“Faendem Wanfala Pearl wea Garem Hae Price”

“Kingdom bilong heven hem goal wea olketa man trae for kasem, and olketa wea gohed for trae hard savve kasholem hem.”—MATTHEW 11:12.

1, 2. (a) Long wanfala parabol bilong hem abaotem Kingdom, wanem nao datfala fasin wea Jesus story abaotem wea samfala man nomoa garem? (b) Wanem nao Jesus sei long datfala parabol abaotem pearl wea garem hae price?

WASWE, eni samting stap wea iu barava tinghae long hem and wea iu bae willing for givim evri samting wea iu ownim for kasem datwan? Nomata pipol story abaotem wei for strong for aftarem wanfala goal olsem selen, bignem, or position, samfala man nomoa bae willing for givim evri samting wea olketa ownim for kasem samting wea olketa ting hem spesol tumas. Long wanfala parabol abaotem Kingdom bilong God, Jesus Christ storyim disfala fasin wea gud tumas, bat wea samfala man nomoa garem.

² Datfala parabol wea Jesus talem long olketa disaepol bilong hem nomoa, hem nao abaotem pearl wea garem hae price. Jesus sei olsem: “Kingdom bilong heven hem olsem wanfala bisnisman wea go long olketa difren ples for luk aotem olketa best pearl. Taem hem faendem wanfala pearl wea garem hae price, hem go and kwiktaem salem evri samting wea hem garem and baem datwan.” (Matthew 13:36, 45, 46) Wanem nao Jesus laekem olketa wea lisin for lanem from disfala tokpiksa? And hao nao iumi savve kasem gud samting from samting wea hem talem?

Hae Price Bilong Olketa Pearl

3. Why nao olketa best pearl garem hae price long bifor kam?

³ From taem bifor kam, pipol tinghae long olketa pearl from olketa luk naes tumas. Wanfala buk storyim hao datfala man for raet from Rome, Pliny the Elder, talem hao “olketa pearl nao best samting winim evri nara samting wea garem hae price.” Olketa pearl moa spesol winim gold, silver, and plande nara ston wea luk naes, from oyster nao wakem olketa pearl. For wakem olketa pearl, oyster hem kavarem samting wea kam insaed long sela bilong hem, olsem olketa smol ston, witim wanfala samting olketa kolem nacre. Long bifor kam, pipol harvestim olketa best pearl from Red Sea, Persian Gulf, and Indian Ocean—farawe from Israel. Dastawe Jesus storyim “wanfala bisnisman wea go long olketa difren ples for luk aotem olketa best pearl.” For faendem olketa best pearl, man mas waka hard.

4. Wanem nao main point long parabol bilong Jesus abaotem datfala bisnisman?

⁴ Nomata from bifor kam olketa best pearl expensive fogud, price bilong olketa hem no main important point long parabol bilong Jesus. Long disfala parabol, Jesus no markem Kingdom bilong God witim pearl wea garem hae price nomoa, bat hem markem Kingdom witim “wanfala bisnisman wea go long olketa difren ples for luk aotem olketa best pearl” and samting wea hem duim taem hem faendem wanfala olsem. Bisnisman wea go long olketa difren ples and baem and salem olketa pearl hem no olsem wanfala stoakeeper wea salem staka didifren samting, bat hem man wea savve tumas long evri samting abaotem olketa pearl and hem luksavve sapos wanfala pearl hem spesol wan or nomoa. Hem bae luksavve long wanfala really pearl and wanfala giaman pearl.

5, 6. (a) Hao nao datfala bisnisman long parabol bilong Jesus hem difren from nara pipol? (b) Datfala parabol abaotem samting wea haed wea garem hae price hem showimaot wanem samting abaotem datfala bisnisman?

⁵ Nara samting tu hem important abaotem disfala bisnisman. Eni nara bisnisman maet fastaem wakemaot kost wea hem savve kasem taem hem salem moa datfala pearl, mekem hem savve disaed haomas hemseleva mas peim fastaem for mek sure hem kasem profit. Maet hem ting raonem tu sapos pipol bae willing for baem or nomoa, mekem hem savve salem kwiktaem. Diswan minim hem no interest for ownim datfala pearl, bat hem laek for kwiktaem salem moa for kasem profit. Bat bisnisman long parabol bilong Jesus hem no olsem. Hem no interest long pearl for kasem profit. Tru nao, hem willing for givim “evri samting wea hem garem”—evriting wea hem ownim and evri property—for kasem datfala samting wea hem luk aotem.

