Evriwan Long Kongregeson Praisem Jehovah

“Mi bae talemaot nem bilong iu long olketa brata bilong mi; insaed long datfala kongregeson mi bae . . . praisem iu.”—HEBREWS 2:12.

1, 2. Why nao kongregeson hem barava helpem iumi, and wanem nao main reason why hem stap?

START from taem bifor kam, famili arrangement hem mekem pipol stap gud tugeta and feel sef. Bat Bible storyim narafala arrangement wea mekem staka pipol evriwea long world enjoyim barava spesol wei for fren gud witim narawan and for feel sef. Datwan nao hem Christian kongregeson. Nomata sapos famili bilong iu fren gud and sapotim each other or nomoa, iu shud luksavve long samting God provaedem thru long kongregeson and tinghae long datwan. Sapos iu kaban distaem witim wanfala kongregeson bilong Olketa Jehovah’s Witness, iu savve finis long wei wea man savve fren gud and stap gud witim olketa narawan.

² Kongregeson hem no olsem olketa nara grup long community wea mekem chance for pipol wea interest long sem samting for kaban tugeta, olsem wanfala youth or sports club. Bat main reason why kongregeson arrangement hem stap hem for praisem Jehovah God. And datwan hem semsem tu long taem bifor kam. Long Psalm 35:18, hem sei: “Mi bae praisem iu long big kongregeson; midolwan plande pipol mi bae praisem iu.” Olsem tu, Psalm 107:31, 32 givim disfala encouragement: “Hem fitim for pipol talem thankiu long Jehovah for loving-kaeness bilong hem and for olketa nambawan samting wea hem duim for olketa man. And hem fitim for praisem hem long kongregeson bilong olketa pipol.”

3. Olsem Paul talem, wanem nao kongregeson duim?

³ Datfala Christian man aposol Paul mekhae long narafala important waka bilong kongregeson taem hem story abaotem “famili bilong God, wea hem kongregeson bilong God wea laef and wanfala post wea sapotim truth.” (1 Timothy 3:15) Wanem kongregeson nao Paul story abaotem? Bible iusim datfala word “kongregeson” taem hem storyim olketa wanem samting? And hao nao kongregeson shud affectim laef and future bilong iumi? For ansarem olketa kwestin hia, firstaem bae iumi lukluk long olketa difren wei wea Word bilong God iusim datfala word “kongregeson.”

4. Plande taem Bible iusim datfala word “kongregeson” insaed Hebrew Scripture for minim wanem?

⁴ Hebrew word wea plande taem olketa transleitim “kongregeson” savve minim tu “hipap tugeta.” (Deuteronomy 4:10; 9:10) Man wea raetem psalm iusim disfala word “kongregeson” taem hem storyim olketa angel long heven, and Bible iusim disfala word taem hem storyim wanfala grup bilong pipol wea wicked tu. (Psalm 26:5; 89:5-7) Bat plande taem insaed Hebrew Scripture datwan savve minim olketa Israelite. God talem hao Jacob bae “kamap wanfala kongregeson bilong olketa pipol,” and datwan nao samting wea happen. (Genesis 28:3; 35:11; 48:4) Jehovah chusim olketa Israelite for kamap “kongregeson bilong Jehovah,” “datfala kongregeson bilong tru God.”—Numbers 20:4; Nehemiah 13:1; Joshua 8:35; 1 Samuel 17:47; Micah 2:5.

5. Wanem Greek word nao olketa plande taem transleitim “kongregeson,” and disfala word savve minim wanem?

⁵ Long Greek languis datfala word “kongregeson” hem ek·kle·siʹa, wea kam from tufala Greek word wea minim “aot” and “kolem kam.” Hem savve minim wanfala grup wea hipap for duim samting wea no join witim religion, olsem “datfala sekson” wea Demetrius leadim for againstim Paul taem hem stap long Ephesus. (Acts 19:32, 39, 41) Bat plande taem datfala word long Bible hem minim Christian kongregeson. Samfala Bible iusim word “church” for datfala Greek word, bat The Imperial Bible-Dictionary talem hao “no enitaem long Niu Testament . . . datwan hem minim building wea olketa Christian hipap insaed for worship.” Bat interesting samting nao, Christian Greek Scripture savve iusim datfala word “kongregeson” for minim fofala difren samting.

