Duim Gudfala Samting Evritaem
“Duim gudfala samting . . . evritaem.”—LUKE 6:35.
1, 2. Why nao hem no isi for duim gudfala samting long pipol?
HEM no isi for duim gudfala samting long pipol. Taem iumi duim gudfala samting long pipol, maet olketa no duim sem samting long iumi. Nomata iumi waka hard for talemaot “nambawan gud nius abaotem hapi God” and Son bilong Hem, maet olketa no laek herem iumi or no tinghae long datwan. (1 Tim. 1:11) Samfala pipol duim nogud samting and nating laek luksavve Christ hem dae for iumi mekem iumi kasem laef olowe. (Phil. 3:18) From iumi olketa Christian, bae iumi waswe long pipol olsem?
2 Jesus Christ talem olketa disaepol bilong hem: “Gohed lovem olketa enemy bilong iufala and duim gudfala samting long olketa evritaem.” (Luke 6:35) Distaem bae iumi storyim datfala toktok bilong Jesus. Bae iumi lanem gud samting tu from olketa nara toktok bilong Jesus for duim gudfala samting long pipol.
“Lovem Olketa Enemy Bilong Iufala”
3. (a) Wanem nao Jesus storyim long Matthew 5:43-45? (b) Long first century, olketa bigman bilong olketa Jew ting hao long olketa Jew and pipol wea no Jew?
3 Taem Jesus storyim Sermon long Maunten, hem talem olketa long there for lovem enemy bilong olketa and prea for pipol wea spoelem olketa. (Readim Matthew 5:43-45.) Olketa wea herehere kam long Jesus, hem olketa Jew wea savve long disfala law bilong God: “Iufala mas no change kaon or kros olowe long pipol bilong iufala, and iufala mas lovem nara man olsem iufala lovem iufala seleva.” (Lev. 19:18) Olketa bigman bilong olketa Jew long first century, olketa sei disfala toktok “pipol bilong iufala” and “nara man” hem minim olketa Jew nomoa. Nomata Law bilong Moses hem talem olketa Israelite for stap difren from nara pipol, staka Jew garem difren tingting long diswan. Olketa tingse pipol wea no Jew olketa nao enemy bilong olketa wea olketa mas heitim.
4. Olketa disaepol bilong Jesus mas waswe long enemy bilong olketa?
4 Bat Jesus sei olsem: “Gohed lovem olketa enemy bilong iufala and prea for olketa wea spoelem iufala.” (Matt. 5:44) Olketa disaepol bilong hem mas kaen long pipol wea heitim olketa. Luke hem talem disfala toktok bilong Jesus: “Mi talem long iufala wea herehere kam, Gohed lovem olketa enemy bilong iufala, duim gudfala samting long olketa wea heitim iufala, blessim olketa wea tok spoelem iufala, and prea for olketa wea tok nogud long iufala.” (Luke 6:27, 28) Olketa man bifor duim samting wea Jesus talem. Iumi tu “duim gudfala samting long olketa wea heitim” iumi taem iumi kaen long olketa. Iumi “blessim olketa wea tok spoelem” iumi taem iumi tok gud for olketa. And iumi “prea for olketa wea spoelem” iumi and “tok nogud” long iumi. Taem iumi prea for olketa enemy bilong iumi, datwan showimaot iumi lovem olketa bikos iumi laekem olketa for changem wei bilong olketa and for duim samting wea Jehovah hapi long hem.
5, 6. Why nao iumi mas lovem olketa enemy bilong iumi?
5 Why nao iumi mas lovem olketa enemy bilong iumi? Jesus talem olsem: “Diswan bae showimaot iufala nao olketa son bilong Dadi bilong iufala long heven.” (Matt. 5:45) Sapos iumi followim datfala toktok, iumi olsem “olketa son” bilong God nao from iumi followim wei bilong hem. Jehovah “mekem sun hem shaen long pipol wea gud and pipol wea nogud and hem mekem hem rain long pipol wea obeyim God and wea no obeyim God.” Olsem Luke talem, God hem “kaen long pipol wea no thankiu long hem and pipol wea garem rabis wei.”—Luke 6:35.