⁶ Maet plande bisnisman tingse samting wea man long parabol bilong Jesus duim hem no wise. Bisnisman wea garem savve bae nating ting for duim samting olsem. Bat datfala bisnisman long parabol bilong Jesus hem no garem sem tingting olsem olketa. Gud samting hem kasem from datwan hem no chance for kasem moa selen, bat hapi and feeling for satisfae wea man kasem taem hem ownim samting wea garem hae price winim eni nara samting. Disfala point hem showaot klia long nara tokpiksa bilong Jesus abaotem semkaen samting. Hem sei: “Kingdom bilong heven hem olsem samting wea garem hae price wea stap haed long wanfala pis land, wea wanfala man faendem and haedem; and from hem hapi tumas hem go and salem evri samting wea hem garem and baem datfala pis land.” (Matthew 13:44) Tru nao, hapi wea man savve kasem taem hem faendem and ownim datfala spesol samting hem muvim hem for givim evri samting bilong hem. Waswe, eni pipol stap distaem wea garem datkaen tingting? Waswe, eni spesol samting stap distaem wea fitim for man givim evri samting bilong hem for kasem datwan?

Olketa wea Tinghae Long Kingdom

7. Hao nao Jesus showimaot hem barava tinghae long Kingdom?

⁷ Long parabol bilong hem, Jesus story abaotem “kingdom bilong heven.” Jesus barava tinghae long Kingdom. Olketa story long Gospel barava showimaot hao datwan hem tru. Bihaen hem baptaes long 29 C.E., Jesus “start for preach and sei: ‘Repent iufala, from kingdom bilong heven hem kam klosap nao.’ ” For thri and haf year hem teachim staka pipol abaotem datfala Kingdom. Hem go evriwea long Israel, “from taon tu taon and from vilij tu vilij, for preach and talemaot gud nius bilong kingdom bilong God.”—Matthew 4:17; Luke 8:1.

8. Wanem nao Jesus duim olsem example for showimaot wanem datfala Kingdom bae duim?

⁸ Taem hem duim olketa mirakol long staka ples—wea insaed diswan hem wei for healim olketa wea sik, feedim olketa wea hangre, kontrolem weather, and for mekem olketa wea dae for laef bak moa—Jesus showimaot wanem Kingdom bilong God bae duim. (Matthew 14:14-21; Mark 4:37-39; Luke 7:11-17) Last samting, hem pruvim hao hem loyal long God and datfala Kingdom taem hem willing for dae long wanfala post for faith bilong hem. Long sem wei wea datfala bisnisman hem willing for givim evri samting wea hem garem for kasem datfala “pearl wea garem hae price,” evri samting wea Jesus duim, and dae bilong hem tu, hem for datfala Kingdom.—John 18:37.

9. Olketa fasfala disaepol bilong Jesus garem wanem fasin wea staka man no garem?

⁹ Jesus iusim laef bilong hem for datfala Kingdom and long semtaem hem hipimap wanfala smol sekson wea followim hem. Olketa hia tu barava tinghae long Kingdom. Wanfala hem Andrew, wea fastaem hem wanfala disaepol bilong John Baptaesa. Andrew and narafala disaepol bilong John, maet wanfala son bilong Zebedee wea nem bilong hem tu John, tufala herem John talemaot hao Jesus hem “Lamb bilong God.” Stretawe tufala laek savve long Jesus and olketa biliv nao. Then Andrew go nao long brata bilong hem Simon and hem sei: “Mifala faendem Messiah.” No longtaem bihaen, Simon (wea bihaen garem nem Cephas, or Peter) and Philip and fren bilong hem Nathanael, olketa tu luksavve hao Jesus hem datfala Messiah. Tru nao, Nathanael sei long Jesus: “Iu nao Son bilong God, iu nao King bilong Israel.”—John 1:35-49.

Muvim Olketa for Duim Samting

10. Long mek-tu taem wea Jesus meetim olketa disaepol, wanem nao olketa duim taem Jesus kolem olketa for kam followim hem?

