Waswe, Iu “Minim Gud”?

1, 2. Wanem nao Jesus duim for encouragem olketa disaepol long day wea hem laef bak?

LONG day wea Jesus hem laef bak, tufala disaepol bilong hem wakabaot go long wanfala vilij wea stap samting olsem 11 kilometer from Jerusalem. Tufala still sorre yet bikos Jesus hem dae and tufala no savve hem laef bak finis. Seknomoa Jesus kam and wakabaot witim tufala. Then Jesus “start for minim long [tufala] evri samting wea Moses and evri profet raetem abaotem hem insaed long olketa Holy Raeting.” (Luke 24:13-15, 27) Datwan barava comfortim tufala and tufala hapi tumas bikos Jesus hem explainim gud olketa Holy Raeting long tufala.—Luke 24:32.

² Long evening bilong datfala sem day, tufala disaepol hia wakabaot go bak long Jerusalem. Taem tufala kasem olketa aposol, tufala storyim samting wea happen. Taem olketa gohed story, Jesus kam long olketa. Olketa aposol barava fraet and no sure sapos hem Jesus or nomoa. Wanem nao Jesus duim for encouragem olketa? Bible sei: “Hem helpem olketa for minim gud olketa Holy Raeting.”—Luke 24:45.

3. Wanem nao samfala samting wea maet mekem iumi wikdaon, and wanem nao bae helpem iumi for gohed hapi?

³ Samfala taem maet iumi tu wikdaon or feel sorre olsem olketa disaepol hia. Nomata iumi busy for duim waka bilong Jehovah, maet iumi wikdaon from pipol no interest taem iumi preach long olketa. (1 Cor. 15:58) Or maet hem luk olsem olketa Bible study bilong iumi no gohed gud. And tu, maet samfala wea iumi study witim olketa no gohed for study. Wanem nao savve helpem iumi for gohed hapi long ministry? Wanfala samting wea savve helpem iumi hem for barava minim gud olketa tokpiksa bilong Jesus. Distaem bae iumi storyim thrifala tokpiksa bilong Jesus, and wanem iumi savve lanem from olketa tokpiksa hia.

FARMER WEA SLEEP

4. Wanem nao tokpiksa bilong Jesus abaotem farmer wea sleep hem minim?

⁴ Readim Mark 4:26-29. Wanem nao tokpiksa bilong Jesus abaotem farmer wea sleep hem minim? Datfala farmer hem piksarem olketa wea preachim gud nius abaotem Kingdom, and olketa seed piksarem datfala message wea olketa hia talemaot long pipol wea garem gudfala heart. Taem Jesus sei “evri naet [farmer] hem sleep and wekap long morning,” datwan showimaot hem gohed duim olketa samting wea hem duim long laef evriday. Hem tek taem for olketa seed hia for grow. From taem wea datfala farmer hem plantim go kasem taem bilong harvest, “olketa seed start for grow and kamap big.” Olketa seed hia isisi grow seleva gogo olketa big and garem frut nao. Sem samting tu hem happen long man wea lanem truth. Hem tek taem for hem fren witim Jehovah. Taem samwan hem disaed for worshipim God and hem dedicate and baptaes, datwan hem olsem seed hem grow gogo hem “garem frut” nao.

5. Why nao Jesus storyim tokpiksa abaotem farmer wea sleep?

⁵ Why nao Jesus storyim disfala tokpiksa? Jesus laekem iumi for luksavve Jehovah nao mekem truth hem grow insaed heart bilong pipol wea laek lanem truth. (Acts 13:48; 1 Cor. 3:7) Iumi plantim and watarem seed, bat iumi no savve mekem datfala seed for grow. Olsem datfala farmer no savve hao nao olketa seed wea hem plantim hem grow, iumi tu no savve hao truth hem grow insaed heart bilong man. Taem iumi gohed duim olketa samting wea iumi duim long laef evriday, maet iumi no luksavve truth hem gohed grow long heart bilong samwan. And gogo maet hem kamap wanfala disaepol and hem helpem iumi long preaching waka.—John 4:36-38.

6. Taem iumi studyim Bible witim samwan, wanem nao iumi mas luksavve long hem?

⁶ Wanem nao iumi savve lanem from disfala tokpiksa? First samting, iumi mas luksavve iumi no savve mekem truth grow insaed heart bilong Bible study bilong iumi, bat Jehovah nao mekem datwan for grow. Nomata iumi duim staka samting for helpem and sapotim hem, bae iumi no trae forcem hem for baptaes. Bat iumi mas hambol and luksavve hemseleva nao mas disaed for dedicate long Jehovah. Jehovah bae hapi long dedication bilong man only sapos hem duim diswan from hem barava lovem God.—Ps. 51:12; 54:6; 110:3.

7, 8. (a) Wanem nao samfala nara samting wea iumi lanem from tokpiksa abaotem farmer wea sleep? Storyim example. (b) Wanem nao iumi lanem abaotem Jehovah and Jesus from disfala tokpiksa?

