Wanfala Sekson and Wanfala Man for Lukaftarem Olketa
“Iufala wea followim mi bae sidaon tu long twelvfala throne and judgem twelvfala tribe bilong Israel.”—MATT. 19:28.
1. Hao nao tingting bilong Jehovah abaotem pipol wea kam from laen bilong Abraham? Why nao diswan no minim Jehovah nating tingim nara pipol?
JEHOVAH lovem Abraham dastawe hem lovem olketa wea born kam long laen bilong Abraham and hem faithful long olketa. Hem ting long nation bilong Israel wea kam from laen bilong Abraham olsem ‘spesol pipol’ bilong hem for winim 1,500 year. (Readim Deuteronomy 7:6.) So waswe, datwan minim Jehovah nating tingim pipol from olketa nara nation? Nomoa. Long datfala taem, Jehovah letem pipol wea no Israelite wea laek worshipim hem for joinim spesol pipol bilong hem. Long tingting bilong Jehovah, olketa hia wea followim religion bilong olketa Jew kamap part bilong datfala nation tu. Olketa Israelite mas ting long olketa olsem brata bilong olketa. (Lev. 19:33, 34) Pipol hia mas obeyim evri law bilong Jehovah tu.—Lev. 24:22.
2. Wanem nao Jesus talem wea mekem olketa Jew sapraes? Diswan mekem iumi tingim olketa wanem kwestin?
2 Bat Jesus talem samting wea mekem olketa Jew long taem bilong hem sapraes. Hem talem olketa: “God bae tekem kingdom bilong hem from iufala and bae givim long pipol wea duim olketa samting wea hem laekem.” (Matt. 21:43) Hu nao bae insaed long disfala niu nation, and hao nao disfala change affectim iumi distaem?
Niu Nation
3, 4. (a) Wanem nao aposol Peter talem abaotem disfala niu nation? (b) Hu nao insaed disfala niu nation?
3 Aposol Peter talem hu nao insaed disfala niu nation. Hem talem olketa Christian: “ ‘God chusim iufala for kamap pipol bilong hem. Iufala bae kamap king and priest and holy pipol bilong hem. Iufala nao spesol pipol bilong God wea mas talem pipol long evri ples abaotem olketa nambawan wei’ bilong God. God kolem iufala for kamaot from dark ples for go long nambawan laet bilong hem.” (1 Pet. 2:9) Olsem Bible talem finis, olketa Jew wea bilivim Jesus hem Messiah olketa nao first wan insaed datfala niu nation. (Dan. 9:27a; Matt. 10:6) Bihaen datwan, staka pipol wea no Israelite tu kamap part bilong disfala nation, bikos Peter hem sei: “Long bifor iufala no pipol bilong God, bat distaem iufala kamap pipol bilong God.”—1 Pet. 2:10.
4 Peter story long hu? Long start bilong leta bilong hem, hem sei: “From Jesus Christ hem dae and laef bak, God mekem iumi born moa and garem hope wea no savve finis. Disfala laef wea hem redyim for iufala long heven hem no savve finis, hem barava klin, and hem stap for olowe.” (1 Pet. 1:3, 4) So disfala niu nation hem olketa anointed Christian wea garem hope for go long heven. Olketa nao “datfala Israel bilong God.” (Gal. 6:16) Aposol John lukim long vision namba bilong “datfala Israel bilong God” hem 144,000. “God baem olketa from pipol long world mekem olketa nao kamap olketa firstfala frut for God and for datfala Pikinini Sheepsheep.” Olketa hia bae waka olsem “olketa priest” and “rul olsem king witim [Jesus] for wan thousand year.”—Rev. 5:10; 7:4; 14:1, 4; 20:6; Jas. 1:18.
Waswe, Nation Bilong Israel Bifor Savve Piksarem Tu Olketa Nara Christian?
5. (a) “Israel bilong God” hem minim hu? (b) Why nao disfala toktok “Israel” savve piksarem tu olketa nara Christian?
5 Long Galatians 6:16, “Israel bilong God” hem minim olketa anointed Christian nomoa. Bat waswe, samfala taem nation bilong Israel bifor savve piksarem tu olketa nara Christian? Iumi savve long ansa taem iumi readim wanem Jesus talem long olketa faithful aposol bilong hem. Hem sei: “Mi promis for iufala bae rul long wanfala kingdom olsem Dadi bilong mi tu hem promis for mi bae rul long wanfala kingdom, mekem iufala savve kaikai and drink long tebol bilong mi insaed long kingdom bilong mi, and sidaon long olketa throne for judgem twelvfala tribe bilong Israel.” (Luke 22:28-30) Diswan bae happen taem “God mekem evri samting niu moa” long 1,000 year wea Jesus hem rul.—Readim Matthew 19:28.