Anointed Kongregeson Bilong God

6. Wanem nao David and Jesus duim insaed long kongregeson?

⁶ Aposol Paul iusim toktok bilong David long Psalm 22:22 and mekem diswan for olsem toktok bilong Jesus. Hem raet olsem: “‘Mi bae talemaot nem bilong iu long olketa brata bilong mi; insaed long datfala kongregeson mi bae singsing for praisem iu.’ Dastawe [Jesus] mas kamap olsem ‘olketa brata’ bilong hem long evri wei, mekem hem savve kamap wanfala hae priest wea showimaot mercy and wea faithful saed long olketa samting wea join witim God.” (Hebrews 2:12, 17) David praisem God insaed long datfala kongregeson bilong Israel bifor. (Psalm 40:9) Bat wanem nao Paul minim taem hem sei Jesus praisem God “insaed long datfala kongregeson”? Jesus praisem God insaed long wanem kongregeson?

7. Wanem nao main wei wea Christian Greek Scripture iusim datfala word “kongregeson”?

⁷ Samting wea iumi readim long Hebrews 2:12, 17 hem important. Hem showimaot hao Christ tu hem member bilong wanfala kongregeson wea hem talemaot nem bilong God long olketa brata bilong hem. Hu nao olketa brata hia? Hem olketa wea part bilong “seed bilong Abraham,” wea hem nao olketa anointed brata bilong Christ wea “share long hope for go long heven.” (Hebrews 2:⁠16–3:1; Matthew 25:40) Tru nao, main wei wea Christian Greek Scripture iusim datfala word “kongregeson” hem for datfala sekson bilong olketa anointed follower bilong Christ. Olketa 144,000 anointed Christian hia nao “datfala kongregeson bilong olketa firstborn wea nem bilong olketa stap finis long heven.”—Hebrews 12:23.

8. Wanem nao Jesus talem wea showimaot datfala Christian kongregeson bae kamap?

⁸ Jesus talem samting wea showimaot hao disfala Christian “kongregeson” bae kamap. Klosap wanfala year bifor hem dae, hem talem Peter olsem: “Iu nao Peter, and mi bae buildim kongregeson bilong mi antap long disfala big ston, and olketa gate bilong Hades bae no winim hem.” (Matthew 16:18) Peter and Paul barava minim stret hao Jesus nao datfala big ston. Peter raetem hao olketa wea kamap “olketa ston wea laef” bilong datfala spiritual haos wea stap antap long datfala big ston, Christ, olketa nao “wanfala spesol samting [for] talemaot evriwea olketa nambawan fasin” bilong Datwan wea kolem olketa kam long hem.—1 Peter 2:4-9; Psalm 118:22; Isaiah 8:14; 1 Corinthians 10:1-4.

9. Wanem taem nao kongregeson bilong God hem start?

⁹ Wanem taem nao God start for hipimap olketa pipol wea “spesol samting” bilong hem for kamap Christian kongregeson? Diswan hem long Pentecost 33 C.E., taem God givim holy spirit long olketa disaepol wea hipap long Jerusalem. Bihaen datwan, Peter givim barava nambawan tok long wanfala grup bilong olketa Jew and proselyte. Plande long olketa barava feel sorre and shame from wei wea olketa rejectim Jesus and hem dae. Olketa repent and baptaes. Bible storyim hao thri thousand nao duim olsem, and from datwan olketa kamap part bilong datfala niu kongregeson bilong God wea namba bilong olketa gohed for kamap staka. (Acts 2:1-4, 14, 37-47) Reason why hem kamap moa big hem bikos plande moa Jew and proselyte acceptim wei wea datfala nation bilong Israel hem no kongregeson bilong God nao. Bat olketa anointed Christian bilong datfala spiritual “Israel bilong God” nao hem datfala tru kongregeson bilong God.—Galatians 6:16; Acts 20:28.

10. Wanem nao position bilong Jesus saed long kongregeson bilong God?

¹⁰ Plande taem long Bible hem storyim Jesus separate from olketa anointed Christian, olsem disfala toktok “saed long Christ and datfala kongregeson.” Jesus hem Hed bilong disfala kongregeson bilong olketa Christian wea spirit anointim olketa. Paul talem hao God “mekem [Jesus] hed ovarem evri samting long kongregeson, wea hem nao body bilong hem.” (Ephesians 1:22, 23; 5:23, 32; Colossians 1:18, 24) Distaem, wanfala smol sekson nomoa bilong olketa anointed Christian bilong disfala kongregeson stap long earth. Nomata olsem, iumi savve sure hao Hed bilong olketa, Jesus Christ, barava lovem olketa. Long Ephesians 5:25, Paul story abaotem love bilong Jesus for olketa. Hem sei: “Christ tu hem lovem kongregeson and givim laef bilong hem for datwan.” Jesus lovem olketa bikos olketa gohed for givim “wanfala sakrifaes bilong praise long God evritaem, wea hem nao frut bilong mouth wea talemaot nem bilong hem long pablik,” olsem hem duim taem hem stap long earth tu.—Hebrews 13:15.

