Distaem Hem Moa Important for Luk Aot Gud
“Go ahed for luk aot, bikos iufala no savve wanem day nao Lord bilong iufala bae kam.”—MATTHEW 24:42.
1, 2. Wanem nao showimaot iumi stap long end bilong disfala system?
MAN for raet, Bill Emmott hem sei: “War nao main samting wea barava affectim mek-20 century.” Nomata hem agree hao war and raf fasin hem fulap long history bilong olketa man, hem sei: “Mek-20 century hem no difren saed long war and raf fasin, bat samting wea difren nao hem wei wea war and raf fasin hem moa big winim bifor. Hem nao first century for garem wanfala war wea kamap long full world . . . And for showimaot hem barava tru, no wanfala world war nomoa kamap long mek-20 century, bat tufala.”
2 Jesus Christ hem profesi abaotem olketa war wea ‘nation bae againstim nation and kingdom againstim kingdom.’ Bat, olketa part long ‘saen bilong taem wea Christ stap moa and taem bilong end bilong disfala system.’ Long disfala nambawan profesi, Jesus storyim tu taem bilong no eni kaikai, nogud sik, and olketa earthquake. (Matthew 24:3, 7, 8; Luke 21:6, 7, 10, 11) Long planti wei, olketa trabol hia kamap moa big and moa strong. Wei wea wicked fasin bilong man hem staka hem showaot thru long tingting bilong olketa abaotem God and nara pipol. Brekdaon saed long fasin and wei wea raf fasin kamap moa big hem showaot klia. Olketa man kamap pipol wea lovem selen and no lovem God, olketa busy tumas long hapitaem. Evriting hia pruvim iumi stap long “nogud taem.”—2 Timothy 3:1-5.
3. Hao nao “olketa saen bilong taem” shud affectim iumi?
3 Hao nao iuseleva ting long wei wea living hem kamap moa worse? Planti pipol no warim, or no feel sorre long olketa nogud samting wea happen distaem. Olketa bigman bilong world and olketa savveman no savve long mining bilong “olketa saen bilong taem”; and olketa bigman bilong religion tu no givim stretfala instruction long diswan. (Matthew 16:1-3) Bat Jesus givim disfala kaonsel long olketa follower bilong hem: “Go ahed for luk aot, bikos iufala no savve wanem day nao Lord bilong iufala bae kam.” (Matthew 24:42) Long hia Jesus encouragem iumi no for luk aot nomoa bat for “go ahed for luk aot.” For go ahed for luk aot, iumi mas stap redy and luk aot evritaem. For duim diswan man need for duim moa samting winim wei for luksavve iumi stap long olketa last day and for luksavve hao living hem hard. Iumi mas barava biliv strong hao “end bilong evri samting hem kam klosap nao.” (1 Peter 4:7) Kaen tingting olsem bae mekem iumi luksavve hao wei for luk aot hem important tumas. So, kwestin wea iumi mas ting raonem nao hem: ‘Wanem nao bae helpem iumi for strongim go moa biliv bilong iumi hao end hem klosap tumas?’
4, 5. (a) Wanem nao bae strongim go moa biliv bilong iumi hao end bilong disfala wicked system hem klosap, and why nao olsem? (b) Wanem nao wanfala samting wea semsem witim taem bilong Noah and disfala taem wea Son bilong man hem stap moa?
4 Tingim living klosap long taem wanfala spesol samting long history hem happen—bigfala Flood long taem bilong Noah. Pipol wicked tumas gogo Jehovah “feel sorre long heart bilong hem.” Hem sei: “Mi bae finisim from disfala graon olketa man wea mi creatim.” (Genesis 6:6, 7) And datwan nao samting wea hem duim. Taem Jesus storyim wei wea datfala taem hem olsem distaem, hem sei: “Olsem long taem bilong Noah, taem wea Son bilong man stap moa bae olsem tu.”—Matthew 24:37.
