Olketa Barava Willing For Go Long Russia

LONG 1991, Olketa Jehovah’s Witness long Russia barava hapi taem gavman long Russia letem preaching waka bilong olketa for gohed bihaen olketa tambuim for staka year. Long datfala taem namba bilong olketa pablisa hem samting olsem 16,000, and distaem hem klosap kasem 170,000 pablisa! Samfala brata and sista hia kam from olketa nara kantri for helpem olketa kongregeson long Russia. (Matt. 9:37, 38) Bae iumi storyim samfala long olketa hia.

OLKETA BRATA WEA WILLING FOR HELP

Long 1991, Matthew wea kam from Britain hem 28 year. Long wanfala convention long datfala year, wanfala tok kamap wea storyim hao olketa kongregeson long Eastern Europe needim help. Brata wea givim datfala tok storyim example bilong wanfala kongregeson long St. Petersburg, long Russia, wea garem wanfala ministerial servant nomoa and no eni elder. Nomata olsem, olketa pablisa long datfala kongregeson garem tu-thri handred Bible study! Matthew sei: “Bihaen datfala tok mi tingting evritaem abaotem Russia, so mi prea long Jehovah and talem hem mi laek muv go long Russia.” Matthew sev ap, hem salem klosap evri samting wea hem garem, and hem muv go long Russia long 1992. Wanem nao happen taem hem long Russia?

Matthew sei: “Hem no isi for lanem languis long Russia. So mi no savve storyim tumas Bible long pipol.” Nara samting, hem no isi for faendem ples for stap. Hem sei: “Staka taem nao mi mas kwiktaem muv aot from wanfala haos for go long narafala haos.” Nomata Matthew kasem olketa hard samting olsem, hem sei: “Best samting wea mi duim long laef bilong mi nao hem for muv kam long Russia. Taem mi stap long hia diswan helpem mi for barava trustim Jehovah, and mi lukim Jehovah helpem mi long staka samting.” Bihaen, Matthew kamap wanfala elder and spesol pioneer, and distaem hem waka long branch office wea stap klosap long St. Petersburg.

Long 1999, Hiroo wea 25 year, hem graduate from Ministerial Training Skul long Japan. Wanfala instructor long datfala skul encouragem hem for muv long nara kantri. Hiroo herem olketa kongregeson long Russia needim help, so hem lanem languis bilong Russia. Hem duim nara samting tu. Hem sei: “Mi go stay long Russia for sixfala month. Mi go long November, bikos hem cold tumas long datfala taem mekem mi savve sapos mi fit for stap long ples olsem wea savve barava cold.” Bihaen datfala sixfala month Hiroo hem disaed hem fit for stap long Russia, so hem go bak long Japan, sevem samfala selen, then hem muv go for stap long Russia.

Hiroo stap long Russia for 12-fala year finis, and hem helpem samfala kongregeson long there. Long samfala kongregeson hem nomoa elder wea mas lukaftarem winim 100 pablisa. Long wanfala kongregeson hem duim klosap evri part long Service Meeting, hem lukaftarem Theocratic Ministry Skul, Wastaoa Study, and faevfala Kongregeson Buk Study evri week. Hem duim staka shepherding kol tu. Hiroo sei olsem abaotem datfala taem: “Mi hapi tumas for helpem olketa brata and sista for fren gud witim Jehovah.” Wanem gud samting nao Hiroo kasem from hem muv go long Russia? Hem sei: “Bifor mi kam long Russia, mi elder and pioneer, bat taem mi long hia mi feelim wei wea mi fren witim Jehovah hem barava strong winim bifor. Mi lane for barava trustim Jehovah long evri samting wea mi duim long laef.” Long 2005, Hiroo maritim Svetlana, and tufala gohed pioneer distaem.

Matthew, wea 34 year, and brata bilong hem Michael, wea 28 year, tufala from Canada. Taem tufala go visit long Russia, tufala sapraes for lukim staka pipol kam long olketa meeting, bat no staka brata stap for conductim olketa meeting. Matthew sei: “Long kongregeson wea mi visitim, 200 pipol nao kam long meeting, bat wanfala elder wea olo and wanfala young ministerial servant nomoa conductim evri meeting. Datwan mekem mi barava laek for muv go long there for helpem olketa brata and sista.” So long 2002 hem muv go long Russia.

