Waka Hard for Kamap Strongfala Christian Bikos “Day Bilong Jehovah Klosap”
“Iumi mas waka hard for kamap olketa strongfala Christian.”—HEB. 6:1.
1, 2. Wanem nao happen wea mekem olketa Christian long Jerusalem and Judea savve “ranawe go long olketa maunten”?
TAEM Jesus stap long earth, olketa disaepol kam long hem and askem hem: “Wanem nao saen wea bae showimaot iu stap and world hem gogo for finis?” Ansa wea Jesus talem long olketa hem firstaem kamap tru long first century. Jesus storyim wanfala samting bae happen wea bae mekem olketa luksavve hao end hem barava klosap. Taem olketa lukim datfala samting hem happen, “olketa wea stap long Judea mas ranawe go long olketa maunten.” (Matt. 24:1-3, 15-22) Waswe, bae olketa disaepol bilong Jesus luksavve long datfala saen and kwiktaem duim wanem hem talem?
2 Klosap 30 year bihaen, long 61 C.E., aposol Paul raetem important toktok for olketa Hebrew Christian wea stap long Jerusalem and Judea. Paul and olketa nara Christian no savve hao bihaen faevfala year nomoa, datfala samting wea Jesus talem wea bae startim “bigfala trabol” hem bae happen nao. (Matt. 24:21) Long 66 C.E., Cestius Gallus leadim army bilong Rome for attakim Jerusalem. Olketa klosap winim Jerusalem, bat seknomoa olketa go bak. Hem chance nao for olketa Christian ranawe.
3. Wanem kaonsel nao Paul talem long olketa Hebrew Christian, and why nao olsem?
3 Olketa Christian hia mas luksavve hao samting wea Jesus talem finis hem happen nao, and hao olketa mas kwiktaem ranawe. Bat samfala long olketa “slow tumas for minim samting.” Long spiritual wei, olketa olsem baby wea “susu yet.” (Readim Hebrews 5:11-13.) Nomata samfala worshipim Jehovah for klosap 30 year finis, samting wea olketa duim showimaot olketa tu “isisi lusim God wea laef.” (Heb. 3:12) Samfala garem “wei” for no go evritaem long olketa meeting nomata datfala bigfala “day hem kakam klosap.” (Heb. 10:24, 25) Paul givim kaonsel long olketa long barava taem. Hem sei: “From iumi savve finis long olketa main teaching abaotem Christ, iumi mas waka hard for kamap olketa strongfala Christian.”—Heb. 6:1.
4. Why nao iumi mas luksavve long olketa Bible profesi and fren gud witim Jehovah? Wanem nao bae helpem iumi for duim datwan?
4 Iumi stap long taem wea datfala profesi wea Jesus talem bae kamap tru long bigfala wei. ‘Klosap nao bigfala day bilong Jehovah’ bae finisim world bilong Satan. (Zeph. 1:14) Distaem hem barava important for iumi luksavve long olketa Bible profesi and fren gud witim Jehovah. (1 Pet. 5:8) Waswe, iumi duim datwan? Taem iumi kamap strongfala Christian, datwan bae helpem iumi for luksavve long taem wea iumi stap long hem.
Wanem Nao Hem Minim for Kamap Strongfala Christian?
5, 6. (a) Wanem nao hem minim for kamap strongfala Christian? (b) Wanem tufala samting nao iumi mas waka hard for duim?
5 Paul talem olketa Hebrew Christian long first century for waka hard for kamap olketa strongfala Christian, bat hem talem tu wanem nao datwan hem minim. (Readim Hebrews 5:14.) “Olketa strongfala Christian” no hapi for “susu” nomoa olsem baby, bat olketa kaikaim “strongfala kaikai.” Dastawe olketa savve long “olketa firstfala samting” abaotem truth and “olketa deep samting” tu. (1 Cor. 2:10) Nara samting tu, taem olketa evritaem followim wanem Bible talem, diswan helpem olketa for luksavve long wanem hem stret and wanem hem no stret. Taem olketa mas disaedem eni samting, olketa bae ting raonem wanem Bible hem talem and followim datwan.