5 Hem fitim for ting hao Jehovah garem sem feeling abaotem pipol distaem olsem hem garem abaotem pipol wea stap long taem bifor Flood. From hem finisim wanfala world wea no followim God long taem bilong Noah, hem bae distroem tu wicked world wea stap distaem. From iumi garem stretfala savve hao datfala taem hem olsem taem bilong iumi, datwan shud strongim biliv bilong iumi hao end bilong world hem klosap. So, wanem nao olketa samting wea semsem? Samting olsem faevfala point nao stap. First wan hem wanfala warning wea talemaot klia disfala wei for distroe wea bae kam.
“Warning Abaotem Olketa Samting wea Hem No Lukim Yet”
6. Wanem nao Jehovah disaed for duim long taem bilong Noah?
6 Long taem bilong Noah, Jehovah sei: “Spirit bilong mi bae no deal olowe long man from hem tu flesh. For fitim datwan olketa day bilong hem bae kasem wan handred and twenti year.” (Genesis 6:3) Disfala order wea kam from God long 2490 B.C.E. hem markem start bilong taem wea datfala world wea no followim God bae finis. Tingim wanem datwan hem minim for olketa wea laef! Only 120 year moa and Jehovah bae hem mekem “flood bilong wata long earth for finisim evri flesh wea garem paoa bilong laef insaed long olketa anda long heven.”—Genesis 6:17.
7. (a) Wanem nao Noah duim taem hem herem warning abaotem datfala Flood? (b) Wanem nao iumi shud duim saed long olketa warning abaotem end bilong disfala system?
7 Noah kasem warning planti year bifor trabol hem happen, dastawe hem iusim datfala taem long wisefala wei for redy for winim datwan. Aposol Paul hem sei: “Bihaen God givim hem warning abaotem olketa samting wea hem no lukim yet, [Noah] showimaot wei for fraet long God and wakem wanfala ark for sevem famili bilong hem.” (Hebrews 11:7) Waswe long iumi? Samting olsem 90 year go pas finis from taem wea olketa last day bilong disfala system hem start long 1914. Iumi barava stap long “taem bilong end.” (Daniel 12:4) Wanem nao iumi shud duim taem iumi herem olketa warning? Bible hem sei: “Man wea duim will bilong God bae stap olowe.” (1 John 2:17) So, distaem nao hem taem for duim will bilong Jehovah witim feeling for hariap.
8, 9. Wanem nao olketa warning wea Jehovah givim long distaem, and hao nao olketa hia go kasem pipol?
8 Long distaem, olketa Bible student lanem from Bible hao disfala system hem redy for distroe. Waswe, iumi bilivim diswan? Lukim kliafala toktok bilong Jesus Christ: “Big trabol bae kamap wea nating happen bifor from taem world hem start kam kasem distaem, and hem bae no happen moa.” (Matthew 24:21) Jesus sei tu hao hem bae kam olsem Judge wea God markem and bae separatem pipol olsem wanfala shepherd separatem olketa sheep and olketa goat. Olketa wea no fit bae “finis evribit, bat olketa raeteous wan bae kasem laef olowe.”—Matthew 25:31-33, 46.
9 Jehovah hem go ahed for warnim pipol bilong hem thru long spiritual kaikai wea kam long barava taem wea datfala “faithful and wise slave” provaedem. (Matthew 24:45-47) And tu, evri nation, tribe, languis, and pipol kasem invitation for “fraet long God and givim hem glory, from hour bilong judgment bilong hem kam finis nao.” (Revelation 14:6, 7) Wanfala important part long message bilong Kingdom wea Olketa Jehovah’s Witness preachim evriwea long earth hem warning abaotem wei wea klosap nao Kingdom bilong God bae aotem rul bilong olketa man. (Daniel 2:44) Disfala warning hem no samting nating. Olmaeti God hem evritaem fulfillim promis bilong hem. (Isaiah 55:10, 11) Hem duim datwan long taem bilong Noah and bae hem duim olsem long taem bilong iumi.—2 Peter 3:3-7.
