekem young pipol bilivim olketa mas garem olketa expensive kaleko and olketa nara expensive samting nomata olketa no barava needim. Bat olketa samting hia expensive bikos plande pipol laekem. Iufala young wan, tingting gud bifor iu peim samting. Tingim sapos samting wea iu laek peim bae helpem famili bilong iu for redi gud taem Son bilong man hem kam. Trustim disfala promis bilong Jehovah: “Bae mi nating lusim iu.”​—Heb. 13:5.

Waka Hard for Kasem Olketa Spiritual Goal

9. Wanem gud samting nao famili savve kasem from wei for garem olketa spiritual goal?

⁹ Nara samting wea famili savve duim for strongim faith bilong olketa and for fren gud witim Jehovah, hem for garem olketa spiritual goal and waka hard for kasem. Diswan bae helpem famili for luksavve sapos olketa gohed strong for worshipim Jehovah and for disaedem olketa important samting wea olketa shud duim firstaem.​—Readim Philippians 1:10.

10, 11. (a) Wanem nao olketa spiritual goal wea famili bilong iu waka hard for kasem? (b) Wanem nao olketa nara goal wea iu laek for kasem long future?

¹⁰ Famili savve kasem gud samting long wei for garem olketa smol goal tu. Tingim goal for storyim text evriday. Koment wea each wan long famili givim savve helpem hasband for luksavve long tingting bilong olketa abaotem Jehovah and olketa tru samting long Bible. Nara goal hem for famili readim Bible evriday. Diswan bae helpem pikinini for lane hao for read gud and for minim message long Bible. (Ps. 1:1, 2) Olketa prea wea iumi talem tu savve showimaot sapos iumi fren gud witim God. So hem gud for garem goal for story gud witim Jehovah taem iumi prea! Nara gudfala goal hem for trae hard for garem olketa gudfala wei wea holy spirit mekem man for garem. (Gal. 5:22, 23) Taem iumi meetim pipol long ministry, tingim olketa samting wea iumi savve duim for kaen long olketa! Taem famili waka hard for duim datwan, pikinini bae lane for kaen long narawan and for laek regular pioneer or duim missionary waka long future.

¹¹ Tingim samfala goal wea iu and famili bilong iu savve kasem. Waswe, famili savve duim samfala hour moa long ministry? Waswe, famili savve trae for duim street witnessing or bisnis territory? Waswe, famili savve muv long ples wea needim samfala pablisa moa? Waswe, samwan long famili savve lanem nara languis mekem hem savve preach long pipol wea kam from difren ples?

12. Wanem nao hasband savve duim for helpem famili kamap olketa strongfala Christian?

¹² Iufala hasband, tingim olketa samting wea famili savve duim for kamap olketa strongfala Christian. Then markem olketa goal wea bae helpem famili for duim datwan. Olketa goal wea iu markem shud fitim olketa and no hard for kasem. (Prov. 13:12) Samfala goal wea iu markem hem bae no isi for famili kwiktaem kasem. So markem samfala taem wea famili iusim for lukluk long television for duim olketa spiritual samting. (Eph. 5:15, 16) Waka hard for kasem olketa goal wea iu markem for famili. (Gal. 6:9) Taem famili waka hard for kasem olketa spiritual goal, “evriwan [bae] lukim wei wea” famili kamap strongfala Christian.​—1 Tim. 4:15.

Duim Famili Worship Evritaem

13. Wanem change nao kamap long olketa kongregeson meeting, and olketa wanem kwestin nao iumi shud tingim?

¹³ Bigfala change wea kamap long January 1, 2009, long schedule for olketa kongregeson meeting barava helpem olketa famili for “redi gudfala” for taem wea Son bilong man bae kam. Distaem iumi no garem Kongregeson Buk Study olsem bifor, bat datfala meeting kamap long taem bilong Theocratic Ministry Skul and Service Meeting. Diswan mekem olketa Christian famili savve duim Famili Worship evri week for strongim olketa long spiritual wei. From disfala change kamap for winim 2-fala year finis, tingim diswan: ‘Waswe, mi mekius long taem wea mi garem for duim Famili Worship? Sapos mi singol, waswe, mi iusim datfala taem for duim study seleva? Waswe, mi kasem goal from datfala arrangement?’

14. (a) Wanem nao main goal for duim Famili Worship or study seleva evri week? (b) Why nao wei for duim Famili Worship hem barava important?