Olketa Nara Wei wea Bible Iusim Datfala Word “Kongregeson”

11. Wanem nao mek-tu wei wea Christian Greek Scripture iusim datfala word “kongregeson”?

¹¹ Samfala taem, datfala word “kongregeson” insaed Bible no minim full sekson bilong 144,000 anointed Christian wea insaed “datfala kongregeson bilong God.” Olsem example, Paul raet olsem long olketa Christian long Corinth: “No duim eni samting wea mekem olketa Jew, olketa Greek, and kongregeson bilong God stambol.” (1 Corinthians 10:32) Sapos wanfala Christian long Corinth duim samting wea no stret, maet datwan savve mekem samfala narawan stambol. Bat waswe, datwan savve mekem evri Greek, Jew, or anointed Christian stambol kam kasem distaem? Barava nomoa nao. So luk olsem “kongregeson bilong God” long disfala verse hem olketa Christian wea stap long datfala taem or long eni narafala taem. So maet iumi savve storyim wei wea God leadim, sapotim, and blessim kongregeson, wea minim evri Christian long enitaem, nomata wea nao olketa stap. Or maet iumi savve storyim hapi and peace wea stap insaed kongregeson bilong God distaem, wea minim evri Christian brata and sista long world.

12. Wanem nao mek-thri wei wea Bible iusim datfala word “kongregeson”?

¹² Mek-thri wei wea Bible iusim datfala word “kongregeson” hem for evri Christian wea stap long wanfala area. Bible hem sei: “Datfala kongregeson long full Judea, Galilee, and Samaria kasem wanfala taem bilong peace.” (Acts 9:31) Nomata plande grup bilong olketa Christian stap long Judea, Galilee, and Samaria, Bible kolem olketa grup long datfala big area, “datfala kongregeson.” Taem iumi tingim hao staka baptaes long Pentecost 33 C.E. and bihaen datwan tu, maet tu-thri grup bilong olketa Christian nao hipap evritaem long Jerusalem. (Acts 2:41, 46, 47; 4:4; 6:1, 7) Herod Agrippa I rulim Judea go kasem taem hem dae long 44 C.E., and hem klia from samting wea 1 Thessalonians 2:14 talem hao plande kongregeson stap long Judea long 50 C.E. So taem iumi read abaotem wei wea Herod hem “persecutim samfala long kongregeson,” maet datwan minim hem duim olsem long plande grup wea hipap long Jerusalem.—Acts 12:1.

13. Wanem nao mek-foa wei wea Bible plande taem iusim datfala word “kongregeson”?

¹³ Mek-foa wei wea Bible plande taem iusim datfala word “kongregeson” hem for olketa Christian bilong wanfala kongregeson nomoa, wea maet datwan hem olketa wea hipap insaed wanfala haos. Paul story abaotem “olketa kongregeson long Galatia.” Winim wanfala kongregeson stap long datfala province bilong Rome wea big tumas. Tufala taem Paul hem sei “olketa kongregeson” taem hem story abaotem Galatia. Olketa kongregeson hia hem olketa long Antioch, Derbe, Lystra, and Iconium. Olketa man wea kasem olketa mark insaed Bible serve olsem olketa overseer insaed olketa kongregeson hia. (1 Corinthians 16:1; Galatians 1:2; Acts 14:19-23) Bible showimaot hao evri kongregeson hia hem “olketa kongregeson bilong God.”—1 Corinthians 11:16; 2 Thessalonians 1:4.

14. Wanem nao iumi savve lanem from wei wea samfala scripture iusim datfala word “kongregeson”?

¹⁴ Masbi samfala grup wea hipap for olketa Christian meeting hem smol nomoa, and olketa fit for hipap insaed wanfala haos. Nomata olsem, Bible iusim word “kongregeson” taem hem storyim olketa grup hia. Samfala wea iumi savve abaotem hem olketa kongregeson wea hipap insaed haos bilong Aquila and Prisca, Nympha, and Philemon. (Romans 16:3-5; Colossians 4:15; Philemon 2) Diswan shud encouragem olketa kongregeson distaem wea smol and wea maet hipap evritaem insaed wanfala haos nomoa. Jehovah acceptim olketa smol kongregeson olsem long first century, and hem acceptim olketa distaem tu. Hem iusim spirit bilong hem for leadim and sapotim olketa.