6 From Jesus laekem olketa disaepol for mas ‘gohed lovem olketa enemy bilong olketa,’ hem talem olsem: “Sapos iufala lovem nomoa olketa wea lovem iufala, wanem gud samting nao bae iufala kasem? Olketa man wea tekem tax duim sem samting, iaman? Sapos olketa wea iufala hello and story long olketa hem olketa brata bilong iufala nomoa, datwan hem no difren from wanem nara pipol duim. Nomata pipol wea no savve long God tu duim sem samting, iaman?” (Matt. 5:46, 47) Sapos iumi lovem nomoa pipol wea lovem iumi, bae God no givim eni “gud samting” long iumi. Long bifor pipol savve les tumas long olketa man wea tekem tax. Bat olketa man hia tu savve lovem pipol wea lovem olketa.—Luke 5:30; 7:34.
7. Sapos iumi hello and story nomoa long olketa “brata” bilong iumi, waswe, datwan hem difren from wanem nara pipol duim? Why nao olsem?
7 Hem wei bilong olketa Jew for talem disfala toktok “peace” taem olketa meetim pipol. (Judg. 19:20; John 20:19) Olketa tok olsem for showimaot olketa laekem man for no sik, for stap gud, and hapi. Sapos iumi story nomoa long olketa “brata” bilong iumi, “datwan hem no difren from wanem nara pipol duim.” Jesus hem sei “pipol wea no savve long God” tu bat duim sem samting.
8. Taem Jesus talem disfala toktok: “Iufala mas perfect,” wanem nao hem minim?
8 Hem hard for olketa disaepol bilong Christ for perfect from olketa born sin. (Rom. 5:12) Nomata olsem, Jesus talem olketa: “Iufala mas perfect olsem Dadi bilong iufala long heven tu hem perfect.” (Matt. 5:48) Taem hem tok olsem, hem laekem olketa wea herem hem for followim wei bilong Jehovah, “Dadi bilong [olketa] long heven.” Taem olketa lovem enemy bilong olketa, love bilong olketa hem perfect. Iumi tu mas olsem.
Why Nao Iumi Mas Forgivim Nara Man?
9. Olsem prea wea Jesus talem, wanem gudfala samting nao iumi savve duim long pipol?
9 Iumi duim gudfala samting long pipol taem iumi forgivim man wea duim nogud samting long iumi. Prea bilong Jesus tu hem storyim diswan. Hem sei: “Forgivim sin bilong mifala, from mifala tu forgivim olketa wea sin againstim mifala.”—Matt. 6:12.
10. Wanem nao wanfala samting wea iumi savve followim God long hem?
10 From God forgivim pipol wea sorre long rong samting wea olketa duim, iumi tu mas olsem. Aposol Paul talem diswan: “Iufala mas kaen and tingim feeling bilong pipol, and forgivim olketa olsem God tu hem forgivim iufala bikos long Christ.” (Eph. 4:32) David wea raetem psalm hem sei: “Jehovah hem sorre long iumi and hem kaen, hem no savve kros kwiktaem and hem lovem iumi evritaem. . . . Hem no panisim iumi fitim olketa sin bilong iumi; and hem no mekem iumi kasem samting wea iumi fit for kasem from olketa rong bilong iumi. . . . Hem putim olketa sin bilong iumi farawe from iumi, olsem ples wea sun kamap hem farawe from ples wea sun go daon. Jehovah hem sorre long olketa wea fraet long hem, olsem dadi hem sorre long olketa son bilong hem. Hem savve gud long iumi from hem nao wakem iumi, and hem no forgetim iumi dust nomoa.”—Ps. 103:8-14.
11. Hu nomoa God hem forgivim?
11 God bae forgivim pipol nomoa sapos olketa forgivim nara man wea duim nogud samting long olketa. (Mark 11:25) Jesus mekhae long diswan taem hem sei: “Sapos iufala forgivim nara pipol wea sin againstim iufala, Dadi bilong iufala long heven bae forgivim iufala tu. Bat sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.” (Matt. 6:14, 15) Tru tumas, God forgivim nomoa pipol wea forgivim nara man. Iumi duim gudfala samting long pipol taem iumi followim disfala toktok bilong Paul: “Jehovah forgivim iufala, so iufala tu mas olsem.”—Col. 3:13.