¹⁴ Main goal for duim Famili Worship or study seleva evri week hem for helpem iumi fren gud witim God. (Jas. 4:8) Taem iumi studyim Bible evritaem and gohed lane abaotem Jehovah, datwan bae mekem iumi fren gud witim hem. Taem iumi fren gud witim Jehovah, bae iumi lovem hem long ‘full heart, soul, strong, and evri savve bilong iumi.’ (Mark 12:30) Iumi laek for obeyim God and followim wei bilong hem. (Eph. 5:1) Wei for duim Famili Worship evritaem hem main samting wea bae helpem evriwan long famili fren gud witim God and “redi gudfala” taem iumi weitim “bigfala trabol” for kam. (Matt. 24:21) Hem barava important for duim Famili Worship mekem evriwan stap laef.

15. Wanem gud samting nao famili kasem from wei for duim Famili Worship?

¹⁵ Nara goal for duim Famili Worship hem for helpem evriwan long famili fren gud tugeta. Taem famili storyim olketa spiritual samting tugeta evri week, datwan bae barava helpem olketa. Taem hasband and waef studyim Bible tugeta and storyim olketa interesting samting wea tufala lanem, tufala bae wan mind! (Readim Ecclesiastes 4:12.) Taem dadi and mami and olketa pikinini duim Famili Worship tugeta, olketa bae showimaot love bikos “datwan nao hem barava mekem pipol for wan mind.”​—Col. 3:14.

16. Storyim gud samting wea thrifala sista kasem from olketa markem wanfala evening for studyim Bible.

¹⁶ Tingim gud samting wea thrifala widow sista long kongregeson kasem from arrangement for markem wanfala evening for studyim Bible. Nomata thrifala olo sista hia no from sem famili, olketa fren gud for staka year finis. From olketa laek kaban tugeta and iusim datfala taem for storyim olketa spiritual samting, olketa markem wanfala evening for studyim Bible tugeta. Firstaem olketa iusim buk “Bearing Thorough Witness” About God’s Kingdom. Wanfala sista sei: “Mifala barava enjoyim study bilong mifala and plande taem study hem winim wan hour. Mifala trae for tingim olketa samting wea kasem olketa brata long first-century and storyim wanem mifala bae duim sapos sem samting kasem mifala. Then mifala trae for followim wanem mifala lanem long ministry. Diswan mekem mifala for enjoyim tumas preaching waka and for teachim pipol for kamap disaepol. Mifala kasem staka gud samting long ministry.” Samting wea thrifala sista hia duim strongim spiritual saed bilong olketa and mekem olketa barava fren gud. Olketa sei: “Mifala tinghae tumas long disfala arrangement.”

17. Wanem nao bae helpem famili kasem gud samting from Famili Worship?

¹⁷ Waswe long iu? Wanem gud samting nao iu kasem from wei for duim Famili Worship or study seleva? Sapos iu duim samfala taem nomoa, bae iu no kasem gud samting from datwan. Evriwan long famili shud redi long taem wea famili markem for duim study. Olketa sismol samting shud no spoelem taem wea iu markem for duim datwan. Iu shud chusim tu information wea famili bae iusim long laef bilong olketa. Wanem nao iu savve duim mekem famili kasem gud samting from datfala study? Teach long gudfala wei and showimaot respect mekem evriwan enjoyim study.​—Jas. 3:18.a

“Gohed Wekap” and “Redi Gudfala”

18, 19. From iumi savve Son bilong man klosap for kam, hao nao diswan shud affectim iu and famili bilong iu?

¹⁸ Start kam long 1914, staka nogud samting hem happen wea showimaot iumi stap long olketa last day bilong world bilong Satan. Armageddon klosap tumas. Son bilong man klosap for kam and finisim pipol wea no worshipim Jehovah. (Ps. 37:10; Prov. 2:21, 22) Diswan shud mekem iu and famili bilong iu for “gohed wekap” and “redi gudfala”!

¹⁹ Waswe, iu followim advaes bilong Jesus for “lukluk long wanfala samting nomoa”? Nomata pipol long world laek for garem staka material samting or bignem, waswe, famili bilong iu waka hard for kasem olketa spiritual goal? Waswe, iu gohed for followim arrangement for duim Famili Worship or study seleva? Waswe, datwan helpem famili bilong iu fren gud witim Jehovah and each other? Iufala hasband, waef, and pikinini, waswe, iufala duim waka wea God givim wea savve helpem evriwan long famili “gohed wekap”? (1 Thess. 5:6) Sapos olsem, iufala bae “redi gudfala” taem Son bilong man hem kam.

[Footnote]

Wanem Nao Iu Lanem?

• Storyim hao olketa Christian famili savve “redi gudfala” long wei for . . .

“lukluk long wanfala samting nomoa.”

markem and waka hard for kasem olketa spiritual goal.

duim Famili Worship evritaem.

[Piksa long page 13]

Olketa material samting bae no spoelem iumi sapos iumi “lukluk long wanfala samting nomoa”