¹⁰ Iumi savve markem hapi bilong Andrew, Peter, John, and olketa narawan taem olketa luksavve long datfala Messiah witim hapi bilong datfala bisnisman wea faendem datfala pearl wea garem hae price. Wanem nao bae olketa duim? Olketa Gospel no storyim staka samting abaotem wanem olketa duim stretawe bihaen olketa luksavve long Jesus. Luk olsem plande long olketa go bak long evriday living bilong olketa. Bat samting olsem sixfala month or maet wanfala year bihaen, Jesus meetim Andrew, Peter, John, and brata bilong John, James, long ples wea olketa ranem fishing bisnis long Sea Bilong Galilee.a Taem Jesus lukim olketa hem sei: “Kam followim mi, and mi bae mekem iufala fisherman for kasem olketa man.” Wanem nao olketa duim? Gospel bilong Matthew hem sei olsem abaotem Peter and Andrew: “Stretawe olketa lusim olketa net and followim hem.” Saed long James and John, iumi read: “Stretawe olketa lusim boat and dadi bilong tufala and followim hem.” Story bilong Luke talem hao olketa “lusim evri samting and followim hem.”—Matthew 4:18-22; Luke 5:1-11.

11. Why nao olketa disaepol kwiktaem for duim samting taem Jesus kolem olketa for kam followim hem?

¹¹ Waswe, wei wea olketa disaepol hia kwiktaem acceptim datfala invitation hem wei for disaed wea man no tingting gud fastaem? Nomoa! Nomata olketa go bak long famili fishing bisnis bihaen olketa meetim Jesus, samting wea olketa lukim and herem long datfala taem hem barava affectim heart and mind bilong olketa. From klosap wanfala full year hem go pas, olketa garem staka taem for ting raonem evri samting hia. Olketa mas disaed nao. Waswe, bae olketa kamap olsem datfala bisnisman taem hem faendem datfala pearl wea garem hae price, and wea heart muvim hem for “go and kwiktaem” duim samting for baem datfala pearl? Ia. Samting olketa lukim and herem muvim heart bilong olketa. Olketa luksavve hao hem taem for duim samting nao. Dastawe, olsem datfala story talem iumi, olketa no hol bak for lusim evri samting and kamap olketa follower bilong Jesus.

12, 13. (a) Plande wea lisin long Jesus duim wanem samting? (b) Wanem nao Jesus sei abaotem olketa faithful disaepol bilong hem, and wanem nao mining bilong datwan?

¹² Olketa hia wea faithful barava difren from samfala narawan wea olketa Gospel storyim bihaen! Plande pipol kasem healing or kaikai from Jesus, bat bihaen, olketa gohed long evriday living bilong olketa nomoa. (Luke 17:17, 18; John 6:26) Samfala mek excuse taem Jesus invaetem olketa for followim hem. (Luke 9:59-62) Bat olketa wea faithful olketa difren evribit, olsem Jesus hem sei bihaen: “Start long taem bilong John Baptaesa kam kasem distaem, kingdom bilong heven hem goal wea olketa man trae for kasem, and olketa wea gohed for trae hard savve kasholem hem.”—Matthew 11:12.

¹³ Wanem nao datfala toktok “trae for kasem” hem minim? Saed long Greek word wea toktok hia kam from, Vine’s Expository Dictionary of Old and New Testament Words hem sei: “Disfala word minim man forcem hemseleva.” And Bible savveman, Heinrich Meyer hem sei olsem abaotem datfala verse: “Disfala toktok hem storyim datfala strong feeling for waka hard and stragol for kasem datfala Messiah kingdom wea bae kam . . . Datfala interest saed long kingdom hem barava strong (no willing for sidaon nating and weit nomoa).” Olsem datfala bisnisman, olketa hia kwiktaem luksavve long samting wea barava spesol, and olketa lusim evri samting for datfala Kingdom.—Matthew 19:27, 28; Philippians 3:8.

Olketa Narawan Luk Aotem Tu

14. Hao nao Jesus redim olketa aposol for datfala waka for preachim Kingdom, and wanem nao kamaot from diswan?

¹⁴ Taem Jesus duim ministry bilong hem, hem trainim and helpem olketa narawan for aftarem datfala Kingdom. Fastaem, hem chusim 12-fala disaepol bilong hem for kamap olketa aposol, wea minim, olketa wea hem sendem go. Jesus talem plande instruction long hao olketa mas duim ministry bilong olketa, and tu, hem givim warning abaotem olketa problem and hard taem wea olketa bae kasem. (Matthew 10:1-42; Luke 6:12-16) For samting olsem tufala year, olketa go witim Jesus long olketa preaching gogo bilong hem and olketa fren gud witim hem. Olketa lisin long hem, lukim olketa mirakol wea hem duim, and lukim tu example wea hem showimaot. (Matthew 13:16, 17) Evri samting hia barava muvim heart bilong olketa, wea mekem olketa strong and no hol bak for aftarem Kingdom, olsem datfala bisnisman.