6 Paul hem sei: “Iumi mas lisin gud go moa long olketa samting wea iumi herem finis mekem iumi no isisi go difren.” (Heb. 2:1) Maet iumi no luksavve, batawea, maet iumi isisi lusim truth. Bat diswan bae no happen long iumi sapos iumi “lisin gud go moa” taem iumi study seleva long haos and taem iumi go long olketa meeting. Dastawe iumi wanwan mas tingim olketa kwestin hia: ‘Waswe, mi tingim nomoa olketa firstfala samting wea mi lanem? Waswe, mi duim nomoa olketa samting long truth from mi mas duim and no witim full heart bilong mi? Wanem nao mi savve duim mekem mi gohed strong for worshipim Jehovah?’ Sapos iumi laek kamap strongfala Christian, iumi mas waka hard for duim tufala samting. Iumi mas barava savve gud long Bible and iumi mas lane for obeyim God.
Barava Savve Gud Long Bible
7. Wanem gud samting nao iumi kasem taem iumi savve gud long Bible?
7 Paul hem sei: “Eniwan wea susu yet hem wanfala baby, from hem no savve long stretfala toktok.” (Heb. 5:13) Iumi mas barava savve gud long wanem God hem talem iumi for duim, mekem iumi kamap strongfala Christian. From toktok bilong God hem stap long Bible, iumi mas studyim gud olketa scripture and olketa buk wea “datfala wakaman wea faithful and wise” givim long iumi. (Matt. 24:45-47) Taem iumi duim olsem, iumi bae savve long tingting bilong God and luksavve long wanem hem stret and wanem hem no stret. Tingim wanfala Christian sista wea nem bilong hem Orchid.a Hem sei: “Advaes wea barava helpem mi nao hem for readim Bible evriday. Mi readim full Bible insaed samting olsem tufala year, and hem olsem datwan nao hem firstaem for mi savve gud long God wea wakem mi. Mi lane abaotem olketa wei bilong hem, wanem hem laekem, wanem hem no laekem, strongfala paoa bilong hem, and bigfala savve bilong hem. From mi readim Bible evriday, datwan strongim mi taem mi kasem olketa barava hard taem.”
8. Bible garem paoa for helpem iumi long wanem wei?
8 Taem iumi readim Bible evriday, toktok bilong God wea “garem paoa” savve changem iumi. (Readim Hebrews 4:12.) Hem savve helpem iumi tu for garem olketa gudfala wei and for duim olketa samting wea Jehovah hapi long hem. Waswe, iu need for markem samfala taem moa for readim Bible and ting raonem wanem iu readim?
9, 10. Man wea barava savve gud long Bible hem mas duim wanem? Minim kam.
9 Hem no fitim nomoa for savve lelebet long Bible. Long taem bilong Paul, olketa Christian wea olsem baby long spiritual wei, olketa savve lelebet long Bible. Bat olketa no followim wanem olketa lanem, dastawe olketa no kasem gud samting. From olketa no iusim Bible for helpem olketa disaedem samting long gudfala wei, olketa no savve gud long toktok bilong God.
10 Man wea barava savve gud long Bible hem savve long wanem Bible talem and hem followim tu. Story bilong wanfala Christian sista wea nem bilong hem Kyle showim iumi hao for duim diswan. Kyle and wanfala woman wea hem waka witim, tufala raoa lelebet. Wanem nao Kyle duim for stretem datfala problem? Hem sei: “Long datfala taem mi tingim Romans 12:18, wea hem sei: ‘Traem best bilong iufala for no raoa bat stap gud witim evri man.’ So mi askem woman hia for mitufala story bihaen waka.” Tufala stretem datfala problem and disfala woman tinghae long samting wea Kyle duim. Kyle hem sei: “Mi lanem hao stret samting for duim nao hem for evritaem followim wanem Bible talem.”
