Waswe, Iu Trustim Jehovah for Lukaftarem Iu?

“Evritaem Kingdom and olketa samting wea God sei hem stret mas first samting long laef bilong iufala. Sapos olsem, God bae givim iufala olketa samting hia wea iufala needim.”​—MATT. 6:33.

1, 2. (a) Long Galatians 6:16, hu nao “Israel bilong God” piksarem? (b) Long Matthew 19:28, hu nao “twelvfala tribe bilong Israel” piksarem?

TAEM iu readim long Bible datfala nem Israel, wanem nao iu tingim? Waswe, iu tingim Jacob, son bilong Isaac wea bihaen nem bilong hem change for kamap Israel? Or waswe, iu tingim nation bilong Israel wea olketa nao born kam from laen bilong Jacob? Bible story tu abaotem “Israel bilong God,” wea hem nao 144,000 anointed Christian wea bae kamap king and priest long heven. (Gal. 6:16; Rev. 7:4; 21:12) Matthew 19:28 story abaotem 12-fala tribe bilong Israel tu.

² Jesus sei: “God bae mekem evri samting niu moa long taem wea Son bilong man hem sidaon long nambawan throne bilong hem. Long taem hia nao, iufala wea followim mi bae sidaon tu long twelvfala throne and judgem twelvfala tribe bilong Israel.” Long verse hia, “twelvfala tribe bilong Israel” hem olketa wea bae laef olowe long Paradaes long earth. Datfala 144,000 bae waka olsem priest and judge for olketa.

3, 4. Wanem gudfala example nao olketa anointed Christian showimaot?

³ Olketa anointed Christian tinghae long privilege wea olketa garem for worshipim God. (Num. 18:20) Olketa anointed Christian no tingse bae olketa kasem land long earth bat olketa hapi for waka witim Jesus olsem king and priest long heven. Olketa bae gohed for worshipim Jehovah olsem Revelation 4:10, 11 showimaot.​—Ezek. 44:28.

⁴ Samting wea olketa anointed Christian duim taem olketa stap long earth showimaot olketa trustim Jehovah for lukaftarem olketa. Wei for worshipim Jehovah nao hem main samting long laef bilong olketa. Aposol Peter sei: “From God hem chusim iufala, traem best for gohed faithful long hem.” (2 Pet. 1:10) Olketa anointed Christian showimaot faith long sakrifaes bilong Jesus and gohed followim hem. Nomata olketa garem difren living and savve, olketa no ting long datwan olsem excuse for duim lelebet samting nomoa for God. Olketa duim best bilong olketa for worshipim hem. Olketa showimaot gudfala example for olketa wea garem hope for laef long earth.

5. Hao nao evri Christian savve showimaot olketa trustim Jehovah, bat why hem no isi?

⁵ Nomata sapos iumi garem hope for laef long heven or long earth, iumi mas ‘givim laef bilong iumi for God and karem post wea Christ karem, and gohed followim hem olowe.’ (Matt. 16:24) Staka million pipol wea garem hope for laef long Paradaes long earth gohed for worshipim God and duim sem samting wea Christ duim. Olketa traem best for worshipim God. Staka mekem laef bilong olketa simpol and regular pioneer. Olketa narawan pioneer for samfala month evri year. Nomata samfala no fit for pioneer, olketa waka hard long ministry. Olketa olsem Mary wea kapsaetem spesol oil long hed bilong Jesus. Jesus sei: “Gudfala samting nao [Mary] duim for mi. . . . Hem duim nomoa wanem hem fit for duim.” (Mark 14:6-8) From Satan rulim world, hem no isi for duim best bilong iumi. Nomata olsem, iumi need for waka hard and trustim Jehovah. Tingim fofala wei wea iumi savve duim datwan.

Kingdom Mas First Samting Long Laef

6. (a) Wanem nao staka pipol long world tingim? (b) Why nao hem gud for followim example bilong David?

