Love Mekem Iumi Wan Mind​—Report From Spesol Meeting

EVRIWAN wea hipap long Assembly Hall bilong Olketa Jehovah’s Witness long Jersey City, New Jersey, long America barava hapi. Long morning long October 3, 2009, winim 5,000 pipol hipap for mek-125 spesol meeting bilong Watch Tower Bible and Tract Society of Pennsylvania. Staka thousand Witness lisin and lukluk long program long thrifala ples long Bethel long America and Bethel long Canada tu. Evriwan wea hipap hem 13,235 wea enjoyim datfala spesol meeting wea gohed for thrifala hour and olketa wan mind bikos olketa lovem Jehovah.

Geoffrey Jackson, wea hem wanfala long Governing Body, hem chairman bilong program hia. Hem startim program taem hem askem samfala wea waka long Bethel for singim samfala song from niu songbuk bilong iumi. David Splane, nara brata long Governing Body, leadim smol grup hia wea singsing, and hem storyim lelebet hao music hem wanfala important samting wea iumi duim long tru worship. Then evriwan wea hipap singim thrifala niu song. Smol grup hia nao singsing firstaem then bihaen, evriwan singsing tugeta. Olketa duim diswan for spesol meeting hia nomoa. Iumi bae no duim datwan long olketa kongregeson, circuit, and distrik.

Report From Faevfala Branch

Samfala brata long Branch Komiti long faevfala branch talem kam report. Kenneth Little talem klosap nao branch long Canada bae printim klosap evri magasin for America and Canada. Datwan minim namba bilong olketa magasin wea olketa printim bae tenfala taem big winim bifor. Wanfala niu machine for print bae waka 16 hour long evri waka day.

Reiner Thompson talem report abaotem Kingdom waka long Dominican Republic, and Albert Olih storyim waka bilong iumi long Nigeria. Emile Kritzinger from Mozambique storyim hao bihaen pipol spoelem Olketa Jehovah’s Witness for staka year, long 1992 gavman registerim waka bilong olketa Witness. No longtaem go nomoa, namba bilong olketa pablisa long thrifala kantri hia hem kamap barava big. Viv Mouritz from Australia branch storyim waka wea gohed gud long East Timor, wea Australia branch nao lukaftarem.

Olketa Komiti Bilong Governing Body

Start long 1976, sixfala komiti bilong Governing Body lukaftarem evri waka bilong Olketa Jehovah’s Witness. Samfala year bihaen, olketa chusim samfala long olketa nara sheepsheep for duim spesol waka for helpem olketa. Distaem 23 brata nao duim datfala waka. Olketa interviewim sixfala long olketa brata hia. Taem olketa kaontem haomas year nao olketa duim full-taem service, hem kasem 341 year, wea minim sixfala hia duim samting olsem 57 year long full-taem service.

Don Adams, wea start waka long Bethel long 1943, storyim Coordinators’ Komiti wea faevfala coordinator bilong olketa nara komiti insaed long hem. Disfala komiti helpem waka bilong faevfala komiti for gohed gud. Hem lukaftarem olketa big problem wea kamap olsem taem pipol spoelem olketa Witness, kot case, disaster, and olketa nara important samting wea kasem Olketa Jehovah’s Witness evriwea.

Dan Molchan storyim waka bilong Personnel Komiti wea lukaftarem spiritual and physical need bilong 19,851 pipol wea waka long Bethel evriwea long world. David Sinclair storyim Publishing Komiti wea lukaftarem waka for baem evri samting wea olketa branch needim. Then Robert Wallen, wea waka long Bethel for klosap 60 year, storyim Service Komiti wea lukaftarem waka bilong pipol bilong Jehovah long field ministry and long olketa kongregeson. William Malenfant storyim big waka wea Teaching Komiti duim for redyim program for convention. Then John Wischuk storyim Writing Komiti wea lukaftarem waka for redyim gud spiritual kaikai long olketa buk bilong iumi.a

Yeartext for 2010 Storyim Love

Thrifala brata long Governing Body givim thrifala tok. Long start bilong tok bilong Gerrit Lösch hem askem disfala kwestin: “Waswe, iu laekem pipol for lovem iu?” Hem sei iumi evriwan needim samwan for lovem iumi and datwan mekem iumi hapi. From Jehovah laek showimaot love long iumi, dastawe hem wakem iumi. Iumi preach and teachim pipol bikos iumi lovem Jehovah.

Iumi showimaot trufala love long olketa wea lovem iumi and olketa enemy bilong iumi tu. (Matt. 5:​43-​45) Brata Lösch encouragem evriwan for ting raonem olketa nogud samting wea kasem Jesus taem olketa whipim hem, tok spoelem hem, spit long hem, and spiarim hem. Nomata olsem, Jesus prea for olketa soldia wea nilam hem long post. Tru tumas, datwan mekem iumi barava lovem Jesus. Then Brata Lösch sei yeartext for 2010 hem kam from 1 Corinthians 13:​7, 8 wea sei: ‘Love mekem man for no givap. Love bae no finis enitaem.’ Iumi savve showimaot love for olowe, and narawan savve lovem iumi for olowe.