Fofala year bihaen, Michael tu muv go long Russia and luksavve olketa needim staka brata yet for help long there. From Michael hem ministerial servant hem kasem assignment for duim accounts, and lukaftarem literature and territory. Hem kasem assignment tu for duim waka bilong secretary long kongregeson, for givim olketa pablik tok, and hem help for organizem olketa assembly and buildim olketa Kingdom Hall. Nomata distaem, olketa kongregeson long Russia still needim staka brata for help. Distaem Michael hem wanfala elder. Nomata hem garem staka waka long kongregeson, hem sei: “Mi barava hapi for helpem olketa brata and sista long kongregeson. Hem best samting for mi duim long laef bilong mi!”

Gogo, Matthew maritim Marina, and Michael hem maritim Olga. Fofala hia, witim staka nara brata and sista, gohed for helpem olketa kongregeson long Russia wea gohed for grow.

OLKETA SISTA HELP LONG PREACHING WAKA

Long 1994, taem Tatyana hem 16 year, sixfala spesol pioneer from Czech Republic, Poland, and Slovakia kam pioneer long kongregeson bilong hem long Ukraine. Hem tingim yet olketa pioneer hia, and sei: “Olketa pioneer hia strong long preaching waka, hem isi for story witim olketa, and olketa kaen and savve gud long Bible.” Hem lukim wei wea Jehovah blessim olketa, and hem barava laek for followim example bilong olketa.

Gudfala example bilong olketa pioneer hia encouragem Tatyana for iusim skul holiday bilong hem for go witim olketa nara Witness for preach long pipol long olketa farawe territory long Ukraine and Belarus. From hem barava enjoyim datwan, hem disaed for muv go long Russia and duim moa samting long ministry. Firstaem, hem go visitim wanfala sista wea muv go for stap long Russia, and hem lukaotem waka for sapotim hem taem hem bae pioneer. Bihaen, long year 2000, hem muv go for stap long Russia. Waswe, diswan hem isi for hem?

Tatyana sei: “From mi no garem inaf selen for rentim haos for miseleva, mi mas rentim wanfala rum long haos bilong olketa narawan. Datwan hem no isi. Samfala taem mi laek for go bak long hom. Bat evritaem Jehovah helpem mi for luksavve mi bae kasem gud samting sapos mi gohed pioneer long hia.” Distaem, Tatyana hem wanfala missionary long Russia. Hem sei: “Long olketa year wea mi stap long Russia mi kasem staka naes experience and mi garem staka fren tu. Olketa samting wea mi duim long hia hem strongim faith bilong mi.”

Masako wea kam from Japan, hem winim 50 year distaem. Taem hem young yet, hem laek for kamap wanfala missionary, bat from health bilong hem nogud, hem tingse hem bae no fit for duim datwan. Nomata olsem, taem health bilong hem kamap gud lelebet, hem disaed for muv go long Russia for help long preaching waka. Nomata hem no isi for faendem waka and ples for stap, hem gohed for pioneer and hem duim lelebet waka for teachim Japanese languis and hem duim klining waka. Wanem nao helpem hem for gohed long ministry?

Taem Masako ting bak long 14 year wea hem pioneer long Russia, hem sei: “Hapi wea mi kasem long ministry hem winim olketa hard samting wea mi mas deal witim. For go preach long olketa ples wea needim samfala pablisa moa hem barava gud samting for duim.” Hem sei tu: “Wei wea Jehovah evritaem provaedem kaikai, kaleko, and ples for mi stap, hem olsem wanfala mirakol.” Masako go long Kyrgyzstan tu for help long preaching waka. And tu, hem helpem olketa grup wea story long English, Chinese, and Uighur languis. Distaem Masako hem pioneer long St. Petersburg.

