Iu No Savve Which Wan Long Olketa Nao Bae Grow!

“Iu mas plantim olketa seed start long morning go kasem evening, bikos iu no savve which wan long olketa nao bae grow.”​—ECCL. 11:6.

1. Hao nao wei wea olketa plant grow hem barava spesol and hem mekem iumi hambol tu?

WANFALA farmer mas weit. (Jas. 5:7) Bihaen hem plantim olketa seed, hem mas weit for olketa seed hia for grow. Taem weather hem gud, olketa seed hia isisi for grow kamaot from graon and garem olketa leaf. Then olketa grow big and garem frut. Gogo, garden bilong farmer hem redi for hem harvestim nao. Wei wea olketa seed hia grow hem barava spesol tumas! Taem iumi luksavve Hu nao mekem olketa seed hia for grow, datwan mekem iumi hambol tu. Iumi savve lukaftarem olketa plant and watarem, bat God nomoa savve mekem olketa grow.​—Markem witim 1 Corinthians 3:6.

2. Long study bifor diswan, wanem nao Jesus talem abaotem hao gogo man hem kamap disaepol?

² Olsem iumi storyim long study bifor diswan, Jesus talem hao preaching waka hem semsem witim farmer wea plantim olketa seed. Long tokpiksa hia abaotem olketa difren kaen graon, Jesus talem hao nomata farmer hem plantim olketa gudfala seed, wei wea datfala seed bae grow gud or nomoa hem depend long heart bilong man. (Mark 4:​3-9) Long datfala tokpiksa abaotem farmer wea sleep, Jesus showimaot disfala man no minim gud hao gogo man hem kamap wanfala disaepol. Diswan hem bikos God nao mekem man kamap disaepol, and no from hard waka bilong iumiseleva. (Mark 4:​26-​29) Bae iumi storyim nara thrifala tokpiksa moa wea Jesus talem. First wan hem abaotem seed bilong mustard tree, mek-tu hem abaotem yeast, and mek-thri hem abaotem wanfala net.a

Tokpiksa Abaotem Seed Bilong Mustard Tree

3, 4. Tokpiksa wea stap long Mark 4:​30-​32 showimaot wanem samting abaotem Kingdom message?

³ Datfala tokpiksa abaotem seed bilong mustard tree wea stap long Mark chapter 4, hem showimaot tufala samting. Firstfala samting, staka pipol nao laek herem message abaotem Kingdom. Mek-tu samting, olketa wea obeyim datfala message olketa stap sef. Jesus hem sei: “Kingdom bilong God hem olsem wanem? Wanem tokpiksa nao hem fitim for minim diswan? Hem olsem wanfala seed bilong mustard tree wea man plantim long graon and wea hem smol winim evri nara seed. Bat bihaen hem plantim datwan, seed hia grow big winim evri nara samting long garden. Hem garem olketa barava bigfala branch wea olketa bird savve kam and stap long shade bilong hem.”​—Mark 4:​30-​32.

⁴ Long scripture hia Jesus storyim hao “kingdom bilong God” hem grow. Diswan showaot long wei wea staka pipol herem message abaotem Kingdom, and wei wea Christian kongregeson grow start long Pentecost 33 C.E. kam kasem distaem. From seed bilong mustard tree hem smol tumas, hem savve piksarem samting wea barava smol. (Markem witim Luke 17:6.) Bat gogo disfala seed savve grow big olsem wanfala tree wea tol bilong hem 3 go kasem 5 meter and wea garem olketa strongfala branch.​—Matt. 13:31, 32.

5. Storyim wei wea Christian kongregeson long first century kamap big.

⁵ Taem Christian kongregeson hem start long 33 C.E., hem smol nomoa. Long datfala taem, God anointim 120 disaepol long holy spirit. Bat no longtaem bihaen, disfala smol kongregeson hem kamap big from staka thousand pipol nao kamap disaepol. (Readim Acts 2:​41; 4:4; 5:​28; 6:7; 12:24; 19:20.) Insaed thirti year nomoa, namba bilong olketa wea kamap disaepol hem barava big tumas, dastawe aposol Paul hem sei long kongregeson long Colossae hao “evri pipol long world” olketa herem finis datfala gud nius. (Col. 1:⁠23) Kongregeson hem barava big kwiktaem tumas!