Waswe, Petrol Bilong Iu Klosap Finis?

Samuel Herd startim tok bilong hem witim disfala tokpiksa. Tingim sapos wanfala fren bilong iu kam tekem iu long trak for iufala go kasem wanfala farawe ples. Taem iufala gogo, iu lukim petrol klosap finis so iu talem fren bilong iu. Hem sei for iu no wari bikos lelebet petrol stap yet. No longtaem bihaen, petrol finis nao. Wanem nao tingting bilong iufala? Waswe, hem gud for gohed nomoa taem petrol klosap finis? Waswe, iu laek for stop long saed road? Hem barava gud sapos iumi garem staka petrol evritaem! Tokpiksa petrol hem minim savve wea iumi garem abaotem Jehovah.

So iumi mas garem staka petrol evritaem. Iumi savve duim diswan long fofala wei. First samting, iumi mas study seleva and savve gud long Bible taem iumi readim evriday. Iumi no read nating nomoa bat iumi mas minim wanem iumi readim. Mek-tu samting, iumi mas duim Famili Worship evritaem. Waswe, iumi barava fulimap petrol evri week or iumi fulimap lelebet nomoa? Mek-thri samting, iumi mas go long evri meeting. Mek-foa samting, iumi mas markem taem and faendem kwaet ples for ting raonem olketa wei bilong Jehovah. Psalm 143:5 sei: “Mi no forgetim samting wea happen bifor. Mi ting raonem evri waka bilong iu.”

“Olketa wea Raeteous Bae Shaen Braet”

John Barr givim lastfala tok wea storyim tokpiksa bilong Jesus abaotem wheat and rabis grass. (Matt. 13:​24-​30, 38, 43) Datfala tokpiksa storyim “taem for harvestim planteison” wea olketa angel hipimap “olketa son bilong kingdom” and aotem olketa rabis grass and bonem.

Brata Barr sei waka for hipimap olketa son bilong kingdom bae no gohed for olowe. Hem storyim Matthew 24:​34, wea sei: ‘Disfala genereson bae no finis taem evri samting hia happen.’ Tufala taem nao hem talem diswan: “Masbi Jesus minim olketa anointed wan wea stap laef long semtaem nomata olketa haomas year. Samfala hia lukim saen wea start for showaot long 1914 and gogo olketa dae, bat olketa narawan wea laef long semtaem witim olketa bae lukim start bilong bigfala trabol.” Iumi no savve hao long nao ‘disfala genereson’ bae stap, bat insaed diswan nao hem tufala grup bilong pipol wea laef long semtaem long olketa last day nomata olketa haomas year. Wanfala grup nao olketa anointed wan wea luksavve long saen wea start long 1914. Nara grup nao olketa anointed wan wea laef long semtaem olsem firstfala grup bat wea young lelebet. Iumi hapi tumas for savve samfala long mek-tu grup hia bae no dae bifor bigfala trabol hem start!

“Olketa son bilong kingdom” barava weitim reward for go long heven, bat iumi evriwan mas gohed faithful and shaen braet go kasem end. Hem nambawan privilege for iumi stap distaem long taem wea olketa hipimap “wheat.”

Bihaen lastfala song, Theodore Jaracz long Governing Body prea for finisim meeting. Disfala spesol meeting program barava encouragem evriwan!

[Footnote]

[Box long page 5]

SKUL FOR OLKETA ELDER

Long spesol meeting, Anthony Morris, long Governing Body announcem olketa bae gohed for trainim olketa elder. Wanfala skul for olketa elder long America start long 2008 long education center long Patterson, New York. Mek-72 class hem just finis, wea minim distaem 6,720 elder nao kasem training. Staka moa stap yet for kasem training. Winim 86,000 elder stap long America nomoa. Dastawe Governing Body appruvim nara skul for gohed long Brooklyn, New York, start long December 7, 2009.

Fofala traveling overseer bae kasem training long Patterson for tufala month for kamap teacher. Fofala hia bae go long Brooklyn for teach long there, then nara fofala moa bae kasem training. Fofala hia bae teachim olketa skul long Brooklyn, and fofala first wan bae go for teachim olketa skul long olketa Assembly Hall and Kingdom Hall. Sem samting bae gohed go kasem taem 12-fala teacher savve teachim sixfala skul evri week long English languis long America. Then nara fofala bae kasem training for teachim olketa wea savve long Spanish languis. Disfala niu skul for olketa elder bae no changem Kingdom Ministry Skul wea gohed yet distaem. Goal nao hem for helpem olketa elder gohed strong long spiritual wei. Olketa branch raonem world bae garem olketa skul long olketa Assembly Hall and Kingdom Hall start long 2011 service year.

[Piksa long page 4]

Spesol meeting start witim singsing from niu songbuk, “Singsing Long Jehovah”