Kwestin From Reader

Jesus talem olketa Sadducee olketa wea laef bak “bae no marit.” (Luke 20:34-36) Waswe, hem story abaotem resurrection long earth?

Disfala kwestin hem barava important, especially for olketa wea hasband or waef bilong olketa hem dae. Maet olketa hia laekem tumas for maritim moa hasband or waef bilong olketa wea resurrect long niu world. Wanfala widow man sei: “Mitufala waef bilong mi no laekem marit bilong mifala for finis. Mitufala laekem tumas for worshipim Jehovah tugeta olsem hasband and waef for olowe. Feeling bilong mi abaotem datwan hem semsem nomoa.” Waswe, iumi garem gudfala reason for tingse olketa wea resurrect savve marit? For tok stret, iumi no barava sure long diswan.

For staka year nao olketa pablikeson bilong iumi sei luk olsem disfala samting wea Jesus talem abaotem resurrection and marit hem minim olketa wea bae resurrect long earth nao bae no marit.a (Matt. 22:29, 30; Mark 12:24, 25; Luke 20:34-36) Bat waswe, maet Jesus hem story abaotem olketa wea bae resurrect for go laef long heven? Iumi storyim wanem Jesus talem.

Tingim samting wea happen. (Readim Luke 20:27-33.) Olketa Sadducee, wea no biliv long resurrection, trae for trikim Jesus taem olketa askem hem wanfala kwestin abaotem resurrection and kastom for maritim brata-in-law.b Jesus sei long olketa: “Pipol long disfala world savve marit. Bat olketa wea fit for laef bak long datfala taem wea bae kam bae no marit. Iu savve, olketa no savve dae moa tu bikos olketa olsem olketa angel, and from olketa laef bak, olketa hia olketa pikinini bilong God.”—Luke 20:34-36.

Why nao olketa pablikeson bilong iumi sei maet Jesus hem story abaotem resurrection long earth? Datwan hem bikos long tufala important point from Bible. Firstfala point, maet olketa Sadducee tingim resurrection long earth taem olketa askem datfala kwestin long Jesus, and Jesus ansarem kwestin bilong olketa. Mek-tu point, taem hem ansarem olketa, lastfala samting wea hem storyim nao hem olketa faithful man bifor wea bae resurrect long earth, olsem Abraham, Isaac, and Jacob.—Luke 20:37, 38.

Bat luk olsem maet Jesus hem tingim resurrection for go long heven. Wanem pruv nao iumi garem for ting olsem? Iumi bae storyim tufala important toktok wea Jesus talem.

Firstfala toktok: “Olketa wea fit for laef bak.” Olketa anointed Christian wea faithful nao olketa “fit for” kasem Kingdom bilong God. (2 Thess. 1:5, 11) From olketa garem faith long ransom olketa raeteous, and long tingting bilong God, taem olketa dae olketa no garem sin. (Rome 5:1, 18; 8:1) Bible sei olketa anointed Christian hia “hapi and holy” and olketa fit for resurrect for go long heven. (Rev. 20:5, 6) Bat waswe, iumi savve sei datfala toktok “olketa wea fit for laef bak” hem fitim olketa wea bae laef bak long earth? Nomoa, bikos “pipol wea no raeteous” tu bae resurrect long earth.—Acts 24:15.

Mek-tu toktok: “Olketa no savve dae moa.” Jesus hem no sei: “Olketa bae no dae moa.” Bat hem sei: “Olketa no savve dae moa.” Wanfala Bible transleison hem transleitim disfala toktok olsem: “Dae no garem paoa ovarem olketa.” Taem olketa anointed Christian faithful go kasem taem olketa dae and go long heven, olketa garem body wea no savve dae. (1 Cor. 15:53, 54) Datwan minim dae no garem paoa ovarem olketa wea resurrect for go long heven.c

So wanem nao iumi lanem from tufala toktok hia? Taem Jesus story abaotem resurrection and marit, maet hem story abaotem resurrection for go long heven. Sapos hem nao wanem Jesus minim, toktok bilong hem helpem iumi for luksavve long samfala samting abaotem olketa wea resurrect for go long heven. Olketa no marit, olketa no savve dae, and long samfala wei olketa olsem angel. Bat diswan mekem samfala kwestin kamap.

Firstfala kwestin: Why nao Jesus story abaotem resurrection for go long heven taem hem ansarem olketa Sadducee, wea maet ask abaotem resurrection long earth? Staka taem Jesus storyim difren samting taem hem ansarem kwestin bilong olketa wea againstim hem. Olsem example, wantaem olketa Jew askem Jesus for showim olketa wanfala saen. Then hem sei long olketa: “Aotem disfala temple and mi bae wakem bak insaed thrifala day.” Maet Jesus savve olketa ask abaotem temple long Jerusalem, “bat taem hem sei temple, hem minim body bilong hem.” (John 2:18-21) So maet Jesus no laek for ansarem olketa Sadducee hia wea no honest, wea no biliv long resurrection, and wea sei no eni angel hem stap. (Prov. 23:9; Matt. 7:6; Acts 23:8) Bat maet hem laek for storyim resurrection for go long heven bikos hem laekem olketa tru disaepol bilong hem wea garem hope for go long heven for savve long olketa samting hia.

Mek-tu kwestin: Why nao Jesus storyim Abraham, Isaac, and Jacob, wea bae resurrect long earth long end bilong datfala story bilong hem? (Readim Matthew 22:31, 32.) Bifor Jesus storyim thrifala faithful man hia, hem talem disfala toktok: “Taem wea olketa wea dae finis bae laef bak.” Disfala toktok showimaot Jesus redi for storyim difren samting. Jesus savve olketa Sadducee bilivim olketa samting wea Moses raetem, so Jesus storyim toktok wea Jehovah talem long Moses long tree wea fire gohed for bonem. Jesus laek pruvim long olketa Sadducee hao plan bilong God for pipol resurrect long earth bae kamap tru.—Ex. 3:1-6.

Mek-thri kwestin: Sapos disfala samting wea Jesus talem abaotem resurrection and marit hem minim resurrection for go long heven, waswe, diswan minim olketa wea resurrect long earth bae savve marit? Bible no talem ansa for datfala kwestin. Sapos samting wea Jesus storyim hem abaotem resurrection for go long heven, wanem hem talem no showimaot sapos olketa wea resurrect long earth savve marit or nomoa.

Bat iumi savve Bible hem sei taem hasband or waef hem dae, marit bilong tufala hem finis nao. So sapos wanfala man or woman wea marit partner bilong hem dae distaem hem disaed for marit moa, hem shud no feel guilty abaotem datwan. Datwan hem samting wea man seleva disaedem, and olketa narawan shud no tok againstim hem sapos hem laek marit moa.—Rome 7:2, 3; 1 Cor. 7:39.

Tru tumas, maet iumi garem staka kwestin abaotem laef long niu world. Winim wei for iumi guessim ansa for olketa kwestin hia, iumi mas weit for lukim wanem nao Jehovah bae duim long future. Bat samting wea iumi barava sure long hem nao hem olsem: Olketa wea obeyim Jehovah bae hapi, bikos hem savve long best wei for givim evri samting wea olketa needim and laekem.—Ps. 145:16.