6, 7. Long Matthew 19:28 and Luke 22:30, “twelvfala tribe bilong Israel” piksarem hu?
6 Long 1,000 year wea Christ hem rul, 144,000 anointed Christian bae waka olsem olketa king, priest, and judge. (Rev. 20:4) Hu nao bae olketa judgem, and hu nao bae olketa rulim? Long Matthew 19:28 and Luke 22:30, hem sei olketa bae judgem “twelvfala tribe bilong Israel.” Long tufala scripture hia, “twelvfala tribe bilong Israel” piksarem hu? Hem piksarem evriwan wea garem hope for laef olowe long earth, hem nao olketa wea showimaot faith long sakrifaes bilong Jesus bat bae no kamap king and priest long heven. (Tribe bilong Levi hem no insaed long list bilong 12-fala tribe bilong Israel.) Olketa hia bae kasem olketa gud samting wea helpem olketa fren witim God taem 144,000 waka olsem olketa priest. Olketa tu pipol bilong God wea hem lovem and acceptim olketa. Dastawe hem fitim for sei olketa olsem olketa Israelite bifor.
7 Taem aposol John lukim long vision God markem finis 144,000 spiritual Israelite long forhed bilong olketa bifor datfala big trabol, hem lukim tu wanfala “big crowd wea no eni man savve kaontem wea kam from evri kantri.” (Rev. 7:9) Olketa hia bae no dae long bigfala trabol bat bae gohed laef taem Christ hem rul for 1,000 year. Long datfala taem, staka billion pipol bae laef bak and stap witim olketa tu. (John 5:28, 29; Rev. 20:13) Evriwan hia piksarem “twelvfala tribe bilong Israel” wea Jesus and 144,000 wea rul witim hem bae judgem.—Acts 17:31; 24:15; Rev. 20:12.
8. Hao nao olketa samting wea happen long Day for Forgivim Sin Bilong Nation piksarem wei wea 144,000 and evri nara man bae waka tugeta?
8 Olketa samting wea happen long Day for Forgivim Sin Bilong Nation piksarem wei wea 144,000 and evri nara man bae waka tugeta. (Lev. 16:6-10) Long bifor, hae priest mas sakrifaesim wanfala buluka for olketa sin bilong “hem and famili bilong hem” firstaem. So first wan wea kasem gud samting from sakrifaes bilong Jesus hem olketa wea bae waka witim Jesus olsem priest long heven. Hae priest sakrifaesim tufala goat tu for olketa sin bilong olketa nara Israelite. Long Day for Forgivim Sin Bilong Nation, tribe wea waka olsem priest piksarem 144,000, and olketa nara Israelite piksarem olketa wea garem hope for stap long earth. Diswan mekem iumi luksavve disfala toktok “twelvfala tribe bilong Israel” no minim nomoa olketa anointed Christian wea bae waka olsem priest witim Jesus, bat hem savve minim evriwan wea showimaot faith long sakrifaes bilong Jesus.a
9. Long vision wea Ezekiel lukim, olketa priest piksarem hu, and olketa Israelite wea no priest piksarem hu?
9 Tingim nara example. Long wanfala vision, profet Ezekiel lukim staka samting abaotem temple bilong Jehovah. (Ezekiel chapter 40 go kasem 48) Long datfala vision, olketa priest waka long temple, teachim pipol and kasem kaonsel from Jehovah for stretem pipol. (Ezek. 44:23-31) Ezekiel lukim tu pipol long olketa nara tribe kam long temple for worshipim God and for givim olketa sakrifaes. (Ezek. 45:16, 17) Long datfala vision, olketa priest piksarem olketa anointed Christian, and olketa Israelite from olketa nara tribe wea no priest piksarem olketa wea garem hope for stap long earth. Datfala vision mekhae long wei wea tufala grup hia waka tugeta and garem wan mind, and hao olketa priest wea piksarem olketa anointed Christian lead long tru worship.
10, 11. (a) Wanem nao kamap tru wea strongim faith bilong iumi? (b) Wanem kwestin nao kamap abaotem olketa nara sheepsheep?