6, 7. (a) Bihaen 1914, wanem samting nao kamap big? (b) Wanem nao bae gohed for grow yet?

⁶ Bihaen Kingdom bilong God start for rul long heven long 1914, olketa branch bilong datfala mustard tree barava grow big tumas winim wanem man hem tingim. Pipol bilong God lukim finis disfala samting wea Isaiah talem hem kamap tru: “Smol wan bae kamap wan thousand, and datwan wea no big tumas bae kamap wanfala maeti nation.” (Isa. 60:22) Olketa anointed Christian wea duim preaching waka long datfala taem, olketa nating savve bae samting olsem seven million Witness nao bae duim disfala waka long winim 230 kantri distaem. Namba bilong olketa Witness barava kamap big, olsem datfala seed bilong mustard tree wea grow big tumas!

⁷ Bat waswe, namba bilong olketa bae hem gohed for grow yet? Ia. Gogo Kingdom bilong God bae rulim evriwan wea stap long earth. Olketa wea againstim datfala Kingdom bae finis. Jehovah, wea Nambawan Lord nao bae duim diswan, no olketa man. (Readim Daniel 2:​34, 35.) Long datfala taem, bae iumi lukim nara samting wea Isaiah talem hem kamap tru. Hem sei: “Savve wea evriwan long earth garem abaotem Jehovah bae olsem sea wea fulap long wata.”​—Isa. 11:⁠9.

8. (a) Olketa hu nao olketa bird long datfala tokpiksa? (b) Iumi stap sef from wanem samting distaem?

⁸ Jesus talem bae olketa bird savve kam and stap long shade bilong disfala Kingdom. Olketa bird hia no olsem olketa bird long nara tokpiksa wea olketa laek kaikaim olketa gudfala seed wea man torowem long olketa difren kaen graon. (Mark 4:⁠4) Bat long disfala tokpiksa, olketa bird hia hem pipol wea kam long Christian kongregeson mekem olketa savve stap sef insaed. Taem olketa stap long kongregeson, olketa nogud tingting and wei bilong disfala rabis world no savve spoelem wei wea olketa fren gud witim God. (Markem witim Isaiah 32:​1, 2.) Jehovah sei datfala Kingdom bilong Messiah hem semsem olsem wanfala tree. Hem sei: “Mi bae plantim datwan antap long wanfala big maunten long Israel. Bae hem garem olketa branch and staka frut and bae hem kamap wanfala nambawan cedar tree. And evri difren kaen bird bae flae kam and stap long shade bilong hem.”​—Ezek. 17:23.

Tokpiksa Abaotem Yeast

9, 10. (a) Taem Jesus talem datfala tokpiksa abaotem yeast, wanem nao hem laek showimaot? (b) Long Bible, plande taem yeast hem piksarem wanem? Wanem kwestin abaotem yeast nao bae iumi storyim?

⁹ Long nara tokpiksa, Jesus showimaot iumi olketa man no savve lukim wei wea wanfala samting hem grow. Hem sei: “Kingdom bilong God hem olsem yeast wea wanfala woman mixim witim wanfala ten kilo bag flour, gogo datfala yeast mekem evri flour hia hem rise.” (Matt. 13:33) Wanem nao disfala yeast piksarem, and why nao Jesus markem yeast witim wei wea datfala Kingdom hem grow?

¹⁰ Long Bible, plande taem yeast hem piksarem sin. Aposol Paul hem storyim yeast long datfala wei taem hem storyim wanfala sinner wea hem spoelem datfala kongregeson long Corinth. (1 Cor. 5:​6-8) Waswe, taem Jesus storyim yeast hem minim wanfala nogud samting nao bae grow?

11. Olketa Israelite bifor iusim yeast long wanem taem?

¹¹ Bifor iumi ansarem datfala kwestin, iumi mas savve long thrifala samting firstaem. First samting, nomata Jehovah stopem olketa Israelite for iusim yeast long taem bilong Pasova, long olketa narafala taem hem letem olketa for iusim. Man iusim yeast taem hem givim olketa sakrifaes long Jehovah for thankiu long hem for staka gudfala samting wea hem duim for hem. Olketa wea kaikaim disfala sakrifaes, olketa hapi.​—Lev. 7:​11-​15.