⁷ Mek-tu samting, disfala tokpiksa helpem iumi for no wikdaon sapos hem luk olsem Bible study bilong iumi no gohed gud. Iumi mas patient. (Jas. 5:7, 8) Sapos truth no grow insaed heart bilong Bible study bilong iumi nomata iumi duim best bilong iumi for helpem hem, datwan no minim hao iumi teach hem nogud. Truth savve grow nomoa insaed long heart bilong man wea hambol and willing for change. (Matt. 13:23) So wei wea iumi duim gud ministry or nomoa hem no showaot long haomas man nao iumi helpem for baptaes. Jehovah no lukluk long haomas man nao iumi helpem for baptaes, bat samting wea Jehovah tinghae long hem nao hem wei wea iumi traem best long ministry.—Readim Luke 10:17-20; 1 Corinth 3:8.

⁸ Mek-thri samting, maet iumi no luksavve long wei wea man hem start for change. Olsem example, wanfala hasband and waef wea study witim wanfala missionary talem hem tufala laek for kamap anbaptaes pablisa. Hem sei for tufala kamap anbaptaes pablisa tufala mas stop smoke. Brata hia sapraes taem tufala talem hem tufala stop smoke for tu-thri month finis. Wanem nao mekem tufala disaed for stop smoke? Tufala luksavve nomata tufala smoke haed Jehovah savve lukim tufala, and God heitim wei for laea. So long tingting bilong tufala, tufala mas mekem disison: for stop smoke, or for gohed smoke nomata missionary hia lukim tufala. Nomata datfala missionary no luksavve long bigfala change wea tufala mekem, love wea tufala garem for Jehovah hem helpem tufala for disaedem stret samting.

DATFALA NET

9. Wanem nao tokpiksa bilong Jesus abaotem datfala net hem minim?

⁹ Readim Matthew 13:47-50. Wanem nao tokpiksa bilong Jesus abaotem datfala net hem minim? Jesus sei wei for duim preaching waka hem olsem wanfala big net wea olketa putim long sea. Long sem wei wea “olketa didifren kaen fish” savve pas insaed long wanfala big net, staka million difren kaen pipol interest long message abaotem Kingdom. (Isa. 60:5) Staka million pipol wea kam evri year long olketa convention and Memorial pruvim datwan. Samfala long olketa pipol hia olsem “olketa gud fish,” and olketa kam insaed long Christian kongregeson. Bat samfala olsem “olketa rabis fish,” and Jehovah no acceptim olketa.

10. Why nao Jesus storyim tokpiksa abaotem datfala net?

¹⁰ Why nao Jesus storyim disfala tokpiksa? Wei wea olketa separatem olketa gud fish from olketa rabis fish hem no piksarem samting wea bae happen long Armageddon. Bat disfala tokpiksa hem storyim samting wea happen long olketa last day. Jesus helpem iumi for luksavve no evriwan wea interest long message abaotem Kingdom bae laek for worshipim Jehovah. Olsem example, staka pipol wea kam long olketa meeting or studyim Bible witim iumi no laek for dedicate long Jehovah. (1 Ki. 18:21) Olketa narawan no kakam tu long olketa meeting. And samfala young wan wea dadi and mami bilong olketa Witness olketa no laek for followim olketa standard bilong Jehovah. Jesus storyim disfala tokpiksa for mekhae long wei wea man seleva mas chus for worshipim Jehovah. Man wea chus for worshipim Jehovah hem “barava spesol” long hem.—Hag. 2:7; footnote.

11, 12. (a) Wanem nao iumi savve lanem from tokpiksa abaotem datfala net? (b) Wanem nao iumi lanem abaotem Jehovah and Jesus from disfala tokpiksa?

¹¹ Wanem nao iumi savve lanem from tokpiksa abaotem datfala net? Disfala tokpiksa savve helpem iumi for no sorre tumas or no feel nogud sapos wanfala Bible study or pikinini bilong iumi no kam insaed truth. Maet iumi duim staka samting finis for helpem hem. Nomata samwan agree for studyim Bible, or dadi and mami bilong hem tufala Witness, datwan no minim hem bae kamap fren bilong Jehovah. Sapos hem no laek for stap anda long rul bilong Jehovah, God bae no acceptim hem.

¹² Waswe, diswan minim hem hard nao for olketa wea lusim truth for kam bak long kongregeson? Or waswe, diswan minim no eni hope stap nao for man wea no dedicate yet long Jehovah? Nomoa, chance hem stap for olketa olsem for fren witim Jehovah bifor datfala big trabol hem start. Jehovah sei olsem long olketa hia: “Kam bak long mi, and mi bae kam bak long iufala.” (Mal. 3:7) Tokpiksa bilong Jesus abaotem olobaot son wea lus mekhae long diswan.—Readim Luke 15:11-32.