10 Jesus story abaotem “olketa nara sheepsheep” wea no insaed “disfala fence” wea “smol sekson bilong olketa sheepsheep” stap long hem. (John 10:16; Luke 12:32) Hem sei: “Mi mas tekem kam olketa hia tu and bae olketa herem toktok bilong mi. Evri sheepsheep hia bae wanfala sekson nomoa and wanfala man nao bae lukaftarem olketa.” Olketa toktok hia kamap tru and datwan barava strongim faith bilong iumi! Tufala grup hia join tugeta, hem nao olketa anointed Christian wea hem smol grup nomoa witim big crowd bilong olketa nara sheepsheep. (Readim Zechariah 8:23.) Nomata olketa nara sheepsheep no worshipim God long inner courtyard bilong spiritual temple, olketa worshipim hem long outer courtyard bilong datfala temple wea stap raonem inner courtyard.
11 Sapos long samfala scripture olketa Israelite wea no priest piksarem olketa nara sheepsheep, waswe, datwan minim olketa wea garem hope for stap long earth shud kaikaim bred and drinkim red wine long Memorial? Iumi bae ansarem datfala kwestin.
Niufala Agreement
12. Wanem niu agreement nao Jehovah talem bae hem mekem?
12 Jehovah talem bae hem mekem niu agreement witim pipol bilong hem taem hem sei: “Bihaen datfala taem, diswan nao agreement wea mi bae mekem witim haos bilong Israel. Mi bae putim law bilong mi insaed long olketa, and bae mi raetem insaed heart bilong olketa. And mi bae kamap God bilong olketa, and olketa bae kamap pipol bilong mi.” (Jer. 31:31-33) Disfala niu agreement bae mekem promis wea Jehovah talem long Abraham barava kamap tru.—Readim Genesis 22:18.
13, 14. (a) Hu nao olketa wea insaed long niu agreement? (b) Hu nao olketa wea kasem gud samting from agreement hia, and long wanem wei nao olketa “hol strong” long datwan?
13 Jesus storyim datfala niu agreement long naet bifor hem dae. Hem sei: “[Disfala kap wine] hem piksarem datfala niu agreement wea bae hem start taem mi pourimaot blood bilong mi for iufala.” (Luke 22:20; 1 Cor. 11:25) Waswe, evri Christian nao insaed long disfala niu agreement? Nomoa. Olsem olketa aposol wea drinkim datfala kap wine long datfala evening, samfala Christian nomoa bae insaed long disfala niu agreement.b Jesus mekem nara promis witim olketa aposol tu for rul witim hem long Kingdom bilong hem. (Luke 22:28-30) Olketa bae stap witim Jesus long Kingdom bilong hem.—Luke 22:15, 16.
14 Waswe long olketa wea bae stap long earth taem Kingdom bilong hem rul? Olketa bae kasem olketa gud samting from datfala niu agreement. (Gal. 3:8, 9) Nomata olketa no insaed long datfala agreement, olketa “hol strong” long agreement hia long wei for followim wanem agreement talem, olsem profet Isaiah talem: “Pipol from difren kantri wea chus for worshipim Jehovah, lovem nem bilong Jehovah, kamap olketa wakaman bilong hem, keepim sabbath olsem holy samting, and hol strong long agreement bilong mi, mi bae tekem olketa kam long holy maunten bilong mi tu and mekem olketa hapi insaed long haos bilong mi for prea.” Then Jehovah sei: “Pipol bae kolem haos bilong mi wanfala haos for prea wea evri pipol kam long hem.”—Isa. 56:6, 7.
Hu Nao Shud Kaikaim Bred and Drinkim Red Wine?
15, 16. (a) Wanem privilege nao aposol Paul sei olketa wea insaed long niu agreement kasem? (b) Why nao olketa wea garem hope for laef long earth mas no kaikaim bred and drinkim red wine long Memorial?
15 Olketa wea insaed niu agreement “free for go insaed long Most Holy.” (Readim Hebrews 10:15-20.) Olketa hia bae “kasem wanfala kingdom wea no savve seksek.” (Heb. 12:28) So datwan minim olketa wea bae king and priest witim Jesus Christ long heven nomoa shud drinkim datfala “kap wine” wea piksarem niu agreement. Olketa hia bae maritim Pikinini Sheepsheep. (2 Cor. 11:2; Rev. 21:2, 9) Olketa narawan wea kam long Memorial kam for showimaot respect long diswan and no kaikaim bred and drinkim red wine long Memorial.
