‘Lisin and Minim Samting’

1, 2. Why nao staka pipol no minim samting wea Jesus talem?

TAEM samwan story kam long iu, maet iu savve herem voice bilong hem and wanem hem talem. Bat waswe, bae iu savve wanem hem story abaotem sapos iu no minim wanem hem talem? (1 Cor. 14:9) Jesus story long staka thousand pipol long languis bilong olketa. Bat staka long olketa no minim samting wea hem talem. So Jesus sei long olketa: “Iufala evriwan lisin long mi, and minim samting wea mi talem long iufala.”—Mark 7:14.

² Why nao staka long olketa no minim samting wea Jesus talem? Samfala garem tingting bilong olketa seleva or rong tingting. Jesus sei olsem abaotem olketa hia: “Iufala savve tumas hao for go raonem law bilong God mekem iufala savve gohed followim nomoa kastom bilong iufala.” (Mark 7:9) Olketa no laek for savve long mining bilong samting wea Jesus talem. Olketa no laek for changem wei and tingting bilong olketa. Olketa herem wanem Jesus talem, bat olketa no laek for minim datwan! (Readim Matthew 13:13-15.) Wanem nao bae helpem iumi for evritaem willing for lanem samting from olketa teaching bilong Jesus?

HAO FOR KASEM GUD SAMTING FROM TEACHING BILONG JESUS

3. Wanem nao helpem olketa disaepol for minim samting wea Jesus talem?

³ Iumi mas followim example bilong olketa disaepol bilong Jesus wea hambol. Hem sei long olketa: “Iufala hapi bikos eye and ear bilong iufala hem lukim and herem samting.” (Matt. 13:16) Why nao olketa disaepol minim wanem Jesus talem, bat olketa narawan no minim? Olketa disaepol duim thrifala samting. First samting, olketa willing for askem olketa kwestin and laek for faendemaot wanem nao toktok bilong Jesus hem minim. (Matt. 13:36; Mark 7:17) Mek-tu samting, olketa willing for joinim wanem olketa lanem witim olketa samting wea olketa savve finis. (Readim Matthew 13:11, 12.) Mek-thri samting, olketa willing for followim samting wea olketa lanem and for teachim datwan long olketa narawan.—Matt. 13:51, 52.

4. Wanem thrifala samting nao iumi mas duim for minim olketa tokpiksa bilong Jesus?

⁴ Sapos iumi laek for minim olketa tokpiksa bilong Jesus, iumi mas duim sem samting wea olketa disaepol duim. Iumi tu mas duim thrifala samting. First samting, iumi mas spendem taem for study and ting raonem wanem Jesus storyim, duim research, and trae for minim gud datwan. Taem iumi duim olsem bae iumi garem savve. (Prov. 2:4, 5) Mek-tu samting, iumi mas joinim wanem iumi lanem witim olketa samting wea iumi savve finis, and luksavve hao datwan savve helpem iumi. Taem iumi duim olsem, datwan hem wei for minim samting. (Prov. 2:2, 3) Mek-thri samting, iumi shud followim wanem iumi lanem long laef bilong iumi. Datwan showimaot iumi garem wisdom.—Prov. 2:6, 7.

5. Storyim tokpiksa for showimaot wei wea savve, wei for minim samting, and wisdom olketa no semsem.

⁵ Long wanem wei nao savve, wei for minim samting, and wisdom, olketa no semsem? For ansarem datfala kwestin, tingim disfala tokpiksa: Iu standap midol long road and wanfala bas hem kam. First samting, iu luksavve bas nao hem kakam for iu. Datwan hem savve. Then, iu luksavve sapos iu gohed standap long there, bae bas hia bangam iu nao. Datwan hem wei for minim samting! So iu kwiktaem muv from road. Datwan hem wisdom! Dastawe Bible encouragem iumi for garem wisdom bikos datwan savve sevem laef bilong iumi!—Prov. 3:21, 22; 1 Tim. 4:16.

