Iumi Bae Wakabaot Long Nem Bilong God Bilong Iumi, Jehovah
“Iumi, for saed bilong iumi, bae wakabaot long nem bilong Jehovah, God bilong iumi for longfala taem, yes for olowe.”—MICAH 4:5.
1. Hao nao fasin bilong pipol long taem bilong Noah, and long wanem wei nao Noah hem difren?
FIRST man wea Bible sei hem wakabaot witim God nao hem Enoch. Mek-tu man hem Noah. Bible hem sei: “Noah hem wanfala raeteous man. Hem no garem blame midolwan long pipol long datfala taem. Noah wakabaot witim trufala God.” (Genesis 6:9) Kasem taem bilong Noah, olketa man no duim klin worship. Diswan kamap moa worse bikos olketa angel wea no faithful maritim olketa woman and garem pikinini wea Bible kolem olketa Nephilim, “olketa maeti man,” or “olketa man wea garem bignem,” long datfala taem. Dastawe earth hem fulap witim raf fasin! (Genesis 6:2, 4, 11) Nomata olsem, Noah hem no garem blame and hem “preach abaotem raeteous fasin.” (2 Peter 2:5) Taem God givim hem komand for buildim wanfala ark for keepim olketa laef, Noah hem obey and “duim evri samting wea God komandim hem for duim. Hem barava duim olsem.” (Genesis 6:22) Tru tumas, Noah hem wakabaot witim God.
2, 3. Wanem nambawan example nao Noah showimaot for iumi distaem?
2 Taem Paul storyim olketa faithful witness bifor, hem talem nem bilong Noah and hem sei: “Thru long faith Noah, bihaen God givim hem warning abaotem olketa samting wea hem no lukim yet, showimaot wei for fraet long God and wakem wanfala ark for sevem famili bilong hem; and thru long disfala faith hem judgem world, and hem kasem promis bilong raeteous fasin wea kam from faith.” (Hebrews 11:7) Datwan hem nambawan example! From Noah hem sure toktok bilong Jehovah bae kamap tru, hem iusim taem, strong, and samting hem ownim for duim olketa samting wea God komandim hem for duim. Long sem wei, staka distaem rejectim olketa chance for win long disfala world and iusim taem, strong and olketa samting wea olketa ownim for obeyim wanem Jehovah komandim. Faith bilong olketa hem strong and diswan bae sevem olketa seleva and olketa narawan tu.—Luke 16:9; 1 Timothy 4:16.
3 Masbi hem hard for Noah and famili bilong hem for showimaot faith olsem Enoch, laen dadi bilong Noah wea iumi storyim long first article. Long taem bilong Noah, olsem long taem bilong Enoch, olketa tru worshiper smol sekson nomoa—eitfala pipol nomoa faithful and sev long taem bilong Flood. Noah hem preach abaotem raeteous fasin midolwan pipol wea raf and duim dirty fasin. And tu, hem and famili bilong hem buildim wanfala big ark for flood wea bae kamap evriwea long world, nomata no eniwan lukim flood olsem bifor. Masbi pipol long datfala taem nating minim why nao olketa laek duim datwan.
4. Wanem mistek nao Jesus hem sei pipol long taem bilong Noah duim?
4 Interesting samting, taem Jesus story abaotem taem bilong Noah, hem no story abaotem raf fasin, giaman religion, or dirty fasin—nomata olketa samting hia barava nogud samting tumas. Mistek wea Jesus mekhae long hem nao hem wei wea pipol les for herem warning wea Noah talem long datfala taem. Hem sei olketa “kaikai and drink, olketa man marit and givim olketa woman for marit, go kasem taem wea Noah hem go insaed long ark.” Kaikai, drink, marit—olketa samting hia no rong. Long tingting bilong olketa, olketa duim “normal samting” nomoa! Bat flood hem klosap for kam, and Noah hem gohed preach abaotem raeteous fasin. Toktok and fasin bilong hem shud givim warning long olketa. Nomata olsem, “olketa nating lisin go kasem taem flood hem kam and swipim olketa go.”—Matthew 24:38, 39.
