Mekem Young Laef Bilong Iu Win
Olketa askem pipol long wanfala kantri long Europe for chusim wanfala long thri samting hia: luk naes, riches, or young laef. Young laef nao staka chusim. Yes, pipol bilong evri age tingim olketa teenage year go kasem 25 year olsem spesol taem bilong laef. And evriwan laekem olketa young wan for win long wei for kamap full-grown pipol. Bat hao nao for olketa duim?
Waswe, Bible savve help? Ansa hem bigfala yes. Bae iumi lukim tufala spesol wei wea Word bilong God savve helpem young pipol, maet moa winim olketa bilong nara age grup.
Stap Gud Witim Nara Pipol
Jugend 2000 hem wanfala survey saed long tingting, wanem olketa tinghevi long hem, and fasin, bilong winim 5,000 young pipol long Germany. Disfala survey showimaot hao, taem young pipol laekem hapitaem—olsem wei for lisin long music, plei sports, or just hange raon nomoa—klosap evritaem olketa witim nara pipol. Luk olsem winim olketa nara age grup, young pipol nao laek stap witim olketa wea sem age olsem olketa. Diswan showaot wanfala secret for win taem man hem young hem for stap gud witim nara pipol.
Bat hem no evritaem isi for stap gud witim nara pipol. Yes, for fren gud witim pipol hem samting wea olketa young wan planti taem sei hem problem for olketa. Long diswan Bible savve barava help. Word bilong God garem olketa important kaonsel for helpem olketa young wan for fren gud witim pipol long balance wei. Wanem nao Bible talem?
Wanfala long olketa important principle bilong wei for fren gud witim pipol hem datfala Golden Rul: “Evritaem deal witim pipol long wei wea iu laekem olketa for deal witim iu.” For respectim, honorim, and kaen long pipol bae encouragem olketa for olsem long iu tu. Kaenfala fasin savve daonem nogud feeling and hevi midolwan long pipol. Sapos pipol savve long iu olsem man wea tingim feeling bilong narawan, bae olketa rememberim and acceptim iu. Waswe, iu feel hapi taem pipol acceptim iu?—Matthew 7:12, Revised English Bible.
Bible advaesem iu for “lovem neiba bilong iu olsem iuseleva.” Iu need for lovem iuseleva long wei for kea for iuseleva and for garem balance wei for respectim seleva, no ova tumas. Why nao diswan help? Well, sapos iu no respectim iuseleva, bae iu ting or tok daonem pipol, diswan savve mekem hem hard for stap gud witim olketa. Bat for garem balance tingting abaotem iuseleva hem faondeson wea iu savve buildim strongfala wei for fren antap long hem.—Matthew 22:39.
Wans wei for fren kamap, tufala evriwan wea fren need for strongim. Wei for waka hard for mekem wei for fren gud kamap shud mekem iu feel hapi, bikos “moa hapi kamaot from wei for give winim wei for kasem.” Wanfala wei for givim samting hem nao for forgive, wea minim tu for forgetim olketa smol rong and no for expectim pipol for perfect. Bible talem iumi: “Letem evri man lukim balance fasin bilong iufala.” Tru nao, “sapos iufala fit for duim, keepim peace witim evri man.” Waswe sapos wanfala fren talem iu wanfala wik point bilong iu? Wanem nao iu duim? Tingim disfala gudfala advaes from Bible: “No kwiktaem for letem spirit bilong iu for feel kros, bikos ‘olketa kill from wanfala fren hem faithful.’ Waswe, hem tru hao olketa fren affectim tingting, toktok, and wei bilong iu? Dastawe nao Bible givim warning: “Wei for kaban witim nogud pipol hem spoelem gudfala fasin.” Long narasaed, “man wea wakabaot witim wise pipol bae kamap wise.”—Acts 20:35; Philippians 4:5; Romans 12:17, 18; Ecclesiastes 7:9; Proverbs 13:20; 27:6, REB; 1 Corinthians 15:33.
Marco tok for staka young man and woman taem hem sei: “Olketa Bible principle nao bigfala help long wei for stap gud tugeta witim nara pipol. Samfala wea mi savve long olketa laekem gud samting for olketa seleva nomoa and wanem olketa savve kasem from laef. Bible teachim iumi for ting, no tumas long iumiseleva, bat long nara pipol. Long tingting bilong mi, datwan nao best wei for stap gud tugeta witim pipol.”
Samting young pipol olsem Marco lanem from Bible helpem olketa no just taem olketa young bat long future tu. And saed long future, iumi faendem nara wei wea spesol wea Bible savve helpem olketa young wan.
Wari Abaotem Future
Staka young pipol garem mind wea laek savve. Maet winim eni nara age grup, olketa laek savve wanem nao go ahed for happen and reason wea kosim diswan. And Bible, winim eni nara buk, hem explainim reason for olketa samting wea happen long world and talem iumi wanem for expectim long future. Diswan nao wanem young pipol laek savve. Why nao iumi savve sure long diswan?
Nomata staka ting long young pipol olsem olketa wea interest long hapi for distaem nomoa, samfala survey showimaot difren samting. Olketa showimaot young pipol planti taem ting raonem olketa samting wea happen raonem olketa, and from diswan kasem idea bilong olketa seleva abaotem laef long future. Pruv bilong diswan hem wei wea 3-fala long evri 4-fala young wan olketa tingim future “staka taem” or “evritaem.” Nomata planti taem young pipol tingim hapi samting, staka long olketa wari abaotem future.