12. Wanem nao iumi lanem taem Bible storyim wanfala samting for piksarem nara samting?

¹² Mek-tu samting, nomata wanfala samting long Bible savve piksarem nogud samting, datfala sem samting savve piksarem gud samting tu. Tingim diswan, long 1 Peter 5:8 hem storyim Satan olsem wanfala lion from hem barava raf tumas and savve killim man dae. Bat long Revelation 5:5, Bible storyim Jesus tu olsem “Lion wea kam from tribe bilong Judah.” Long hia, lion hem piksarem wei wea Jesus no fraet for duim stret samting.

13. Datfala tokpiksa abaotem yeast hem showim wanem samting abaotem wei wea man hem kamap disaepol?

¹³ Mek-thri samting, long datfala tokpiksa wea Jesus talem, hem no sei datfala yeast hem spoelem full flour. Hem storyim nomoa hao for wakem bred. Taem datfala woman addim go yeast, flour hem rise nao. From hem mixim yeast long evri flour, hem no savve lukim datfala yeast. So woman hia no savve lukim wei wea datfala yeast hem mekem flour hia for rise. Diswan mekem iumi tingim datfala tokpiksa abaotem man wea plantim olketa seed and then hem sleep long naet. Jesus talem hao ‘olketa seed start for grow and kamap big. Bat datfala man no savve hao olketa seed hia hem grow.’ (Mark 4:​27) Jesus iusim olketa gudfala tokpiksa for showim hao gogo wanfala man hem kamap disaepol! Long firstaem, maet iumi no lukim wei wea man hem change, bat gogo bae iumi lukim klia hem wanfala disaepol.

14. Wei wea yeast hem mekem full flour for rise, hem piksarem wanem samting saed long preaching waka?

¹⁴ Olketa man no savve lukim disfala wei wea man kamap disaepol. And olketa no lukim tu wei wea diswan happen long full world. Diswan nao nara samting wea Jesus showimaot long datfala tokpiksa abaotem yeast. Datfala yeast mekem “datfala ten kilo bag flour” for rise. (Luke 13:21) Olsem datfala yeast wea mekem full flour for rise, waka for preach abaotem Kingdom hem mekem staka pipol moa for kamap disaepol. Gogo disfala waka for preach hem kasem “evri farawe ples long earth.” (Acts 1:8; Matt. 24:14) Hem barava spesol samting for iumi duim disfala Kingdom waka wea kamap big tumas distaem!

Wanfala Net

15, 16. (a) Storyim main point bilong datfala tokpiksa abaotem net. (b) Wanem nao datfala net hem piksarem? Disfala tokpiksa hem showimaot wanem samting abaotem olketa disaepol?

¹⁵ Nomata staka nao sei olketa disaepol bilong Jesus Christ, datwan hem no important. Samting wea important nao hem wei wea olketa disaepol hia kamap olketa trufala disaepol. Jesus showimaot diswan long datfala tokpiksa abaotem wanfala net. Hem sei: “Kingdom bilong God hem olsem wanfala net wea olketa putim long sea wea olketa didifren kaen fish pas insaed long hem.”​—Matt.13:47.

¹⁶ Datfala net hem piksarem waka for preach abaotem Kingdom wea enikaen difren fish nao kam pas insaed long hem. Jesus sei moa: “Gogo net hia hem full so olketa pullim kam datfala net long sandbis. Then olketa sidaon and aotem olketa gud fish from net and putim long olketa basket bat olketa rabis fish olketa torowem nomoa. Bae hem olsem nao long taem wea world hem gogo for finis. Olketa angel bae go and separatem nogud pipol from pipol wea obeyim God and olketa bae torowem olketa long bigfala fire. Long there nao bae olketa feel sorre tumas and krae.”​—Matt. 13:​48-​50.

17. Waka for separatem pipol wea tokpiksa abaotem datfala net showimaot, hem gohed long wanem taem?

¹⁷ Waswe, disfala wei for separatem pipol hem nao datfala last judgment for separatem olketa sheepsheep from olketa goat wea Jesus sei bae hem duim? (Matt. 25:​31-​33) Nomoa. Jesus bae duim datwan long taem bilong datfala big trabol. Bat wei for separatem pipol wea disfala tokpiksa abaotem net hem showimaot, hem kamap long “taem wea world hem gogo for finis.”b Distaem nao iumi stap long taem wea iumi gogo for kasem datfala big trabol. So hao nao disfala waka for separatem pipol hem gohed distaem?