Dirty Fasin Kamap Nogud Tumas
10. Hao big nao dirty fasin long taem bilong Noah?
10 Taem bilong iumi hem semsem olsem taem bilong Noah long nara samting. Jehovah givim komand long first man and woman for “fulimap earth” witim olketa nara man, iusim paoa wea God givim tufala saed long sex insaed long marit arrangement. (Genesis 1:28) Long taem bilong Noah, olketa angel wea no obey spoelem olketa man saed long nogud sex. Olketa kamdaon long earth, kasem body olsem man, and sleep witim olketa woman wea luk naes, and garem olketa pikinini wea haf man, haf demon—olketa Nephilim. (Genesis 6:2, 4) Sin bilong olketa angel hia wea garem strong feeling for laek duim sex hem olsem olketa nogud fasin bilong pipol long Sodom and Gomorrah. (Jude 6, 7) Dastawe, dirty fasin hem big tumas long datfala taem.
11. Wanem fasin saed long living nao showimaot hao taem bilong iumi hem semsem witim taem bilong Noah?
11 Waswe fasin bilong olketa man distaem? Long olketa last day distaem, main samting long living bilong planti pipol hem sex. Paul story klia abaotem olketa hia taem hem sei olketa “no garem eni stretfala tingting”; planti long olketa insaed “olabaot fasin for duim evrikaen fasin wea no klin witim greedy fasin.” (Ephesians 4:19) Dirty piksa, sex bifor marit, spoelem pikinini saed long sex, and homosexual fasin kamap olsem normal samting nomoa. Samfala “kasem evribit long olketa seleva samting wea fitim olketa for kasem” saed long olketa sik bilong dirty fasin, famili brekdaon, and olketa nara problem saed long living.—Romans 1:26, 27.
12. Why nao iumi shud mekem grow fasin for heitim nogud samting?
12 Long taem bilong Noah, Jehovah sendem bigfala Flood and finisim datfala world wea laekem tumas sex. Iumi mas no enitaem forgetim hao taem wea iumi stap insaed hem semsem witim taem bilong Noah. Datfala “big trabol” wea redy for happen bae aotem ‘olketa wea duim fornication, duim adultery, duim homosexual fasin, and olketa man wea leidaon witim man.’ (Matthew 24:21; 1 Corinthians 6:9, 10; Revelation 21:8) Hem important tumas for iumi mekem grow fasin for heitim nogud samting and stap klia long olketa samting wea savve lead go for dirty fasin!—Psalm 97:10; 1 Corinthians 6:18.
Earth Hem “Fulap Witim Raf Fasin”
13. Long taem bilong Noah, why nao earth hem “fulap witim raf fasin”?
13 Taem hem storyim mek-thri samting wea kamap long taem bilong Noah, Bible sei: “Earth hem kamap nogud tumas long eye bilong tru God and earth hem fulap witim raf fasin.” (Genesis 6:11) Raf fasin hem no niu samting. Cain, son bilong Adam hem killim dae raeteous brata bilong hem. (Genesis 4:8) Taem hem story abaotem raf fasin long taem bilong hem, Lamech raetem wanfala poem wea hem tokplas abaotem hao hem killim dae wanfala young man, wea happen taem hem defendim hemseleva. (Genesis 4:23, 24) Samting wea difren long taem bilong Noah nao hem wei wea raf fasin hem big tumas. Taem olketa angel bilong God wea no obey olketa maritim olketa woman long earth and garem pikinini—olketa Nephilim—raf fasin kamap big winim enitaem bifor. Olketa raf giant hia nao “olketa Feller”—“olketa wea mekem nara pipol foldaon.” (Genesis 6:4, footnote) From diswan nao earth hem “fulap witim raf fasin.” (Genesis 6:13) Tingim olketa problem wea Noah feisim taem hem trainim famili bilong hem long kaen ples olsem! Nomata olsem, Noah hem ‘raeteous front long Jehovah midolwan long datfala genereson.’—Genesis 7:1.