15. Wanem nao Jesus sei hem trufala reason why olketa follower bilong hem mas hapi?

¹⁵ Witim 12-fala aposol hia, Jesus “markem seventi moa and hem sendem olketa go, tu bae tu, for go fastaem long hem insaed long evri taon and ples wea hem bae kasem.” Hem talem olketa tu abaotem olketa test and hard taem wea olketa bae kasem and talem hao olketa mas sei long pipol: “Kingdom bilong God hem kam klosap long iufala.” (Luke 10:1-12) Taem 70 hia kam bak, olketa hapi fogud and sei long Jesus: “Lord, olketa demon tu obeyim mifala taem mifala iusim nem bilong iu.” Bat maet olketa sapraes taem Jesus talem hao olketa bae hapi go moa long future from strong wea olketa showimaot for datfala Kingdom. Hem sei olsem: “No hapi long wei wea olketa spirit stap anda long iufala, bat hapi from God raetem finis nem bilong iufala long heven.”—Luke 10:17, 20.

16, 17. (a) Wanem nao Jesus talem olketa faithful aposol bilong hem long lastfala naet wea hem stap witim olketa? (b) Toktok bilong Jesus mekem olketa feel hapi and sure long wanem samting?

¹⁶ Long lastfala naet wea Jesus stap witim olketa aposol, long Nisan 14, 33 C.E., hem startim wanfala celebration wea iumi kolem Evening Kaikai Bilong Lord and hem komandim olketa for celebratem datwan. Long datfala naet, Jesus talem 11-fala wea stap witim hem: “Iufala nao olketa wea no lusim mi taem mi kasem olketa test; and mi mekem wanfala covenant witim iufala, olsem Dadi bilong mi hem mekem wanfala covenant witim mi, for wanfala kingdom, mekem iufala savve kaikai and drink long tebol bilong mi long kingdom, and sidaon long olketa throne for judgem twelvfala tribe bilong Israel.”—Luke 22:19, 20, 28-30.

¹⁷ Olketa aposol mas barava hapi and garem feeling for satisfae taem olketa herem Jesus talem datwan! Olketa bae kasem honor and privilege wea moa hae winim eni samting olketa man savve kasem. (Matthew 7:13, 14; 1 Peter 2:9) Olsem datfala bisnisman, olketa lusim staka samting for followim Jesus and aftarem datfala Kingdom. Olketa feel sure nao hao Jesus bae no forgetim sakrifaes bilong olketa.

18. Witim 11-fala aposol, gogo, hu moa bae kasem gud samting from datfala Kingdom?

¹⁸ Olketa wea bae kasem gud samting from Kingdom hem no olketa aposol nomoa wea stap witim Jesus long datfala naet. Will bilong Jehovah hem for 144,000 man for join insaed Kingdom covenant for rul witim Jesus Christ long datfala nambawan Kingdom long heven. And tu, long wanfala vision aposol John lukim “wanfala big crowd, wea no eni man savve kaontem, . . . olketa standap front long throne and front long Lamb, . . . and sei: ‘Mifala sev thru long God bilong mifala, wea sidaon long throne, and thru long Lamb.’ ” Hem nao olketa wea bae stap long earth anda long datfala Kingdom.b—Revelation 7:9, 10; 14:1, 4.

19, 20. (a) Pipol bilong evri nation garem chance for duim wanem samting? (b) Wanem kwestin nao bae iumi story raonem long nextfala article?

¹⁹ No longtaem bifor hem go ap long heven, Jesus komandim olketa faithful follower bilong hem: “So go and mek disaepol long pipol bilong evri nation, baptaesim olketa long nem bilong Father and bilong Son and bilong holy spirit, teachim olketa for duim evri samting wea mi komandim long iufala. And mi stap witim iufala evriday go kasem end bilong disfala world.” (Matthew 28:19, 20) Diswan minim pipol from evri nation bae kamap olketa disaepol bilong Jesus Christ. Olketa tu bae aftarem datfala Kingdom—for kasem reward long heven or long earth—olsem datfala bisnisman hem aftarem datfala best pearl.

²⁰ Toktok bilong Jesus showimaot hao datfala waka for mek disaepol bae gohed go kasem “end bilong disfala world.” So long taem bilong iumi, waswe, samfala pipol stap wea olsem datfala bisnisman wea willing for givim evri samting bilong olketa for aftarem Kingdom bilong God? Bae iumi story raonem diswan long nextfala article.