18, 19. (a) Long wanem wei nao waka for separatem pipol hem gohed distaem? (b) Wanem nao olketa wea laekem truth mas duim? (Lukim tu footnote long page 21.)

¹⁸ Staka fish wea insaed long datfala tokpiksa net hem staka million pipol long world wea laek for kam insaed kongregeson bilong Jehovah long taem bilong iumi. Samfala kam long Memorial, samfala moa kam long olketa meeting, and olketa narawan laek for studyim Bible. Bat waswe, olketa hia kamap olketa trufala Christian? Jesus sei nomata olketa “pullim kam datfala net long sandbis” olketa “gud fish” nomoa olketa putim insaed long olketa basket, wea piksarem olketa Christian kongregeson. Bat olketa rabis fish bae olketa torowem. Gogo bae olketa torowem olketa fish hia insaed bigfala fire wea piksarem wei for finis olowe.

¹⁹ Pipol wea olsem olketa rabis fish hem olketa wea studyim Bible witim pipol bilong Jehovah bat gogo olketa stop for study. Samfala wea dadi and mami bilong olketa Witness olketa no laek for followim Jesus. Olketa no laek for dedicate long Jehovah or maet bihaen olketa worshipim hem for lelebet taem olketa stop for duim datwan nao.c (Ezek. 33:32, 33) Bat hem barava important for evriwan wea laekem truth for kam insaed long olketa kongregeson bifor datfala last judgment hem kam, and for olketa stap sef olowe insaed.

20, 21. (a) Iumi lanem olketa wanem samting long olketa tokpiksa wea Jesus storyim? (b) Wanem nao iu barava laek for duim?

²⁰ So iumi lanem olketa wanem samting long olketa tokpiksa wea Jesus storyim? First samting, olsem datfala mustard seed hem grow gogo hem kamap big, pipol wea laek for herem message abaotem Kingdom olketa kamap staka tumas. No eni samting savve stopem disfala waka bilong Jehovah! (Isa. 54:17) Nara samting tu, pipol wea go for “stap long shade” bilong datfala tree olketa stap sef long spiritual wei. Mek-tu samting, God nao hem mekem samting for grow. Olsem yeast insaed flour hem mekem full flour for rise, disfala waka hem gohed for grow big nomata iumi no savve minim or lukim datwan! Mek-thri samting, no evriwan wea herem message olketa kamap disaepol. Samfala olsem olketa rabis fish insaed datfala tokpiksa wea Jesus storyim.

²¹ Nomata olsem, iumi hapi tumas for lukim staka pipol nao Jehovah pullim olketa kam! (John 6:​44) From diswan, namba bilong olketa disaepol hem kamap big long staka kantri. Iumi mas praisem Jehovah God for diswan. From iumi lukim diswan hem happen, iumi laek for obeyim disfala toktok wea Solomon raetem staka handred year go finis: “Iu mas plantim olketa seed start long morning . . . , bikos iu no savve which wan long olketa nao bae grow. Maet evri seed grow gud, or maet samfala nomoa grow bat olketa narawan no grow.”​—Eccl. 11:⁠6.

[Olketa Footnote]

Wanem Nao Ansa Bilong Iu?

• Long tokpiksa abaotem mustard seed, wanem nao iumi lanem abaotem wei wea Kingdom hem grow, and for stap sef long spiritual wei?

• Long tokpiksa wea Jesus talem, yeast hem piksarem wanem? Wanem samting nao diswan showimaot abaotem wei wea Kingdom hem grow?

• Tokpiksa abaotem net hem showimaot wanem samting abaotem wei wea Kingdom hem grow?

• Wanem nao iumi savve duim mekem iumi nao olketa gudfala fish wea olketa “putim long olketa basket”?

[Olketa Piksa long page 18]

Long tokpiksa abaotem mustard seed, wanem nao iumi lanem abaotem wei wea Kingdom hem grow?

[Piksa long page 19]

Wanem nao iumi lanem long tokpiksa abaotem yeast?

[Piksa long page 21]

Wei for separatem olketa gudfala fish from olketa rabis fish hem piksarem wanem?