14. Hao nao earth distaem hem “fulap witim raf fasin”?
14 Raf fasin hem stap long full history bilong olketa man. Bat olsem long taem bilong Noah, taem bilong iumi raf fasin hem winim enitaem bifor. Iumi evritaem herem story abaotem raf fasin long famili, olketa terrorist, wei for killim dae pipol from difren ples, and olketa man wea no garem eni reason bat wea killim dae planti pipol. Joinim olketa hia witim planti pipol wea dae long olketa war. Earth hem fulap moa witim raf fasin. Why nao olsem? Wanem nao mekem diswan kamap big tumas? Ansa hem stap long samting wea semsem tu long taem bilong Noah.
15. (a) Why nao raf fasin hem kamap big tumas long olketa last day? (b) Wanem nao iumi savve sure long hem?
15 Taem Messiah Kingdom bilong God hem start long heven long 1914, Jesus Christ, King wea rul hem duim samting wea affectim full world. Hem torowem Devil Satan and olketa demon bilong hem from heven kamdaon and stap raonem earth. (Revelation 12:9-12) Bifor datfala Flood, olketa angel wea no obey olketa seleva lusim position bilong olketa long heven; bat, long distaem, Jesus Christ aotem olketa. And tu, olketa no savve kasem moa body olsem man long earth for mekem olketa savve aftarem samting saed long man wea olketa laekem. So from olketa feel nogud, kros, and fraet long judgment wea olketa klosap kasem, olketa muvim olketa man and organization for duim criminal samting and raf fasin wea big winim taem bilong Noah. Jehovah finisim world wea stap long taem bifor Flood bihaen olketa angel wea no obey and pikinini bilong olketa fulimap earth witim nogud fasin. For sure bae hem duim sem samting long taem bilong iumi! (Psalm 37:10) Nomata olsem, olketa wea luk aot gud distaem savve wei for sevem olketa hem klosap nao.
Olketa Preach Abaotem Datfala Message
16, 17. Wanem nao mek-foa samting wea semsem long taem bilong Noah and taem bilong iumi?
16 Mek-foa samting wea semsem long world distaem and world bifor taem bilong Flood hem assignment wea Noah kasem. Noah buildim wanfala bigfala ark. Hem “wanfala man wea preach” tu. (2 Peter 2:5) Wanem nao message wea hem preachim? Noah hem preach abaotem wei for repent and givim warning abaotem wei for distroe wea bae kam. Jesus sei pipol long taem bilong Noah “olketa nating lisin gogo flood hem kam and swipim olketa go.”—Matthew 24:38, 39.
17 Long sem wei tu, taem Olketa Jehovah’s Witness waka hard for fulfillim assignment bilong olketa, olketa preachim message bilong Kingdom bilong God evriwea long world. Long klosap evri part long world, pipol savve herem and read abaotem message bilong Kingdom long languis bilong olketa seleva. Wastaoa magasin wea story abaotem Kingdom bilong Jehovah olketa printim 25,000,000 copy evritaem long winim 140 languis. Tru nao, olketa preachim gud nius abaotem Kingdom bilong God “long earth for givim witness long evri nation.” Taem datfala waka hem kasem wanem God wantem, then end bae kam.—Matthew 24:14.
18. Hao nao wei wea pipol ting long preaching waka bilong iumi hem semsem olsem planti pipol long taem bilong Noah?
18 From barava nogud living long spiritual saed and saed long fasin bifor Flood hem kam, iumi savve long reason why olketa neiba bilong Noah laflaf and tok spoelem hem and famili bilong hem. Bat end hem really kam. Olsem long olketa last day tu, staka “pipol wea laek for mekfani bae kam witim toktok bilong olketa.” “Nomata olsem, day bilong Jehovah bae kam olsem man for steal,” Bible hem talem. (2 Peter 3:3, 4, 10) Bae hem kam long barava taem wea God markem. Bae hem no leit. (Habakkuk 2:3) Iumi wise sapos iumi go ahed for luk aot!
