“Gohed for Lukaot”—Hour Bilong Judgment Kam Finis!
Information long disfala study article hem kam from datfala brochure Gohed for Luk Aot! wea release long olketa distrik convention raonem world long 2004/05.
“Gohed for lukaot, bikos iufala no savve wanem day nao Lord bilong iufala bae kam.”—MATTHEW 24:42.
1, 2. Jesus markem taem wea hem bae kam witim wanem?
WANEM nao bae iu duim sapos iu savve wanfala man for steal hem gogo raon long area wea iu stap? For protectim haos and famili bilong iu, bae iu gohed for lukaot. Iu duim olsem bikos hem no talem iu wanem taem hem bae kam, bat hem kam long wei wea haed wea iu no savve.
2 Long samfala difren taem Jesus iusim wei bilong man for steal insaed olketa tokpiksa bilong hem. (Luke 10:30; John 10:10) Taem Jesus storyim olketa samting wea bae happen long taem bilong end bifor hem kam for judgem olketa man, hem talem disfala warning: “Gohed for lukaot, bikos iufala no savve wanem day nao Lord bilong iufala bae kam. Bat iufala savve finis hao sapos man wea ownim haos savve wanem taem nao man for steal bae kam, hem bae stap wekap and no letem man hia for go insaed haos.” (Matthew 24:42, 43) Long hia, Jesus markem taem wea hem bae kam bak witim wei bilong man for steal. Jesus bae kam long taem wea pipol no tingim.
3, 4. (a) Wanem nao hem minim for iumi obeyim warning bilong Jesus abaotem taem wea hem bae kam bak? (b) Wanem nao olketa kwestin wea kamap?
3 Datfala tokpiksa hem fitim bikos no eniwan bae savve long barava day wea Jesus bae kam bak. Long datfala sem profesi, Jesus hem sei: “No eniwan savve long datfala day and hour, nomata olketa angel long heven or Son tu, bat Father nomoa savve.” (Matthew 24:36) Dastawe Jesus sei olsem long olketa wea lisin long hem: “Iufala mas redi.” (Matthew 24:44) Olketa wea obeyim warning bilong Jesus bae stap redi and duim stret samting, nomata wanem taem hem kam for givim judgment bilong Jehovah.
4 Samfala important kwestin kamap: Waswe, warning bilong Jesus hem for pipol long world nomoa, or waswe, olketa tru Christian tu need for “gohed for lukaot”? Why nao hem barava important for iumi “gohed for lukaot,” and hao nao iumi savve duim datwan?
Warning for Hu Nao?
5. Hao nao iumi savve datfala warning for “gohed for lukaot” hem for olketa tru Christian?
5 Hem tru hao Lord bae kam olsem man for steal for pipol bilong world wea no laek herem warning abaotem trabol wea klosap for happen. (2 Peter 3:3-7) Bat, waswe olketa tru Christian? Aposol Paul hem sei olsem long olketa Christian: “Iufala barava savve hao day bilong Jehovah bae kam olsem man for steal long naet.” (1 Thessalonians 5:2) Iumi barava sure “day bilong Jehovah bae kam.” Bat waswe, diswan shud mekem iumi ting smol long wei wea iumi need for gohed for lukaot? Lukim hao Jesus story long olketa disaepol bilong hem nao, taem hem sei: “Long hour wea iufala no tingim, Son bilong man bae kam nao.” (Matthew 24:44) Bifor datwan, taem hem encouragem olketa disaepol for lukaotem kingdom bilong hem evritaem, Jesus warnim olketa: “Stap redi, bikos long hour wea iufala no tingim, Son bilong man bae kam.” (Luke 12:31, 40) Hem klia tumas hao Jesus tingim olketa follower bilong hem taem hem talem datfala warning for “gohed for lukaot.”
6. Why nao iumi need for “gohed for lukaot”?
6 Why nao iumi need for “gohed for lukaot” and “stap redi”? Jesus explainim diswan olsem: “Tufala man bae long field: bae olketa tekem wanfala and lusim narawan; tufala woman bae smasem wheat long wanfala hand mill: bae olketa tekem wanfala and lusim narawan.” (Matthew 24:40, 41) Pipol wea stap redi bae olketa “tekem” olketa, wea minim olketa bae sev taem disfala world wea no followim God hem distroe. Olketa narawan olketa bae “lusim” olketa for dae from olketa gohed for aftarem wanem olketa seleva laekem. Luk olsem insaed disfala sekson hem olketa wea savve finis long truth bat wea no gohed for lukaot.