‘No Judgem’ Pipol
12. Wanem nao Jesus talem long Matthew 7:1-5?
12 Taem Jesus storyim Sermon long Maunten, hem storyim nara gudfala samting wea iumi savve duim long pipol. Hem talem olketa wea herehere kam for no judgem pipol and then hem talem wanfala tokpiksa long diswan. (Readim Matthew 7:1-5.) Distaem bae iumi storyim wanem nao Jesus minim taem hem sei: ‘No judgem’ pipol.
13. Olketa wea herehere kam long Jesus mas duim wanem?
13 Matthew raetem disfala toktok bilong Jesus: “Hem wei bilong iufala for judgem narawan. No duim olsem, mekem God no judgem iufala.” (Matt. 7:1) Luke tu talem disfala toktok bilong Jesus: “Hem wei bilong iufala for judgem pipol. No duim olsem, nogud God hem judgem iufala. Hem wei bilong iufala tu for panisim pipol. No duim olsem, nogud God hem panisim iufala. Iufala mas forgivim nara man mekem God hem forgivim iufala tu.” (Luke 6:37) From olketa Pharisee long first century followim kastom wea againstim tingting bilong God, olketa savve judgem pipol nogud. Olketa wea herehere kam long Jesus and wea garem wei for judgem pipol mas ‘no duim datwan nao.’ Bat olketa “mas forgivim” rong bilong pipol. Aposol Paul tu talem iumi for forgivim pipol, olsem iumi storyim finis.
14. Taem pipol lukim olketa disaepol forgivim nara man, diswan bae mekem olketa laek duim wanem?
14 Taem pipol lukim olketa disaepol bilong Jesus forgivim nara man, diswan bae mekem olketa laek forgivim pipol tu. Jesus sei olsem: “God bae judgem iufala followim hao iufala judgem narawan, and pipol bae deal witim iufala tu followim hao iufala deal witim olketa.” (Matt. 7:2) So wanem iumi duim long pipol, olketa bae duim long iumi tu.—Gal. 6:7.
15. Wanem nao Jesus talem for showimaot hem rong for judgem pipol?
15 Jesus talem hem rong for judgem pipol taem hem sei: “Why nao iu lukluk long smol grass insaed long eye bilong brata bilong iu, bat iu no tingim bigfala timba insaed long eye bilong iuseleva? Sapos bigfala timba nao stap insaed long eye bilong iuseleva, iu hard for sei long brata bilong iu, ‘Kam mi aotem smol grass insaed long eye bilong iu.’” (Matt. 7:3, 4) Man wea savve judgem pipol hem lukim nomoa smol samting wea brata bilong hem duim wea hem tingse hem no stret. Long tingting bilong hem, brata hia no savve luksavve long stret samting. Nomata smol samting wea brata hia duim hem olsem smol grass long eye bilong hem, man hia laek for “aotem” nao. Hem tingse hem holy tumas dastawe hem sei for aotem datfala smol grass mekem brata bilong hem luksavve long wanem hem stret.
16. Why nao olketa Pharisee garem “bigfala timba” long eye bilong olketa?
16 Olketa bigman bilong olketa Jew savve judgem pipol nogud. Wanfala story long Bible showimaot diswan. Taem Jesus healim wanfala man wea blind, man hia talem God nao sendem Jesus kam. So olketa Pharisee tok olsem long hem: “Start kam long taem iu born iu sin nao, so hao nao iu trae for teachim mifala olsem?” (John 9:30-34) Olketa Pharisee garem “bigfala timba” long eye bilong olketa, dastawe olketa judgem man nogud. So Jesus tok olsem long olketa: “Iu tingse iu holy tumas! Aotem firstaem bigfala timba from eye bilong iuseleva, mekem iu lukluk gud and savve hao for aotem smol grass from eye bilong brata bilong iu.” (Matt. 7:5; Luke 6:42) Sapos iumi laek duim gudfala samting long pipol, bae iumi no lukluk olowe for aotem tokpiksa smol grass from eye bilong brata bilong iumi. Bat bae iumi luksavve iumi sin, and iumi mas no judgem olketa brata and sista bilong iumi.
Iumi Mas Waswe Long Pipol?