OLKETA FAMILI GO FOR HELP

Staka famili savve muv go long nara kantri for faendem waka bikos economy long kantri bilong olketa hem nogud. Bat olsem Abraham and Sarah, samfala famili muv long nara kantri for duim samfala samting moa long waka bilong Jehovah. (Gen. 12:1-9) Olsem example, Mikhail and Inga, wanfala hasband and waef from Ukraine, muv go long Russia long 2003. Taem tufala kasem long there, tufala luksavve plande pipol barava interest long Bible.

Mikhail sei: “Wantaem mifala go preach long wanfala ples wea no eni Witness preach long there bifor. Long wanfala haos, wanfala olo man openem door and sei: ‘Waswe, iufala kam for preach?’ Taem mifala sei yes, hem sei: ‘Mi savve wanday bae iufala kam. Samting wea Jesus talem hem mas kamap tru ia.’ Then hem talem toktok wea stap long Matthew 24:14.” Mikhail sei tu: “Long datfala ples, mifala meetim samting olsem tenfala Baptist woman wea barava interest long Bible. Olketa garem Live Forever buk, and evri weekend olketa iusim datwan for studyim Bible. Mifala sidaon witim olketa for staka hour and ansarem olketa kwestin bilong olketa, singim olketa Kingdom song witim olketa, and mifala kaikai tugeta tu. Datwan hem naesfala experience wea mi barava enjoyim.” Mikhail and Inga sei wei for go preach long olketa ples wea needim samfala pablisa moa helpem tufala for barava fren gud witim Jehovah, strongim love wea tufala garem for pipol, and tufala garem gudfala laef. Distaem tufala duim circuit waka.

Long 2007, Yury and Oksana, wanfala hasband and waef long Ukraine, wea winim 30 year distaem, and son bilong tufala Aleksey, wea distaem hem 13 year, visitim branch office long Russia. Olketa lukim wanfala map bilong Russia, wea showim staka unassigned territory. Oksana sei: “Bihaen mifala lukim datfala map, mifala luksavve bigfala need hem stap for go preach long olketa ples hia. Datwan helpem mifala for disaed for muv go for stap long Russia.” Wanem nao samfala nara samting wea helpem olketa for disaed? Yury sei: “Mifala readim samfala article insaed olketa pablikeson bilong iumi, olsem datfala article: ‘Waswe, Iu Savvy Serve Long Nara Kantri?’a Mifala go visitim ples wea branch office talem wea needim help, and mifala trae for faendem haos and waka for selen.” Long 2008, olketa muv go for stap long Russia.

Long firstaem, hem no isi for faendem waka, and staka taem nao olketa mas muv aot from wanfala haos for go long narafala haos. Yury sei: “Mifala prea staka taem for mifala no feel wikdaon, and then mifala gohed long preaching waka, and trustim Jehovah for sapotim mifala. Mifala lukim hao Jehovah lukaftarem mifala taem Kingdom nao hem first samting long laef bilong mifala. Diswan strongim famili bilong mifala.” (Matt. 6:22, 33) Hao nao disfala samting wea famili duim hem affectim Aleksey? Oksana sei: “Datwan barava helpem hem. Taem hem naen year, hem dedicate long Jehovah and baptaes. From hem luksavve bigfala need hem stap long preaching waka, hem savve auxiliary pioneer long taem bilong skul holiday. Wei wea hem tinghae long ministry hem mekem mifala hapi fogud.” Distaem, Yury and Oksana tufala duim spesol pioneer waka.

“MI WISH NOMOA MI DUIM DISWAN LONGTAEM FINIS”

Olsem experience bilong olketa brata and sista hia showimaot, iumi mas barava trustim Jehovah sapos iumi laek for muv go for stap long nara ples for duim samfala samting moa long ministry. Hem tru, olketa wea duim diswan feisim samfala hard samting, bat olketa barava hapi tu for talemaot gud nius long pipol wea interest long message abaotem Kingdom. Waswe, iu fit for muv go long ples wea needim samfala pablisa moa? Sapos iu disaed for go, maet gogo bae iu kasem sem feeling olsem Yury, wea sei olsem abaotem wei wea hem muv go long Russia: “Mi wish nomoa mi duim diswan longtaem finis.”