[Footnote]

Aftarem “Pearl wea Garem Hae Price” Distaem

“Olketa bae talemaot disfala gud nius bilong kingdom evriwea long earth for givim witness.”—MATTHEW 24:14.

1, 2. (a) Long taem bilong Jesus, wanem nao tingting bilong olketa Jew abaotem Kingdom bilong God? (b) Wanem nao Jesus duim for olketa minim gud datfala Kingdom, and wanem nao kamaot from datwan?

KINGDOM bilong God hem wanfala subject wea olketa Jew barava interest long hem taem Jesus kam long earth. (Matthew 3:1, 2; 4:23-25; John 1:49) Bat fastaem olketa no minim hao datfala kingdom bae garem bigfala paoa and rulim full earth, and hao hem wanfala gavman wea stap long heven. (John 3:1-5) Nomata samfala follower bilong Jesus, olketa tu no barava minim wanem nao datfala Kingdom bilong God and samting wea olketa mas duim, mekem olketa kasem privilege for rul witim Christ insaed long datwan.—Matthew 20:20-22; Luke 19:11; Acts 1:6.

² Gogo, long patient wei, Jesus teachim staka samting long olketa disaepol bilong hem. Wanfala leson hia hem datfala parabol abaotem pearl wea garem hae price wea iumi storyim long lastfala article, wea mekhae long wei wea olketa mas barava trae hard for aftarem datfala Kingdom long heven. (Matthew 6:33; 13:45, 46; Luke 13:23, 24) Masbi diswan muvim heart bilong olketa bikos olsem buk bilong Acts hem storyim, no longtaem bihaen, olketa gohed and no fraet for talemaot gud nius bilong Kingdom long olketa farawe ples long earth.—Acts 1:8; Colossians 1:23.

3. Saed long taem bilong iumi, wanem nao Jesus sei abaotem datfala Kingdom?

³ Bat waswe distaem? Staka million pipol herem message abaotem wanfala paradaes long earth anda long datfala Kingdom. Long nambawan profesi bilong Jesus abaotem “end bilong disfala world,” hem talem klia hao “olketa bae talemaot disfala gud nius bilong kingdom evriwea long earth for givim witness long evri nation; and then end bae kam.” (Matthew 24:3, 14; Mark 13:10) Hem explainim tu hao nomata persecution and olketa nara barava hard samting bae kamap, kaen samting olsem bae no stopem disfala bigfala waka. Hem promis tu hao “man wea gohed strong kasem end nao bae sev.” (Matthew 24:9-13) From evri samting hia, olketa wea duim disfala waka bae needim fasin for sakrifaesim seleva and strong for aftarem samting, olsem fasin bilong datfala bisnisman long parabol bilong Jesus. Waswe, eni pipol stap distaem wea garem datkaen faith and strong for aftarem Kingdom?

Hapi Taem Man Faendem Truth

4. Hao nao truth abaotem Kingdom hem affectim pipol distaem?

⁴ Datfala bisnisman long parabol bilong Jesus hem hapi fogud taem hem faendem wanfala “pearl wea garem hae price.” Datfala hapi wea hem garem muvim hem for duim evri samting for kasem datfala pearl. (Hebrews 12:1) Long sem wei distaem, truth abaotem God and Kingdom bilong hem pullim pipol kam and muvim olketa for duim samting. Brata Alexander Macmillan storyim kaen samting olsem taem hem raet abaotem wei wea hemseleva luk aotem God and plan bilong God for olketa man insaed buk bilong hem Faith on the March. Hem sei: “Samting wea mi faendem finis, staka pipol gohed for faendem evri year. And olketa pipol hia olsem iumi nomoa. Olketa kam from evri difren nation, kala skin, living, olketa young wan, and olketa olo tu. Truth hem no for wankaen pipol nomoa. Hem pullim kam evri difren kaen pipol.”

5. Wanem gud samting nao iumi lukim long service year report for 2004?

⁵ Iumi lukim hao datfala toktok hem tru from evri year gud nius bilong Kingdom bilong God hem muvim plande handred thousand pipol wea garem honest heart for dedicatem laef bilong olketa long Jehovah and duim will bilong hem. Service year bilong 2004, wea start long September 2003 go kasem August 2004, hem showimaot sem samting. Insaed datfala year, 262,416 pipol baptaes long wata for showimaot long pablik olketa dedicate long Jehovah. Diswan hem kamap long 235 kantri, wea Olketa Jehovah’s Witness conductim 6,085,387 Bible study evri week for helpem pipol from evri difren kaen living, kantri, tribe, and languis for kasem truth from Word bilong God wea savve givim laef long man.—Revelation 7:9.