6. Wanem fofala kwestin nao bae iumi ansarem taem iumi storyim sevenfala tokpiksa bilong Jesus? (Lukim box.)

⁶ Long disfala study and nextfala study, bae iumi storyim sevenfala tokpiksa bilong Jesus. Bae iumi storyim ansa bilong olketa kwestin hia: Wanem nao tokpiksa hia hem minim? (Ansa bae mekem iumi garem savve.) Why nao Jesus storyim disfala tokpiksa? (Ansa bae helpem iumi for minim samting wea Jesus storyim.) Hao nao iumi savve followim wanem iumi lanem and iusim datwan for helpem olketa narawan? (Ansa bae helpem iumi for showimaot wisdom.) Lastfala kwestin, wanem nao iumi lanem abaotem Jehovah and Jesus from disfala tokpiksa?

SEED BILONG MUSTARD TREE

7. Wanem nao tokpiksa bilong Jesus abaotem seed bilong mustard tree hem minim?

⁷ Readim Matthew 13:31, 32. Wanem nao tokpiksa bilong Jesus abaotem seed bilong mustard tree hem minim? Datfala seed bilong mustard tree hem piksarem message abaotem Kingdom, and hem piksarem tu Christian kongregeson. Taem Christian kongregeson hem start long 33 C.E., hem smol nomoa, olsem seed bilong mustard tree wea “smol winim evri nara seed.” Bat preaching waka mekem Christian kongregeson hem kwiktaem grow. Staka pipol no tingse hem bae grow kwiktaem olsem. (Col. 1:23) Jesus sei “olketa bird . . . stap long olketa branch bilong hem.” Datwan piksarem wei wea olketa wea laek for lanem truth olketa kam insaed long kongregeson for kasem spiritual kaikai and for stap sef.—Comparem Ezekiel 17:23.

8. Why nao Jesus storyim tokpiksa abaotem seed bilong mustard tree?

⁸ Why nao Jesus storyim disfala tokpiksa? Hem storyim wei wea datfala smol seed hem grow for kamap wanfala big tree for showimaot wei wea Kingdom bilong God hem grow and duim staka samting, hem protectim pipol bilong God, and hem savve winim eni samting wea againstim hem. Start kam long 1914, organization bilong God long earth hem barava kamap big. (Isa. 60:22) Jehovah protectim olketa wea insaed organization bilong hem long spiritual wei. (Prov. 2:7; Isa. 32:1, 2) No eni samting savve stopem organization bilong Jehovah for grow.—Isa. 54:17.

9. (a) Wanem nao iumi savve lanem from datfala tokpiksa abaotem seed bilong mustard tree? (b) Wanem nao iumi lanem abaotem Jehovah and Jesus from disfala tokpiksa?

⁹ Wanem nao iumi savve lanem from datfala tokpiksa abaotem seed bilong mustard tree? Maet long territory bilong iumi no staka Witness stap, and staka pipol no interest taem iumi go preach long olketa. Nomata olsem, sapos iumi no forgetim hao no eni samting savve stopem Kingdom for grow, datwan bae strongim iumi for gohed faithful. Olsem example, taem Brata Edwin Skinner kasem India long 1926, no staka Witness stap long there and preaching waka hem barava no isi bikos staka pipol no interest. Nomata olsem, hem gohed for preach, and hem lukim wei wea staka pipol start for acceptim Kingdom message. Distaem, winim 37,000 Witness stap long India, and winim 108,000 pipol attendim Memorial long 2013. Long sem year wea Brata Skinner kasem India, preaching waka hem start long Zambia. Distaem, Zambia garem winim 170,000 pablisa, and 763,915 pipol attendim Memorial long 2013. Datwan minim 1-fala long evri 18-fala pipol long Zambia attendim Memorial. Kingdom message hem barava grow big long Zambia!