Smol Sekson Nomoa Laef
19, 20. Wanem nao olketa samting wea semsem saed long Flood and taem wea disfala system bae distroe?
19 Wei wea taem bilong Noah and taem bilong iumi semsem hem no saed long raf fasin nomoa and wei wea pipol bae distroe. Long sem wei wea samfala laef thru long Flood, samfala tu bae laef thru long end bilong disfala system. Olketa wea laef thru long Flood nao olketa hambol wan wea no garem living olsem pipol long datfala taem. Olketa obeyim warning bilong God and stap difren from wicked world wea stap long datfala taem. Bible sei: “Noah mekem Jehovah hapi. . . . [Noah] no garem blame midolwan long pipol long datfala taem.” (Genesis 6:8, 9) Long evri man, wanfala famili, “tu-thri pipol nomoa, hem nao, eitfala soul, stap sef thru long wata.” (1 Peter 3:20) And long olketa hia Jehovah givim komand olsem: “Garem pikinini and kamap staka and fulimap earth.”—Genesis 9:1.
20 Word bilong God promisim iumi hao “wanfala big crowd” bae “kamaot from datfala big trabol.” (Revelation 7:9, 14) Haomas pipol nao bae stap insaed datfala big crowd? Jesus seleva sei: “Gate hem smol and road wea lead go long laef hem no isi for wakabaot long hem, and samfala nomoa faendem.” (Matthew 7:13, 14) Sapos iumi markem olketa hia witim planti billion pipol wea stap long earth distaem, olketa wea bae laef thru long datfala big trabol wea bae kam hem smol nomoa. Bat bae olketa garem chance wea olsem olketa wea laef thru long Flood. Olketa wea laef thru maet for samfala taem fit for garem pikinini olsem part bilong datfala niu community long earth.—Isaiah 65:23.
“Go Ahed for Luk Aot”
21, 22. (a) Hao nao disfala wei for story abaotem Flood hem helpem iu? (b) Wanem nao yeartext bilong 2004, and why nao iumi shud followim advaes hia?
21 Nomata Flood hem happen longtaem go finis, diswan hem wanfala warning wea iumi mas no ting nating long hem. (Romans 15:4) Wei wea taem bilong Noah and taem bilong iumi semsem long planti wei shud mekem iumi luksavve long samting wea go ahed for happen and mekem iumi luksavve hao wei wea Jesus bae kam for judgem wicked pipol bae olsem man wea steal.
22 Distaem, Jesus Christ hem leadim wanfala bigfala spiritual building waka. For keepim sef and helpem olketa tru worshiper for laef thru, wanfala spiritual paradaes wea olsem wanfala ark hem stap. (2 Corinthians 12:3, 4) For laef thru long datfala big trabol, iumi mas stap insaed long datfala paradaes. Raonem datfala spiritual paradaes hem world bilong Satan, wea redy for kasholem eniwan wea sleep long spiritual wei. Hem important for iumi “go ahed for luk aot” and pruvim hao iumi redy for day bilong Jehovah.—Matthew 24:42, 44.
Waswe, Iu Remember?
• Wanem kaonsel nao Jesus givim saed long kakam bilong hem?
• Jesus markem taem wea hem stap moa witim wanem?
• Wanem nao olketa wei wea taem bilong iumi hem semsem witim taem bilong Noah?
• Hao nao wei for ting raonem wei wea taem bilong iumi semsem witim taem bilong Noah hem affectim feeling bilong iumi for hariap?
[Blurb long page 18]
Yeartext bilong 2004 bae hem: “Go ahed for luk aot . . . Pruvim hao iufala redy.”—Matthew 24:42, 44.
[Piksa long page 15]
Noah obeyim warning bilong God. Waswe, iumi tu duim olsem?
[Olketa Piksa long page 16, 17]
“Olsem long taem bilong Noah, taem wea Son bilong man stap moa bae olsem tu”