Keepim ‘Heart Klin’ Taem Nogud Samting Gohed
“VITTORIO Messori wea hem man for raet abaotem Catholic Church, hem story abaotem olketa samting wea no stret wea happen long Church long Italy no longtaem go nomoa. Hem sei: “Hem hard tumas for sei Church distaem hem klin. And problem hia no savve finis sapos olketa changem law bilong Church for letem olketa priest for marit. Bikos big haf bilong olketa case wea kamap distaem, hem abaotem olketa priest wea durong witim olketa man and olketa boy.”—La Stampa.
Olketa rabis wei bilong pipol barava kamap big tumas distaem, and datwan showimaot iumi stap long “olketa last day” bilong disfala world. (2 Tim. 3:1-5) Olsem datfala report showimaot, datkaen wei hem affectim staka pipol and olketa wea sei olketa seleva stand for God. Rabis wei and heart bilong olketa wea no klin mekem olketa duim olketa samting wea barava no stret. (Eph. 2:2) Dastawe nao Jesus warnim iumi for protectim heart from “rabis tingting, wei for killim man dae, adultery, wei for durong and olketa nara samting saed long sex wea no fitim, wei for steal, laea, and talem olketa nogud toktok.” (Matt. 15:19) Bat Jehovah God sei, olketa wea worshipim hem mas barava laekem “heart wea klin.” (Prov. 22:11) So hao nao wanfala Christian savve keepim heart bilong hem klin taem olketa barava nogud samting gohed?
Wanem Nao Hem Minim for Garem “Heart wea Klin”?
Staka taem Bible storyim “heart” long tokpiksa wei. Wanfala buk hem sei taem Bible storyim heart hem minim, “olketa private tingting wea stap deep insaed long man” and “hem nao wanfala part wea important long God. Diswan nao samting wea savve helpem man for fren gud witim God and disaedem samting wea man duim.” Heart hem showimaot wanem kaen man nao iumi. Olsem datfala buk talem, heart nao samting wea Jehovah lukluk long hem and hem tinghae long olketa wea servem hem.—1 Pet. 3:4.
Long Bible, disfala word ‘klin’ savve minim wei for klin long physical saed. Bat hem savve minim tu wei for klin, stret, and garem gudfala heart saed long worship and wei bilong man. Long datfala Sermon Long Maunten, Jesus sei: “Olketa wea garem gudfala heart bae hapi.” Jesus hem minim nao olketa wea klin insaed long heart. (Matt. 5:8) Olketa laekem olketa gudfala samting wea klin. Olketa barava lovem Jehovah witim full heart, olketa honest and no hafhaf, bikos olketa lovem and tinghae long hem. (Luke 10:27) Hem gud tumas for garem heart wea klin!
Hem No Isisi for Keepim ‘Heart Bilong Iu Klin’
Man wea servem Jehovah mas “garem heart wea klin and no duim eni samting wea nogud.” (Ps. 24:3, 4) Bat distaem, hem no isi for olketa wea servem God for gohed keepim ‘heart bilong olketa klin.’ Satan and disfala world wea hem rulim, and body bilong iumi wea sin mekem hem no isi for iumi fren gud witim Jehovah. For iumi winim olketa hard samting hia, hem barava important tumas for garem heart wea klin and keepim gud datwan. Diswan bae protectim and helpem iumi for gohed fren gud witim God. Hao nao iumi savve keepim heart bilong iumi klin?
Long Hebrews 3:12 disfala warning hem stap: “Lukaot olketa brata, nogud eniwan long iufala no showimaot faith and isisi lusim God wea laef, bikos heart bilong iumi savve kamap nogud.” Iumi no savve keepim ‘heart bilong iumi klin’ sapos iumi no “showimaot faith.” Wanem nao samfala idea wea Satan iusim for spoelem faith bilong iumi long God? Satan iusim teaching abaotem evolution, wei wea religion sei no eni samting hem stret or rong, and hem mekem daot kamap sapos Bible hem kam from God. Iumi mas no letem nogud tingting olsem for affectim iumi. (Col. 2:8) Wei for duim Bible reading evriday and barava ting raonem gud, hem nao main samting for winim datwan. Stretfala savve from Bible bae strongim love bilong iumi for Jehovah and wei for tinghae long wanem hem duim. Iumi barava needim love and wei for tinghae olsem, sapos iumi laek for winim olketa rong tingting, showimaot faith long Jehovah and keepim heart bilong iumi klin.—1 Tim. 1:3-5.
Taem Body Laekem Nogud Samting
Hem no isi for keepim heart bilong iumi klin, bikos body savve laekem nogud samting and savve laekem tumas material samting. (1 John 2:15, 16) Wei for laekem selen tumas or tingting for laek rich and garem staka material samting, savve mekem wanfala Christian for duim samting wea no fitim wanem God laekem. Samfala start for no honest long ples for waka, laea long olketa narawan, and stealim selen or tekem samting wea no bilong olketa.—1 Tim. 6:9, 10.