YEAST

10. Wanem nao tokpiksa abaotem yeast hem minim?

¹⁰ Readim Matthew 13:33. Wanem nao tokpiksa abaotem yeast hem minim? Disfala tokpiksa hem abaotem Kingdom message tu and hao hem savve changem pipol. “Flour” hia hem piksarem pipol long evri kantri. Datfala yeast wea isisi mekem flour hia for rise, hem piksarem wei wea preaching waka helpem pipol for herem Kingdom message. Long tokpiksa abaotem seed bilong mustard tree, hem isi for lukim wei wea datfala seed hem grow. Bat long disfala tokpiksa abaotem yeast, long firstaem, hard for man lukim samting wea datfala yeast hem duim. Bihaen nao, man savve lukim datwan taem flour hia hem rise.

11. Why nao Jesus storyim tokpiksa abaotem yeast?

¹¹ Why nao Jesus storyim disfala tokpiksa? Jesus showimaot wei wea message abaotem Kingdom hem fit for kasem “evri farawe ples long earth,” and tu, wei wea datfala message savve changem wei bilong pipol. (Acts 1:8) Long firstaem maet iumi no lukim olketa change hia, bat olketa change hia gohed for happen. Staka pipol evriwea long world acceptim message abaotem Kingdom, and changem wei bilong olketa.—Rome 12:2; Eph. 4:22, 23.

12, 13. Storyim olketa example wea showim hao preaching waka kasem staka ples olsem tokpiksa abaotem yeast hem showimaot.

¹² Staka taem gud samting wea kamaot from preaching waka savve showaot plande year bihaen. Olsem example, long 1982, Franz and Margit, wanfala hasband and waef wea waka long Bethel long Brazil long datfala taem, go preach long wanfala smol taon. Wanfala long olketa study bilong tufala long there hem wanfala mami wea garem thrifala boy and wanfala gele. Wanfala boy hia, wea hem 12 year long datfala taem, savve shame tumas and staka taem hem laek go haed taem olketa redi for study. From Franz and Margit kasem niu assignment, tufala no savve gohed study witim datfala famili. Bat twenti-faev year bihaen, tufala go bak moa long datfala taon. Tufala hapi tumas taem tufala lukim wanfala kongregeson hem stap long there, wea garem 69 pablisa, 13-fala regular pioneer, and wanfala niu Kingdom Hall! And datfala boy wea savve shame tumas, distaem hem nao chairman bilong olketa elder long datfala kongregeson! Olsem datfala yeast long tokpiksa bilong Jesus, Kingdom message hem kasem datfala ples and changem laef bilong plande pipol.

¹³ Datfala message abaotem Kingdom savve changem tu wei bilong pipol wea stap long olketa kantri wea gavman tambuim preaching waka. Staka taem iumi sapraes tumas taem iumi herem haomas pipol kam insaed organization bilong Jehovah long olketa kantri hia. Olsem example, preaching waka hem start long Cuba long 1910, and Brata Russell visitim datfala kantri long 1913. Long firstaem, no staka pipol long Cuba olketa interest. Bat waswe long distaem? Long Cuba distaem, winim 96,000 pablisa preachim gud nius, and 229,726 pipol attendim Memorial long 2013. Datwan minim 1-fala long evri 48-fala pipol long Cuba attendim Memorial. Long olketa kantri wea gavman no tambuim waka, maet olketa Witness long there tingse hem hard for preach long samfala ples long olketa kantri hia. Nomata olsem, maet message abaotem Kingdom kasem finis samfala ples hia.a—Eccl. 8:7; 11:5.

14, 15. (a) Wanem nao iumi savve lanem from datfala tokpiksa abaotem yeast? (b) Wanem nao iumi lanem abaotem Jehovah and Jesus from disfala tokpiksa?

¹⁴ Wanem nao iumi savve lanem from datfala tokpiksa abaotem yeast? Taem iumi ting raonem wanem nao mining bilong datfala tokpiksa, iumi luksavve iumi no need for wari tumas abaotem hao datfala Kingdom message bae kasem staka million pipol wea no herem datwan yet. Jehovah nao kontrolem evri samting. Bat wanem nao iumi mas duim? Bible sei: “Iu mas plantim olketa seed start long morning go kasem evening, bikos iu no savve which wan long olketa nao bae grow. Maet evri seed grow gud, or maet samfala nomoa grow bat olketa narawan no grow.” (Eccl. 11:6) Nara samting tu, iumi shud no forget for prea long Jehovah for blessim preaching waka wea gohed raonem world, and especially long olketa kantri wea gavman tambuim waka bilong iumi.—Eph. 6:18-20.