Lane for Obey
11. Wanem nao showimaot hem no isi for obey taem iumi kasem hard taem?
11 Taem iumi kasem hard taem, datwan savve mekem hem no isi for iumi followim wanem iumi lanem long Bible. Tingim diswan. No longtaem bihaen Jehovah mekem olketa Israelite kamap free from Egypt, olketa “raoa witim Moses” and olketa gohed for “testim Jehovah.” Why nao olketa raoa witim Moses? Hem bikos olketa no garem eni wata for drinkim. (Ex. 17:1-4) Bihaen God mekem wanfala agreement witim olketa, olketa hapi for followim “evri toktok wea Jehovah hem talem.” Batawea, tufala month no go pas yet and olketa brekem law bilong hem taem olketa worshipim wanfala idol. (Ex. 24:3, 12-18; 32:1, 2, 7-9) Waswe, olketa worshipim datfala idol bikos Moses hem long Maunt Horeb and olketa fraet? Or waswe, olketa Israelite tingse olketa Amalekite bae winim olketa bikos Moses no stap for apim hand bilong hem olsem hem duim lastaem? (Ex. 17:8-16) Maet datwan hem tru, bat main samting nao, olketa Israelite “nating laek for obey.” (Acts 7:39-41) Paul talem olketa Christian for ‘duim barava best’ bilong olketa mekem olketa no ‘followim semkaen wei for no obey’ olsem olketa Israelite bifor wea fraet for go insaed long Promis Land.—Heb. 4:3, 11.
12. Long wanem wei nao Jesus lane for obeyim God? Wanem gud samting nao hem kasem?
12 Taem iumi waka hard for kamap strongfala Christian, iumi mas barava duim best bilong iumi for obeyim Jehovah. Jesus Christ nao duim diswan from hem lane for obeyim God taem hem kasem hard taem. (Readim Hebrews 5:8, 9.) Taem Jesus no kam yet long earth, hem obeyim Dadi bilong hem. Bat taem hem kam long earth for duim wanem Dadi bilong hem laekem, hem kasem pain long body and hem tingting strong tumas long wanem hem mas duim. From Jesus gohed for obey nomata hem kasem barava hard taem, hem “kamap fit” for duim waka wea God laekem hem for duim, wea hem nao for hem King and Hae Priest.
13. Wanem nao bae showimaot iumi obeyim God?
13 Waswe long iumi? Waswe, iumi disaed strong for obeyim Jehovah nomata iumi kasem olketa problem wea mekem iumi sorre? (Readim 1 Peter 1:6, 7.) God givim kam kaonsel abaotem wanem kaen wei iumi mas garem, hao iumi mas honest, story long stretfala wei, readim and studyim Bible, go long olketa meeting, and duim preaching waka. (Josh. 1:8; Matt. 28:19, 20; Eph. 4:25, 28, 29; 5:3-5; Heb. 10:24, 25) Waswe, iumi obeyim Jehovah long olketa samting hia nomata iumi kasem hard taem? Sapos iumi obeyim God, datwan showimaot iumi waka hard for kamap strongfala Christian.
Gud Samting wea Iumi Savve Kasem
14. Talem story wea showim hao taem man waka hard for kamap strongfala Christian, datwan savve protectim hem.
14 Taem wanfala Christian luksavve long wanem hem stret and wanem hem no stret, datwan savve protectim hem from world wea “no garem eni stretfala tingting.” (Eph. 4:19) Tingim wanfala brata wea nem bilong hem James. Evritaem hem readim olketa buk bilong iumi and barava tinghae long olketa. Hem waka long ples wea evriwan wea hem waka witim, hem olketa woman nomoa. James hem sei: “Plande woman hia no garem gudfala wei, bat wanfala gele wea luk olsem hem garem gudfala wei, hem laek savve long truth. Bat wanfala taem, taem mitufala waka seleva long wanfala rum, hem trae for holem mi and kissim mi. Mi tingse hem fani nomoa, bat hem barava hard for mi stopem hem. Long datfala taem nomoa mi tingim wanfala story long Wastaoa abaotem wanfala brata wea kasem semkaen test long ples wea hem waka long hem. Datfala Wastaoa storyim Joseph and waef bilong Potiphar.b Mi kwiktaem pushim disfala gele and hem ranawe nao.” (Gen. 39:7-12) James hapi tumas hem no duim eni nogud samting and hem no spoelem gudfala tingting bilong hem.—1 Tim. 1:5.