7. From iumi no savve long day wea end bae kam, iumi savve duim wanem samting?
7 Wei wea iumi no barava savve day wea disfala world bae end givim iumi chance for showimaot stret samting nao muvim iumi for servem God. Hao nao olsem? Maet hem luk olsem end hem farawe yet. Sorre nao, samfala Christian wea feel olsem lusim strong bilong olketa for servem Jehovah. Bat, taem iumi dedicate, iumi givim iumiseleva evribit for servem Jehovah. Pipol wea savve long Jehovah luksavve hao wei for showimaot strong for shortfala taem long end bae no mekem hem tinghae long olketa. Hem savve long samting wea insaed heart.—1 Samuel 16:7.
8. Hao nao love for Jehovah muvim iumi for gohed for lukaot?
8 From iumi barava lovem Jehovah, wei for duim will bilong hem barava mekem iumi hapi. (Psalm 40:8; Matthew 26:39) And iumi laek servem Jehovah for olowe. Nomata iumi mas weit lelebet longtaem winim wanem iumi expectim, hem no minim disfala hope hem no spesol. Main reason why iumi gohed for lukaot hem bikos iumi barava luk forward long wanem day bilong Jehovah bae duim for fulfillim plan bilong hem. Feeling for barava laek mekem God hapi muvim iumi for followim kaonsel long Word bilong hem and mekem Kingdom nao first samting long laef bilong iumi. (Matthew 6:33; 1 John 5:3) Bae iumi storyim hao nao wei for gohed for lukaot shud affectim samting wea iumi disaedem and laef bilong iumi each day.
Wanem Nao Iu Duim Long Laef Bilong Iu?
9. Why nao hem important tumas for pipol long world for luksavve long mining bilong evri samting wea happen distaem?
9 Plande pipol luksavve hao olketa barava serious problem and olketa nogud samting kamap normal samting nomoa, and olketa maet no hapi long laef bilong olketa seleva. Bat, waswe, olketa savve long mining bilong evri samting wea happen long world distaem? Waswe, olketa luksavve iumi stap long “taem bilong end bilong disfala world”? (Matthew 24:3) Waswe, olketa luksavve hao selfish fasin, raf fasin, olketa fasin wea no followim God wea kamap big tumas showimaot iumi insaed “olketa last day”? (2 Timothy 3:1-5) Hem important tumas for olketa luksavve long evri samting hia and lukluk gud long wanem nao olketa duim long laef bilong olketa.
10. Wanem nao iumi mas duim for mek sure iumi gohed for lukaot?
10 Waswe long iumi? Evriday iumi mas mekem olketa disison saed long waka, health, famili, and worship. Iumi savve long wanem Bible hem talem, and iumi trae hard for followim datwan. Dastawe, hem gud for askem iumiseleva: ‘Waswe, mi letem olketa wari bilong laef leadim mi go difren from olketa spiritual goal bilong mi? Waswe, mi letem olketa idea and tingting bilong world affectim olketa disison bilong mi?’ (Luke 21:34-36; Colossians 2:8) Iumi need for gohed for showimaot hao iumi trustim Jehovah witim full heart and no depend long savve bilong iumiseleva. (Proverbs 3:5) Long wei olsem, iumi bae “hol strong long datfala really laef”—laef olowe insaed niu world bilong God.—1 Timothy 6:12, 19.
11-13. Wanem nao iumi savve lanem from example bilong samting wea happen (a) long taem bilong Noah? (b) long taem bilong Lot?
11 Bible garem staka example wea olsem warning wea savve helpem iumi gohed for lukaot. Tingim samting wea happen long taem bilong Noah. God mek sure hem givim inaf taem for pipol herem datfala warning. Bat Noah and famili bilong hem nomoa lisin. (2 Peter 2:5) Jesus sei olsem abaotem diswan: “Taem wea Son bilong man stap moa bae olsem taem bilong Noah. From olsem olketa duim bifor long flood, olketa kaikai and drink, olketa man marit and givim olketa woman for marit, go kasem taem wea Noah hem go insaed long ark; and olketa nating lisin go kasem taem flood hem kam and swipim olketa go, bae hem olsem tu long taem wea Son bilong man stap moa.” (Matthew 24:37-39) Wanem nao iumi savve lanem from datwan? Sapos eniwan long iumi letem olketa smol samting bilong evriday living—nomata normal samting tu—mekem iumi no garem inaf taem and strong for duim olketa spiritual waka wea God encouragem iumi for duim olsem first samting, iumi need for barava tingting strong abaotem diswan.—Romans 14:17.