6. Wanem nao mekem namba bilong olketa niu disaepol hem gohed kamap moa big evri year?

⁶ Wanem nao mekem diswan happen? For sure Jehovah hem pullim kam pipol wea garem fasin fitim laef olowe. (John 6:65; Acts 13:48) Bat nara samting wea join witim diswan tu hem olketa wea tingim nara pipol and barava waka hard for aftarem datfala Kingdom. Taem hem 79 year, Brata Macmillan hem raet olsem: “Start long datfala fastaem wea mi lane abaotem olketa promis bilong God for olketa man wea sik and dae, hope bilong mi long datfala message from Bible hem strong kam kasem distaem. Barava long datfala taem nao mi disaed for lanem moa samting abaotem teaching insaed long Bible mekem mi savve helpem olketa narawan wea olsem mi wea luk aotem savve abaotem Olmaeti God, Jehovah, and gudfala plan bilong hem for olketa man.”

7. Wanem nao wanfala experience wea showimaot hapi and willing fasin bilong olketa wea faendem truth from Bible?

⁷ Olketa servant bilong Jehovah distaem showimaot semkaen willing fasin. Wanfala example hem Daniela from Vienna, Austria. Hem sei: “Start kam long taem mi smol pikinini, God hem best fren bilong mi. Mi laek tumas for savve long nem bilong hem bikos mi feel nogud for kolem hem ‘God’ nomoa. Bat mi no savve long nem bilong hem go kasem taem mi 17 year, taem Olketa Jehovah’s Witness kam long haos bilong mi. Olketa explainim evri samting wea mi laek for savve abaotem God. Mi faendem truth nao, and hem nambawan samting! From mi hapi fogud, mi start for preach long evriwan.” Diswan mekem olketa skulfren mekfani long hem. Daniela gohed for sei: “Bat long mi, hem olsem mi lukim Bible profesi hem fulfill, from Jesus talem hao pipol bae heitim and persecutim olketa follower bilong hem bikos long nem bilong hem. Mi barava hapi and sapraes tu.” No longtaem bihaen, Daniela dedicatem laef bilong hem long Jehovah, hem baptaes, and start for aftarem goal bilong hem for duim missionary waka. Bihaen hem marit, Daniela and hasband bilong hem Helmut start for preach long pipol long Vienna wea kam from Africa, China, Philippines, and India. Distaem, Daniela and Helmut duim missionary waka long southwest Africa.

Olketa No Givap

8. Wanem nao wanfala nambawan wei wea plande showimaot olketa lovem God and loyal long Kingdom bilong hem?

⁸ Tru nao, missionary waka hem wanfala wei wea pipol bilong Jehovah distaem showimaot olketa lovem God and loyal long Kingdom bilong hem. Olsem datfala bisnisman long parabol bilong Jesus, olketa wea duim disfala waka willing for go long olketa farawe ples for saed bilong Kingdom. Olketa missionary hia no go for faendem gud nius bilong Kingdom, bat olketa tekem datwan go long pipol long olketa farawe ples long earth, and olketa teachim and helpem pipol hia for kamap olketa disaepol bilong Jesus Christ. (Matthew 28:19, 20) Long plande kantri, olketa mas deal witim olketa barava hard samting. Bat olketa kasem bigfala blessing for wei wea olketa gohed strong.

9, 10. Wanem nao samfala gudfala experience bilong olketa missionary long olketa farawe ples, olsem Central African Republic?

⁹ Wanfala example hem long Central African Republic. Last year attendance long Memorial bilong dae bilong Christ hem 16,184, wea hem sevenfala taems winim namba bilong olketa pablisa long datfala kantri. From plande part long datfala kantri no garem electric, pipol waswas kaleko and duim kaen waka olsem aotsaed andanit long olketa tree. So hem nao wei wea olketa missionary duim waka bilong olketa—olketa conductim olketa Bible study aotsaed andanit olketa tree. Hem gud bikos hem no hot tumas and hem no dark olsem insaed long haos, bat nara gud samting tu kamaot from diswan. Pipol long there barava tinghae long Bible, and laekem tumas for storyim olketa Bible subject. Plande taem, pipol wea wakabaot go pas lukim diswan and join insaed long study.