Why nao olketa wari? Staka young pipol distaem insaed trabol finis saed long wei for brekem law, raf fasin, and nogud drug. Young pipol wari abaotem wei for kasem waka long world wea pipol trae winim narawan evritaem. Olketa kasem hevi for kasem gud mark long skul or for kasem hae position long waka. Wanfala wea 17 year tok sorre olsem: “Iumi stap long world wea pipol no kea long eniwan bat olketa seleva nomoa. Evriwan followim mind bilong hemseleva nomoa. Man mas evritaem pruvim samting hem savve duim, and datwan mekem mi wiki.” Nara young man wea 22 year sei: “Olketa wea kasem hae position kasem gud samting and savve garem gud living. Olketa wea bad-luck, wea from samfala reason kanduit kasem, olketa just stap bihaen.” Why nao pipol laek winim narawan tumas? Waswe, laef bae olsem olowe?
Trufala Mining
Taem young pipol wari or fraetem living, olketa agree witim Bible. Word bilong God showaot hao “world wea no kea” hem saen bilong taem. Aposol Paul raet abaotem taem bilong iumi long leta for young man Timothy: “Nogud taem wea hard for deal witim bae stap.” Why nao hem nogud and hard for deal witim? Bikos, olsem Paul raetem bihaen, pipol bae “lovem seleva, lovem selen, mekhae long seleva, bighed, . . . no savve sei thankiu, no loyal, . . . raf tumas.” Waswe, hem tru hao diswan barava fitim fasin bilong staka pipol distaem?—2 Timothy 3:1-3.
Bible talem hao olketa hardfala taem hia bae kamap “insaed olketa last day,” bifor olketa big change bae kasem olketa man. Olketa change hia bae affectim evriwan, young pipol and olo pipol. Olketa wanem kaen change? Klosap nao wanfala gavman long heven bae tekovarem wei for rulim olketa man, and olketa wea stap anda long hem bae hapi from “bigfala peace” evriwea. “Olketa raeteous wan seleva bae kasem earth, and olketa bae stap olowe long hem.” Olketa feeling for wari bae samting bilong bifor.—Psalm 37:11, 29.
Bible nomoa givim savve abaotem future wea man fit for trustim. Taem wanfala young wan savve wanem for expectim insaed nextfala tu-thri year, hem savve redy for olketa samting wea bae happen and feel sef and olsem hem garem kontrol long laef bilong hem. Disfala feeling bae katem daon hevi and wari. Long disfala spesol wei, Bible hem satisfaem need bilong young pipol—for minim living and savve wanem bae happen long future.
Young Laef wea Win
Wanem nao showaot young laef hem win? Bigfala education, material samting, and staka fren? Staka ting olsem. Insaed olketa teenage year go kasem taem man 25 year hem olketa year wea provaedem gudfala start for laef bilong man bihaen. For tok stret, young laef wea hem win maet showimaot hao nao bae laef bilong man bihaen.
Olsem iumi lukim finis, Bible savve helpem young wan mekem young laef bilong hem win. Staka young pipol faendem diswan hem tru long living bilong olketa. Olketa readim Word bilong God evriday and followim wanem olketa lanem. (Lukim “Idea From Wanfala Young Servant Bilong Jehovah,” page 6.) Tru nao, Bible hem barava buk for young pipol distaem bikos hem savve helpem olketa for “fit evribit, barava redy for duim evri gudfala waka.”—2 Timothy 3:16, 17.
[Blurb long page 5]
Wanfala secret bilong wei for win taem man young hem for stap gud witim pipol
[Blurb long page 6]
Maet winim eni nara age grup, young pipol laek savve wanem nao go ahed for happen and reason wea kosim diswan
[Box long page 6, 7]
Idea From Wanfala Young Servant Bilong Jehovah
Alexander hem 19 year. Hem growap insaed wanfala famili bilong olketa Jehovah’s Witness, and hem hapi tumas for followim faith bilong hem witim full heart. Bat bifor hem no olsem . Alexander hem minim:
“Maet iu sapraes hao mi bin kaban witim Olketa Jehovah’s Witness olsem young wan wea no baptaes for winim sevenfala year. Long taem hia, worship bilong mi hem hafhaf, hem samting mi duim nomoa. Ating mi fraet for lukluk long miseleva long honest wei.”
Then tingting bilong Alexander hem change. Hem go ahed for sei:
“Parents and olketa fren bilong mi insaed kongregeson go ahed for encouragem mi for readim Bible evriday, for savve gud long Jehovah. Gogo, mi disaed for traem. So mi katdaon long taem wea mi iusim for lukluk television and mi duim Bible reading long early morning. Gogo, mi start for minim wanem nao really insaed Bible. Mi luksavve hao hem savve helpem mi. And—moa important winim eni nara samting—mi luksavve hao Jehovah laekem mi for savve long hem. Wans mi followim diswan, wei wea miseleva fren witim hem start for grow, and mi kamap moa klos witim olketa insaed kongregeson. Bible hem barava changem laef bilong mi! Mi encouragem evri young servant bilong Jehovah for readim Bible evriday.”
Staka million young pipol evriwea long world kaban witim Olketa Jehovah’s Witness. Waswe, iu wanfala long olketa? Waswe, iu laek for kasem gud samting from wei for readim Bible evritaem? Hao sapos iu followim example bilong Alexander? Katdaon long olketa samting wea no important tumas and mekem Bible reading kamap part bilong evriday schedule bilong iu. Iu bae kasem gud samting from diswan.