12 Tingting tu abaotem taem bilong Lot. Taon bilong Sodom wea Lot and famili bilong hem stap, hem barava rich, bat hem barava fulap witim dirty fasin. Jehovah sendem olketa angel bilong hem for distroem datfala taon. Olketa angel talem Lot and famili bilong hem for mas ranawe from Sodom and no luk bak. From olketa kasem encouragement from olketa angel, olketa lusim datfala taon. Bat luk olsem waef bilong Lot tingim tumas haos bilong hem long Sodom. Hem no obey, hem luk bak, and hem dae. (Genesis 19:15-26) Jesus givim warning abaotem future bilong iumi, taem hem sei: “No forgetim waef bilong Lot.” Waswe, iumi duim samting followim datfala warning?—Luke 17:32.
13 Pipol wea followim olketa warning bilong God stap laef. Diswan hem tru for Noah and famili bilong hem and Lot and tufala dota bilong hem. (2 Peter 2:9) Taem iumi ting strong abaotem warning wea stap insaed olketa example hia, iumi hapi tu long gud nius wea stap insaed olketa warning hia for pipol wea lovem raeteous fasin. Diswan barava mekem iumi sure hao God bae fulfillim promis bilong hem for wanfala “niu skae and niu earth” wea “evriwan bae garem raeteous fasin.”—2 Peter 3:13.
‘Hour Bilong Judgment Hem Kam Finis’!
14, 15. (a) Wanem nao bae happen long datfala “hour” bilong judgment? (b) Hao nao iumi savve “fraet long God and givim glory long hem”?
14 Taem iumi gohed for lukaot, wanem nao bae happen? Buk bilong Revelation storyim olketa samting wea bae happen wea fulfillim plan bilong God. Hem important tumas for iumi duim samting wea datwan talem mekem iumi stap redi. Datfala profesi storyim olketa samting wea bae happen long “day bilong Lord,” wea hem start taem Christ kamap king long heven long 1914. (Revelation 1:10) Revelation storyim wanfala angel wea garem “gud nius for olowe for talemaot.” Hem singaot long laodfala voice: “Fraet long God and givim glory long hem, from hour bilong judgment bilong hem kam finis nao.” (Revelation 14:6, 7) Datfala “hour” bilong judgment hem shortfala taem; wea insaed diswan hem wei for talemaot and duim olketa judgment wea showaot klia long datfala profesi. Iumi stap long datfala taem.
15 Bifor datfala hour bilong judgment hem finis, iumi kasem encouragement for “fraet long God and givim glory long hem.” Wanem nao diswan minim? Stretfala wei for fraet long God shud mekem iumi no duim olketa nogud samting. (Proverbs 8:13) Sapos iumi honorim God, iumi bae lisin long hem witim bigfala respect. Iumi bae no busy tumas for duim olketa nara samting, mekem iumi savve readim Word bilong hem, Bible, evriday. Iumi bae no ting smol long kaonsel bilong hem for attendim olketa Christian meeting. (Hebrews 10:24, 25) Iumi bae tinghae long privilege for share witim strong for talemaot gud nius bilong Messiah Kingdom Bilong God. Iumi bae trustim Jehovah evritaem witim full heart. (Psalm 62:8) From iumi luksavve hao Jehovah hem Sovereign Bilong Universe, iumi honorim hem long wei wea iumi willing for stap anda long hem olsem wan wea garem right for rul ovarem iumi. Waswe, iu barava fraet long God and givim glory long hem long olketa wei olsem?
16. Why nao iu savve sei judgment againstim Bigfala Babylon wea Revelation 14:8 storyim, hem fulfill finis?
16 Mek-14 chapter bilong Revelation hem gohed storyim olketa nara samting wea bae happen long datfala hour bilong judgment. Firstaem hem storyim Bigfala Babylon, wea hem nao olketa false religion evriwea long world. Hem sei: “Narawan, mek-tu angel, hem kam bihaen and hem sei: ‘Hem foldaon finis! Bigfala Babylon hem foldaon finis!’” (Revelation 14:8) Tru nao, long tingting bilong God, Bigfala Babylon hem foldaon finis. Long 1919 olketa anointed servant bilong Jehovah kamap free from olketa teaching and kastom bilong Babylon, wea pipol and olketa nation followim for plande thousand year finis. (Revelation 17:1, 15) Start from datfala taem, olketa savve givim olketa seleva evribit for apim tru worship and waka for preachim gud nius abaotem Kingdom Bilong God hem gohed raonem full world.—Matthew 24:14.