OLOBAOT SON

13. Wanem nao tokpiksa abaotem olobaot son hem minim?

¹³ Wanem nao tokpiksa bilong Jesus abaotem olobaot son hem minim? Kaenfala dadi long disfala tokpiksa hem piksarem Dadi bilong iumi long heven, Jehovah. Datfala olobaot son wea spoelem selen bilong hem and evri samting dadi givim hem piksarem olketa wea lusim truth. Olketa go bak insaed world bilong Satan wea farawe from Jehovah, wea hem olsem olketa go long “wanfala farawe kantri.” (Eph. 4:18; Col. 1:21) Gogo samfala hia kasem bak gudfala tingting bilong olketa and disaed for kam bak long Jehovah nomata hem no isi for olketa duim datwan. From olketa hambol and repent, Jehovah forgivim olketa and hapi tumas for olketa kam bak long hem.—Isa. 44:22; 1 Pet. 2:25.

14. Why nao Jesus storyim tokpiksa abaotem olobaot son?

¹⁴ Why nao Jesus storyim disfala tokpiksa? Jesus laekem iumi for luksavve Jehovah barava laekem olketa wea lusim hem for kam bak. Datfala dadi long tokpiksa hem hope wanday bae son bilong hem kam bak. Taem dadi lukim son bilong hem kam bak, hem ran go for meetim son bilong hem taem hem “lelebet farawe yet.” Datfala dadi laekem son bilong hem for savve hem hapi tumas for hem kam bak. Disfala tokpiksa shud encouragem olketa wea lusim truth for kam bak kwiktaem long Jehovah. Maet olketa barava wik long spiritual wei, olketa feel shame, and maet olketa tingse hem no isi for kam bak, bat olketa bae kasem gud samting sapos olketa duim datwan! Jehovah, Jesus, and olketa angel bae hapi tumas taem olketa hia kam bak.—Luke 15:7.

15, 16. (a) Wanem nao iumi savve lanem from tokpiksa abaotem olobaot son? Storyim samfala example. (b) Wanem nao iumi lanem abaotem Jehovah and Jesus from disfala tokpiksa?

¹⁵ Wanem nao iumi savve lanem from disfala tokpiksa abaotem olobaot son? Iumi mas followim wei bilong Jehovah for showimaot love. Taem samwan kam bak long truth, iumi shud no tingse iumi gud winim hem and no laek for welkamim hem. Diswan bae spoelem wei wea iumi fren witim Jehovah. (Eccl. 7:16) Nara samting iumi lanem from disfala tokpiksa, hem nao for ting long eniwan wea lusim truth olsem “wanfala sheepsheep wea lus,” wea wanday maet hem bae kam bak. (Ps. 119:176) And sapos iumi meetim samwan wea lusim truth, waswe, bae iumi talem long olketa elder mekem olketa savve helpem hem? Sapos hem no disfellowship, waswe, bae iumi traem best for helpem hem kam bak? Sapos iumi minim gud datfala tokpiksa abaotem olobaot son and laek followim wanem iumi lanem, iumi bae duim olketa samting hia.

¹⁶ Olketa wea kam bak long truth barava tinghae long mercy bilong Jehovah and love and sapot bilong kongregeson. Wanfala brata wea disfellowship for 25 year hem sei: “Mi barava hapi bihaen mi reinstate from Jehovah gohed for strongim mi. (Acts 3:19) Evriwan long kongregeson barava sapotim and showimaot love long mi! Distaem mi garem wanfala nambawan spiritual famili.” Wanfala young sista wea wikdaon and inactive for faevfala year hem sei: “Mi hapi tumas bikos olketa long kongregeson showimaot bigfala love long mi. . . . Hem nambawan samting for insaed long organization bilong Jehovah!”

17, 18. (a) Wanem nao iumi lanem from thrifala tokpiksa wea iumi storyim long disfala study? (b) Wanem nao iumi laek for duim?

¹⁷ Wanem nao iumi lanem from thrifala tokpiksa wea iumi storyim long disfala study? First samting, iumi mas luksavve iumi no savve mekem truth grow insaed heart bilong Bible study bilong iumi, bat Jehovah nao mekem datwan for grow. Mek-tu samting, iumi shud no tingse evriwan wea kam long olketa meeting and wea iumi study witim bae kam insaed truth. Mek-thri samting, nomata maet samfala lusim Jehovah, iumi hope wanday bae olketa kam bak. Taem olketa kam bak long truth, iumi laek for followim wei bilong Jehovah for showimaot love and welkamim olketa.

¹⁸ Iumi evriwan shud waka hard for gohed kasem savve, wei for minim samting, and wisdom. Taem iu readim olketa tokpiksa bilong Jesus, ting raonem olketa kwestin hia: Wanem nao tokpiksa hia minim? Why nao disfala tokpiksa hem long Bible? Hao nao mi savve followim wanem mi lanem long disfala tokpiksa? Wanem nao mi lanem abaotem Jehovah and Jesus from disfala tokpiksa? Taem iumi duim olsem, datwan showimaot iumi minim gud samting wea Jesus storyim.