⁶ Jesus teachim olketa wea followim hem for mekem Kingdom and samting wea God sei hem stret for mas first samting long laef. Plande taem pipol wea no worshipim Jehovah tingim olketa seleva. Bible kolem olketa hia “pipol long world wea laekem nomoa samting wea olketa savve kasem distaem.” (Readim Psalm 17:1, 13-15.) Staka no tingim Jehovah bat olketa laek for garem gudfala living, famili, and gohed busy nomoa for kasem selen and material samting for pikinini iusim bihaen olketa dae. Olketa laekem nomoa samting wea olketa savve kasem distaem. Bat David no olsem. Hem laek for garem “gudfala nem” witim Jehovah. Son bilong hem Solomon tu talem iumi for duim sem samting. (Eccl. 7:1) Olsem Asaph, David luksavve wei for fren witim Jehovah nao hem important samting long laef. Datwan nao mekem hem hapi. Staka Christian distaem showimaot wei for worshipim Jehovah hem important samting long laef winim waka for selen.

7. Wanem blessing nao wanfala brata kasem from hem mekem Kingdom first samting long laef?

⁷ Tingim Jean-Claude, wanfala elder wea stap long Central African Republic. Hem marit and garem thrifala pikinini. Hem no isi for faendem waka long datfala ples and staka pipol willing for duim eni samting for keepim waka bilong olketa. Wanday, manager talem Jean-Claude hem mas waka evri naet start long 6:30 p.m. Jean-Claude explainim long manager nomata hem mas waka for provaedem material samting for famili, hem mas helpem famili fren gud witim God and helpem olketa long kongregeson tu. Manager sei long hem: “Lucky nao iu garem waka. No tingim nara samting olsem waef, pikinini, and olketa problem bilong iu, bat tingim nomoa waka bilong iu. Iu mas disaedem wanem nao bae iu chusim. Bae iu chusim religion bilong iu or waka bilong iu?” Wanem nao bae iu duim sapos datwan kasem iu? Jean-Claude trustim Jehovah bae lukaftarem hem nomata sapos manager sakem hem. Hem luksavve hem garem staka samting for duim for Jehovah and Jehovah bae provaedem wanem famili bilong hem needim. So Jean-Claude disaed for go long meeting firstaem. Bihaen long meeting, hem redi for go waka nomata hem no savve sapos olketa bae sakem hem or nomoa. Bat bifor hem go, company ringim hem and olketa talem hem olketa sakem manager. Jean-Claude no lusim waka bilong hem.

8, 9. Hao nao iumi savve followim example bilong olketa priest and Levite bifor?

⁸ Maet samfala long iumi kasem sem samting tu. Sapos iu lusim waka, maet iu wari abaotem hao for provaedem need bilong famili. (1 Tim. 5:8) Nomata sapos datwan kasem iu or nomoa, iu savve God bae nating lusim olketa wea trustim hem and wea tinghae long privilege bilong olketa for worshipim hem. Taem Jesus talem olketa disaepol for mekem Kingdom first samting long laef, hem promisim God bae givim evri samting wea olketa needim, olsem kaikai, drink, and kaleko.—Matt. 6:33.

⁹ Tingim olketa Levite wea no kasem eni pis land. From olketa kasem waka for lead long tru worship, olketa mas trustim Jehovah for lukaftarem olketa and provaedem wanem olketa needim. (Num. 18:20) Nomata iumi no waka long temple olsem olketa priest and Levite bifor, iumi savve trustim Jehovah tu. From end hem klosap tumas, hem barava important for iumi trustim God for lukaftarem iumi.​—Rev. 13:17.

Samting wea God Sei Hem Stret Mas First Samting Long Laef

10, 11. Wanem nao samfala duim saed long waka wea showimaot olketa trustim Jehovah? Storyim wanfala example.

¹⁰ Jesus talem olketa disaepol ‘samting wea God sei hem stret mas first samting long laef.’ (Matt. 6:33) Diswan minim iumi followim standard bilong Jehovah long wanem hem stret and wanem hem no stret, and no followim wanem pipol tingse hem stret. (Readim Isaiah 55:8, 9.) Bifor samfala lanem truth, olketa plantim or salem tobacco, lanem narawan hao for faet or wakem and salem olketa samting for faet. Bat taem olketa lanem truth, staka chus for duim difren waka and olketa fit for baptaes.​—Isa. 2:4; 2 Cor. 7:1; Gal. 5:14.