¹⁵ And tu, iumi shud no wikdaon sapos iumi no lukim eni gud samting hem kwiktaem kamaot from preaching waka wea iumi duim. Iumi shud no ting daonem “day wea waka hem just start.” (Zech. 4:10) Olketa gud samting wea kamaot from waka bilong iumi maet winim eni samting wea iumi tingim!—Ps. 40:5; Zech. 4:7.

BISNISMAN WEA GO LONG OLKETA DIFREN PLES, AND EXPENSIVE SAMTING WEA HAED

16. Wanem nao tokpiksa abaotem bisnisman wea go long olketa difren ples, and tok piksa abaotem expensive samting wea haed, tufala minim?

¹⁶ Readim Matthew 13:44-46. Wanem nao tokpiksa abaotem bisnisman wea go long olketa difren ples, and tok piksa abaotem expensive samting wea haed, tufala minim? Long taem bilong Jesus, samfala bisnisman savve go long olketa farawe ples for baem olketa gudfala pearl. Long tokpiksa bilong Jesus, datfala “pearl wea hem gud tumas winim olketa narawan” hem piksarem truth abaotem Kingdom, and datfala bisnisman hem piksarem pipol wea traem best for savve long truth. From datfala bisnisman luksavve pearl hia hem gud tumas, “semtaem nomoa” hem salem evri samting wea hem garem mekem hem savve peim datwan. Jesus storyim tu nara tokpiksa abaotem wanfala expensive samting wea “stap haed” wea wanfala man faendem long wanfala pis land. Disfala man hem no olsem datfala bisnisman wea go lukaotem olketa gudfala pearl. Disfala man wea waka long field hem no lukaotem datfala expensive samting wea hem faendem. Bat taem hem faendem datwan, hem tu willing for salem “evri samting” mekem hem savve peim datwan.

17. Why nao Jesus storyim tokpiksa abaotem bisnisman wea go long olketa difren ples, and tok piksa abaotem expensive samting wea haed?

¹⁷ Why nao Jesus storyim tufala tokpiksa hia? Hem storyim tufala tokpiksa hia for showimaot wei wea pipol kasem truth hem no semsem. Samfala lukaotem truth and duim staka samting for trae faendem datwan. Olketa narawan kasem truth nomata olketa no lukaotem datwan. Maet olketa hia kasem truth taem samwan kam preach long olketa. Tufala man insaed tufala tokpiksa bilong Jesus luksavve olketa faendem barava nambawan samting and tufala willing for sakrifaesim staka samting for kasem datwan.

18. (a) Wanem nao iumi savve lanem from tufala tokpiksa hia? (b) Wanem nao iumi lanem abaotem Jehovah and Jesus from tufala tokpiksa hia?

¹⁸ Wanem nao iumi savve lanem from tufala tokpiksa hia? (Matt. 6:19-21) Ting raonem olketa kwestin hia: ‘Waswe, mi olsem tufala man hia? Waswe, mi ting long truth olsem barava nambawan samting? Waswe, mi willing for mekem olketa sakrifaes for kasem truth, or from mi busy tumas long olketa nara samting long laef, mi no tinghae long truth?’ (Matt. 6:22-24, 33; Luke 5:27, 28; Phil. 3:8) Sapos iumi barava tinghae long truth, bae iumi willing for duim eni samting for gohed mekem truth hem first samting long laef bilong iumi.

19. Wanem nao bae iumi storyim long nextfala study?

¹⁹ Iumi laek for duim samting wea showimaot iumi lisin long Jesus and barava minim gud olketa tokpiksa hia abaotem Kingdom. Hem important for iumi savve long mining bilong olketa, and tu, iumi mas duim wanem iumi lanem from olketa tokpiksa hia. Long nextfala study, bae iumi storyim thrifala tokpiksa moa, and wanem nao iumi savve lanem from olketa.