“Olketa Man Sei Mi Hu?”

HEM taem bilong Christmas moa. Pipol raonem world celebratem wanfala birthday. Birthday bilong hu? Waswe, Son bilong God or wanfala Jew wea strong long worship wea ting for stretem main religion long area bilong hem? Waswe, hem birthday bilong wanfala man wea defendim poor pipol, man wea barava againstim Rul Bilong Rome wea mekem olketa killim hem dae, or maet hem wanfala wise man wea mekhae long savve and wisdom bilong man seleva? Diswan mekem iu barava fit for ting, ‘Jesus Christ hem really hu nao?’

Jesus seleva barava interest long ansa bilong pipol long datfala kwestin. Wantaem hem askem olketa disaepol bilong hem “Olketa man sei mi hu?” (Mark 8:27) Why nao kwestin hia kamap? Planti stop for followim hem finis. Luk olsem planti konfius and feel nogud bihaen hem rejectim wei wea olketa trae for mekem hem kamap king. And tu, Jesus no givim eni saen from heven for pruvim hu nao hem taem olketa enemy bilong hem askem hem for duim. So for ansarem datfala kwestin, wanem nao olketa aposol bilong hem sei abaotem hu nao hem? Olketa talem samfala tingting wea pipol garem: “Samfala sei John datfala Baptaesa, nara pipol sei Elijah, and samfala moa sei

Jeremiah or wanfala long olketa profet.” (Matthew 16:13, 14) Olketa nating talem planti nogud toktok abaotem Jesus wea gogo raon long datfala taem long Palestine—olsem hem man for tokspoelem man, conman, giaman profet, and krangge man.

Olketa Difren Tingting Abaotem Jesus

Sapos Jesus askem disfala kwestin distaem, maet hem changem lelebet: “Olketa savveman sei mi hu?” Olsem long datfala taem, distaem tu planti difren idea stap. Olsem David Tracy bilong University bilong Chicago hem talem, “difren pipol garem planti difren idea and wei for minim samting abaotem Jesus and wanem hem talem and duim.” Insaed long 100 year wea go pas, olketa savveman lukluk gud long olketa difren samting olsem living, studyim wei bilong pipol, and olketa raeting taem olketa trae for ansarem kwestin abaotem hu nao Jesus. Gogo, wanem nao tingting bilong olketa abaotem hu nao Jesus?

Samfala savveman go ahed for sei Jesus bilong history hem wanfala Jew profet wea profesi abaotem end bilong world and wea encouragem fasin for repent. Bat, olketa hol bak for kolem hem Son bilong God, Messiah, and Man for baem bak olketa man. Planti savveman daotem story bilong Bible hao Jesus hem start kam from heven and resurrection bilong hem. Long narafala pipol, Jesus hem man wea thru long gudfala teaching and example bilong living mekem kamap samfala religion wea gogo kamap part bilong Christian wei. And olsem olketa talem insaed Theology Today, narafala pipol tingim Jesus olsem “wanfala cynic, wanfala wise man wea gogo raon, or wanfala poor man; man for organizem community, man for tokdaonem order bilong community, or man wea savve hao for deal witim olketa criminal wea stap midolwan olketa poor and raf vilij bilong Palestine.”

Samfala kaen tingting wea moa difren stap tu. Idea wea Jesus hem wanfala blak man kamap insaed olketa rap music, pablik saen, and long dance tu.a Nara pipol tingse Jesus hem wanfala woman. Long summer bilong 1993, pipol wea visitim Orange County Fair long California lukim image bilong “Christie,” wanfala naked, woman “Christ” long kros. Klosap semtaem long New York, “Christa”—woman “Jesus” wea olketa hangem long cross—stap for evriwan lukim. Tufala image hia mekem planti raoa kamap. And long start bilong 1999, pipol savve baem wanfala buk “abaotem love wea Boy Jesus and dog bilong hem, Angel, garem for each other.” Olsem buk storyim, wei wea tufala fren hem samting wea savve “encouragem man long spiritual wei and showimaot wei wea boy and dog redy for givim laef bilong tufala for each other.”

Waswe, Hem Really Important for Savve?

Why nao iu mas interest long hu nao Jesus bifor and distaem? Wanfala samting hem bikos, olsem Napoleon talem,“Jesus Christ affectim and leadim olketa wea stap anda long Hem nomata olketa no lukim Hem.” Thru long strongfala wei wea hem teach and living bilong hem, Jesus barava affectim laef bilong planti billion pipol for klosap tu thousand year. Wanfala man for raet hem sei: “Evri army wea march finis, and evri navy wea olketa wakem finis, and evri parliament meeting wea olketa holem finis, and evri king wea rul finis, sapos iumi putim tugeta evri samting hia hem no affectim laef bilong olketa man long earth long bigfala wei olsem.”

Winim datwan, iu need for savve hu nao Jesus long bifor and distaem bikos hem bae helpem iu long future. Iu garem chance for stap anda long wanfala gavman wea start for rul long heven finis—hem nao Kingdom bilong God anda long Jesus. Disfala earth wea garem staka trabol bae kamap gud and naes moa anda long lead bilong Jesus. Bible profesi promisim iumi hao Kingdom bilong Jesus bae feedim olketa wea hangre, kea for poor pipol, healim olketa wea sik, and resurrectim pipol wea dae.

For sure bae iu want for savve wanem kaen man nao bae rul insaed diskaen gavman wea pipol needim tumas. Nextfala article bae helpem iu for luksavve long datfala really Jesus.

[Footnote]