5. Wanem nao olketa fasin wea Noah and famili bilong hem needim?
5 Taem iumi ting bak long datfala taem, iumi lukim hao samting wea Noah duim long laef hem wise samting. Nomata olsem, for stap difren from evri narawan bifor datfala Flood hem kam, Noah needim fasin for no fraet. For buildim datfala big ark and fulimap witim enikaen difren animal, Noah and famili bilong hem mas barava biliv strong. Waswe, samfala taem tu-thri faithful wan hia laek for garem “normal” laef tu? Nomata maet olketa lelebet tingim datwan samfala taem, datwan no stopem olketa for gohed faithful. Bihaen staka year—wea datwan hem staka moa year winim olketa year wea eniwan long iumi bae need for gohed strong long disfala world—faith bilong Noah mekem hem kasem salvation taem Flood hem kam. Bat, Jehovah judgem evriwan wea laef bilong olketa “normal” and wea no ting strong long wei wea olketa stap insaed taem wea God hem judgem pipol.
Raf Fasin Kamap Moa Midolwan Olketa Man
6. Bihaen long Flood, wanem samting nao stap yet?
6 Bihaen wata bilong Flood hem go daon, olketa man garem niu start. Nomata olsem, olketa man still no perfect, and “wei bilong heart bilong man” gohed for “nogud . . . start kam from taem hem young yet.” (Genesis 8:21) Nara samting tu, nomata olketa demon no savve kamap olsem man moa, olketa still garem paoa for duim samting. Kwiktaem nomoa, pipol wea no lovem God showimaot hao olketa “stap anda long paoa bilong wicked wan” and olsem distaem tu, olketa tru worshiper mas faet againstim olketa “trik bilong Devil.”—1 John 5:19; Ephesians 6:11, 12.
7. Hao nao raf fasin kamap moa big bihaen taem bilong Flood?
7 Long taem bilong Nimrod, pipol start for kamap raf moa. From population hem grow and technology hem muv ahed, raf fasin hia kamap moa big. Long bifor, olketa iusim sword, spia, bow and arrow, and chariot. Long tu-thri century wea go pas olketa iusim musket and cannon, and then long olketa first year bilong mek-20 century, olketa iusim gun and olketa nara hae paoa samting for killim man dae. Long World War I, olketa iusim olketa niu samting for faet wea barava mekem man fraet olsem aeroplane, tank, submarine, and poison gas. Long datfala war, olketa niu samting for faet hia killim dae staka million pipol. Waswe, datwan hem samting wea iumi no expectim? Nomoa.
8. Long wanem wei nao Revelation 6:1-4 hem fulfill?
8 Long year 1914, Jesus hem kamap King long Kingdom Bilong God long heven, and “day bilong Lord” hem start. (Revelation 1:10) Long wanfala vision insaed buk bilong Revelation, Jesus hem King wea raedem wanfala white horse and wea win againstim olketa enemy. Olketa narafala man wea raedem horse followim hem, and each wan stand for difren trabol wea kasem olketa man. Wanfala long olketa hem raedem red horse, and hem kasem paoa for “tek aotem peace from earth mekem pipol killim dae each other; and olketa givim hem wanfala sword wea big tumas.” (Revelation 6:1-4) Disfala horse and man wea raedem piksarem war, and datfala sword wea big tumas piksarem wei wea samting olketa iusim for faet distaem savve barava distroem samting winim enitaem bifor. Insaed diswan hem olketa nuclear bomb and biological weapon wea savve killim dae staka million pipol and olketa rocket wea savve kasem target wea stap long olketa farawe kantri.
Iumi Lisin Long Olketa Warning Bilong Jehovah
9. Long wanem wei nao world distaem hem semsem olsem world long taem bilong Flood?
9 Long taem bilong Noah, Jehovah distroem wicked pipol bikos long raf fasin wea olketa wicked man and Nephilim duim. Waswe distaem? Waswe, earth distaem hem raf olsem long taem bilong Noah? Barava nao! Nara samting tu, olsem long taem bilong Noah, pipol distaem gohed long laef bilong olketa evriday, olketa trae for garem “normal” laef, and no laek for lisin long olketa warning. (Luke 17:26, 27) So waswe, eni reason stap for mekem iumi daotem sapos Jehovah bae distroem wicked pipol moa? Nomoa tu.
10. (a) Wanem warning nao staka profesi insaed Bible givim? (b) Wanem nao only wise samting for duim distaem?
10 Staka handred year bifor long Flood, Enoch talem profesi abaotem wei wea God bae finisim evri samting long taem bilong iumi. (Jude 14, 15) Jesus tu story abaotem “bigfala trabol” wea bae kam. (Matthew 24:21) Olketa nara profet tu givim olketa warning abaotem taem hia. (Ezekiel 38:18-23; Daniel 12:1; Joel 2:31, 32) And insaed buk bilong Revelation hem storyim klia tumas datfala taem wea evri samting bae distroe. (Revelation 19:11-21) Iumi wanwan followim example bilong Noah and strong for preach abaotem raeteous fasin. Iumi herem olketa warning bilong Jehovah and long loving wei helpem olketa neiba bilong iumi for duim sem samting. So, olsem Noah, iumi wakabaot witim God. Tru tumas, hem important for eniwan wea laek for laef mas gohed wakabaot witim God. Hao nao iumi savve duim datwan nomata iumi feisim olketa hevi evriday? Iumi need for mekem grow strongfala faith long plan bilong God.—Hebrews 11:6.