¹⁰ Dastawe taem wanfala missionary conductim Bible study aotsaed, wanfala young man wea stap klosap hem kam long hem and talem hao from no eniwan kam yet for story long hem, datfala missionary shud kam and studyim Bible witim hem tu. Missionary hia willing nomoa, and datfala young man hem gohed gud tumas distaem. Long datfala kantri, plande taem police stopem olketa Witness long road, no for orderim olketa go long kot or givim fine, bat for kasem olketa niu Wastaoa and Wekap! magasin or for talem thankiu for wanfala article wea olketa readim wea hem gud tumas.

11. Nomata olketa kasem samfala hard samting, hao nao olketa wea duim missionary waka for longfala taem ting long waka bilong olketa?

¹¹ Plande wea start for duim missionary waka 40 or 50 year bifor gohed faithful long datfala waka kam kasem distaem. Olketa nao nambawan example bilong faith and fasin for gohed strong for iumi evriwan followim! Insaed 42 year wea go pas finis, wanfala hasband and waef duim missionary waka tugeta long thrifala difren kantri. Datfala hasband hem sei: “Mifala kasem samfala hard samting. Olsem example, mifala deal witim malaria for 35 year. Nomata olsem, no enitaem mifala sorre mifala disaed for duim missionary waka.” Waef bilong hem sei: “Mifala evritaem garem staka samting for thankiu long hem. Field ministry hem givim bigfala hapi, and hem isi for startim olketa Bible study. Taem iu lukim olketa student kam long olketa meeting and iu savve gud long each other, hem olsem wanfala famili wea hipap tugeta.”

Olketa “Ting Long Evri Samting Hia Olsem Samting Nating”

12. Hao nao wanfala man savve showimaot hem barava tinghae long Kingdom?

¹² Taem datfala bisnisman faendem datfala pearl wea garem hae price, “hem go and kwiktaem salem evri samting wea hem garem and baem datwan.” (Matthew 13:46) Hem wei bilong olketa wea barava tinghae long Kingdom for willing for lusim evri samting for kasem datfala Kingdom. Aposol Paul, wea luk forward for kasem glory witim Christ long Kingdom bilong God, hem sei: “Mi ting long evri samting hia olsem samting nating bikos long nambawan savve abaotem Christ Jesus, Lord bilong mi. Bikos long hem mi lusim evri samting and mi ting long olketa samting hia olsem rabis samting nomoa, mekem mi savve kasem Christ.”—Philippians 3:8.

13. Hao nao wanfala man long Czech Republic showimaot hem lovem Kingdom?

¹³ Olsem tu, plande pipol distaem mekem bigfala change long laef bilong olketa for kasem olketa blessing wea kam from Kingdom. Olsem example, long October 2003, hedmasta bilong wanfala skul long Czech Republic wea hem 60 year hem kasem datfala Bible study buk Savvy wea Lead Go Long Laef Olawe. Stretawe bihaen hem readim finis, hem askem Olketa Jehovah’s Witness long area bilong hem for wanfala Bible study. Hem muv ahed gud and no longtaem bihaen hem start for attendim evri meeting. Bat waswe long plan bilong hem for kamap mayor long taon and then kasem position olsem bigman long politik? Hem disaed for iusim full strong bilong hem for duim wanfala difren waka—for talemaot gud nius bilong Kingdom. Hem sei, “Olketa student bilong mi acceptim staka Bible literature from mi.” Hem showimaot hem dedicate finis long Jehovah taem hem baptaes long wata long wanfala convention long July 2004.

14. (a) Gud nius bilong Kingdom hem muvim plande million pipol for duim wanem samting? (b) Wanem nao olketa important kwestin wea iumi wanwan savve askem iumiseleva?

¹⁴ Plande million nara pipol raonem full world duim semkaen samting taem olketa acceptim gud nius bilong Kingdom. Olketa lusim disfala wicked world, lusim oldfala fasin bilong olketa, pipol wea olketa kaban witim bifor, and samting wea olketa aftarem long disfala world. (John 15:19; Ephesians 4:22-24; James 4:4; 1 John 2:15-17) Why nao olketa duim evri samting hia? Hem from olketa tinghae long olketa blessing bilong Kingdom bilong God olsem hem barava winim eni samting bilong disfala world distaem. Waswe, iu feel olsem tu abaotem gud nius bilong Kingdom? Waswe, datwan muvim iu for changem laef bilong iu and olketa standard and goal for fitim samting wea Jehovah laekem? Sapos iu duim olsem, bae iu kasem staka blessing distaem, and long future.