17. Matthew 7:12 hem talem for iumi mas waswe long pipol?
17 Taem Jesus storyim Sermon long Maunten, hem talem God hem olsem wanfala dadi bikos Hem herem prea bilong olketa wea worshipim Hem. (Readim Matthew 7:7-12.) Tingim disfala toktok bilong Jesus: “Samting wea iufala laekem pipol for duim long iufala, sem samting nao iufala mas duim long olketa.” (Matt. 7:12) Sapos iumi duim gudfala samting long pipol, iumi followim wei bilong Jesus Christ.
18. “Law” talem for iumi mas waswe long pipol?
18 Bihaen Jesus talem iumi for stap gud witim pipol, hem sei: “Diswan nao mining bilong samting wea datfala Law and olketa profet talem.” Taem iumi duim gudfala samting long pipol olsem Jesus talem, iumi followim nao “datfala Law” wea stap long buk bilong Genesis go kasem Deuteronomy. Olketa buk hia showimaot Jehovah plan for garem wanfala seed wea bae finisim evri rabis samting. And tu, olketa storyim Law wea God givim long Moses for olketa Israelite long 1513 B.C.E. (Gen. 3:15) Law storyim staka samting for olketa Israelite duim. Samfala nao, olketa mas duim stret samting, no saedem eniwan, and mas duim gudfala samting long pipol wea kasem hard taem and long pipol bilong difren ples wea stap witim olketa.—Lev. 19:9, 10, 15, 34.
19. Wanem nao “olketa profet” talem for iumi duim?
19 Taem Jesus talem disfala toktok “olketa profet,” hem minim olketa buk long Hebrew Scripture wea storyim olketa profesi. Olketa buk hia storyim olketa profesi abaotem Messiah wea kamap tru taem Christ stap long earth. Olketa showimaot tu God helpem pipol bilong hem taem olketa duim samting wea hem hapi long hem and taem olketa stap gud witim pipol. Wanfala nao hem disfala profesi long buk bilong Isaiah for olketa Israelite: ‘Diswan nao samting wea Jehovah talem: “Iufala mas duim samting wea stret, and samting wea gud. Man wea duim diswan and wea no duim eni nogud samting, hem hapi.” ’ (Isa. 56:1, 2) God laekem pipol bilong hem for duim gudfala samting long pipol evritaem.
Duim Gudfala Samting Long Pipol Evritaem
20, 21. Bihaen Jesus storyim Sermon long Maunten, wanem nao tingting bilong pipol? Why nao hem gud for iu ting raonem datfala Sermon?
20 Iumi storyim tu-thri samting nomoa wea Jesus talem long Sermon long Maunten. Nomata olsem, iumi savve long tingting bilong pipol wea herehere kam long Jesus long datfala taem. Bible sei: “Bihaen Jesus hem storyim olketa samting hia, pipol wea lisin kam olketa barava sapraes nao long hao hem teach bikos hem iusim Word bilong God, bat olketa wea teachim law no duim datwan.”—Matt. 7:28, 29.
21 Jesus Christ nao “Nambawan man for givim kaonsel” wea Isaiah storyim bifor. (Isa. 9:6) Disfala Sermon long Maunten showimaot Jesus savve gud long tingting bilong Dadi bilong hem long heven. Jesus storyim tu wanem iumi mas duim for iumi hapi, stap klia long wei for durong, duim samting wea stret, wanem nao iumi mas duim for iumi laef olowe, and staka nara samting tu. Hem gud tumas sapos iu readim moa Matthew chapter 5 go kasem 7 and tingim diswan taem iu prea. Ting raonem olketa nambawan samting wea Jesus storyim long Sermon long Maunten. Duim samting wea Christ hem talem. Sapos olsem, bae Jehovah hapi go moa long iu, bae iu stap gud witim pipol, and bae iu duim gudfala samting long olketa evritaem.
Wanem Nao Ansa Bilong Iu?
• Iumi mas waswe long olketa enemy bilong iumi?
• Why nao iumi mas forgivim pipol?
• Wanem nao Jesus talem abaotem wei for judgem pipol?
• Matthew 7:12 talem for iumi mas waswe long pipol?
[Blurb long page 10]
Waswe, iu savve why nao Jesus sei: ‘No judgem’ pipol?
[Piksa long page 8]
Why nao iumi mas prea for pipol wea spoelem iumi?
[Piksa long page 10]
Waswe, samting wea iu laekem pipol for duim long iu, sem samting nao iu duim long olketa?