Gohed for Wakabaot Witim God Long Taem Bilong Trabol
11. Long wanem wei nao iumi followim example bilong olketa Christian long first century?
11 Long first century, pipol talem hao olketa anointed Christian brata and sista olketa member bilong “Datfala Wei.” (Acts 9:2) Evri samting olketa duim hem followim faith wea olketa garem long Jehovah and Jesus Christ. Olketa wakabaot followim wei wea Masta bilong olketa hem followim. Distaem, olketa faithful Christian duim sem samting tu.
12. Wanem nao happen bihaen Jesus duim mirakol for feedim staka pipol?
12 Samting wea happen long ministry bilong Jesus showim why nao hem important for garem strongfala faith. Jesus duim mirakol for feedim samting olsem 5,000 man. Pipol hia barava sapraes and hapi tu. Bat, lukim next samting wea happen. Bible hem sei: “Taem olketa man lukim olketa mirakol wea hem duim, olketa start for sei: ‘For sure, disfala man nao datfala profet wea bae kam long world.’ So, from hem savve olketa redi for kasholem hem for mekem hem kamap king, Jesus go ap seleva long maunten.” (John 6:10-15) Long datfala naet hem travel go long nara ples. Maet staka nao no hapi taem Jesus no acceptim datfala wei for kamap king. Hem showimaot wei wea hem wise and fit for kamap king, and tu, hem garem paoa for givim pipol wanem olketa needim long physical saed. Nomata olsem, hem no taem bilong Jehovah yet for Jesus rul olsem King. Nara samting moa, Kingdom Bilong Jesus bae no kamap long earth, bat bae hem kamap long heven.
13, 14. Plande garem wanem tingting, and wanem nao testim faith bilong olketa?
13 Nomata olsem, olketa pipol followim Jesus, and olsem John hem talem, olketa faendem hem long “narasaed bilong sea.” Why nao olketa followim hem bihaen hem lusim olketa from hem no laek for kamap king? Plande long olketa showimaot olketa garem physical tingting taem olketa story abaotem olketa material samting wea Jehovah provaedem long wilderness long taem bilong Moses. Reason why olketa storyim datwan hem bikos long tingting bilong olketa, Jesus shud gohed provaedem kaikai for olketa. Jesus luksavve long rong tingting wea olketa garem and start for teachim olketa spiritual truth long olketa wea savve stretem tingting bilong olketa. (John 6:17, 24, 25, 30, 31, 35-40) Bat, samfala komplen abaotem hem, especially taem hem talem disfala tokpiksa long olketa: “Mi talem iufala stret, Sapos iufala no kaikaim body bilong Son bilong man and drinkim blood bilong hem, iufala bae no garem laef. Man wea kaikaim body bilong mi and drinkim blood bilong mi bae garem laef olowe, and mi bae resurrectim hem long last day.”—John 6:53, 54.
14 Plande taem, olketa tokpiksa bilong Jesus muvim pipol for showimaot sapos olketa really laek for wakabaot witim God or nomoa. Disfala tokpiksa hem olsem tu. Pipol garem barava strongfala feeling abaotem datwan. Bible hem sei: “Plande disaepol bilong hem, taem olketa herem diswan, olketa sei: ‘Disfala toktok hem nogud tumas; hu nao laek for lisin long kaen toktok olsem?’” Jesus gohed for explainim hao olketa shud trae for luksavve long spiritual mining bilong samting wea hem talem. Hem sei: “Spirit nao hem givim laef; body hem iusles nomoa. Olketa samting mi talem long iufala hem spirit and laef.” Nomata olsem, staka no laek for lisin, and Bible sei: “From diswan plande long olketa disaepol bilong hem go bak long olketa samting bilong bifor and no followim hem moa.”—John 6:60, 63, 66.
15. Wanem stretfala tingting nao samfala follower bilong Jesus garem?
15 Bat, samfala long olketa disaepol bilong Jesus garem difren feeling abaotem datwan. Hem tru, olketa hia no barava minim samting wea Jesus talem. Nomata olsem, olketa still barava trust long Jesus. Peter, wanfala long olketa disaepol wea loyal hem talem feeling bilong evriwan long olketa hia taem hem sei: “Lord, hu nao bae mifala go long hem? Iu nao storyim olketa samting wea bae mekem man kasem laef olowe.” (John 6:68) Datwan hem nambawan wei for tingting, and gudfala example for iumi followim!