Harvest Klosap Kasem End Bilong Hem

15. Olketa Bible profesi sei pipol bilong God bae duim wanem samting long olketa last day?

¹⁵ Man wea raetem psalm hem sei: “Pipol bilong iu bae willing for givim olketa seleva long day bilong iu for faet.” Insaed disfala sekson hem ‘olketa young man wea olsem olketa dew drop’ and “wanfala bigfala army” bilong “olketa woman wea talemaot gud nius.” (Psalm 68:11; 110:3) Wanem nao kamaot from wei wea pipol bilong Jehovah—olketa man and woman, young and olo—waka hard and willing for givim seleva long olketa last day distaem?

16. Storyim wanfala example wea showimaot hao olketa wea worshipim God trae hard for helpem nara pipol lane abaotem Kingdom.

¹⁶ Long India, wanfala pioneer, wea minim hem full-taem for talemaot Kingdom, hem ting raonem hao nao winim tu million pipol wea earpas long datfala kantri bae kasem help for lane abaotem Kingdom. (Isaiah 35:5) Hem disaed for duim wanfala course long Bangalore for lanem saen languis. Long there hem sharem Kingdom hope witim plande pipol wea earpas, and samfala Bible study grup kamap. Insaed tu-thri week, winim twelvfala pipol start for kam long olketa meeting long Kingdom Hall. Bihaen, long wanfala marit feast, datfala pioneer hem meetim wanfala young man from Calcutta wea earpas wea askem staka kwestin and barava interest for savve moa abaotem Jehovah. Bat hem garem wanfala problem. Datfala young man mas go bak long Calcutta, wea hem samting olsem 1,600 kilometer, for go long college, and no eni Witness long there savve long saen languis. Hem ask strong, gogo, dadi bilong hem agree for letem hem go skul long Bangalore and no long Calcutta, mekem hem savve gohed long Bible study bilong hem. Hem muv ahed gud, and bihaen samting olsem wanfala year, hem dedicatem laef bilong hem long Jehovah. Bihaen datwan, hem study witim samfala pipol wea earpas, and wanfala wea hem fren witim taem tufala smol pikinini. Distaem branch office long India hem mekem arrangement for olketa pioneer for lanem saen languis for help long datfala waka.

17. Storyim samting wea barava encouragem iu from datfala service year report for 2004 long page 19 go kasem 22.

¹⁷ Long page 19 go kasem 22 bilong disfala magasin, service year report bilong Olketa Jehovah’s Witness for 2004 hem stap. Lukluk long datwan for lelebet taem, and lukim pruv wea showimaot pipol bilong Jehovah raonem world distaem barava busy for aftarem datfala “pearl wea garem hae price.”

Gohed “Luk Aotem Fastaem Kingdom”

18. Wanem nao Jesus no talem long datfala parabol abaotem bisnisman, and why nao olsem?

¹⁸ Iumi tingim moa parabol bilong Jesus abaotem datfala bisnisman. Iumi lukim hao Jesus no storyim wanem datfala man bae duim for kasem need bilong hem bihaen hem salem finis evri samting wea hem garem. Maet samfala ask: ‘Hao nao bae datfala bisnisman kasem kaikai, kaleko, and ples for stap from hem no garem eni samting nao? Hao nao bae datfala best pearl helpem hem?’ For man wea no tingim spiritual samting, olketa kwestin hia fitim. Bat Jesus encouragem olketa disaepol bilong hem for ‘gohed for luk aotem fastaem kingdom and raeteous fasin bilong hem, and olketa bae kasem olketa narafala samting hia.’ (Matthew 6:31-33) Main point bilong datfala parabol hem hao iumi mas worshipim God witim full heart and mas showimaot strong for Kingdom bilong hem. Waswe, iumi savve lanem samting from diswan?

19. Wanem nao main leson iumi savve lanem from parabol bilong Jesus abaotem datfala pearl wea garem hae price?

¹⁹ Nomata iumi just lanem datfala nambawan gud nius or iumi story abaotem datfala Kingdom and aftarem hem for longfala taem finis, iumi mas gohed for mekem Kingdom main samting wea iumi interest long hem. Iumi stap long hardfala taem, bat iumi garem olketa strongfala reason for bilivim hao samting wea iumi aftarem hem tru and barava nambawan—olsem datfala pearl wea datfala bisnisman hem faendem. Samting wea happen long world distaem and olketa Bible profesi wea fulfill pruvim hao iumi stap long “taem bilong end bilong disfala world.” (Matthew 24:3) Olsem datfala bisnisman, iumi mas showimaot from heart hao iumi strong for Kingdom bilong God and hapi long privilege bilong iumi for talemaot gud nius.—Psalm 9:1, 2.