¹¹ Tingim example bilong Andrew. Taem hem and waef lane abaotem Jehovah, tufala disaed for worshipim hem. Nomata Andrew laekem tumas waka wea hem duim, hem chusim difren waka. Why nao olsem? Bikos organization wea hem waka for hem sapotim war and hem laek for duim samting wea God sei hem stret. Andrew lusim datfala waka nomata hem garem tufala pikinini for lukaftarem and lelebet selen nomoa for tu-thri month. Maet long tingting bilong pipol, Andrew olsem olketa Levite bifor wea no kasem eni pis land. Nomata olsem, hem trustim Jehovah and lukaotem difren waka. Taem Andrew and famili ting go bak, olketa luksavve Jehovah helpem olketa. (Isa. 59:1) From Andrew and waef mekem laef bilong tufala simpol, tufala fit for pioneer. Hem sei nomata samfala taem olketa wari abaotem selen, ples for stap, health bilong olketa, and wei wea olketa start for olo, Jehovah evritaem helpem olketa. Olketa sei wei for worshipim Jehovah hem nambawan privilege wea man savve garem.a​—Eccl. 12:13.

12. For duim samting wea God sei hem stret, wanem nao iumi need for garem? Storyim example long ples bilong iu.

¹² Jesus talem olketa disaepol: “Nomata sapos faith bilong iufala hem smol olsem wanfala seed bilong mustard tree nomoa, iufala bae sei long disfala maunten, ‘Iu muv go long narasaed,’ and bae hem muv nao, and no eni samting bae hard for iufala.” (Matt. 17:20) Waswe, bae iu gohed for duim samting wea God sei hem stret nomata iu kasem hard taem? Sapos iu no sure iu fit for duim datwan, story witim narawan long kongregeson. Experience bilong olketa abaotem hao Jehovah helpem olketa bae strongim faith bilong iu.

Tinghae Long Wanem Jehovah Provaedem

13. Taem iumi traem best for worshipim Jehovah, iumi sure hem bae givim iumi wanem samting?

¹³ Sapos iu tinghae long privilege for worshipim Jehovah, bae hem givim wanem iu needim long physical wei and long spiritual wei olsem hem duim for olketa Levite. Tingim David. Nomata hem haed long cave, hem savve God bae helpem hem. Iumi tu savve trustim Jehovah nomata iumi tingse no eniwan bae helpem iumi. Taem Asaph go long “holy temple bilong God,” hem luksavve why nao hem feel nogud. (Ps. 73:17) Iumi tu need for trustim Jehovah bae givim wanem iumi needim for helpem iumi gohed fren witim hem. Datwan bae showimaot iumi tinghae long privilege wea iumi garem for worshipim Jehovah nomata wanem samting kasem iumi. Iumi bae trustim Jehovah for lukaftarem iumi.

14, 15. Wanem nao iumi shud duim sapos change kamap long hao iumi minim wanfala teaching, and why nao olsem?

¹⁴ Taem Jehovah helpem iu for minim “wisdom bilong [hem]” wea stap long Bible, waswe, iu trustim hem? (1 Cor. 2:10-13) Aposol Peter showimaot nambawan example long datwan. Jesus sei long olketa Jew: “Sapos iufala no kaikaim body bilong Son bilong man and drinkim blood bilong hem, bae iufala no kasem laef.” Plande disaepol tingse Jesus story abaotem really body and blood bilong hem and olketa sei: “Disfala toktok hem here nogud tumas, bae hu nao laek herem?” Olketa disaepol hia “go bak for duim olketa samting wea olketa duim bifor.” Bat Peter sei long Jesus: “Lord, no eniwan moa for mifala followim. Toktok bilong iu nomoa savve mekem man laef olowe.”​—John 6:53, 60, 66, 68.