Samting wea savve helpem iumi for keepim ‘heart bilong iumi klin,’ hem nao for barava no laek duim eni samting wea Jehovah no hapi long hem. Iumi mas laekem tumas stret samting and disaed strong for followim wanem conscience bilong iumi talem. Datwan nao savve mekem iumi gohed for “duim nomoa olketa stret samting.” (Heb. 13:18) Taem iumi duim samting long honest wei, datwan savve givim bigfala witness. Wanfala witness long Italy, Emilio wea hem draeva long pablik transport, hem faendem wanfala paos wea garem 470 euro ($5,500 SBD). Olketa wea hem waka witim barava sapraes taem hem givim paos hia long boss bilong hem, and then boss hia givim bak datfala paos long man wea lusim. Samfala wea waka witim Emilio barava tinghae long wanem hem duim, and olketa start for interest and laek for studyim Bible. From datwan, sevenfala pipol from tufala famili nao acceptim truth. Tru nao, wei for garem heart wea klin hem mekem iumi honest and savve barava helpem olketa narawan for praisem God.—Titus 2:10.
Nara samting wea savve spoelem heart bilong wanfala Christian, hem nao wei for garem rong tingting abaotem sex. Tru nao, pipol tingse hem normal samting nomoa for durong bifor marit, adultery, and wei for olketa man durong witim man, and woman durong witim woman. Datkaen tingting savve spoelem heart bilong wanfala Christian. Wanfala man wea durong maet haedem datfala sin and trae for act olsem man wea klin. Datwan showimaot man hia barava no ‘klin long heart.’
Gabriele baptaes taem hem 15 year and stretawe hem start for pioneer. Bat bihaen, hem start for go long naetclub witim samfala nogud fren. (Ps. 26:4) From datwan, hem start for garem laef wea olobaot and hem disfellowship from Christian kongregeson. From hem kasem discipline from Jehovah, hem start for tingting gud abaotem laef bilong hem. Gabriele sei: “Mi start for duim evri samting wea mi no duim gud bifor. Mi readim Bible evriday for herem wanem Jehovah talem, and mi barava studyim gud olketa Bible pablikeson. Mi lukim hao wei for study seleva, readim Bible, and wei for prea strong, hem mekem mi satisfae and hem barava strongim mi.” Diswan helpem Gabriele for lusim olketa nogud wei bilong hem and for fren bak moa witim Jehovah.
Distaem Gabriele hem pioneer moa witim waef bilong hem. Samting wea happen long Gabriele pruvim hao wei for studyim Bible and olketa pablikeson from “datfala wakaman wea faithful and wise,” savve helpem man for garem heart wea klin and stap klia long olketa nogud wei.—Matt. 24:45; Ps. 143:10.
Keepim ‘Heart Bilong Iu Klin’ Taem Test Kamap
Hevi from olketa wea againstim iumi, problem saed long selen, and olketa barava nogud sik mekem samfala wea servem God for feel nogud. Samfala taem, datwan spoelem heart bilong olketa. King David tu kasem datwan and hem sei: “Spirit insaed long mi hem wikdaon, and heart bilong mi no feelim eni samting.” (Ps. 143:4) Wanem nao helpem hem for winim kaen feeling olsem? David tingim bak olketa samting wea Jehovah duim for olketa wea worshipim Hem and hao hemseleva tu kasem help from God. Hem ting raonem wanem Jehovah duim for nambawan nem bilong Hem. David gohed for ting raonem olketa waka bilong God. (Ps. 143:5) Olsem David, taem iumi kasem test, iumi savve gohed for ting raonem evri samting wea Jehovah duim finis and wanem hem gohed for duim for iumi.
Taem samwan talem rong samting abaotem iumi, hem isisi for iumi kros or feel nogud. Sapos iumi gohed for tingim olowe, datwan savve mekem iumi feel nogud abaotem olketa brata and sista bilong iumi. Maet iumi start for no fren witim olketa brata and sista and no interest long olketa. Bat waswe, bae datwan help for keepim ‘heart bilong iumi klin’? Tru tumas, for keepim heart bilong iumi klin hem minim tu olketa samting wea iumi duim witim olketa Christian brata and sista taem iumi no agree long eni samting.
Long disfala world wea olobaot and wei bilong pipol gohed for kamap nogud, iumi olketa tru Christian difren bikos iumi laek for keepim ‘heart bilong iumi klin.’ From iumi duim wanem God laekem, laef bilong iumi kamap gud bikos iumi kasem trufala peace. Winim eni samting, iumi enjoyim wei for fren gud witim Creator bilong iumi Jehovah God wea lovem olketa wea “klin long heart.” (Ps. 73:1) Tru nao, iumi savve hapi, bikos Jesus hem sei olketa wea garem “heart wea klin” “bae lukim God” taem Hem duim samting for olketa.—Matt. 5:8.