17. Wanem nao iumi need for duim for go aot from Bigfala Babylon?
17 Bat judgment bilong Jehovah againstim Bigfala Babylon no finis long there. Klosap nao bae hem finis evribit. (Revelation 18:21) Iumi minim why Bible encouragem pipol evriwea olsem: “Go aot from hem [Bigfala Babylon] . . . sapos iufala no want for share witim hem long olketa sin bilong hem.” (Revelation 18:4, 5) Wanem nao iumi savve duim for go aot from Bigfala Babylon? Moa samting hem insaed long diswan winim wei for lusim false religion nomoa. Iumi lukim hao staka celebration and kastom distaem, and tu, wei wea world letem nomoa dirty fasin, apim kaen living and hapitaem wea join witim spiritism, and staka samting moa, olketa join witim religion bilong Babylon bifor. For gohed for lukaot, iumi mas showimaot iumi separate evribit from Bigfala Babylon, saed long wanem iumi duim and long wanem heart laekem.
18. Taem iumi tingim datfala warning wea stap long Revelation 14:9, 10, olketa Christian wea lukaot olketa careful for stap klia long wanem?
18 Long Revelation 14:9, 10, iumi lanem nara samting abaotem datfala “hour bilong judgment.” Nara angel hem sei: “Sapos eniwan worshipim datfala wild animal and image bilong hem, and kasem mark long forhed bilong hem or long hand bilong hem, hem tu bae drinkim wine bilong kros bilong God.” Why nao olsem? Datfala “wild animal and image bilong hem” piksarem rul bilong olketa man wea no acceptim sovereign rul bilong Jehovah. Olketa Christian wea lukaot, olketa careful for no letem tingting and samting olketa duim showimaot olketa garem datfala mark long wei for kamap slave bilong olketa wea no acceptim haefala sovereign rul bilong tru God, Jehovah. Olketa Christian savve hao Jehovah putim finis Kingdom bilong hem long heven wea bae smasem and finisim evri rul bilong olketa man, and datwan nao bae stap for olowe.—Daniel 2:44.
No Tingse End Hem Farawe Yet!
19, 20. (a) Taem iumi gogo for end bilong olketa last day, iumi savve sure Satan bae trae for duim wanem samting? (b) Iumi shud disaed strong for duim wanem?
19 Taem iumi gogo for end bilong olketa last day, olketa hevi and temptation bae kamap moa big. From iumi stap insaed disfala old world and safa from wei wea iumi no perfect, staka samting savve affectim iumi, olsem health wea kamap nogud, wei for olo, samwan wea iumi lovem hem dae, feel nogud, feeling for no hapi taem iumi preachim Word Bilong God from pipol no lisin, and plande samting moa. No forget hao Satan laekem tumas for mekius long olketa hevi wea iumi kasem for mekem iumi stop for preachim gud nius or for givap for live followim olketa standard bilong God. (Ephesians 6:11-13) Distaem hem no taem for iumi tingse end hem farawe yet!
20 Jesus savve hao iumi bae kasem bigfala hevi for givap, dastawe hem talem disfala kaonsel for iumi: “Gohed for lukaot, bikos iufala no savve wanem day nao Lord bilong iufala bae kam.” (Matthew 24:42) So, iumi mas evritaem luksavve hao iumi klosap long end. Keakea long olketa trik bilong Satan wea savve mekem iumi slow daon or givap. Iumi mas preachim gud nius bilong Kingdom Bilong God witim moa strong winim bifor and no givap. Iumi mas no lusim feeling for hariap taem iumi obeyim warning bilong Jesus for “gohed for lukaot.” Sapos iumi duim olsem, bae iumi honorim Jehovah and bae iumi garem hope for kasem olketa blessing bilong hem for olowe.
Hao Nao Bae Iu Ansa?
• Hao nao iumi savve datfala warning bilong Jesus for “gohed for lukaot” hem for olketa tru Christian?
• Wanem nao samfala example insaed Bible wea olsem warning wea savve helpem iumi “gohed for lukaot”?
• Wanem nao datfala hour bilong judgment, and iumi kasem encouragement for duim wanem samting bifor datfala taem hem finis?
[Piksa long page 23]
Jesus markem taem wea hem bae kam bak witim wei bilong man for steal
[Piksa long page 24]
Klosap nao Bigfala Babylon bae finis evribit
[Olketa Piksa long page 25]
Iumi mas disaed strong for preach witim moa strong winim bifor