15. Taem iumi waka hard for kamap strongfala Christian, long wanem wei nao datwan strongim tingting bilong iumi?
15 Taem iumi waka hard for kamap strongfala Christian, datwan strongim tingting bilong iumi and helpem iumi for no “letem enikaen difren teaching for pullim iumi go difren.” (Readim Hebrews 13:9.) Hem helpem iumi tu for tingim olowe “olketa samting wea barava important.” (Phil. 1:9, 10) Nara samting tu, bae iumi tinghae go moa long God and evri gud samting wea hem givim long iumi. (Rom. 3:24) Olketa Christian wea “garem tingting olsem man wea big finis,” olketa nao bae garem diskaen wei for tinghae and fren gud witim Jehovah.—1 Cor. 14:20.
16. Wanem nao helpem wanfala sista for ‘strongim tingting’ bilong hem?
16 Wanfala sista wea nem bilong hem Louise hem talem hao for staka year bihaen hem baptaes, hem duim nomoa olketa Christian waka for mekem pipol hapi long hem. Hem sei: “Mi no duim eni rong samting, bat hem olsem mi no interest tumas for worshipim Jehovah. Mi luksavve hao sapos mi laek worshipim Jehovah witim full heart bilong mi, mi mas changem samfala samting. Big samting wea mi mas duim nao, mi mas duim evri samting wea mi fit for duim for worshipim Jehovah.” From Louise waka hard for duim datwan, datwan ‘strongim tingting’ bilong hem and barava helpem hem taem hem sik big. (Jas. 5:8) Louise hem sei: “Nomata hem no isi from mi sik big, mi barava fren gud witim Jehovah.”
‘Obey From Heart’
17. Why nao hem important tumas for olketa Christian long first century for obey?
17 Kaonsel wea Paul givim for “waka hard for kamap strongfala Christian” barava helpem olketa Christian wea stap long Jerusalem and Judea bifor. Olketa wea followim datfala kaonsel luksavve long saen wea Jesus givim for “ranawe go long olketa maunten.” Taem olketa “lukim datfala rabis samting wea kam for finisim Jerusalem hem standap long ples wea holy,” wea hem nao army bilong Rome wea kam raonem Jerusalem, olketa savve hem taem nao for olketa ranawe. (Matt. 24:15, 16) Olketa Christian followim toktok bilong Jesus and ranawe from Jerusalem bifor hem finis. And olsem Eusebius, wanfala man wea studyim religion hem talem, olketa go stap long datfala taon Pella long maunten area bilong Gilead. From olketa duim olsem, olketa no dae long datfala barava nogud trabol wea kasem Jerusalem.
18, 19. (a) Why nao hem important tumas distaem for iumi obey? (b) Wanem nao bae iumi storyim long study bihaen diswan?
18 Sapos iumi waka hard for kamap strongfala Christian wea obeyim God, iumi bae no dae long “bigfala trabol” wea Jesus profesi abaotem wea bae nogud winim eni nara trabol. (Matt. 24:21) Sapos “datfala wakaman wea faithful” talem iumi for duim eni important samting long future, waswe, bae iumi obeyim datwan? (Luke 12:42) Hem important tumas distaem for iumi ‘obey from heart’ bilong iumi!—Rom. 6:17.
19 Iumi mas luksavve long wanem hem stret and wanem hem no stret mekem iumi kamap strongfala Christian. Iumi savve duim datwan taem iumi waka hard for barava savve gud long Bible and lane for obeyim God. Bat hem no isi for olketa young wan kamap strongfala Christian. Study bihaen diswan bae storyim wanem nao olketa savve duim mekem olketa kamap strongfala Christian.
[Olketa Footnote]
a Mifala changem samfala nem.
b Lukim story, “Strong for Say No Long Rong Fasin,” long October 1, 1999, Wastaoa.
Wanem Nao Iu Lanem?
• Wanem nao hem minim for kamap strongfala Christian, and hao nao iumi savve duim datwan?
• Hao nao wei for savve gud long Bible helpem iumi for kamap strongfala Christian?
• Wanem nao helpem iumi lane for obey?
• Wanem nao olketa gud samting wea iumi kasem taem iumi waka hard for kamap strongfala Christian?
[Piksa long page 10]
Taem iumi obeyim kaonsel long Bible, datwan helpem iumi for stretem olketa problem long gudfala wei
[Piksa long page 12]
From olketa Christian bifor obeyim kaonsel bilong Jesus, olketa no dae