¹⁵ Peter no barava minim wanem Jesus talem bat hem trustim Jehovah bae helpem pipol minim truth. Sapos hao iumi minim wanfala teaching long Bible hem change from hao iumi minim bifor, waswe, iu trae for savve why nao hem olsem? (Prov. 4:18) Olketa long Beroea long first century “willing for herem message bilong God and evriday olketa lukluk gud long olketa Holy Raeting.” (Acts 17:11) Sapos iu followim example bilong olketa, bae iu tinghae long privilege wea iu garem for worshipim God.

Maritim Man wea Worshipim God

16. Olsem 1 Corinthians 7:39 talem, wanem nao olketa singol Christian savve duim for showimaot olketa trustim God?

¹⁶ Nara samting wea showimaot olketa Christian trustim God hem long wei for obeyim wanem Bible talem for maritim “man wea worshipim God.” (1 Cor. 7:39) Staka disaed for stap singol bikos olketa laek obeyim God and God lukaftarem olketa. Wanem nao David duim taem hem feel lonely and tingse no eniwan bae helpem hem? Hem sei: “Mi talemaot evri wari and hevi bilong mi long [God] taem mi wikdaon.” (Ps. 142:1-3) Nomata Jeremiah singol, hem gohed faithful for worshipim God. Maet Jeremiah tu feel olsem David. Iu savve studyim example bilong Jeremiah long chapter 8 long buk God’s Word for Us Through Jeremiah.

17. Wanem nao wanfala singol sista duim taem hem feel lonely?

¹⁷ Wanfala sista long America sei hem no plan for stap singol. Hem laek for maritim man wea fitim hem. Mami bilong hem wea no Witness barava laekem gele bilong hem for maritim eniwan nomoa. Sista hia askem mami bilong hem hao nao bae hem feel sapos marit bilong hem brekdaon. Taem mami lukim gele bilong hem garem gudfala waka, savve lukaftarem hemseleva, and hapi, hem no forcem gele bilong hem for marit. Samfala taem sista hia feel lonely. Hem sei: “Mi trustim Jehovah for helpem mi and no enitaem hem lusim mi.” Wanem nao helpem hem for trustim Jehovah? Hem sei: “Prea helpem mi for luksavve mi no stap seleva bat God bae helpem mi. From Barava Haefala God long universe hem lisin long olketa prea bilong mi, datwan mekem mi for hapi and luksavve hem tingim mi!” Sista hia trustim wanem Bible talem taem hem sei: “Man wea givim samting hem barava hapi winim man wea kasem samting.” So hem trae for helpem narawan and no expectim olketa for duim sem samting. Hem sei: “Mi savve hapi taem mi tingim wanem for duim for helpem narawan.” (Acts 20:35) Tru tumas, sista hia trustim Jehovah for lukaftarem hem and hem hapi for worshipim Jehovah.

18. Long wanem wei nao Jehovah savve lukaftarem iu?

¹⁸ Nomata wanem samting nao kasem iu, iu savve worshipim God and trustim hem for lukaftarem iu. Sapos iu duim datwan, bae iu hapi for worshipim hem witim pipol bilong hem. (2 Cor. 6:16, 17) Jehovah bae lukaftarem iu olsem hem duim for olketa wea worshipim hem bifor. (Readim Deuteronomy 32:9, 10.) Jehovah ting long olketa Israelite olsem pipol bilong hem, and hem bae lukaftarem iu tu.​—Ps. 17:8.

[Footnote]

Wanem Nao Ansa Bilong Iu?

• Taem Kingdom and samting wea God sei hem stret hem first samting long laef, hao nao datwan showimaot iu trustim Jehovah?

• Wanem nao iu savve duim for showimaot iu tinghae long samting wea Jehovah provaedem?

• Taem iu obeyim wanem Bible talem for maritim man wea worshipim God, hao nao datwan showimaot iu trustim Jehovah?

[Blurb long page 13]

Jehovah bae lukaftarem iumi taem iumi duim samting for hem firstaem

[Piksa long page 15]

Example bilong Jeremiah encouragem iumi