Olketa Kongregeson Praisem Jehovah

15. Holy spirit mekem samfala long olketa kongregeson long first century fit for duim wanem samting?

¹⁵ Olsem iumi storyim finis, Jesus fulfillim toktok long Psalm 22:22 long wei wea hem praisem God insaed long datfala kongregeson. (Hebrews 2:12) Olketa wea faithful for followim hem mas duim sem samting tu. Long first century, taem holy spirit anointim olketa tru Christian for kamap olketa son bilong God and from datwan olketa kamap olketa brata bilong Christ, spirit start for waka insaed long samfala long wanfala spesol wei. Spirit givim paoa long olketa for duim olketa samting. Samfala samting wea showimaot man garem datfala spirit hem spesol toktok or savve wea wise, paoa for healim man or talemaot eni message bilong God, or wei for savve story long olketa difren languis.—1 Corinthians 12:4-11.

16. Why nao samfala kasem paoa from spirit for duim olketa mirakol?

¹⁶ Paul talem olsem abaotem wei for toktok long difren languis: “Bae mi singim praise from paoa bilong spirit, bat tu, bae mi singim praise wea mi savve minim.” (1 Corinthians 14:15) Hem luksavve hao hem important for olketa narawan minim toktok bilong hem, mekem datwan savve helpem olketa. Goal bilong Paul hem for praisem Jehovah insaed long kongregeson. Hem encouragem olketa narawan wea spirit givim paoa long olketa for “gohed for iusim datwan for strongim kongregeson,” wea datwan minim kongregeson long ples wea spirit givim paoa long olketa. (1 Corinthians 14:4, 5, 12, 23) Tru tumas, Paul hem interest long each kongregeson and hem savve hao evri Christian garem chance for praisem God insaed evri kongregeson hia.

17. Saed long olketa kongregeson distaem, wanem nao iumi savve sure long hem?

¹⁷ Jehovah gohed for iusim and sapotim kongregeson bilong hem. Hem blessim sekson bilong olketa anointed Christian wea stap long earth distaem. Datwan hem showaot long wei wea pipol bilong God kasem staka spiritual kaikai distaem. (Luke 12:42) Hem blessim full sekson bilong olketa brata evriwea long world. And tu, hem blessim each kongregeson, wea hem nao ples wea iumi savve praisem Creator bilong iumi thru long samting iumi duim and olketa koment iumi givim for strongim faith bilong narawan. Long kongregeson iumi kasem education and training wea savve helpem iumi for praisem God long olketa taem wea iumi no hipap witim kongregeson bilong iumi.

18, 19. Wanem nao olketa faithful Christian insaed evri kongregeson laek for duim?

¹⁸ Tingim samting wea aposol Paul encouragem olketa Christian long kongregeson long Philippi, Macedonia, for duim. Hem sei: “Diswan nao mi gohed for prea for hem, for [iu] savve showimaot olketa raeteous fasin wea datwan hem from Jesus Christ, mekem datwan givim glory and praise long God.” Insaed datwan hem for storyim faith wea olketa garem long Jesus and nambawan hope bilong olketa long olketa nara pipol wea no part bilong Christian kongregeson. (Philippians 1: 9-11; 3:8-11) Olsem tu, Paul encouragem olketa Christian: “Thru long [Jesus] iumi mas givim wanfala sakrifaes bilong praise long God evritaem, wea hem nao frut bilong mouth wea talemaot nem bilong hem long pablik.”—Hebrews 13:15.

¹⁹ Waswe, iu hapi for praisem God ‘insaed long kongregeson,’ olsem Jesus duim, and for iusim mouth bilong iu for praisem Jehovah long olketa wea no praisem and savve long hem? (Hebrews 2:12; Romans 15:9-11) Ansa bilong iumi savve depend long hao iumi ting long waka wea kongregeson duim saed long plan bilong God. Long next article, bae iumi storyim wei wea Jehovah leadim and iusim olketa kongregeson distaem and hao kongregeson shud affectim long laef bilong iumi distaem.

Waswe, Iu Remember?

• Long wanem wei nao datfala “kongregeson bilong God,” wea hem nao olketa anointed Christian, hem start?

• Wanem nao thrifala wei wea Bible iusim datfala word “kongregeson”?

• Wanem nao David, Jesus, and olketa Christian long first century laek for duim insaed long kongregeson, and hao nao diswan shud affectim iumi?

[Piksa long page 5]

Jesus hem faondeson bilong wanem kongregeson?

[Piksa long page 7]

Olketa grup bilong olketa Christian wea hipap hem “olketa kongregeson bilong God”

[Piksa long page 8]

Olsem olketa Christian long Benin, iumi savve praisem Jehovah midolwan long olketa wea hipap