16 Wanem Paul talem tu helpem iumi for minim why nao olketa wea garem hope for stap long earth no kaikaim bred and drinkim red wine long Memorial. Hem sei long olketa anointed Christian: “Evritaem iufala kaikaim disfala bred and drinkim disfala kap wine, iufala gohed for talemaot dae bilong Lord, go kasem taem hem kam.” (1 Cor. 11:26) Wanem taem nao bae Lord hem “kam”? Hem bae kam taem lastfala anointed Christian go long heven. (John 14:2, 3) So hem klia hao disfala Evening Kaikai Bilong Lord bae no gohed for olowe. Olketa anointed Christian wea “stap yet” long earth bae garem Memorial go kasem taem evriwan long olketa go long heven. (Rev. 12:17) Sapos Jesus talem olketa wea bae laef olowe long earth for kaikaim bred and drinkim red wine hia, bae olketa mas celebratem Memorial for olowe.
“Olketa Bae Kamap Pipol Bilong Mi”
17, 18. Long wanem wei nao profesi long Ezekiel 37:26, 27 kamap tru?
17 Jehovah profesi hao pipol bilong hem bae kamap wanfala sekson nomoa taem hem sei: “Mi bae mekem promis witim olketa for olketa garem peace. Disfala promis bae gohed for olowe. Mi bae givim land long olketa and mekem olketa kamap staka. And mi bae mekem temple bilong mi stap midolwan long olketa for olowe. And mi bae stap witim olketa, and mi bae kamap God bilong olketa, and olketa bae kamap pipol bilong mi.”—Ezek. 37:26, 27.
18 Evriwan wea worshipim God kasem gud samting from disfala promis for olketa Christian garem peace. Tru tumas, Jehovah promisim hao evriwan wea obeyim hem bae garem peace. Holy spirit bilong hem mekem olketa for garem olketa gudfala wei. Temple bilong God wea stap midolwan long olketa hem piksarem wei wea pipol bilong God worshipim hem long stretfala wei. Olketa barava kamap pipol bilong hem bikos olketa lusim wei for worshipim idol and olketa worshipim Jehovah God nomoa.
19, 20. Jehovah ting long hu moa olsem ‘pipol bilong hem,’ and wanem nao disfala niu agreement mekem kamap?
19 Iumi hapi tumas taem iumi lukim tufala grup hia kamap wanfala sekson! Nomata olketa long big crowd no garem hope for go long heven, olketa hapi tumas for waka witim olketa wea garem disfala hope. Olketa join witim datfala Israel bilong God. From olketa duim olsem, Jehovah ting long olketa olsem ‘pipol bilong hem.’ Olketa hia mekem disfala profesi kamap tru: “Long datfala taem, pipol from staka kantri bae kam long Jehovah, and olketa bae kamap pipol bilong mi, and mi bae stap witim [olketa].”—Zech. 2:11; 8:21; readim Isaiah 65:22; Revelation 21:3, 4.
20 Jehovah mekem evri samting hia kamap tru bikos long datfala niu agreement. Plande million pipol from staka kantri kamap pipol bilong Jehovah. (Mic. 4:1-5) Olketa barava disaed for hol strong long datfala niu agreement long wei for acceptim olketa gud samting from datwan and for obeyim evri samting long datfala agreement. (Isa. 56:6, 7) Taem olketa duim olsem, olketa garem peace olsem datfala Israel bilong God. Hem nao samting wea mifala laekem iu for kasem distaem and for olowe!
[Olketa Footnote]
a Staka taem Bible storyim olketa anointed Christian olsem “kongregeson.” (Heb. 12:23) Bat datfala word “kongregeson” savve minim tu evri Christian, nomata wanem hope nao olketa garem.—Lukim Wastaoa, May 1, 2007, page 5-7.
b Jesus no insaed long datfala niu agreement bat hem mekem agreement hia kamap (hem Mediator). From hem Mediator, luk olsem hem no kaikaim bred and drinkim red wine long datfala naet.
Waswe, Iu Tingim Yet?
• “Twelvfala tribe bilong Israel” wea 144,000 bae judgem hem piksarem hu?
• Wanem nao olketa anointed Christian duim insaed long disfala niu agreement and wanem gud samting nao olketa nara sheepsheep kasem from diswan?
• Waswe, evri Christian shud kaikaim bred and drinkim red wine long Memorial?
• Wanem profesi nao storyim hao pipol bilong God bae kamap wanfala sekson nomoa?
[Olketa Piksa long page 25]
(For fully formatted text, see publication)
Staka distaem waka witim Israel bilong God
1950 | 373,430
1970 | 1,483,430
1990 | 4,017,213
2009 | 7,313,173