16. Wanem kaen samting nao maet testim iumi, and wanem stretfala tingting nao iumi shud mekem grow?
16 Distaem, maet iumi kasem semkaen test wea olketa follower bilong Jesus kasem. Maet iumi feel nogud from iumi no lukim olketa promis bilong Jehovah fulfill kwiktaem fitim wanem iumi laekem. Maet hem hard for minim wei wea olketa Bible pablikeson bilong iumi explainim Bible. Maet fasin bilong wanfala Christian mekem iumi feel nogud. Waswe, bae hem stret for lusim wei for wakabaot witim God for olketa kaen reason olsem? Barava nomoa nao! Olketa disaepol wea lusim Jesus garem physical wei for ting long samting. Iumi mas stap klia long wei for duim sem samting.
“Iumi No Datkaen wea Muv Bak”
17. Hao nao iumi savve kasem help for gohed wakabaot witim God?
17 Aposol Paul hem raet olsem: “Full Bible hem kam from God.” (2 Timothy 3:16) Jehovah talem iumi thru long Bible disfala klia toktok: “Diswan nao wei. Wakabaot followim.” (Isaiah 30:21) Wei for obeyim Word Bilong God hem helpem iumi for ‘lukluk gud long hao iumi wakabaot.’ (Ephesians 5:15) Wei for studyim Bible and ting raonem wanem iumi lanem bae helpem iumi “gohed for wakabaot long truth.” (3 John 3) Tru nao, olsem Jesus talem, “spirit nao hem givim laef, body hem iusles nomoa.” Only instruction for leadim iumi long spiritual wei wea iumi savve trustim nao, hem instruction from Word Bilong Jehovah, spirit bilong hem, and organization bilong hem.
18. (a) Wanem nao wanfala samting wea no wise wea samfala duim? (b) Wanem kaen faith nao iumi mekem grow?
18 Distaem, olketa wea feel nogud bikos olketa garem physical wei for ting long samting or bikos olketa no kasem samting olketa expectim, olketa plande taem mekius long world. From olketa lusim wei wea olketa tingim hao end hem klosap for kam, olketa no lukim eni need for “gohed for luk aot,” and olketa chus for aftarem olketa selfish goal winim wei for putim Kingdom fastaem. (Matthew 24:42) Hem barava no wise for duim olsem. Tingim disfala toktok bilong aposol Paul: “Iumi no datkaen wea muv bak for finis evribit, bat datkaen wea garem faith for keepim soul laef.” (Hebrews 10:39) Olsem Enoch and Noah, iumi stap long taem bilong trabol, bat olsem tufala, iumi garem privilege for wakabaot witim God. From iumi duim olsem, iumi feel sure hao iumi bae lukim taem wea olketa promis bilong Jehovah fulfill, wicked fasin hem finis, and wanfala raeteous niu world hem kamap. Datwan hem nambawan samting for luk forward long hem!
19. Micah sei olketa tru worshiper bae duim wanem?
19 Spirit bilong God hem muvim profet Micah for talem hao olketa nation bilong world bae “wakabaot long nem bilong god bilong olketa.” Then hem storyim hemseleva and olketa narawan wea faithful for worship taem hem sei: “Iumi, for saed bilong iumi, bae wakabaot long nem bilong God bilong iumi Jehovah, for longfala taem, yes for olowe.” (Micah 4:5) Sapos iu disaed strong for duim sem samting olsem Micah, iu mas fren gud witim Jehovah, and gohed for duim datwan nomata long eni trabol wea kasem iumi. (James 4:8) Mekem hem kamap samting wea heart bilong iumi barava laekem, hem nao, for wakabaot witim God bilong iumi Jehovah for longfala taem, yes for olowe!
Hao Nao Bae Iu Ansa?
• Long wanem wei nao taem bilong Noah and distaem hem semsem?
• Wanem wei nao Noah and famili bilong hem followim, and hao nao iumi savve garem sem faith olsem olketa?
• Wanem rong tingting nao samfala follower bilong Jesus garem?
• Wanem nao olketa tru Christian disaed strong for duim?
[Olketa Piksa long page 20]
Olsem long taem bilong Noah, pipol distaem busy tumas long evriday living
[Piksa long page 21]
Iumi wea preach abaotem Kingdom “no datkaen wea muv bak”